Wednesday, February 28, 2024
- Advertisment -
- Advertisment -

የአሮጌው ዓመት ችግሮች ወደ አዲሱ ዓመት አይንከባለሉ!

2007 ዓ.ም. ተጠናቆ 2008 ዓ.ም. ሊጀመር ጥቂት ቀናት ቀርተዋል፡፡ አዲሱ ዓመት በአዲስ መንፈስ እንዲጀመር የአሮጌው ዓመት ችግሮች በፍፁም ወደሚቀጥለው ዓመት መንከባለል የለባቸውም፡፡ በዚህ በሚጠናቀቀው አሮጌ ዓመት እንደ አገር ሲያስቸግሩ የነበሩ ዋነኛ ችግሮች የመልካም አስተዳደር ጉድለት፣ ሙስናና ፀረ ዴሞክራሲያዊ ተግባራት ናቸው፡፡ እነዚህ በሕዝብ ላይ ከፍተኛ ችግር አስከትለው ብሔራዊ የመወያያ አጀንዳ የነበሩ ችግሮች ወደ አዲሱ ዓመት እንዲተላለፉ አያስፈልግም፡፡

የመልካም አስተዳደር ዕጦት ከእያንዳንዱ ዜጋ እስከ አገር የሚመሩ ግለሰቦች ድረስ በአገር ላይ አደጋ መደቀኑ በስፋት ተነግሯል፡፡ ብዙ ተብሎበታል፡፡ ዜጎች በገዛ አገራቸው ባይተዋርነት እንዲሰማቸው የሚያደርጉት የመንግሥታዊ አገልግሎቶች መስተጓጎል፣ የፍትሕ መዛባት፣ ግልጽነትና ተጠያቂነት አለመኖር፣ የሰብዓዊ መብቶች አለመከበር፣ የልማት ተጠቃሚ አለመሆን፣ ወዘተ በችግርነት ተጠቅሰዋል፡፡ አሁንም አሉ፡፡ እነዚህ ሕዝብንና አገርን የሚያስለቅሱ ተግባራት መቋጫ ሊደረግላቸው ይገባል፡፡

በመልካም አስተዳደር ዕጦት ምክንያት ዜጎች እየተማረሩ ለስደት ይዳረጋሉ፡፡ በስደት ምክንያት ደግሞ ብዙ ዜጎች ሕይወታቸውን አጥተዋል፡፡ በተለያዩ የአፍሪካ አገሮች በረሃዎችና በህንድ ውቅያኖስ በርካታ ዜጎች ለሕልፈት ተዳርገዋል፡፡ እጅግ በጣም ዘግናኝ የሆነው በአሸባሪው አይኤስ አረመኔያዊ ግድያ ተፈጽሞባቸው ሰማዕትነትን የተቀበሉ ዜጎች ጉዳይ መቼም ቢሆን የሚረሳ አይደለም፡፡ በዘር ጥላቻ ላይ የተመሠረተው የደቡብ አፍሪካ ጥቃትና ሳዑዲ ዓረቢያ በነበሩ ዜጎች ላይ የተፈጸመው መጠነ ሰፊ ማፈናቀልም እንዲሁ፡፡ ዜጎች በመልካም አስተዳደር ዕጦት ሲማረሩና ተስፋ ሲቆርጡ ራሳቸውን ለሕገወጥ ስደት ይዳርጋሉ፡፡ ስደት የሚቆመው እዚህም እዚያም በሚደረጉ አነስተኛ የይስሙላ ዘመቻዎች ሳይሆን፣ ወሳኝ በሆነ ተግባራዊ እንቅስቃሴ ነው፡፡ ለዚህም ነው መልካም አስተዳደር ይስፈን የሚባለው፡፡

መልካም አስተዳደር ሲሰፍን ብሔራዊ መግባባት ይዳብራል፡፡ የሕዝብ ተሳትፎ ይጨምራል፡፡ የሕግ የበላይነት ይሰፍናል፡፡ ውጤታማ የሆኑ አገራዊ ተግባራት ይከናወናሉ፡፡ ተጠያቂነት፣ ግልጽነትና ኃላፊነት ይኖራሉ፡፡ መንግሥት ለሕዝብ ጥያቄዎች አፋጣኝ ምላሽ ይሰጣል፡፡ ፍትሐዊ የሀብት ክፍፍል ይደረጋል፡፡ ይህ የአዲሱ ዘመን በረከት መሆን አለበት፡፡

ሌላው አደገኛ በሽታ ሙስና ነው፡፡ በአሁኑ ጊዜ ሙስና ያልደረሰበት ቦታ የለም፡፡ በመንግሥት መሥሪያ ቤቶች፣ በከፍተኛ ትምህርት ተቋማት፣ በየደረጃው ባሉ የአስተዳደር መዋቅሮችና በተለያዩ ሥፍራዎች ሙስና ገደብ የለሽ እየሆነ ነው፡፡ ግብር ከፋዩ ሕዝብ መብቱ ተጠብቆለት በሕጋዊ መንገድ መስተናገድ ሲገባው፣ በየደረሰበት ቦታ ሁሉ ጉቦ እየተጠየቀ ነው፡፡ በተለያዩ የንግድና የኢንቨስትመንት መስኮች የተሰማሩ የአገር ውስጥና የውጭ ባለሀብቶች ሕገወጥ ክፍያ ይጠየቃሉ፡፡ ያንን ካልፈጸሙ አይስተናገዱም፡፡ የኤሌክትሪክ ቆጣሪ ከሚፈልግ ግለሰብ እስከ ትራንስፎርመር ጠያቂው ድረስ ጉቦ ክፈል ይባላል፡፡ የግንባታና የዕድሳት ጥያቄ ያለ ጉቦ አይፈቀድም፡፡ በአገልጋይነት መንፈስ አገራቸውንና ሕዝባቸውን የሚያገለግሉ ንፁኃን ዜጎች ባሉበት አገር ውስጥ ጉቦ ካልተቀበሉ መስተንግዶ የማይሰጡ እየበዙ ናቸው፡፡ በሁሉም አገልግሎት መስጫ አካባቢዎች ሕገወጥ ደላሎችና አቀባባዮች ተሰማርተው ሙስናን በአገሪቱ ላይ እያነገሡ ነው፡፡ በርካታ ምሳሌዎችን መጥቀስ ይቻላል፡፡

ሙስና በመኖሪያ ቤቶች ግንባታ፣ በአገር ውስጥ ገቢና ጉምሩክ፣ በኤሌክትሪክ አገልግሎት፣ በውኃና ፍሳሽ፣ በመንገድና ትራንስፖርት፣ በንግድ ፈቃድና ምዝገባ፣ በብቃት ማረጋገጫ፣ በፈተናና ምዘና፣ በመሬት አቅርቦት፣ በዕቃዎች ግዥና ንብረት አስተዳደር፣ በመንግሥት ቤቶች፣ በተለያዩ መንግሥታዊ ትምህርት ተቋማት፣ በጤና ማዕከላት፣ ወዘተ ሙስና ተንሰራፍቷል፡፡ ለአገርና ለሕዝብ ፀረ የሆነው የሙስና ካንሰር አገሪቱን እየገዘገዘ ነው፡፡ ትውልዱንም እየበከለ ነው፡፡ ይኼንን አጥፊ ችግር ይዞ ወደ አዲሱ ዓመት መግባት ፈፅሞ አስፈላጊ ባለመሆኑ ተግባራዊ ዕርምጃ ያስፈልጋል፡፡

ፀረ ዴሞክራቲክ ከሆኑ ተግባራት መካከል ሐሳብን በነፃነት የመግለጽ መብትን መጋፋት በትልቁ ይጠቀሳል፡፡ የአገሪቱ ሕገ መንግሥት ዋስትና ከሰጣቸው መሠረታዊ መብቶች መካከል አንዱ የሆነው ይኼ ነፃነት ሊከበር ይገባል፡፡ ዜጎች ሰላማዊ በሆነ መንገድ የፈለጉትን መደገፍ፣ ያልፈለጉትን የመቃወም መብት እንዳላቸው መቀበል ተገቢ ነው፡፡ ይኼ መብት ሊከበር ባለመቻሉ ግን አገሪቱ በዓለም አቀፍ ደረጃ ሳይቀር እየተተችበት ነው፡፡ ዜጎች ያለምንም መሸማቀቅ ሐሳባቸውን እንዲገልጹ ሲደረግ ለአገራቸው ትልቅ አስተዋጽኦ ያበረክታሉ፡፡ የታፈነ ዜጋ ግን ለአመፅና ለብጥብጥ ራሱን ስለሚያዘጋጅ፣ በአገር ሰላምና መረጋጋት ላይ አደጋ ይደቅናል፡፡ ዜጎች ሰብዓዊና ዴሞክራሲያዊ መብቶቻቸው ሲከበሩ፣ የልማቱ እኩል ተጠቃሚ ሲሆኑ፣ የፈለጉትን ሲመርጡና የማይፈልጉትን ሲሽሩ፣ ወዘተ የአገር ባለቤትነት ስሜት ይኖራቸዋል፡፡

የሽብርተኝነት ምንጩ ሁሉንም ዜጋ በእኩልነት የማያሳትፍ ፀረ ዴሞክራሲያዊ ሥርዓት ነው፡፡ ዜጎች የልማቱና የዕድገቱ ተዋናይ ሲሆኑ፣ በዴሞክራሲያዊ ምርጫ በሙሉ ልብ ሲሳተፉ፣ ለሚያቀርቡት ጥያቄና አቤቱታ መልስ ሲያገኙ፣ በአገራዊ ወሳኝ ጉዳዮች ላይ በቀጥታም ሆነ በወኪሎቻቸው አማካይነት ሲመክሩ፣ በፖሊሲ ቀረፃዎች ላይ ድምፃቸው ሲሰማና በመሳሰሉት ዕውቅና ሲያገኙ አገር ሰላም ሆና ትበለፅጋለች፡፡ ሥልጣናቸውን በመመካት በማናለብኝነት እንደፈለጉ መሆን የሚፈልጉ ደግሞ አደብ ይገዛሉ፡፡ ሕዝብ በነፃነት ሲንቀሳቀስ የአገሩ ባለቤት መሆኑን ስለሚያረጋግጥ ለዕድገትና ለብልፅግና ይተጋል፡፡

በ2007 ዓ.ም. መጨረሻ አካባቢ ጠቅላላ ጉባዔውን ያካሄደው ገዥው ፓርቲ ኢሕአዴግ የመልካም አስተዳደር ጉድለቶችን ለመቅረፍ፣ ሙስናን ለማስወገድና ፀረ ዴሞክራቲክ አሠራሮችን ከሥራቸው ለመናድ ቃል ገብቷል፡፡ ቃል ከመግባቱም በተጨማሪ ለተግባራዊነቱ ቁርጠኝነቱን በተደጋጋሚ ገልጿል፡፡ እነዚህ ችግሮች ለራሱም ለአገሪቱም ጠንቅ መሆናቸውን ተንትኗል፡፡ በዚህም ትንተና መሠረት መጪው አዲስ ዓመት በአዲስ መንፈስ ትግል የሚጀምርበት መሆኑንም አብስሯል፡፡ ወደኋላ መመለስ እንደማይቻልም አስረድቷል፡፡ ቃሉና ተግባሩ ይገናኙ ዘንድ የበኩሉን ድርሻ ያለማሰለስ ይወጣ፡፡

የኢትዮጵያ ሕዝብ ለዓመታት ሲፈራረቁበት የነበሩትን እነዚህን የመከራ ቀንበሮች ለመፋለም ይትጋ፡፡ እያንዳንዱ ሰው ከገዛ ቤቱ ጀምሮ ለሥራውና ለአኗኗሩ የማይበጁትን እነዚህን ችግሮች ለማስወገድ የድርሻውን ሚና መጫወት አለበት፡፡ መልካም አስተዳደር በሌለበት ሰላም የለም፡፡ ሙስና በነገሠበት ዕድገት አይታሰብም፡፡ ፀረ ዴሞክራሲ አሠራሮች በሰፈኑበት ነፃነት የለም፡፡ ስለዚህ አሮጌው ዓመት ሲሸኝ እነዚህ ችግሮች ወደ አዲሱ ዓመት እንዲሸጋገሩ ዕድል አይሰጣቸው፡፡ የአሮጌው ዓመት ችግሮች ወደ አዲሱ ዓመት አይንከባለሉ!

በብዛት የተነበቡ ፅሁፎች

- Advertisment -

ትኩስ ፅሁፎች

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...

የጋራ ድላችን!

ከፒያሳ ወደ ቄራ ልንጓዝ ነው። ለበርካታ ደቂቃዎች ሠልፍ ይዘን...
spot_img

ተዛማጅ ፅሁፎች

ታላቁ የዓድዋ ድል ሲዘከር የጀግኖቹ የሞራል ልዕልና አይዘንጋ!

የታላቁ ዓድዋ ድል 128ኛ ዓመት ክብረ በዓል ሲዘከር፣ ለአገርና ለሕዝብ ክብር የሚመጥኑ ተግባራት ላይ ማተኮር ይገባል፡፡ በዓድዋ ከወራሪው ኮሎኒያሊስት ኃይል ጋር ተፋልመው ከትውልድ ወደ...

ሰብዓዊ ቀውሶችን ማስቆም ተቀዳሚ ተግባር ይሁን!

በቅርቡ ጠቅላይ ሚኒስትር ዓብይ አህመድ (ዶ/ር) ከአማራ ክልል የተለያዩ አካባቢዎች ተወክለው ከመጡ ሰዎች ጋር ያደረጉት ውይይት፣ በአማራ ክልልም ሆነ በሌሎች ሥፍራዎች የሚካሄዱ ግጭቶች ምን...

የበራሪው የኅብረተሰብአዊት ኢትዮጵያ ጀግና ጄኔራል ለገሠ ተፈራ ቅርሶችን የአዲስ አበባ ዩኒቨርሲቲ ተረከበ

በቀድሞው የኢትዮጵያ መንግሥት (1967-1983) ዘመን የኅብረተሰብአዊት ኢትዮጵያ ጀግና ሜዳይ የየካቲት 1966 1ኛ ደረጃ ኒሻን ተሸላሚ የነበሩ የአየር ኃይል ጀት አብራሪው የብርጋዴር ጄኔራል ለገሠ ተፈራ...