Thursday, February 9, 2023
- ማስታወቂያ -
- ማስታወቂያ -

የውጭ ምንዛሪ ፍላጐት ለማሟላት ዳግም የቦንድ ሽያጭ ሊደረግ ነው

- ማስታወቂያ -

ተዛማጅ ፅሁፎች

አገሪቱ በሁለተኛው የዕድገትና ትራንስፎርሜሽን ዕቅድ የሚያስፈልጋትን የውጭ ምንዛሪ ፍላጐት ለማሟላት በአውሮፓና በአሜሪካ ገበያዎች ዳግም የቦንድ ሽያጭ እንደምታቀርብ፣ የገንዘብና ኢኮኖሚ ልማት ሚኒስቴር አስታወቀ፡፡

የሚኒስቴሩ የሕዝብ ግንኙነት ኃላፊ አቶ ሐጂ ኢብሳን ጠቅሶ ሮይተርስ እንደዘገበው፣ በመስከረም ወር መጨረሻ አዲሱ የኢትዮጵያ መንግሥት ካቢኔ ከተመሠረተ በኋላ ቦንዱ ለውጭ ገበያ ይቀርባል፡፡

ጉዳዩን በተመለከተ ሪፖርተር ያነጋገራቸው አቶ ሐጂ ኢብሳ ኢትዮጵያ ወደ ቦንድ ሽያጭ ዳግም እንደምትገባ አረጋግጠዋል፡፡ ይሁን እንጂ መቼ ሽያጩ እንደሚከናወን፣ ምን ያህል የውጭ ምንዛሪ ማግኘት እንደሚፈለግ፣ እንዲሁም ለምን ዓይነት ፕሮጀክቶች እንደሆነ ገና አለመወሰኑን ገልጸዋል፡፡

በዚህ ወር መጨረሻ አካባቢ በአሜሪካ የፋይናንስ ለልማት ጉባዔ የሚካሄድ ሲሆን፣ ከፍተኛ መንግሥት ባለሥልጣናት ከስብሰባው ጐን ለጐን፣ ቦንዱን የመግዛት አቅም ካላቸው ኩባንያዎች ጋር ይመክራሉ ተብሎ ይጠበቃል፡፡

መንግሥት ከ2008 ዓ.ም. እስከ 2012 ዓ.ም. ተግባራዊ ለማድረግ ያቀደው ከ2.4 ትሪሊዮን ብር በላይ የሚፈጀው ሁለተኛው የዕድገትና ትራንስፎርሜሽን ዕቅድ ካስቀመጣቸው ግዙፍ መሠረተ ልማቶች መካከል፣ የተጀመሩትን የባቡርና የስኳር ፕሮጀክቶች መፈጸም፣ እንዲሁም ኢንዱስትሪዎችንና የኢኮኖሚ ዞኖችን ማስፋፋት እንደሚገኙበት በቅርቡ መዘገቡ ይታወሳል፡፡

የሁለተኛው ትራንስፎርሜሽን ዕቅድ በአጠቃላይ 119.5 ቢሊዮን ዶላር የውጭ ምንዛሪ እንደሚያስፈልገውም ረቂቅ ዕቅዱ ያስረዳል፡፡ ከዚህ በተጨማሪም የውጭ የማክሮ ኢኮኖሚ ተፅዕኖን የገመገመው ይኼው ረቂቅ ዕቅድ፣ አሜሪካ በሚቀጥሉት ሁለትና ሦስት ዓመታት ውስጥ የገንዘብ ፖሊሲዋን እንደምታጠብቅ ይተነብያል፡፡

በመሆኑም የዶላር ዋጋ እየጠነከረ እንደሚሄድና ይህም የብርን ዋጋ ከሌሎች የመገበያያ ገንዘቦች አንፃር ውድ እንደሚያደርገው ከግንዛቤ ያስገባል፡፡ ይህንን ሥጋት ለመቋቋም ይረዳ ዘንድ የአገሪቱን የውጭ ምንዛሪ ክምችት ከፍ ማድረግ የትኩረት አቅጣጫ መሆኑን ረቂቅ ዕቅዱ ይገልጻል፡፡

ከተቀመጡት ሥጋቶችና ፍላጐቶች አንፃር የቦንድ ሽያጩ በ2008 ዓ.ም. ውስጥ ይካሄዳል ብሎ መገመት ይቻላል፡፡

መንግሥት ባለፈው ዓመት ታኅሳስ ወር ለአውሮፓና ለአሜሪካ ገበያ ያቀረበው የአንድ ቢሊዮን ዶላር ቦንድ በሦስት ቀናት ውስጥ ከቀረበው መጠን በላይ የግዥ ፍላጐት አስመዝግቦ መጠናቀቁ ይታወሳል፡፡

በወቅቱ ቀርቦ የነበረው አንድ ቢሊዮን ዶላር ቢሆንም 2.64 ቢሊዮን ዶላር ገዥዎች ተመዝግበው እንደነበር በወቅቱ ተዘግቧል፡፡ በወቅቱ የተሸጠው የአንድ ቢሊዮን ዶላር ቦንድ 6.25 በመቶ ወለድ የሚከፈልበትና በአሥር ዓመታት ተከፍሎ የሚጠናቀቅ ነው፡፡

ይህ ገንዘብ በአሁኑ ወቅት በብሔራዊ ባንክ ውስጥ የሚገኝ ሲሆን፣ የኢንዱስትሪ ዞን ልማት ኮርፖሬሽን እየተበደረ የሚያንቀሳቀሰው እንደሆነ ተገልጿል፡፡    

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች