Friday, June 14, 2024
- ማስታወቂያ -
- ማስታወቂያ -

የሁለተኛው የሆቴል ፎረም ጥቁር እንግዶች

spot_img

ተዛማጅ ፅሁፎች

ዓምና በአዲስ አበባ ከመካሄዱ በፊት ለአምስት ዓመታት አስጠብቋል፡፡ በውጤቱም አዲስ አበባ ከ50ም፣ ከ30ም፣ ከ15 ዓመታትም በኋላ ያልገነባቻቸውን ዓለም አቀፍ ስም ያተረፉ ሆቴሎችን ለመገንባት የሚያስችል የአምስት ዓመት ጉዞ ጀምራበታለች፡፡

ከግማሽ ክፍለ ዘመን በፊት የመጀመሪያው ዓለም አቀፍ ስታንዳርድ ያለው ወይም ‹‹ብራንድ›› ሆቴል ወደ አዲስ አበባ የመጣው በንጉሠ ነገሥት ቀዳማዊ ኃይለ ሥላሴ ዘመን ነበር፡፡ ሒልተን አዲስ አበባ በመንግሥት ንብረትነት፣ በሒልተን ሆቴል ስምና አስተዳደር ሽርክና ሥራ ጀመረ፡፡ ነገር ግን የሒልተንን ፈለግ ለመከተል አምሳ ዓመት መጠበቅ ግድ የሆነበት ብራንድ ሆቴል ብቅ ያለው ሒልተን ከመጣ ከ30 ዓመት በኋላ ነበር፡፡ ሸራተን አዲስ፡፡ ከሸራተን በኋላ ሌላ 15 ያህል ዓመት መጠበቅ ግድ እንደነበር የዘርፉ ባለሙያዎች ይገልጻሉ፡፡ እርግጥ አገልግሎት ከጀመረ ወደ 18ኛ ዓመቱ እየተቃረበ ይገኛል፡፡

የውጭ ሆቴሎች ወደ አገር ውስጥ መምጣት ትልቅ ዜና በሰነበተበት ዓመት ከስድስት ያላሰኑ ዓለም አቀፍ ስታንዳርድ ያላቸው ሆቴሎች መምጣታቸው ይታወሳል፡፡ ይሁንና አብዛኞቹ ሆቴሎች ሥራ እንደሚጀምሩ የሚጠበቀው በአምስት ዓመት ጊዜ ውስጥ እንደሆነ የካሊብራ ሆስታሊቲ ኮንሰልታንሲ ኩባንያ ማኔጂንግ ዳይሬክተር አቶ ነዋይ ብርሃኑ ለሪፖተር ገልጸዋል፡፡ አቶ ነዋይ እንዳብራሩት፣ የእነዚህ ሆቴሎች የግንባታ ሒደት በአማካይ ከሦስት ዓመት ያላነሰ ጊዜ የሚፈጅ በመሆኑ ወደ ሥራ የሚገቡበት ጊዜም ወደኋላ ሊያዘገየው ችሏል፡፡ ሆኖም በሌሎች አገሮች የሚስተዋለው ግን ዓለም አቀፍ ብራንድ ያላቸው ሆቴሎች ግንባታ ከስድስት እስከ አንድ ዓመት ባለው ጊዜ ውስጥ ተጠናቆ ለሥራ ብቁ እንደሚያደርጋቸው ይገልጻሉ፡፡

የውጭ ሆቴሎች ኢትዮጵያ ውስጥ መበራከታቸው ቱሪስቶችን የሚመጥን አገልግሎት ከማቅረብ ባሻገር፣ ለአገሪቱ የውጭ ምንዛሪ በማስኘት የሥራ ዕድል በመፍጠር፣ የአገሪቱን የመስተንግዶና የእንግዳ አቀባበል ብቃት ከማሳደግ ባሻገር በሆቴልና በመስተንግዶ ሙያ መስክ ትልቅ አስተዋጽኦ እንደሚያደርጉ ያብራራሉ፡፡ ከአሥር ዓመት በላይ በሒልተን ሆቴል የካበተ የሥራ ልምድ መያዛቸው ዛሬ ላሉበት የሆቴልና መስተንግዶ ዘርፍ አማካሪነት እንደረዳቸው የሚናገሩት አቶ ነዋይ፣ በአገሪቱ የውጭ ብራንድ ሆቴሎች መበራከት የሥልጠና ዕድል በመስጠት ከታች እስከ ላይ ባለው የሥራ መስክ ላይ ለሚሰማሩ ባለሙያዎች ኢንዱስትሪው በዓለም ደረጃ የሚመራበትን የሥራ ባህል ጠንቅቀው በማወቅ በየትኛውም የዓለም ጥግ የሚሰጠውን የሆቴል አገልግሎት ለመስጠት እንደሚያስችል ያብራራሉ፡፡ 

ይህ በመሆኑም አንድ 150 ክፍሎች ያሉት ዓለም አቀፍ ብራንድ ሆቴል በአማካይ ለ300 ሰዎች የሥራ ዕድል የመፍጠር አቅም ያለው በመሆኑ፣ ከዚህም በተጨማሪ እያንዳንዱ ብራንድ ሆቴል ራሱን የቻለ የሥልጠና ክፍል አብሮ የሚከፍት በመሆኑ ለሠራተኞች ሙያዊ ክህሎትና ዕውቀት መሻሻል ትልቅ ድርሻ ይኖረዋል፡፡ እንደ አቶ ነዋይ ማብራሪያ ከዚህም በላይ በኢትዮጵያ እየተከፈቱ ያሉትን የውጭ ሆቴሎች በአንዛኛው በባለቤትነት የሚያስተዳድሩት የአገር ውስጥ ኢንቨስተሮች መሆናቸውም ትልቅ ጥቅም ያለው ነው፡፡ የጎረቤት አገሮችን ጨምሮ በበርካታ አገሮች ውስጥ ብራንድ ሆቴሎችን በባለቤትነትም ሆነ በሙያቸው የሚያስተዳድሩት የውጭ ዜጎች ናቸው፡፡ በኢትዮጵያ ግን ይህ ይለያል፡፡ በርካታ የሆቴል ሙያተኞች በኃላፊነት ቦታዎች ላይ ሆቴሎችን እያስተዳደሩ ሲሆን ሆቴሎቹን የሚመሠርቱትም የኢትዮጵያ ዜጎች መሆናቸው ከሆቴል ንግድ ሥራ የሚገኘውን ጥቅም እዚሁ አገር ውስጥ ለማስቀረት ትልቅ ሚና እንዳለው ያብራራሉ፡፡

የኢትዮጵያ ሆቴል ባለሙያዎችን በከፍተኛው የሆቴል አመራር ቦታ ላይ እንዲሰማሩ በማሰልጠን ረገድ ሒልተንና ሸራተን ትልቁን ድርሻ ይይዛሉ፡፡ በአሁኑ ወቅት በአገሪቱ ያሉትን ባለኮከብ ሆቴሎች የሚመሩት ኢትዮጵያውያን ባለሙያዎች በአብዛኛው የሒልተን ተቀጣሪ እንደነበሩ የሚገልጹት አቶ ነዋይ፣ እሳቸውና ካሊብራ የተሰኘውን አማካሪ ኩባንያ በአጋርነት አብረዋቸው የመሰረቱት አቶ ዮናስ ሞገስ በሒልተን በነበራቸው ቆይታ ውጭ አገር ድረስ ሔደው የሠለጠኑት ሒልተን ሆቴል በሚሰጠው የሥልጠና ዕድል መሆኑን ሳገልጹ አላለፉም፡፡

በአዲስ አበባ ከመቶ ዓመትም በፊት የሆቴል ንግድ ሥራ በእቴጌ ጣይቱ መጀመሩ ዕውቅ ነው፡፡ ንግሥት ጣይቱ ብጡል በስማቸው የሚጠራውን ጣይቱ ሆቴል ከፍተው ብሉልኝ ጠጡልኝን ካስተዋወቁ 120 ዓመታት ሊደፍኑ ተቃርበዋል፡፡ የአገሪቱ የሆቴል ኢንዱስትሪ እንዳጀመማመሩ ቢጓዝ ኑሮ ምናልባትም እስካሁን በርካታ የአገር ውስጥም የውጭም ትልልቅ ሆቴሎች በተበራከቱ ነበር የሚስያበለው ከላይ የጠቀስናቸው ሦስቱ ዓለም አቀፍ ስታንዳርድ ያላቸው ሆቴል አገልግሎት መስጠት የጀመሩት ጣይቱ ሆቴል ከተመሠረተ በኋላ በመሆኑ ነው፡፡  

ዘንድሮ አዲስ አበባ ለሁለተኛ ጊዜ የምታስተናግደው የአፍሪካ ሆቴል ኢንቨስትመንት ፎረም፣ እንዲህ ያሉ ዕድሎችን የሚፈጥሩ የውጭ ብራንድ ሆቴሎችን ለማምጣት የሚችሉ ቱባ የኢንዱስትሪው አድራጊና ፈጣሪዎች የሚታደሙበት ነው፡፡ ዓለም ላይ ያሉትን ትልልቅ ሆቴሎች የሚያስተዳደሩ ምክትል ፕሬዚዳንቶችና ዋና ሥራ አስፈጻሚዎች የሚወከሉበት ይህ ፎረም፣ ከመስቀል በዓል ማግሥት አንስቶ እስከመክፈቻ ሥነ ሥርዓቱ ጭምር ለሦስት ቀናት በሸራተን ሆቴል ይካሄዳል፡፡ ከውጭ የሚመጡትን ጨምሮ ከ500 በላይ ተሳታፊዎች እንደሚገኙበት ይጠበቃል፡፡ እስከመጪው ሳምንት መጀመሪያ ቀናትም ለአገር ውስጥ ተሳታፊዎች ምዝገባ ክፍት መሆኑን የፎረሙ አዘጋጆች ለሪፖርተር በላኩት መግለጫ አስታውቀዋል፡፡

ታዳሚዎች በክፍያ የሚታደሙበት ይህ ፎረም፣ ባለፈው ዓመትም ከ500 በላይ የአገር ውስጥና የውጭ ዕድምተኞችን አሳትፏል፡፡ ከሆቴል ኃላፊዎችና ባለሙያዎች ባሻገር፣ የግንባታ ተቋራጮች፣ አማካሪዎች፣ ፋይናንስ አቅራቢዎች እንዲሁም ከአፍሪካ የተውጣጡ ባለሥልጣኖች የሚገኙበት ፎረም፣ በአፍሪካ ሲካሄድ አምተኛ ዓመቱን አስቆጥሯል፡፡ ቤንች ኤቨንትስ በተባለው የእንግሊዝ ኩባንያ አማካይነት በዓለም ከሚካሄዱ የሆቴል ፎረሞች አንዱ በመሆን ወደ ምሥራቅ አፍሪካ እንዲመጣ መንስኤ የሆነው ካሊብራ ኩባንያ ከቤንች ኤቨንትስ ኃላፊዎች ጋር ከአምስት ዓመት በፊት በፈጠረው ግንኙነት የተነሳ መሆኑን አቶ ነዋይ ይገልጻሉ፡፡ በወቅቱ ቤንች ኤቨንትስ የመካከለኛው መሥራቅና የሰሜን አፍሪካ ሆቴሎች የሚሳተፉበትን ፎረም በማዘጋጀት ተወስኖ ቆይቷል፡፡ ይሁንና ኬንያ እ.ኤ.አ. በ2012ና በ2013 የተካሄደውን ከኢትዮጵያ በመንጠቅ ለማዘጋጀት መብቃቷም ይታወሳል፡፡ 

ቤንች ኤቨንትስ በሩስያ፣ በቱርክ፣ በጀርመን፣ በስፔን፣ በተባበሩት አረብ ኤንሬትስ እንዲሁም በእንግሊዝ በያመቱ በርካታ የሆቴልና የቱሪዝም፣ በሆቴልና ቱሪዝም እንዲሁም በሬስቶራንት መስኮች ላይ የሚደረጉ እንቅስቃሴቆችንና የኢንቨስትመንት ሥራዎችን የሚመለከቱ ስብሰባዎችን በማዘጋጀት የረጅም ጊዜ ተሞክሮ ያካበተ ነው፡፡

የሆቴል ኢንቨስትመንቱ መምጣት ትልልቆቹን የሆቴል ብራንዶች የሚመሩ ሰዎች ለማምጣት በማስቻሉ፣ ባለፈው ዓመት ጠቅላይ ሚኒስትር ኃይለማርያም ከእነዚህ ኃላፊዎች ጋር በዝግ መነጋገራቸው ይታወሳል፡፡ ከዚህ ባሻገር ከውጭ ብራንድ ሆቴሎች ጋር በመሆን ሀብታቸውን በሆቴል ንግድ ሥራ ላይ ያዋሉና ለማዋል ጥናት የጀመሩ ኢንቨስተሮች በአገሪቱ መፈታት አለባቸው ያሏቸውን ጥያቄችም ለባለሥልጣናት ማንሳታቸው ይታወሳል፡፡ ከጥያቄዎቹ መካከል የፋናንስ አቅርቦት ችግር፣ የመሬት ለማግኘት አለመቻል፣ የጉምሩክና የሎጂስቲክስ ችግሮች ገልተው ይጠቀሳሉ፡፡  እነዚህን ችግሮች በሚመለከት መንግሥት ለሆቴል ሥራ የሚቀርቡ ጥያቄዎችን በአፋጣኝ ለማስተናገድ ቃል መግባቱም ይታወሳል፡፡ በመሬት ጥያቄ በኩል መንግሥት እስከ አምስት ኮከብ ደረጃ ያላቸውን ሆቴሎች ለሚገነቡ ባለሀብቶች የተለየ ትኩረት በመስጠት እንደሚያስተናግድ ማስታወቁ ይታሳል፡፡ በፋይናንስ ረገድም ንግድ ባንክ ብድር እንዲያመቻች፣ የውጭ ፋይናንስ ለሚፈልጉም መንግሥት በብሔራዊ ባንክ በኩል ድጋፍ እንዲያገኙም ሲነገር ሰንብቷል፡፡

ከሊብራ ኩባንያ ከሆቴል ፕሮጀክት ጥንስስ ጀምሮ ዲዛይንኑን አካቶ እስከፍጻሜው ባለው ሒደት ከማማከር ባሻገር፣ የአዋጭነት ጥናቶችን፣ ድርድሮችን፣ የፋይናንስ ምንጮችን እስከማፈላለግና ተዛማጅ ሥራዎች ላይ እየተሳተፈ ሲሆን፣ እስካሁን ካፈራረማቸው ስድስት ያህል የውጭ ሆቴሎች ውስጥ ጎልደን ቱሊፕ ሥራ መጀመሩ ይታወቃል፡፡ የዊንድሃም ሆቴል ብራንድ የሆነው ራማዳ ሆቴልም በቅርብ ጊዜ ውስጥ ይከፈታሉ ተብለው ከሚጠበቁት ውስጥ ቀዳሚው ነው፡፡ ካፒታል ሆቴልን ጨምሮ 30 የአገር ውስጥና የውጭ ሆቴል ፕሮጀክቶችን እያማከረ እንደሚገኝም አቶ ነዋይ ገልጸዋል፡፡

የሦስቱ ብቸኞች ቅድመ ታሪክ

ስለሒልተን ካለፈው እስከ ዛሬ

የሆቴል መስተንግዶን ለዓለም ያስተዋወቀችው አሜሪካ፣ ሒልተንንም ወደ ዓለም ገበያ በማምጣትም ትጠቀሳለች፡፡ ከአንደኛው የዓለም ጦርነት ማክተም በኋላ፣ በዓመቱ የሒልተን መሥራች ኮንራድ ሒልተን የጠነሰሱት ሒልተን ሆቴል ሥራ የጀመረውን የመጀመሪያውን ሆቴል ሥራ ያስጀመረው ግን እ.ኤ.አ. በ1927 እንደነበር የሒልተን ታሪክ ይተርካል፡፡ ሒልተን ሆቴል የመጀመሪያውንና ዋኮ ሒልተን የሚል ሥያሜ የሰጠውን ሆቴል በአሜሪካ፣ ቴክሳስ ሲያስተዋውቅ የጀመረው ቀዝቃዛ ውኃና አየር ማቀዝቀዣ ብቻ የተገጠመላቸውን ክፍሎችን ለሕዝብ በማቅረብ ነበር፡፡ ዛሬ ላይ ሒልተን ሪዞርቶችን አካቶ 600 የሚጠጉ ሆቴሎችን በ78 አገሮች ውስጥ የሚያስተዳድር፣ በጋራ ባለቤትነት የሚመራ ወይም ደግሞ ሙሉ ለሙሉ በራሱ ንብረትነት የመሠረተው ሒልተን፣ በአሁኑ ወቅት የሚጠራበት ሥያሜ ሒልተን ሆቴልስ ኤንስ ስፓ ሲሆን እናት ኩባንያው ግን ሒልተን ወርልድዋይድ የሚባለው ነው፡፡ በአዲስ አበባ የተተከለው ሒልተን ሆቴል 650 ያህል መኪኖችን ማቆሚያ ቦታን ጨምሮ 372 ክፍሎች ያሉት ዓለም አቀፍ ሆቴል ነው፡፡ ከዚህ በተጨማሪም ባለ18 ጉድጓድ መለስተኛ የቴኒስ መጫወጫ ሜዳን ያካተተ ትልቅ ሆቴል ነው፡፡

ሸራተን ሆቴልና አዲስ አበባ

      ሸራተን አዲስ ተብሎ የተሰየመው ሸራተን ሆቴል 200 ሚሊዮን ዶላር መፍጀቱ ይነገርለታል፡፡ በአገሪቱ የዓለም አቀፍ ሆቴል ታሪክ ሁለተኛው ሆኖ የተመዘገበው ሸራተን፣ ምንም እንኳ የስታርውድስ ሆቴሎችና ሪዞርቶች ኩባንያ ብራንድ ቢሆንም፣ በኢትዮጵያ ሌግዠሪ ኮሌክሽን የተባለውን ስታንዳርድ በመጠቀም ከብራንድ ኩባንያው የተለየ ሆኖ ለመገኘት መቻሉ ብቻም ሳይሆን ከአምስት ኮከብነት በላይ ዴሉክስ የተባለውን የብራንድ ደረጃ እንደያዘ ሲነገርለት መቆየቱ አይዘነጋም፡፡ 293 ክፍሎች፣ ስድስት ሬስቶራንቶችና አራት ባሮችን ያካተተ ትልቅ ሆቴል ነው፡፡ በርካታ ስብሰባዎችንና አገር መሪዎችን በእንግድነት የሚያስተናግደውም ይሄው ሸራተን ነው፡፡ በትልውደ ኢትጵያዊው ባለሀብት ሼክ መሐመድ አል አላሙድን ንብረትነት የተመዘገበ ነው፡፡

      የሸራተን ሆቴሎችና ሪዞርቶች መሥራቾች የሆኑት ኧርነስት ሔንደርሰንና ሮበርት ሙር የተባሉ አሜሪካውያን የመሠረቱት ሲሆን የስታርውድስ ሆቴሎችና ሪዞርቶች ዓለም አቀፍ ብራድ መሆኑም የሚታወቅ ነው፡፡ እ.ኤ.አ. በ1937 በማሳቹሴትስ የተመሠረተው ሸራተን፣ በመላው ዓለም ከ400 በላይ ሆቴሎችን እያስተዳደረ ይገኛል፡፡

203 ክፍሎችን ይዞ ወደ ሥራ የገባው ራዲሰን ብሉ ሆቴል፣ ግማሽ ቢሊዮን ብር ወይም በአሁኑ ምንዛሪ 250 ሚሊዮን ዶላር ገደማ ወጪ የተደረገበት የራዲዞር ሆቴሎች ግሩፕ እህት ኩባንያ ሲሆን ባለቤቱም የውጭ ዜጋ ናቸው፡፡ ራዲዞር ሆቴሎች ግሩፕም እንደቀደምቱ ሁለት ሆቴሎች የተቋቋመው ከእኛው ጣይቱ ሆቴል ዘግይቶ ነው፡፡ እ.ኤ.አ. በ1938 ኩርቲስ ካርልሰን በተባሉ አሜሪካዊ ሲመሠረት፣ የካርልሰን ኩባንያዎች በሚል ሥያሜ ከመቶ ኩባንያዊች ያላነሱ የንግድ ተቋማትን በሚያስተዳድረው ግዙፍ ኩባንያ ሥር እንደሆነም ታሪክ ይዘክረዋል፡፡   

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች