Sunday, January 29, 2023
- ማስታወቂያ -
- ማስታወቂያ -

በየመን ግጭት የትምባሆ ሞኖፖል አክሲዮን ሽያጭ ተጨናገፈ

- ማስታወቂያ -

ተዛማጅ ፅሁፎች

በየመን በተፈጠረው ግጭት ምክንያት ሼባ ኢንቨስትመንት የብሔራዊ ትምባሆ ድርጅት ከፍተኛ አክሲዮን ባለቤት መሆን የሚያስችለው ዕድል ተጨናገፈ፡፡

የፕራይቬታይዜሽንና የመንግሥት የልማት ድርጅቶች ተቆጣጣሪ ኤጀንሲ በየመን የተፈጠረውን ግጭት ታሳቢ በማድረግ፣ ለሼባ ኢንቨስትመንት ኩባንያ የክፍያ መፈጸሚያ ጊዜ ላይ ማራዘሚያ አድርጐ ነበር፡፡

ነገር ግን ግጭቱ መቋጫ ሳያገኝ በመቀጠሉና ሼባ ኢንቨስትመንት ኩባንያ ከአገሩ ውጭ ካሉ የፋይናንስ ተቋማት ገንዘብ ለማግኘት ያደረገው ሙከራ ባለመሳካቱ፣ በኢትዮጵያ ትምባሆ ንግድና ኢንቨስትመንት የአንበሳውን ድርሻ መያዝ የሚያስችለው ዕድል መክኗል፡፡

በዚህ ምክንያት መስከረም 10 ቀን 2008 ዓ.ም. የፕራይቬታይዜሽንና የመንግሥት የልማት ድርጅቶች ተቆጣጣሪ ኤጀንሲ የግብይቱን ሒደት መሰረዙ ታውቋል፡፡

የኤጀንሲው ኮሙዩኒኬሽን ጉዳዮች ኃላፊ አቶ ወንዳፍራሽ አሰፋ ለሪፖርተር እንደገለጹት፣ ሼባ ኢንቨስትመንት ክፍያ መፈጸም ባለመቻሉ የአክሲዮን ሽያጩ አልተሳካም፡፡

የየመኑ ኩባንያ ሼባ ኢንቨስትመንት በ1991 ዓ.ም. በብሔራዊ ትምባሆ አክሲዮን ማኅበር 22 በመቶ ድርሻ ይዟል፡፡

የፕራይቬታይዜሽን ኤጀንሲ ባለው አሠራር በመንግሥት የልማት ድርጅቶች ላይ አክሲዮን ያለው ኩባንያ የመንግሥት ድርሻ መግዛት ከፈለገ ቅድሚያ ዕድል የሚሰጥ በመሆኑ፣ ሼባ ኢንቨስትመንት በትምባሆ ድርጅት ላይ ያለውን የአክሲዮን ድርሻውን ወደ 60 በመቶ ለማሳደግ ጥያቄ አቅርቦ ተፈቅዶለት ነበር፡፡

ይህንን አክሲዮን መያዝ የሚችለው በሁለት ጊዜ ክፍያ ሲሆን፣ የመጀመሪያው 35 በመቶ ቀጣዩ ደግሞ 65 በመቶ ነው፡፡ ሼባ የመጀመሪያውን ክፍያ ፈጽሟል፡፡ ይህ ክፍያ አክሲዮኑን ከ22 በመቶ ወደ 33 በመቶ አድርሶለታል፡፡

ሁለተኛውን ክፍያ 65 በመቶ መክፈል ባለመቻሉ ግን አክሲዮኑን ወደ 60 በመቶ ማሳደግ ሳይቻል ቀርቷል፡፡ በዚህ መሠረት ሼባ ኢንቨስትመንት 33 በመቶ፣ መንግሥት 67 በመቶ ድርሻ ይዘው ይቀጥላሉ፡፡

ከተመሠረተ ሰባ ዓመታት ያስቆጠረውና በኢትዮጵያ በትምባሆ ላይ ብቸኛ የሞኖፖል መብት ያለው ብሔራዊ ትምባሆ ድርጅት፣ ትርፋማ ከሚባሉ የመንግሥት የልማት ድርጅቶች መካከል ተጠቃሽ ነው፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች