Thursday, June 13, 2024
- ማስታወቂያ -
- ማስታወቂያ -

ንግድ ባንክ የሳይበር ወንጀሎችን የሚከላከል ቴክኖሎጂ ተግባራዊ ሊያደርግ ነው

spot_img

ተዛማጅ ፅሁፎች

የኢትዮጵያ ንግድ ባንክ እያካሄዳቸው ከሚገኙ በርካታ ቴክኖሎጂ ነክ ፕሮጀክቶች መካከል ሰሞኑን ይፋ የተደረገውና የደንበኞችን መረጃ ከሥርቆትና ከማጭበርበር ለመከላከል ይረዳሉ የተባሉትን ቴክኖሎጂዎች ለመተግበር ያደረገው ስምምነት ይጠቀሳል፡፡ ቴክኖሎጂዎቹ ኔት ጋርድስ እንዲሁም ቲምሜት የሚል ስያሜ ያላቸው ሲሆኑ፣ ዋናው ተግባራቸውም የደንበኞችን መረጃዎች በኢንተርኔት አማካይነት ከሚካሄዱ የወንጀል ተግባራት መከላከል እንደሆነ ባንኩ ይፋ ያደረገው መረጃ ይጠቁማል፡፡

በባንኩ የኮርፖሬት ኮሙዩኒኬሽን ኃላፊ አቶ ኤፍሬም መኩሪያ ስለ ቴክኖሎጂውው ተጠይቀው እንዳብራሩት፣ የደንበኞችን መረጃዎችን በሳይበር ከሚፈጸሙ ወንጀሎች በማንኛው ጊዜ ሊከላከሉ የሚችሉ፣ ኦዲት በማድረግ የማጭበርበር ሙከራዎችን ከትክክለኛ የባንክ ልውውጦች የሚለዩና ያለማቋረጥ ከየትኛውም የባንኩ ቅርንጫፎች የሚደረጉ የፋይናንስ እንቅስቃሴ መረጃዎችን የሚተነትኑ ቴክኖሎጂዎች ናቸው፡፡

ምንም እንኳ ባንኩ ከሚያካሂዳቸው ሌሎች ትልልቅ ፕሮጀክቶች አኳያ አነስተኛ ግምት የሚሰጠው ፕሮጀክት ቢሆንም፣ የሳይበር ወንጀልን በመከላከሉ ተግባር ግን ለባንኩ ወሳኝ ሥራ መሆኑን አቶ ኤፍሬም ጠቅሰዋል፡፡ ሶፍጄን የተባለውና የባንክ ቴክኖሎጂዎች ላይ በአማካሪነት የተሰማራው ኩባንያ የሚተገብረው ይህ ቴክኖሎጂ በአጭር ጊዜ ውስጥ ተግባራዊ ሲደረግ የትኛውንም የባንኩን የፋይናንስ እንቅስቃሴዎች ይከታተላሉ የተባሉት እነዚህ ቴክኖሎጂዎች ጥርጣሬ ላይ የሚጥሉ ግብይቶች ሲፈጸሙም ወዲያውኑ የሚያሳውቁ በመሆናቸው ባንኩ በሚሰጣቸው አገልግሎቶች ላይ መተማመን እንደሚያሰፍኑለት አስታውቋል፡፡

ከዚህ ቀደም ማሂንድራ በተባለው የህንድ የቴክኖሎጂ ግሩፕ አማካነት የ4.9 ሚሊዮን ዶላር ‹‹ኮርፖሬት ኢንተርፕራይዝ ፕላኒንግ›› የተባለና በባንኩ የአስተዳደር ሥራዎች ላይ የሚያጠነጥን ቴክኖሎጂ በአንድ ዓመት ውስጥ ለመተግበር ስምምነት መፈጸሙ ይታወሳል፡፡ የኦራክል ሥሪት የሆነው ይህ ቴክኖሎጂ፣ ከአንድ ሺሕ በላይ ቅርንጫፎችና ከአሥር ሚሊዮን በላይ ደንበኞች ላሉት ግዙፍ መንግሥታዊው ተቋም ወሳኝ መሆኑን የባንኩ ኃላፊዎች ይስማማሉ፡፡ በፍጥነት እየተስፋፋ የሚገኘው ንግድ ባንክ በአሁኑ ወቅት ወደ 300 ቢሊዮን ብር የሚጠጋ ሀብት ያካበተ ሲሆን፣ በአምስት ዓመት ውስጥ ጠቅላላ የቅርንጫፎቹን ብዛት ከ1,500 በላይ ለማድረስ ያቀደ የፋይናንስ ተቋም ነው፡፡  

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች