Monday, October 3, 2022
ሌሎች ዓምዶች
    - Advertisement -
    - Advertisement -
    ዜናሁለተኛው የትራንስፎርሜሽን ዕቅድ ከአገር ውስጥ የፋይናንስ ተቋማት ከ1.6 ትሪሊዮን ብር በላይ ይፈልጋል

    ሁለተኛው የትራንስፎርሜሽን ዕቅድ ከአገር ውስጥ የፋይናንስ ተቋማት ከ1.6 ትሪሊዮን ብር በላይ ይፈልጋል

    ቀን:

    – የሚኒስትሮች ምክር ቤት ሁለተኛውን የአምስት ዓመት ዕቅድ በዚህ ሳምንት ያፀድቃል

    በሁለተኛው የዕድገትና ትራንስፎርሜሽን ዕቅድ ከአገር ውስጥ የፋይናንስ ተቋማት 1.68 ትሪሊዮን ብር እንደሚጠበቅ መረጃዎች አመለከቱ፡፡

    የፊታችን ዓርብ የሚኒስትሮች ምክር ቤት ተወያይቶ ያፀድቀዋል ተብሎ በሚጠበቀው ሁለተኛው የዕድገትና ትራንስፎርሜሽን ዕቅድ ውስጥ የተካተተው የብሔራዊ ባንክና የገንዘብና ኢኮኖሚ ልማት ሚኒስቴር የፋይናንስ ዘርፍ የዳሰሳ ጥናት ነው፣ ከአገር ውስጥ የፋይናንስ ተቋማት ለዕቅዱ ትግበራ ይገኛል ተብሎ የተገመተውን 1.68 ትሪሊዮን ብር ያመለከተው፡፡

    መንግሥት ለሁለተኛው ዕድገትና ትራንስፎርሜሽን ዕቅድ ከራሱ በጀት ከ2.4 ትሪሊዮን ብር በላይ የሚያወጣ መሆኑን መዘገባችን ይታወሳል፡፡ በዚህ ሳምንት በሚኒስትሮች ምክር ቤት ለውይይት ይቀርባል ተብሎ የሚጠበቀው ይህ የአምስት ዓመት ዕቅድ፣ ከበጀት ውጪ የሆነ ጠቅላላ የአገር ውስጥ ገንዘብ ምን ያህል ሊሆን እንደሚችል ይተነትናል፡፡

    በቀጣዮቹ አምስት ዓመታት ከአገር ውስጥ ባንኮችና የፋይናንስ ተቋማት ቁጠባ፣ ከቦንድና ኮንትራታዊ ቁጠባ ምንጮች በአጠቃላይ 1.9 ትሪሊዮን ብር ሊሰበሰብ እንደሚችል ጥናቱ ይተነብያል፡፡ ከዚህ ውስጥ ባንኮችና አነስተኛ የገንዘብ ተቋማት በቁጠባና ብድር ተመላሽ 1.8 ትሪሊዮን ብር እንደሚሰበስቡ፣ ይህም በአጠቃላይ ከሚሰበስበው ገንዘብ 93.7 በመቶ ድርሻ እንደሚኖረው ይተነብያል፡፡

    ከዚህ ውስጥ 1.68 ትሪሊዮን ብር ለአጠቃላይ የኢኮኖሚ ዘርፎች በቀጣይ አምስት ዓመታት በብድር እንደሚቀርብ ውጥን ተይዟል፡፡

    ይኼው ዕቅድ አጠቃላይ የብድር መጠኑን በተቋማዊ ባለቤትነት ጭምር የደለደለ ሲሆን፣ 1.04 ትሪሊዮን ብር የግሉን ዘርፍ የኢንቨስትመንት ፍላጐት ለማሟላት እንደሚውል ጥናቱ ይጠቁማል፡፡ የተቀረው 640 ቢሊዮን ብር ደግሞ በመንግሥት የሚካሄዱ የኢንቨስትመንት ፕሮጀክቶችን ወጪ ለመሸፈን እንደሚውል ያስረዳል፡፡

    ከአጠቃላይ ብድር ውስጥ የኢንዱስትሪ ዘርፍ አንድ ትሪሊዮን ብር ያገኛል ተብሎ የተተነበየ ሲሆን፣ ከዚህ ውስጥ 502.8 ቢሊዮን ብር ለማኑፋክቸሪንግ ዘርፍ እንደሚመደብ ይገልጻል፡፡

    የተጠቀሰው 1.68 ቢሊዮን ብር ከአገር ውስጥ የፋይናንስ ተቋማት እንደሚገኝ ታሳቢ የተደረገው፣ በአሁኑ ወቅት ያለው የተቋማቱ ቅርንጫፎችና ደንበኞች በእጥፍ ይጨምራል ከሚል መነሻ ነው፡፡

    የባንኮች ቁጠባ በየዓመቱ በአማካይ 30 በመቶ እንደሚጨምርና በ2007 ዓ.ም. መጨረሻ ላይ የነበሩት 2,322 የባንኮች ቅርንጫፎች፣ 4,671 ይደርሳሉ የሚል ትንበያን መነሻ በማድረግ መሆኑን ሰነዱ ያስረዳል፡፡

    የኢትዮጵያ ንግድ ባንክ በዋናነት መንግሥት ለመሠረተ ልማት የሚፈልገውን የኢንቨስትመንት ብድርና ለኢንዱስትሪ ዘርፍ የሚፈለገውን የሥራ ማስኬጃ ብድር እንደሚያቀርብ ታቅዷል፡፡

    ለግብርናና ለኢንዱስትሪ ዘርፎች የሚውለውን የረጅምና የመካከለኛ ጊዜ ብድር በዋናነት የኢትዮጵያ ልማት ባንክ እንደሚያቀርብ ያስረዳል፡፡ ለአገልግሎት ዘርፍ የሚፈለገውን ብድር የግል ባንኮችና የኢትዮጵያ ንግድ ባንክ እንደሚያቀርቡ በዕቅድ ተይዟል፡፡ ዕቅዱ በዚህ ሳምንት መጨረሻ በሚኒስትሮች ምክር ቤት ከፀደቀ በኋላ ለፓርላማ ይመራል ተብሎ ይጠበቃል፡፡  

    - Advertisement -

    ይመዝገቡ

    spot_img
    spot_img