Tuesday, November 29, 2022
ሌሎች ዓምዶች
    - Advertisement -
    - Advertisement -
    - Advertisement -

    ፌርማታ ፅሁፎች

    የሰንደቅ ዓላማው ጨረር የሚፈነጥቀው ወዴት ነው?

    ትኩስ ፅሁፎች

    የኢትዮጵያ ሰንደቅ ዓላማ ቀን ለስምንተኛ ጊዜ ጥቅምት 8 ቀን 2008 ዓ.ም. በመላ አገሪቱ ተከብሮ ውሏል፡፡ በየዓመቱ እንደሚደረገው ሁሉ ስለሰንደቅ ዓላማውና ስለ አርማው ግንዛቤ ማስጨበጫ መድረኮች ተዘጋጅተው ሲተላለፉ ሰንብተዋል፡፡ ትክክልና ትክክል ያልሆነው ተለይቶ ሲወሳም ቆይቷል፡፡ በሕግም እንደሚያስጠይቅ ተደንግጓል፡፡ ይሁን እንጂ ብዙ ቢባልም አሁንም ክፍተት መታየቱ አልቀረም፡፡ በከተማዪቱ በአዲስ አበባ ከተሠራጩትና ከተሰቀሉት ባንዲራዎች የአንዳንዶቹ የጨረር አፈነጣጠቅ ወደ ውጪ መሆኑ ቀርቶ ወደ ውስጥ ሆኗል፡፡

     በድንጋጌው መሠረትም ሰንደቅ ዓላማው ከላይ አረንጓዴ፣ ከመሃል ቢጫ፣ ከታች ቀይ ሆኖ በክብ ሰማያዊ መደብ ላይ የተቀረፀ ብሔራዊ ዓርማ ይኖረዋል፡፡ ዓርማው በሰንደቅ ዓላማው መሃከል ላይ የሚያርፈው የክቡ ዙርያ የአረንጓዴውንና የቀዩን ቀለማት ቁመት አጋማሽ አካሎ ይሆናል ቢልም የተፈጸመው በተቃራኒው ነው፡፡ ለዚህ ማሳያ በአራት ኪሎ በሚገኝ አንድ መንግሥታዊ ድርጅት አጥር ላይ የተሰቀለው ይጠቀሳል፡፡ በሰንደቅ ዓላማና አርማ ዓዋጅ ላይ እንደተመለከተው፣ የሰንደቅ ዓላማው አርማ ክብ ቅርፅና ሰማያዊ መደብ ያለው ሲሆን፣ ቀጥታና እኩል ከሆኑ መስመሮች የተዋቀረው ኮከብ በጉልህ ይታያል። ከየአቅጣጫው መጥተው የሚገናኙ ቀጥታና እኩል የሆኑ ቢጫ መስመሮችም አሉት። በእነዚህ ቀጥታና እኩል መስመሮች መጋጠሚያ ላይ የሚፈነጥቅ ቢጫ ጨረር እንደሚታይ በግልጽ ተመልክቷል። በቴሌቪዥን መግለጫ ከሚሰጡ ሹማምንት በአንዳንዶችም ይኸው የጨረር ፍንጠቃው በተቃራኒው ሆኖ የታየበትም አጋጣሚ አልጠፋም፡፡

    ****************

    ማራኪ ስንኞች

    ብዙ ሺህ ዘመናት
    እልፍ ኣእላፍ ሌሊት
    ሚሊዮን መሰለኝ
    ፍቅሬ ኣንችን ስወደሽ ቀኑ ረዘመብኝ፡፡…
    (ገብረ ክርስቶስ ደስታ – “እኔ እወድሻለሁ”)

    *****
    …ማምለኬ ጣዖት ነህ ቢሉኝ ምን ተዳየ
    ገሃነም ወራጅ ነህ ቢሉኝ ምን ተዳየ
    ቀናኢ አምላክ ቢኖር እኔ ምን ተዳየ
    አመልክሻለሁኝ እሱንም አግልየ፡፡
    (ዮሐንስ አድማሱ – “ከወዴት ዘረፍሽው”)

    *****
    ወድሻለሁ ማለት አይጠቅም፤ አይበቃ፤
    ፍቅሬነሽ ማለትም አይጠቅም፤ አይበቃ፤
    ነፍሴነሽ ማለትም ልቤን አያደርሰው፤
    የፍቅራችን ነገር ዝምነው፤ ዝምነው፡፡

    (መንግስቱ ለማ)

          *****
     “አልወድሽም ያልኩሽ፣ ውሸቴ ውሸቴ”
    “ሳይሽ ብንን፣ ብንን ይላል አከላቴ”
    ሳጣሽ እርር ኩርምት፣ ይላል ሆዴ አንጀቴ፣…
    ወይ አጉል እርግማን፣ ወይ ከንቱ መገደር
    ያንጀቴን ቀብሬ፣ ያፌን ብቻ ነበር፡፡
    (ሎሬት ጸጋዬ ገብረ መድኅን – “መውደድ አባ ፀፀት”)

    • የሰላም ገጽ

     

    ************

    ጎጆ በአየር ላይ

    ቢጡ፡ አባዬ ላገባ ነው

    አባት፡ ልጁ ማነው? አውቀዋለሁ?

    ቢጡ፡ አታውቀውም facbook ላይ ነው የተዋወቅኩት አንድ ዓመት ሙሉ በmessenger ቻት ካረግን በኋላ ለፍቅር ጠየቀኝ፡፡ እኔም ከሱ ይምጣ ብዬ እንጂ ወድጄው ስለነበር እሺ አልኩት፡፡ ከዛ ፍቅረኞች ከሆንን በኋላ ሁለት ዓመት ያህል በtango እና በskype አወራን፡፡ ባለፈው ዓመት እንጋባ ብሎኝ ቆይ ላስብበት ብዬው እስካሁን በviber እና በwhatsap እያወራን ነው አንዳንዴም በline ይደውልልኛል ኔትወርክ ያላስቸገረን ቀን በimoም እንጠቀማለን፡፡ አሁን ያንተ ፈቃድ ቢሆንና ብንጋባ ደስ ይለኛል!

    አባት፡ ጥሩ እንደዛ ከሆነ ጋብቻችሁን twiter ላይ ታደርጉትና መልሳችሁን ደሞ instagram ላይ ቢሆን መልካም ነው፡፡ ለሚዜዎች እንዳትጨነቂ 1ኛ ሚዜ gmail 2ኛ ሚዜ hot mail 3ኛ ሚዜ yahoo ይሆኑሻል፡፡ hyoutube ላይ አሪፍ ባንድ እንይዝና ሰፋ ያለ አዳራሽ hgoogle እንከራያለን፡፡ kkkk

    • ከድረ ገጽ

    ************

    ብልጭታና መብረቅ

    የነጎድጓዳማ ዝናብ መንፈስ በጉ ስለጠፋበት ፍለጋ በወጣ ጊዜ እጅግ በጣም እየዘነበ በጉን በፍለጋ ላይ ሳለ የነጎድጓዱ መንፈስ ከአንዲት እንሽላሊት ዘንድ ይደርስና የጠፋበትን በግ አይታ እንደሆነ ጠየቃት፡፡

    እርሷም “አይ! አላየሁትም፡፡ በዝናቡ ምክንያት በጣም በርዶኝ ስለነበረ ፀሃይ እየሞኩ ነበር፡፡” ብላ መለሰችለት፡፡

    እርሱም “ታዲያ ምን ትመክሪኛለሽ? የጠፋብኝንስ በግ እንዴት ላገኘው እችላለሁ? ማንስ ይሆን የሰረቀው?” ብሎ ጠየቃት፡፡ እንሽላሊቷም “ግንደ ቆርቁር ጋ ሄደህ እርሷ የምታውቀውን ትነግርሃለች፡፡” አለችው፡፡

    ነጎድጓዱም ወደ ግንደ ቆርቁር ሄዶ “በጌ ጠፍቶብኛልና አይተሽዋል?” ብሎ ጠየቃት፡፡

    ግንደ ቆርቁሯም “እኔ የተለመደ ሥራዬን እየሠራሁ፣ እየቆረቆርኩ ነበርና በግህን አላየሁትም፡፡” አለችው፡፡

    እርሱም “እናስ ታዲያ የጠፋብኝን በግ እንዴት ላገኘው እችላለሁ?” አላት።

    እርሷም “እስኪ ወደ እስስት ዘንድ ሂድ ። ሌሎች እንስሳትን ባየ ጊዜ የሚደበቀው አንዳች ክፉ ነገር ቢሠራ ነው። በፀፀት ምክንያት፡፡” አለችው፡፡

    ነጎድጓዱም “በርግጥ የተደበቀበት ምክንያት ገብቶኛል፤ በጌን ሠርቆት ወይም መርዞት መሆን አለበት፡፡” ብሎ አሰበ፡፡

    ይህንንም ካለ በኋላ ወደ እስስት ዘንድ በማምራት እስስቱ ዘንድ እንደደረሰ “በል ና ውጣ ፣አንተ እስስት!” ብሎ ቢጣራም እስስቱ ከአንድ ዛፍ ስር ተደበቀ፡፡

    ነጎድጓዱም እስስቱን ፍለጋ ከዛፉ ጀርባ ቢዞርም እስስቱ ግን ጫካው ውስጥ ገብቶ ተደበቀ፡፡

    ሆኖም በመጨረሻ ነጎድጓዱም እስስቱን አግኝቶ “በጌን የሰረቅኸው አንተ ነሃ! በልተኸው ወይም መርዘኸው ይሆናል፡፡” ብሎ ነጎድጓዱ እስስቱን ሰነጣጠቀው፡፡

    አስከዛሬም ድረስ ነጎድጓዳማ መብረቅ በመጣ ጊዜ በሽማሌዎች ዘንድ “ወደ ውጪ ወጥታችሁ ዛፍ ስር አትቁሙ፤ ምክንያቱም መብረቁ በጉን የሰረቀበትን እስስት እየፈለገ ነው፡፡” የሚል ብሂል አለ፡፡

    የዚህም ተረት መልዕክት ክፉ ነገሮችን ሠርተው እንደሚደበቁ ሰዎች አትሁኑ የሚል ነው፡፡

    • በአዬሻ ቱሽክሎ የተተረከ የኦሞ ተረት

    ****************

    ሀይ ሀይ አለ የፒያሳ ልጅ

    ሀይ ብያለሁ ፤ ከፈለጋችሁም ነመስቴ!!

    እነሆ ከጠፋንበት ብቅ ብለናል፤ እያለን የሌለን ያህል ያጠፋንን ‹እንጀራ› ይሉት ነገር ለማሸነፍ በምናደርገው ግብግብ አንዴ ሲዘርረን አንዴ ሲነርተን ይኸው እየተንገዛገዝን አለን፤ እናንተስ እንዴት ናችሁ፤

    መቼም እዚያው ‹‹ጣና ዳር››ህ ይበጅህ ነበር አላችሁኝ አሉ፤ እኔም ይበጀኝ ነበር ብዬ ልለፈው፤ ጣና ዳር የተፈጥሮ ፍቅር እንጅ የ‹ህይወት ልክፍት› መስከንተሪያ የለማ!
    ዓባይ ዳር ነፃ ቁዘማና ነፃ ሀሳብ እንጅ ነፃ እንጀራ አጣኋ! ባህር ዳር የሰው ፍቅር እንጅ የሥራ ፍቅር ያንሳላ!!

    እናላችሁ ጣና ዳር ቁጭ ብሎ ፤ ዓባይ ዳር ቁጢጥ ብሎ ወይ ደግሞ በዘንባባዎቹ ሰርጥ መሹለክለክ እያማረኝ ግን ደግሞ ከጣፊና ለጣፊ ጋር ከሚዲያ ወዳጆች ጋር እንደ ልብ መገናኘት ያለ ሸገር መሻገር አልችል ብል ነው እኮ ወዲህ መምጣቴ፤ እንዳለመታደል ሆኖ ሸገር ብቻ ነች የኢኮኖሚውና የፖለቲካው ማዕከል፤ እንደ አለመታደል ሆኖ አዲስ አበባ ብቻ ነች የፈለከውን በፈለከው ሰዓት ከፈለከው ሰው ጋር እንድትሰራ በአማራጭ የተሞላችው፤ እንዳለመታደል ሆኖ ልሸቅል፣ ልቋጥር፣ ‹ሰው› ልሁን ብትል ክፍለ ሀገር ላይ ‹አይዞህ› የሚል ቤተሰብ እንጅ ‹አበጀህ› የሚል ጎረቤት አታገኝም፤ እንዳለመታደል ሆኖ አምደኛ ሆኘ ጭሬ እበላለሁ ብትል ‹መጫሪያ ሜዳው›፤ እተውናለሁ ብትል ቤተ ትወናው፤ ፊልም አስተባብራለሁ ብትል ‹‹ፕሮዲዩሰሮች› ያሉት ፒያሳ ወይ ቦሌ እንጅ ዓባይ ዳር አታገኛቸውም፤ ለመዝናናትና ወሬ ብትጋብዛቸው እንኳን ‹‹እንመጣለን›› ሳይሆን ‹‹ብቅ በል›› ነው የሚሉህ፤

    እንዳለመታደል ሆኖ ቁና ሙሉ አፈር ዘግኖ፣ ጎታ ሙሉ ጠጠር አፍሶ፣ የጉልበቱና የትክሻው ልብስ በላብ እስኪነትብ ሰርቶ ጥሪት የቋጠረ የክፍለ ሀገር ነጋዴ እንኳን ‹‹ፕላዛ›› የሚገነባው ቦሌ እንጅ ባህር ዳር ወይ ነቀምት አይደለም፤ እንዳለመታደል ሆኖ ወጣት ሳለህ በየማዕከሉ ‹ና› እያለ ባንተ ስራ ሪፖርቱን ሲያሽሞነሙን የነበረ የክፍለ ሀገር ባህል ማዕከል ካድሬ ‹ፓርላማ› ሲገባ ‹‹ለወጣቶች የኪነ ጥበብ ዕድገት›› ይጮሃል ብለህ ስትጠብቅ አራት ኪሎ ሲደርስ በእንቅልፍ ያወራርደዋል፤ አንተ የክፍለ ሀገር ልጅ ከሆንክ እናትና አባትህ እንኳን ‹‹አዲስ አበባ ግባ›› ይሉሃል፤ ሸገር ላይ ህልም ይዘገን ይመስል!! የአንተ አዲስ አበባ መክተም ለባላገር ወላጆችህ ‹‹አማሪካ›› እንደመግባት ያህል ነውና ‹አጎቴ ጫማ ላክልኝ፤ ወንድሜ የምዝገባ ብር አነሰኝ፣ ልጄ ጥማድ በሬ ልገዛ ነበር፣ የማዳበሪያውን ክፍያ ባንተ ጥየዋለሁ…..›› የማይልህ ዘመድ የለም፤ አንተ እዚህ በሸገር ታክሲ ፍዳህን ስታይ ዘመዶችህ ግን ‹አውቶሞቢል› እየነዳህ ይመስላቸዋል፤ አንተ እዚህ በቤት ኪራይ የምትሆነው እያጣህ የክፍለ ሀገር እናትህ ግን ‹ቪላ› የገነባህ ነው የሚመስላት፤ አንተ እዚህ ደመወዝህን ‹ምን ላርግሽ› እያልክ በሀሳብ ስትዋትት እህትህ ‹ሞሽረኝ› የሚል ‹ሚስድኮል› ታንቃጭልልሃለች፤ አየህ የክፍለ ሀገር ልጅ እንዲህ ነው እዚያ አገር ቤት እያለ ‹‹ህልሙን ለማሳካት ሲፍገመገም›› አጋዥና ናዛዥ አያገኝም፤ ሸገር ሲገባም ህይወቱን አሻግራለሁ ሲል ወይ ከሚሰራ ፎቅ ይወድቃል፤ ወይ በሲኖ ትራክ ነፍሱን ይነጠቃል፤ አነስ ሲልም ከቀን ውሎው ሲመለስ በማታ ወጠምሻ ዱርዬ አጥንቱ ይደቅቃል!!

    አየህ የክፍለ ሀገር ልጅ ስትሆን ህልምህ ሩቅ ኑሮህ ግን ጭንቅ ነው!
    እና እንደምትልልኝ.

    • በደመቀ ከበደ – መሀል ሸገር

    ****************

    ንቦች በረራ አስተጓጎሉ

    ከጥቂት ቀናት በፊት ከአሜሪካ ቴክሳስ ሊበር ዝግጁ በነበረ የአሜሪካ አየር መንገድ አውሮፕላን አንድ ክንፍ ስር ንቦች በመንጋ በመግባታቸው በረራው ከአንድ ሰዓት በላይ እንዲዘገይ መደረጉን ሮይተርስ ዘግቧል፡፡

    ንቦቹ ውስጥ ያልገቡ ቢሆንም የበረራ አስተናጋጆች ከአውሮፕላኑ ክንፍ ሥር መኖራቸውን በመጠቆማቸው ነው ችግሩ ሊታወቅ የቻለው፡፡

    አየር መንገዱ በአካባቢው ያሉ አንቢዎችን በማስጠራት ንቦቹ መላ እንዲባሉ ማድረጉን ዘገባው ያመለክታል፡፡ ነገር ግን የንቦቹ ወረራ በዚህ አላበቃም፡፡ “አንቢዎቹ ከመሄዳቸው ብዙም ሳይቆይ የንቦቹ መንጋ ራሱን አውሮፕላን እንደገና ጎብኝቶታል” ሲሉ የአየር መንገዱ ቃል አቀባይ አንድሪያ ሁግሊ ተናግረዋል፡፡

    አንቢዎች ሁለተኛውን የንብ መንጋ መላ ለማለት ዳግም መጠራታቸው ግድ ሆነ፡፡ ይህ አጋጣሚ የመጀመሪያቸው አለመሆኑን ቃል አቀባይዋ ገልጸዋል፡፡

    ****************

    በአውሮፕላን ተሳፋሪ ሆድ ውስጥ 41 ሺሕ ፓውንድ ዋጋ ያለው ኮኬይን ተገኘ

    ከፖርቹጋል ሊዝበን ወደ አየርላንድ ደብሊን ይበር በነበረው የኤር ሊንገስ አውሮፕላን ውስጥ ተሳፋሪ የነበረው የ25 ዓመት ብራዚላዊ በበረራ ወቅት በልብ እንዲሁም በሆድ ሕመም ክፉኛ መሠቃየቱንና ከዚያም መሞቱን የአይሪሽ ታይምስ ዘገባ ያመለክታል፡፡

    በተሳፋሪው  ሆድ ውስጥ የተገኘው በኮኬይን መጠን 0.8 ኪሎ ግራም እንደሚሆንና በሰማኒያ እሽግ ተከፋፍሎ እንደነበር ተገልጿል፡፡ ወጣቱን ለሕመም ከዚያም ለህልፈት የዳረገው የአንዷ እሽግ መፈንዳት እንደሆነ የተገለጸ ሲሆን በወጣቱ ሳንቶስ ጉርጆኦ ሆድ ውስጥ የተገኘው ኮኬይን ለመሆኑ በምርመራ ተጨማሪ ማረጋገጫ እንደሚደረግ ታውቋል፡፡

    ሚስተር ሳንቶስ ለበረራ ዝግጅት ይደረግ በነበረበት ወቅት በጣም ይጣደፍ ነበር፡፡ በዚህም እንዲረጋጋ ከነገረው አንድ ተሳፋሪ ጋር ተደባድቦ ነበር፡፡

    - Advertisement -
    - Advertisement -

    ተጨማሪ ለማንበብ

    በብዛት የተነበቡ ፅሁፎች