Tuesday, October 4, 2022
ሌሎች ዓምዶች
    - Advertisement -
    - Advertisement -
    ማኅበራዊከሕክምና ሥነ ምግባር ግድፈቶች ጋር በተያያዘ 37 አቤቱታዎች ቀረቡ

    ከሕክምና ሥነ ምግባር ግድፈቶች ጋር በተያያዘ 37 አቤቱታዎች ቀረቡ

    ቀን:

    የኢትዮጵያ የጤና ሙያ ሥነ ምግባር ብሔራዊ ኮሚቴ ከ2007 ዓ.ም. እስከ መስከረም 2008 ዓ.ም. ባሉት ጊዜያት ውስጥ የቀረቡ 37 የሕክምና ሙያ ሥነ ምግባር ጉድለት ቅሬታዎችን ተቀብሎ እየመረመረ መሆኑንና ከ2003 ዓ.ም. እስከ 2006 ዓ.ም. ከቀረቡት አቤቱታዎች ውስጥ በ60ዎቹ ላይ ዕርምጃ መወሰዱን አስታወቀ፡፡

    ከተወሰዱት እርምጃዎች መካከል የሙያ ሥነ ምግባር ግድፈቶች ወይም የሙያ ብቃት ማነስ ችግር የታየባቸው 16 ሐኪሞችና የተለያዩ የሕክምና ባለሙያዎች የሙያ ፈቃድ እንዲሰረዝ፣ ከሥራቸው ላይ ለተወሰነ ጊዜ እንዲታገዱና በከፍተኛ ባለሙያ ሥር እንዲለማማዱ ማድረግ እንደሚገኝበት ኮሚቴው ገልጿል፡፡

    የኢትዮጵያ ሐኪሞች ማኅበር በሚያከናውነው የሜዲካል የሕክምና ሥነ ምግባር ፕሮጀክት ላይ ለመመካከር በጠራው ስብሰባ ላይ ዶክተር ብሩክ ላምቢሶ በአዲስ አበባ ዩኒቨርሲቲ ተባባሪ ፕሮፌሰር፣ የሕዝብ ተወካዮች ምክር ቤት አባል፣ የብሔራዊ ኮሚቴው ሊቀመንበርና የአዲስ አበባ ከተማ አስተዳደር የጤና ሙያ ሥነ ምግባር ኮሚቴ ምክትል ሊቀመንበር እንደገለጹት፣ ኮሚቴው በቀሩት የሕክምና ባለሙያዎች ላይ ደግሞ በግድፈታቸው መጠን መሠረት ከቅሬታ አቅራቢዎች ጋር በማስታረቅና የቃልና የጽሑፍ ማስጠንቀቂያ በመስጠት ችግሮችን ፈትቷል፡፡

    ከቀረቡት ቅሬታዎች 39 የሞት፣ 15 የአካል ጉዳትና ስድስት የክፍያና ሌሎች አስተዳደራዊ ጉዳዮች ናቸው፡፡ ከቅሬታ አቅራቢዎችም ታካሚዎች ወይም ቤተሰቦቻቸው፣ ፖሊስ፣ አዲስ አበባ ጤና ቢሮ፣ ጤና ጥበቃ ሚኒስቴርና ሌሎችም ይገኙበታል፡፡

    ከቀረቡትም ቅሬታዎች 28 በመንግሥትና 32 በግል ጤና ተቋማት ላይ ሲሆን ከባለሙያ አኳያ ሲታይ ደግሞ 25 በማኅፀንና ጽንስ ሀኪሞች፣ ዘጠኝ በጠቅላላ ቀዶ ሕክምና ሀኪሞች አምስት የአጥንት ቀዶ ሐኪሞች ላይ ቅሬታዎች እንደቀረቡባቸው ተናግረዋል፡፡

    ከ2003 ዓ.ም. እስከ 2006 ዓ.ም. ድረስ የቀረቡ ቅሬታዎችን አጣርቶ ምላሽ ለመስጠት የወሰደው ጊዜ ፈጣኑ ከአንድ ወር ያነሰ ሲሆን ረጅም ጊዜ የወሰደው ደግሞ ከአንድ ዓመት ተኩል በላይ እንደሆነም ተገልጿል፡፡

    ብሔራዊ ኮሚቴው ቅሬታዎችን ለማጣራት በተንቀሳቀሰበት ወቅት በኮሚቴው አባላት ላይ ማስፈራራትና ዛቻ መሰንዘር፣ ባለሙያዎችና የጤና ተቋማት የታካሚን መረጃ በተገቢው መንገድ አለመመዝገብና መረጃ መደበቅ እንቅፋት ሆነው መገኘታቸውንም አስረድተዋል፡፡

    የማኅበሩ ሥራ አስፈጻሚ ኮሚቴ አባል፣ ዶክተር አዳሙ አዲስ  በተለይም ካለፉት ጥቂት ዓመታት ወዲህ ብዙ የሕክምና ዘርፎች፣ እስፔሻሊቲዎችና ሥልጠናዎች እየጨመሩ ስለሆነ፣ ከዚሁ ጋር የተጣጣመ የሥነ ምግባር አካሄድ እንደሚያስፈልግ  አስረድተዋል፡፡

    የሥነ ምግባር ትምህርት በዩኒቨርሲቲዎች እየተሰጠ ቢሆንም፣ አሁን ካለው ደረጃ አንፃር ሲታይ ሥልጠናው ብቻ በቂ ሆኖ አልተገኘም፡፡ በመሆኑም ከሥልጠናው ወይም ከምረቃው በኋላ ያለው ክትትልና ተከታታይ የሙያ ማጎልበቻ ተጠናክሮ መቀጠል አለበት ብለዋል፡፡

    - Advertisement -

    ይመዝገቡ

    spot_img
    spot_img