Monday, September 25, 2023
- Advertisement -
- Advertisement -

‹‹በተሰጠን ዕውቅና አገርና ሕዝቡን እያስተዋወቅን ነው››

አቶ ትዕዛዙ ቆሬ የዮድ አቢሲኒያ የባህል ምግብ አዳራሽ ባለቤት

ዮድ አቢሲኒያ የባህል ምግብ አዳራሽ ከተመሠረተ አሥራ ሁለት ዓመት ሆኖታል፡፡ በልዩ ልዩ ብሔረሰቦች ሙዚቃ፣ በባህላዊ ምግብ እንዲሁም በአዳራሾቹ በሚገኙት የኢትዮጵያውያንን ባህል የሚያስተዋውቁ ቁሳቁስ የሚታወቀው ዮድ አቢሲኒያ፣ የበርካታ እንግዶች መዳረሻም ነው፡፡ የአገር መሪዎችና ልዑካን ቡድኖች፣ ሚኒስትሮችና በተለያየ ሙያ ዕውቅናን ያተረፉ ግለሰቦች በሥፍራው ከተስተናገዱት ውስጥ ይጠቀሳሉ፡፡ የባህል ምግብ አዳራሹ በሚያደርጋቸው እንቅስቃሴዎች እንዲሁም የወደፊት ዕቅዶች ዙሪያ ምሕረተሥላሴ መኰንን የዮድ አቢሲኒያ መሥራችና ባለቤት አቶ ትዕዛዙ ቆሬን አነጋግራቸዋለች፡፡

ሪፖርተር፡- በዮድ አቢሲኒያ ከተስተናገዱ የአገር ውስጥና የውጪ ዕውቅ ግለሰቦች ጥቂቱን ይንገሩን?

አቶ ትዕዛዙ፡- ከአገር ውስጥ ከጠቅላይ ሚኒስትር ኃይለማርያም ደሳለኝ ጀምሮ ብዙ ሚኒስትሮች ተስተናግደዋል፡፡ ከውጪ አሁን በሥልጣን ላይ ካሉት መካከል የደቡብ ኮሪያ ፕሬዚዳንት፣ የሞናኮ ንጉሥ፣ ሴብላተርና የናይጄሪያው የቀድሞ ፕሬዚዳንት ኦሊሴጎ ኦባሳንጆ ዋና ዋናዎቹ ናቸው፡፡ በምክትል ጠቅላይ ሚኒስትርና በሚኒስትሮች ደረጃ ያሉ፣ የአፍሪካ ኅብረት አመራሮችና ሌሎችም ተስተናግደዋል፡፡ በቅርቡ የዴቪድ ቤካም ባለቤት ቪክቶሪያ ቬካም መጥተው ነበር፡፡ በእርግጥ እንግዳ እንደሚመጣ ብቻ ነበር የተገለጸልን፡፡ በክብር አቀባበል ልናደርግላቸው የሚገባ ሆነው ሳለ፣ ባልተጠበቀ ሰዓትና ሁኔታ ከውጭ ጉዳይ ሚኒስትሩ ዶ/ር ቴድሮስ አድሃኖም ጋር መጡ፡፡

ሪፖርተር፡- ብዙዎች ከውጪ እንግዳ ሲመጣባቸው ዮድ አቢሲኒያን ወደመሰሉ መዝናኛዎች ይወስዳሉ፤ ይኼ ነገር የተለመደበትና የእናንተ መዝናኛም ተመራጭ የሆነበት ምክንያት ምንድነው?

አቶ ትዕዛዙ፡- ምክንያቱ የተነሳንበት ዓላማ ነው፡፡ ዓላማችን የብዙ ብሔረሰብ መገኛ፣ የረዥም ጊዜ ታሪክ ባለቤት፣ ብዙ ቅርስ ያስመዘገበች፣ የሰው ዘር መገኛ የሆነች አገራችንን ማስተዋወቅ ነው፡፡ ጥንት አባቶቻችን ለፍተው አገሪቷን ትልቅ ቦታ አድርሰዋታል፡፡ እኛ ደግሞ ጊዜው በሚፈቅድልን መንገድ የምናስተዋውቅበት መንገድ መፍጠር አለብን በሚል ተነስተን ነው አዳራሹን የመሠረትነው፡፡ የእንግዳ አቀባበል ምን ይመስላል? የሚለው በዚህ ቤት  በአግባቡ ይታያል፡፡  የአገር ውስጥና የውጪም እንግዶች ትንሿን ኢትዮጵያ ብዙም ሳይጓዙ በዚህ ቤት ማየትና መረዳት እንደሚቻል  ስለሚገነዘቡ ረክተው ይሄዳሉ፡፡ እኛም በየጊዜው አገልግሎታችንን የተሻለ ለማድረግ ከፍተኛ ጥረት እናደርጋለን፡፡ ውጤቱንም የምናየው በዚያው መጠን ነው፡፡ ለጉብኝት ወይም በሌላ መልኩ ከውጪ የመጣ እንግዳ እዚህ ቤት ሳይጎበኝ አይሄድም፡፡

ሪፖርተር፡- ቤተሰብ ተሰባስቦ በዓላትን በባህላዊ መዝናኛዎች የማክበር ነገርም እየተለመደ ነው፡፡ ብዙዎች ዐውደ ዓመትን ለማክበር ሲመጡ ምን ይሰማዎታል?

አቶ ትዕዛዙ፡- ከመጠን ያለፈ ደስታ ይሰማኛል፡፡ በግሌ በሰው መደሰት የምደሰት ሰው ነኝ፡፡ አንድም ሰው ቅሬታ ተሰምቶት እንዲወጣ አልፈልግም፡፡ በአገልግሎቱ የተከፋም ካለ፣ እኔ ወይም አብረውኝ የሚሠሩ ባልደረቦቼ እንዲሻሻል እናደርጋለን፡፡ ደንበኛ ንጉሥ ነው ከሚለው ባሻገር ተገልጋዮች እንደ ቤታቸው እንዲያዩት የማድረግ ፍላጎት አለን፡፡

ሪፖርተር፡- ዮድ አቢሲኒያ በቱሪዝም ዘርፍስ ምን አስተዋጽኦ አበርክቷል ብለው ያምናሉ?

አቶ ትዕዛዙ፡- በአገልግሎታችን የምናስተዋውቃቸው ባልህና ቱሪዝም ሊሠራው የሚገባውን ነው፡፡ ምግብና መጠጥ ብቻ ሸጠን አንሄድም፡፡ የአንድን ብሔረሰብ ባህላዊ ጨዋታና አመጋገብ፣ አለባበስና የፀጉር አሠራሩን፣ የሙዚቃ መሣሪያዎቹን በማሳየት የቱሪዝም ሥራ እየሠራን ነው፡፡ ቱሪስቶች የሚሰሙትን ነገር እዚህ መጥተው በአካል ያዩታል፡፡

ሪፖርተር፡- በዘርፉ ላበረከታችሁት አስተዋጽኦ የተበረከቱላችሁ ሽልማቶች አሉ?

አቶ ትዕዛዙ፡- ከባህልና ቱሪዝም ሚኒስቴር ዕውቅና ተሰጥቶናል፡፡ የቀድሞው የባህልና ቱሪዝም ሚኒስትር አቶ አሚን አብዱልቃድር አሥረኛ ዓመታችንን ስናከብር ‹‹የባህል አምባሳደር›› ብለውናል፡፡ ከዚያ በፊት የቀድሞው ፕሬዚዳንት ግርማ ወልደጊዮርጊስ የባህል አምባሳደር የሚል ዕውቅና ቢሰጡንም፣ በባህልና ቱሪዝም ሚኒስቴር አልተረጋገጠም ነበር፡፡ አቶ አሚን ዕውቅና እንደሰጡን አሳውቀዋል፡፡ በተሰጠን ዕውቅና ባህል፣ አገርና ሕዝቡን የማስተዋወቅ ሥራ እየሠራን ነው፡፡ በረሃብና በጦርነት የምትታወቀውን አገራችንን አቅማችን በፈቀደ በበጎ መልኩ እያስተዋወቅን ነው፡፡

ሪፖርተር፡- ድርጅቱ ማኅበራዊ ኃላፊነቱን በምን መንገድ ይወጣል?

አቶ ትዕዛዙ፡- ለወደፊት የዮድ ፋውንዴሽን በሚል ለማቋቋም ያሰብነው የተራድኦ ድርጅት አለ፡፡ እኔ የሃይማኖት ሰው ነኝና እግዚአብሔር ከሰጣችሁ ስጡ የሚለውን ቃል ለመፈጸም እሞክራለሁ፡፡ ጧሪ ያጡ አረጋውያንና አሳዳጊ የሌላቸው ሕፃናትን በዓመት ሦስት ጊዜ (ለዘመን መለወጫ፣ ለልደትና ለፋሲካ) ቤታችን ቤታቸው መሆኑ እንዲሰማቸው ወደዚህ አምጥተን እናስተናግደዋለን፡፡ እምነቴ በሚፈቅድልኝም ቤተክርስቲያናትን በማገዝና በሌላም እሳተፋለሁ፡፡

ሪፖርተር፡- ዮድ አቢሲኒያ አሁን በሚገኝበት አካባቢ አቅራቢያ ያገኘው ቦታ አለ፤ ምን ልትሠሩበት አቅዳችኋል?

አቶ ትዕዛዙ፡- የ2007 ዓ.ም. የመስቀል በዓልን ለማክበር እዚህ ተሰባስበን ነበር፡፡ የባህልና ቱሪዝም ሚኒስቴር ባለሥልጣናትና ሌሎችም እንግዶች ተገኝተው ነበር፡፡ ለአሥረኛ ዓመታችን ያዘጋጀነው መጽሔት ላይ የተጻፈውን መድረክ መሪው አንብቦት ነበርና በዓሉ ሲከበር ለእኔና ለባለቤቴ ያልታሰበ ጥያቄ አቀረበ፡፡ ጥያቄው ዕቅዳችሁ ምንድነው? የሚል ነበር፡፡ ቤቱን ያከራዩን ሰዎች ከተጋባዦቹ መካከል ነበሩ፡፡ እኔም በቦታው ከወራት ያልዘለለ ዕድሜ እንዳለን ተናገርኩ፡፡ ልቀቁ ብንባል ዮድና ኅብረተሰቡ ይለያያል አልኩ፡፡ ለመንግሥትም ጥያቄ ብናቀርብ ሥራችንን ከማድነቅ በስተቀር የተደረገልን ነገር የለም ብዬ የሚያሳዝነኝን ነገር ተናገርኩ፡፡ መስቀልን ከደንበኞቻችን ጋር ከዋልን በኋላ፣ የቤተሰብ ምርቃት ለመቀበል ወደ ገጠር ሄደን ነበር፡፡ ተመልሰን ሳምንትም ሳንጠብቅ ለጉዳያችን ምላሽ አገኘን፡፡ አከራዮቻችን ለሦስት ዓመት አራዘሙልን፤ አጠገቡ ያለውን ቦታም አገኘን፡፡ በ2008 ዓ.ም. መስቀልን ለማክበር በዮድ አቢሲኒያ ለተሰበሰበው እንግዳ   1,059 ካሬ ሜትር ላይ የባህል ሆቴል እንደምንገነባ አሳውቀናል፡፡ እያስተዋወቅን ያለነው ባህልን ስለሆነ፣ ትልቅ ሕንፃ ገንብቶ ባህልን የማሳየት ዕቅድ አለን፡፡ በውጭ ዜጎች ዘንድ በተለይም በቱሪስቶች የባህል ሆቴል የተሻለ ተቀባይነት ይኖረዋል፡፡ ባለ 15 ፎቅና የባህል ምግብ አዳራሽ ያለው ደረጃውን የጠበቀ ሆቴል ለመገንባት አስበናል፡፡ ሥራውን በዚህ ዓመት የመጀመር ዕቅድ አለን፡፡

ሪፖርተር፡- ባለፉት ዓመታት በቀጥታም ይሁን በተዘዋዋሪ ከሚመለከታቸው የመንግሥት ተቋማት ተገቢውን ድጋፍ አግኝታችኋል?

አቶ ትዕዛዙ፡- ይኼነው የሚባልና የተጨበጠ ድጋፍ አልተደረገልንም፡፡ ድርጀቱ የሚጠይቃቸው ጥያቄዎች ግን ይሟሉለታል፡፡ ቦታ ለማግኘትና የምንፈልገውን ሥራ ለመሥራት ያቀረብነው ጥያቄ ግን ብዙ አልተገፋበትም፡፡

ሪፖርተር፡- ከሚመለከታቸው ተቋማት ምን ዓይነት ድጋፍ መደረግ አለበት ይላሉ?

አቶ ትዕዛዙ፡- ኢትዮጵያ በቱሪስት ተደራሽነት በአፍሪካ ካሉ አምስት አገሮች አንዷ እንደሆነች ይነገርላታል፡፡ በቱሪዝም የበለጠ ለመሥራት እንድንችል ያሉ ጅምሮች  ድጋፍ ያስፈልጋቸዋል፡፡ ሰሞኑን የዓለም የቱሪዝም ቀን ሲከበር በዓለም አቀፍ ደረጃ ቢሊዮን ቱሪስቶች፣ ቢሊዮን ዕድሎች እየተባለ ነበር፡፡ ቢሊዮን ቱሪስቶች ወደ አገራችን ቢመጡ አገልግሎት የመስጠት ብቃትና ዝግጁነት አለን? ብቃቱ እንዲኖረን መንግሥት ዘርፉን ማጠናከር አለበት፡፡ በዘርፉ ላሉት ድርጅቶች ተገቢው ድጋፍ መደረግ አለበት፡፡ አዳዲሶችም ወደ ዘርፉ እንዲገቡ ማበረታቻ መሰጠት አለበት፡፡ አሁን እያደረግን ያለነውና እየተደረገልን ያለው ተመጣጣኝ አይደለም፡፡ በትራንስፎርሜሽን ዕቅዱ፣ ጭስ አልባ ኢንዱስትሪውን ከዚህ የበለጠ ለማሳደግ ታስቧል፡፡ ስለዚህ ይህንን ዘርፍ ማጠናከር ያስፈልጋል፡፡ ይኼንን ዛሬ ብቻ ሳይሆን ደግመን ደጋግመን ተናግረናል፡፡ ለወደፊት የሚመጣው ባይታወቅም እስካሁን ግን ብዙም የሚያበረታታ ነገር አላየንም፡፡

ሪፖርተር፡- ዮድ አቢሲኒያን ገጥመውታል የሚሏቸው ችግሮች አሉ?

አቶ ትዕዛዙ፡- በድርጅታችን የሚሠሩ ሁሉ መንፈሰ ጠንካራ ስለሆኑ ነው እንጂ ብዙ ችግሮች ገጥመውናል፡፡ ቀዳሚውን ቦታ የሚይዘው ድርጅቱ ከዚህ ቀደም የደረሰበት የእሳት አደጋ ነው፡፡ አንድ ድርጅት የሠራው ሁሉ ወድሞበት አዲስ ድርጅት ሲያቋቁም ማበረታቻ ሊደረግለት ይገባል፡፡ እኛ ግን ዘመድ አዝማድ ጠይቀን ያቋቋምነውን ቤት አፍርሱና ፎቅ ሥሩ ነው የተባልነው፡፡ ዮድ አቢሲኒያ ፈርሶ ግን የተተካው ባህላዊ ሳይሆን ዘመናዊ ሬስቶራንት ነው፡፡ በወቅቱ ለምን ይፈርሳል? ተብሎ ብዙ ርቀት ተሂዷል፡፡ ያ አስበርግጎን ወደ ኋላ ሳንሄድ፣ ዛሬ ሕዝብም መንግሥትም የሚጠቀምበት ሠርተናል፡፡ ጥቂት ግለሰቦች በራሳቸው መንገድ ከላይ ያሉትን እያሳሳቱ የሄዱበት መንገድ ነበር፡፡ አንዳንድ ጊዜ ወረድ ብሎም ማየት ጥሩ ነው፡፡ ዛሬ መንግሥት ጥሩ መሥራታችንን ዓይቶ ዕውቅና ሰጥቶናል፡፡

ሪፖርተር፡- ከምግብና መጠጥ በተጨማሪ በሙዚቃና በቤቱም አሠራር የኢትዮጵያን ባህል ታንፀባርቃላችሁ፡፡ በእርሶ ዕይታ ዮድን የተለየ የሚያደርገው የቱ ነው?

አቶ ትዕዛዙ፡- ዋነኛው የቤቱ አሠራር ነው፡፡ ወጥ መሆኑ ሁሉም ሰው በቀጥታ እንዲታደም አስችሏል፡፡ ይህንን አሠራር ተከትለው የተሠሩም መዝናኛዎች አሉ፡፡ ቤቱ የጀግንነትና የማንነት ታሪክን በሚያሳዩ ቁሳቁሶች የተዘጋጀ ነው፡፡ እዚህ ቤት መጥቶ ከፍቶት የሚሄድ ሰው የለም፡፡ አንዳንዴ እንደ ቅሬታ የሚነሳው ለምን የእኛ ብሔረሰብ ዘፈን አይደመጥም የሚለው ነው፡፡ እኛ ግን ሁልጊዜ የአንድ ብሔርን ሙዚቃ ብቻ አናቀርብም፡፡ ሚዛናዊ ሆነን ሁሉንም በዙር እናዳርሳለን፡፡ አንዳንዴ ተናዶ የሚመጣና ልማታ የሚልም ሰው አለ፡፡ ሁሉንም በትዕግሥት ማሳለፍ ያስፈልጋል፡፡ ሌላው ለየት የሚያደርገው ከአፍሪካ አገሮች የሚመጡ እንግዶች ተሰባስበው የሚጫወቱበት መድረክ ነው፡፡ ከኢትዮጵያዊነት አልፎ አፍሪካዊነትን ለማሳየት ከዚያም በላይ ዓለም አቀፋዊነትን ለማጉላት እንፈልጋለን፡፡ የአፍሪካ መዲና በሆነችው ከተማችን አፍሪካዊ ነገር ቢቀርብ ደስ ይላል፡፡ አዳራሽ ውስጥ የአፍሪካ ካርታ ቅርፅ አለ፡፡ የአፍሪካ ኅብረት ስብሰባ በሚኖርበት ጊዜ መብራቱ ይበራና መሀል ላይ አረንጓዴ፣ ቢጫና ቀይ የምታበራ ጮራ አለች፡፡ ለአፍሪካ ጮራ የፈነጠቀችው ኢትዮጵያ መሆኗን ለመግለጽ ነው፡፡ የቤቱ ጣሪያ የተሠራው የንግሥተ ሳባን ጉዞ በ41 ክፍል በሚገልጹ ምስሎች ነው፡፡ በአዳራሹ ግርግዳ ላይ ኢትዮጵያን ያስተዳደሩ መሪዎች ፎቶዎች ይገኛሉ፡፡  የእያንዳንዱን ብሔረሰብ ባህላዊ የፀጉር አሠራር፣ አለባበስና የሙዚቃ መሣሪያዎችን የሚያሳዩ ምስሎችም አሉ፡፡ ቤቱ ባህላዊ ቤት አሠራርን ተከትሎ የተሠራ ሲሆን፣ ካልዲስ ቡና ያገኘበትን መንገድ በስዕላዊ መግለጫ የሚያስረዳና ከግዙፍ ጀበና ጋር የተያያዘ ተንቀሳቃሽ ረከቦትም አለ፡፡ አሥረኛው የዓለም ዋንጫ በደቡብ አፍሪካ ሲዘጋጅ አገርን የሚወክል ነገር አዘጋጁ ተብለን የተሠራ ቢሆንም ሳይሄድ ቀርቷል፡፡ በዩኔስኮ በቅርስነት የተመዘገቡ የኢትዮጵያ ቅርሶች፣ ብርቅዬ አገር በቀል እንስሳት ምስሎችም ይገኛሉ፡፡ በአይዶል ውድድር አንደኛ የወጡት ‹‹ኢትዮጵያዊነት›› እና ሦስተኛ የወጡትም የኛ ልጆች ናቸው፡፡

 

 

ተዛማጅ ፅሁፎች

- Advertisment -

ትኩስ ፅሁፎች ለማግኘት

በብዛት የተነበቡ ፅሁፎች