Saturday, November 26, 2022
ሌሎች ዓምዶች
    - Advertisement -
    - Advertisement -
    ዓለምበመላምቶች የተከበበው የሩሲያ የመንገደኞች አውሮፕላን አደጋ መንስዔ

    በመላምቶች የተከበበው የሩሲያ የመንገደኞች አውሮፕላን አደጋ መንስዔ

    ቀን:

    የሩሲያ አየር መንገድ ሜትሮጄት በረራ ቁጥር 9268 የመንገደኞች አውሮፕላን  ቅዳሜ ጥቅምት 20 ቀን 2008 ዓ.ም. በግብፅ ሲናይ በረሃ ከተከሰከሰ በኋላ፣ ለመከስከሱ ምክንያት ይሆናሉ የተባሉ የተለያዩ መላምቶች እየተሰነዘሩ ነው፡፡ የሩሲያ ባለሥልጣናት ምክንያቱን ለማወቅም ሆነ ለመናገር ጊዜው ገና ነው ሲሉ፣ አይኤስ የተባለው የሽብር ቡድን ደግሞ አውሮፕላኑን መትቼ ጥያለሁ ሲል መልዕክት አስተላልፏል፡፡ አውሮፕላኑ በገጠመው የቴክኒክ ችግር ምክንያት ተከስክሷል የሚል ግምትም እየተሰነዘረ ነው፡፡

    በረራ ቁጥር 9268 አውሮፕላን

    የሩሲያ አየር መንገድ ሜትሮጄት ንብረት የሆነው በረራ ቁጥር 9268 ኤር ባስ  ከግብፅ ሻርም አል ሼክ ወደ ሴንት ፒተርስበርግ ለመብረር ያኮበኮበው ቅዳሜ ጥቅምት 20 ቀን 2008 ዓ.ም. ማለዳ ነበር፡፡ ለ23 ደቂቃዎች ያህል በረራ ካደረገ በኋላ ግን ከራዳር ዕይታ ይሰወራል፡፡ የግብፅ ሲቪል አቪዬሽን ሚኒስትር ሆሳም ከማል እንደሚሉት፣ አውሮፕላኑ ከመከስከሱ በፊት ሁሉም ነገር ሰላማዊ ነበር፡፡ ከራዳር የተሰወረውም ድንገት ነው፡፡ ‹‹ፍላይት ራዳር 24›› ማለትም በዓለም አቀፍ ደረጃ በረራዎችን የሚቆጣጠር ድርጅት በድረ ገጹ እንዳሰፈረው፣ የሩሲያው አውሮፕላን ከራዳር ውጪ ከመሆኑ በፊት በበረራ ከፍታው ላይ ለውጥ አድርጓል፡፡ ፍጥነቱን በማይገመት ሁኔታም ቀንሶ ነበር፡፡

    የአውሮፕላኑ መከስከስ

      አውሮፕላኑ በተከሰከሰበት ወቅት የግጭት ብልጭታ እንደነበር ተመልክቷል፡፡ የአሜሪካ ሳተላይት መረጃ፣ የአሜሪካ የደኅንነትና የመከላከያ አባላትም፣ ብልጭታው የተከሰተው አውሮፕላኑ በአየር ላይ እያለ ይሁን ምድር ከተከሰከሰ በኋላ ለመለየት ምርመራ እያደረጉ መሆኑን አሳውቀዋል፡፡

    ሲኤንኤን የዘርፉን ባለሙያዎች ጠቅሶ እንደዘገበው፣ አውሮፕላኑ ሲከሰከስ  ሙቀት ያለው ብልጭታ መፈጠሩ ከተለያዩ ምክንያቶች ጋር ይያያዛል፡፡ በሚሳይል መመታት፣ የቦምብ ፍንዳታ፣ የሞተር መፈንዳት፣ እንዲሁም አውሮፕላኑ በገጠመው ችግር ከውስጥ በሚነሳ እሳት ሊከሰት ይችላል፡፡

    የአሜሪካ የደኅንነት አባላት ከሳተላይቱ ባገኙት መረጃ ተመሥርተው፣ አውሮፕላኑ በአየር ላይ ስለመፈንዳቱ ወይም መሬት ላይ ስለመከስከሱ እያጣሩ እንደሆነ ቢገልጹም፣ የሩሲያ ከፍተኛ የአቪዬሽን ባለሥልጣን ግን አውሮፕላኑ በአየር ላይ እያለ መበታተኑን ተናግረዋል፡፡ የሩሲያው አየር መንገድ ሜትሮጄት ባለሥልጣን አሌክሳንደር ሲመርኖቭ፣ ለአውሮፕላኑ መከስከስ የቴክክኒክ ችግርና የሰዎች ስህተት ምክንያት ሊሆን ይችላል ብለዋል፡፡

    የሩሲያ ፌዴራል አየር ትራንስፖርት ኤጀንሲ ኃላፊ ግን የሜትሮጄት ባለሥልጣን የሰጡትን አስተያየት ወዲያው ነው ያስተባበሉት፡፡ ‹‹ምንም የተጨበጠ ነገር ሳይኖር አውሮፕላኑ የተከሰከሰበትን ምክንያት ለማወቅም ሆነ ለመናገር አይቻልም፡፡ የአቪዬሽን ባለሥልጣናት ያልበሰለ መረጃ ከመስጠት ተቆጠቡ፤›› ሲሉም አሌክሳንደር ኒራድኮ ተናግረዋል፡፡

    አውሮፕላኑ በአየር ላይ እንዳለ ወደ ቁርጥራጭነት ተቀይሮ ከሆነ አደጋውን ሊያስከትሉ ከሚችሉ መላምቶች አንዱ የሽብር ጥቃት ቢሆንም፣ አውሮፕላኑ የሽብር ሰለባ ሳይሆን አይቀርም የሚለው መላምት ግን ብዙም ትኩረት አላገኘም፡፡ የአሜሪካ ናሽናል ትራንስፖርቴሽን ሴፍቲ ቦርድ የቀድሞ ማኔጂንግ ዳይሬክተር ፒተር ጐልዝ፣ አደጋው በድንገት ከተከሰተ ችግር ምናልባትም ከአውሮፕላኑ ጥገና ጋር በተያያዘ በተፈጠረ ክፍተት ሊሆን እንደሚችል ተናግረዋል፡፡

    አውሮፕላኑ

    ኤ 321-200 ኤር ባስ የተሠራው እ.ኤ.አ. በ1997 ነው፡፡ ሜትሮጄትም አውሮፕላኑን እ.ኤ.አ. ከ2012 ጀምሮ ሲጠቀምበት ቆይቷል፡፡ የሜትሮጄት ባለሥልጣናት እንደሚሉት፣ አውሮፕላኑ ላይ የሚደረግ ቁጥጥርም ሆነ ምርመራ ተዛንፎ አያውቅም፡፡ ከግብፅ ከሚገኘው አውሮፕላን ማረፊያ ሲነሳም ተደጋጋሚ ፍተሻ ተደርጐለታል፡፡

    ተጐጂዎች

    በበረራ ቁጥር 9268 ውስጥ 217 መንገደኞችና ሰባት የአየር መንገዱ ሠራተኞች ነበሩ፡፡ ከተሳፋሪዎቹ 209 ሩሲያውያን ሲሆኑ፣ የዩክሬንና የቤላሩስ ዜጐችም ይገኙበታል፡፡

    ቢቢሲ እንደዘገበው፣ አብዛኞቹ ተሳፋሪዎች ወደ ግብፅ ያመሩት ለመዝናናት ነበር፡፡ ብዙዎቹም ቤተሰቦቻቸውን የያዙ ነበሩ፡፡ የመንገደኞች የስም ዝርዝር እንደሚያስረዳው፣ የአብዛኛዎቹ ተሳፋሪዎች የመጨረሻ ስም መመሳሰል አለው፡፡ ከተጐጂዎቹ ውስጥ ሕፃናት፣ ተማሪዎችና ወጣት ባለሙያዎች ይገኙበታል፡፡

    ግብፅ ለመዝናናት ሄደው ወደ ሴንት ፒተርስበርግ በመመለሰ ላይ ሳሉ በሲናይ በረሃ የቀሩት የአውሮፕላኑን መንገደኞች ማኅበራዊ ድረ ገጽ ጠቅሶ ቢቢሲ እንደሚለው፣ አብዛኞቹ በቀይ ባህርና በሌሎች አካባቢዎች ስለነበራቸው አስደሳች ቆይታ አስፍረው ነበር፡፡

    የሕክምና ባለሙያዎችን ጠቅሶ ሲኤንኤን እንደዘገበው፣ አብዛኛዎቹን አስከሬኖችና የሰውነት ቁርጥራጮች አውሮፕላኑ ከተከሰከሰበት ሲናይ በረሃ የተነሱ ሲሆን፣ ብዙዎቹም የመቃጠል ምልክት አይታይባቸውም፡፡ አስከሬኖቹም ወደ ሩሲያ ተጓጉዘዋል፡፡

    አይኤስና የአውሮፕላኑ አደጋ

    በሲናይ በረሃ የተከሰከሰውን የሩሲያ የመንገደኞች አውሮፕላን አስመልክቶ የተለያዩ ምክንያቶች እየተሰነዘሩ ነው፡፡ ሆኖም አሜሪካም ሆነች ሩሲያ የሽብር ጥቃት ሊሆን ይችላል ለሚለው ሥፍራ አልሰጡትም፡፡

    ሆኖም ሩሲያ በተለይ የሶሪያን መንግሥት ደግፋ በአይኤስ ላይ ያነጣጠረ የአየር ድብደባ ከጀመረች ወዲህ፣ አይኤስ ጥቃት ሊያደርስ እንደሚችል ሲዝት ከርሟል፡፡ በሲናይ በረሃ የተከሰከሰው የሩሲያ አውሮፕላን ደግሞ መልካም አጋጣሚን ፈጥሮለታል፡፡ አውሮፕላኑ የሽብር ሰለባ ስለመሆኑ የሚያሳይ ፍንጭ ባይገኝም፣ አይኤስ ‹‹አውሮፕላኑን መትቼ የጣልኩት እኔ ነኝ፤›› ማለቱን ቢቢሲ ዘግቧል፡፡

    ሲኤንኤን የግብፅ ፕሬዚዳንት ጠቅሶ እንደዘገበው ግን፣ አይኤስ በሲናይ በረሃ ሥፍራ የለውም፡፡ በአውሮፕላኑ ላይ ጥቃት ሊያደርስ የሚችል አቅምም የለውም፡፡ አጋጣሚውንም ለፕሮፓጋንዳ እየተጠቀመበት ነው ተብሏል፡፡

    ምርመራ

    የሩሲያው ፕሬዚዳንት ቭላድሚር ፑቲን፣ ለጠቅላይ ሚኒስትሩ ዲሚትሪ ሜድቬዴቭ ምርመራ እንዲጀመር ትዕዛዝ ሰጥተዋል፡፡ የሩሲያ የምርመራ ኤክስፐርቶች ከግብፅ አቻዎቻቸው ጋር በመሆን አውሮፕላኑ የተከሰከሰበትን መንስዔ በማጣራት ላይ ናቸው፡፡ የጀርመንና፣ የፈረንሣይ እንዲሁም የአውሮፕላኑ ክፍሎች የተሠሩባቸው አገሮች ኤክስፐርቶችም በምርመራው ይሳተፋሉ፡፡

    የአውሮፕላኑ ሞተር የተሠራው አሜሪካ ሲሆን፣ የምርመራው አቅጣጫ ወደ ሞተሩ ከሆነ የአሜሪካ ናሽናል ትራንስፖርቴሽን ሴፍቲ ቦርድ የኤክስፐርት ቡድኑን ወደ ሲናይ በረሃ ይልካል፡፡

    እስከ ማክሰኞ ጥቅምት 23 ቀን 2008 ዓ.ም. በነበረው መረጃ የአውሮፕላኑ የመረጃ ቋት ‹‹ብላክ ቦክስ›› የተገኘ ቢሆንም፣ ከውስጡ ስለተገኘው መረጃ የተባለ ነገር የለም፡፡

    በረራ ቁጥር 9268 የተነሳበት ሥፍራ

    ሻርም አል ሼክ በሲናይ በረሃ ደቡብ ጫፍ የሚገኝ የባህር ዳርቻ ያለው የመዝናኛ ሥፍራ ነው፡፡ የሲናይ በረሃ ደግሞ ከአይኤስ ጋር ግንኙነት ያላቸው በግብፅ መንግሥት ላይ የሸመቁና ከየግብፅ መንግሥት ወታደሮች የሚጋጩበት ሥፍራ ነው፡፡ በሸማቂዎቹና በመንግሥት መካከል በተፈጠረ ግጭትም በመቶዎች የሚቆጠሩ ሞተዋል፡፡

    ሸማቂዎቹ በትከሻ ከሚያዙ መሣሪያዎች ባለፈ አውሮፕላን ሊጥል የሚችል መሣሪያ እንዳልታጠቁ ቢነገርም፣ ሸማቂዎቹ አውሮፕላኑን መተን ጥለናል ብለዋል፡፡ የሩሲያ ትራንስፖርት ሚኒስትር ማክሲም ሶኮሎቭ ግን፣ በሲናይ በረሃ ያሉት ሸማቂዎች ፀረ አውሮፕላን ሚሳይል ይታጠቃሉ ብሎ መገመት እንደማይቻል ተናግረዋል፡፡ 

      

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    የትርፍ መጠኑን በ127 በመቶ ያሳደገው አቢሲኒያ ባንክ ካፒታሉን በ2.5 ቢሊዮን ብር እንዲያድግ ወሰነ

    የአቢሲኒያ ባንክ ዳይሬክተሮች ቦርድ የባንኩ  ካፒታል በ2.5 ቢሊዮን ብር...

    አዋሽ ባንክ ካፒታሉን 55 ቢሊዮን ብር ለማድረስ ወሰነ

    የአዋሽ ባንክ ዳይሬክተሮች ቦርድ ዛሬ ህዳር 17 ቀን 2015...

    ከብሔራዊ ባንክ እውቅና ያገኘው ፔይሊንክ አክሲዮን ማህበር ምሥረታውን አካሄደ

    ከገንዘብ ንክኪ ነፃ የሆነ የዲጂታል ክፍያ ሥርዓት ለመተግበር ያቀደው...