[የክቡር ሚኒስትሩ አንድ ወዳጅ ስልክ ደወለላቸው]
- ሰላም ክቡር ሚኒስትር፡፡
- እንዴት ነህ ወዳጄ?
- አለሁ ክቡር ሚኒስትር፣ ገርሞኝ እኮ ነው የምደውለው፡፡
- ምኑ ነው የገረመህ?
- ተሻሽላችኋል አይደል እንዴ?
- ማነው የተሻሻለው?
- እናንተው ናችኋ፡፡
- ምንድነው የምታወራው?
- ሰሞኑን ቲቪ አላዩም እንዴ?
- ሥራ ስለበዛብኝ አላየሁም፡፡
- በቴሌቪዥን ሲታዩ ነበር እኮ፡፡
- ምን ሳደርግ?
- የመልካም አስተዳደሩ ውይይት ላይ ነዋ፡፡
- እ…
- ምነው ክቡር ሚኒስትር?
- ተላለፈ እንዴ?
- ለሁለት ተከታታይ ቀናት ነው የተላለፈው፡፡
- ጉድ ፈልቷል በለኛ?
- ምን ጉድ አለው?
- አይ ተወው ወዲህ ነው፡፡
- እኔ ግን በጣም ደስ ብሎኛል፡፡
- ምኑ ነው ደስ ያለህ?
- ባለሥልጣኖቻችን እንዲህ በግልጽ ስትወያዩ ሳይ አስደስቶኛል፡፡
- ለመሆኑ እያንዳንዱ ነገር ነው እንዴ የተላለፈው?
- የተቆራረጠ ነገር እንዳለው ያስታውቃል፣ ግን የተላለፈውም ቢሆን አስገራሚ ነው፡፡
- መቼም አሳልፈው አይሰጡኝም?
- ማነው አሳልፎ የሚሰጠዎት?
- የተወራውን ሁሉ አስተላልፈው ነዋ፡፡
- ወሬ ብቻ ምን ያደርጋል ክቡር ሚኒስትር?
- ምን እያልክ ነው?
- እንደዚያ ተወርቶ ወደ ተግባር ካላወጣችሁት ምንም ፋይዳ የለውም፡፡
- ይኸው በቲቪ መተላለፉ ራሱ አንዱ ተግባር ነው፡፡
- ክቡር ሚኒስትር ሕዝብ እኮ ሰልችቶታል፡፡
- ምኑ?
- ወሬ!
- የአሁኑ ግን በወሬ ብቻ የሚቀር አይመስለኝም፡፡
- እሱን ነው የምለዎት፣ በወሬ ሲቀር እኮ አደጋ አለው፡፡
- የምን አደጋ?
- ምርጫውን ሙሉ ለሙሉ ያሸነፋችሁት እናንተው ናችኋ?
- እሷን ነገር አሁን ነው መዘዟ እየገባችኝ የመጣችው፡፡
- የምን መዘዝ?
- ማሳበቢያ የለማ፡፡
- ሕዝቡ ሰበብ ሳይሆን መፍትሔ ነው የሚፈልገው፡፡
- እሱ እኮ ነው ግራ ያጋባን፡፡
- ከልብ ካለቀሱ እንባ አይገድም አይደለም ነው የሚባለው፡፡
- ማልቀስማ አልቅሰናል፣ መፍትሔው ነው የጠፋው፡፡
- ለማንኛውም ሕዝቡ አሁን ጥሪ አይቀበልም፡፡
- የምን ጥሪ?
- የሰበብ!
[የክቡር ሚኒስትሩ ወዳጅ ሚኒስትር ደወሉ]
- አዩት እንዴ ክቡር ሚኒስትር?
- መተላለፉን ራሱ አሁን ነው የሰማሁት፡፡
- ክቡር ሚኒስትር ይኼ ጊዜ ወሳኝ ነው፡፡
- በጣም ወሳኝ እንጂ፡፡
- እርስዎ ላይ እንደዚያ ይረባረቡብዎታል ብዬ አላሰብኩም ነበር፡፡
- ከፍቼ ስጫወት ተገኘኋ፡፡
- ግድ የለም አሁን መጠናከር ያለብን ጊዜ ነው፡፡
- የምን መጠናከር?
- ኔትወርካችን መጠናከር አለበት፡፡
- እየቀለድክ ነው?
- ክቡር ሚኒስትር ቀልድ ያጠናክረናል ብዬ አላስብም፡፡
- ትሰማኛለህ ወዳጄ?
- በሚገባ ክቡር ሚኒስትር፡፡
- አሁን መጠናከር ያለበት የቴሌ ኔትወርክ እንጂ የእኛ ኔትወርክ አይመስለኝም፡፡
- ምን ነካዎት ክቡር ሚኒስትር፣ አሁን ነው እንጂ በደንብ መደራጀት ያለብን?
- አትቀልድ ሰውዬ!
- የምን ቀልድ ነው?
- መደራጀት ያለባቸው አነስተኛና ጥቃቅኖቹ ናቸው፡፡
- እንዲህማ እጅ አይስጡ፡፡
- እኔ በቃኝ፡፡
- ምኑ ክቡር ሚኒስትር?
- መደራጀቱም፣ ኔትወርኩም፣ ግምገማውም፣ ወቀሳውም፣ ለቅሶውም በቃ ሁሉም፡፡
- የምን ለቅሶ ነው ክቡር ሚኒስትር?
- እኔ በየግምገማው ማልቀስ ሰልችቶኛል፡፡
- እርስዎ እኮ እንባ ስለሚቀናዎት ነው፡፡
- እናንተ ሰዎች ዓይኔ በእንባ እንዲጠፋ ትፈልጋላችሁ እንዴ?
- ቆራጥ ይሁኑ እንጂ ክቡር ሚኒስትር?
- ቆርጬማ ነው የምነግርህ፡፡
- ምንድነው የቆረጡት?
- ላለመሞሰን፡፡
- እንዴ ምኑ ተያዘና?
- በቃኝ እኔ ሕዝቡን ማገልገል ነው የምሻው፡፡
- ያድርግልዎት ክቡር ሚኒስትር፡፡
- አሜን!
[የክቡር ሚኒስትሩ ሚስት ስልክ ደወሉላቸው]
- እንዴት ዋልክ?
- ደህና ዋልሽ?
- እየፈለግክልኝ ነው፡፡
- ምንድነው የምፈልግልሽ?
- የቤት ሠራተኛዋን ነዋ፡፡
- አንቺ ሴትዮ ይኼን እንኳን መሥራት አትችይም?
- ምን ነካህ እንዲህ በቀላሉ የሚገኝ ነገር አይደለም፡፡
- እኔ ታዲያ ከየት ላመጣልሽ እችላለሁ?
- አንተ ታውቃቸዋለህ ብዬ ነዋ፡፡
- ምኖቹን ነው የማውቃቸው?
- ደላሎቹን ነዋ፡፡
- ምን አልሽ አንቺ?
- ያለ ደላላ በቀላሉ አይገኙም እኮ ነው የምልህ?
- እና እኔ ደላላ ላናግር?
- ምን ችግር አለው? የቤት ሠራተኛ እኮ በጣም ያስፈልገናል፡፡
- በቃኝ ብያለሁ እኔ፡፡
- ምኑ?
- የድለላው ሥራ፡፡
[የክቡር ሚኒስትሩ የቅርብ ዘመድ ደወለላቸው]
- ሰላም ክቡር ሚኒስትር፡፡
- ከየት ተገኘህ ዛሬ እባክህ?
- አንድ ደስታ ላካፍልዎት ነው፡፡
- የምን ደስታ?
- መኪና ገዛሁ፡፡
- እንኳን ደስ አለህ፡፡
- ባምላክዎት ክቡር ሚኒስትር፣ ስለዚህ ዛሬ የመኪናዬን የደስ ደስ ምሳ ልጋብዝዎታ፡፡
- ደስ ይለኛል፡፡
- በቃ እኔ አሁን መጥቼ እወስድዎታለሁ፡፡
[ክቡር ሚኒስትሩ ዘመዳቸው በገዛው መኪና ምሳ ወደሚበሉበት ቦታ መሄድ ጀመሩ]
- Advertisement -
- ክቡር ሚኒስትር እርስዎ እኮ በጣም ባለውለታዬ ነዎት፡፡
- ምን አደረግኩልህ ብለህ ነው?
- ኮሌጅ እስክጨርስ ድረስ እኮ የረዱኝ እርስዎ ነዎት፡፡
- ይህማ ግዴታዬ ነው፡፡
- ይኸው ሥራ ከገባሁ ጀምሮ አጠራቅሜ ይቺን መኪና ገዛሁ፡፡
- በጣም ቆንጆ መኪና ናት፡፡
- አመሰግናለሁ ክቡር ሚኒስትር፡፡
- ለመሆኑ የት ገዛሃት?
- ያው በደላላ ነዋ፡፡
- ምን?
- ከደላላ ውጪ ከየት አመጣታለሁ?
- መኪናውን ከሚያመጣው ኩባንያ ነዋ፡፡
- እነሱማ ዋጋቸው አይቀመስም፡፡
- እና በደላላ ነው የገዛኸው?
- አዎና ክቡር ሚኒስትር፡፡
- አሁኑኑ አውርደኝ ከዚህ መኪና ላይ፡፡
- ለምን ክቡር ሚኒስትር?
- መነካካት አልፈልግም፡፡
- ከማን ጋር ክቡር ሚኒስትር?
- ከደላላ ጋር፡፡
[አንድ ዳያስፖራ ለክቡር ሚኒስትሩ ደወለላቸው]
- ሰላም ክቡር ሚኒስትር፡፡
- እንዴት ነህ እባክህ?
- ዛሬ ምሳ ልጋብዝዎት ፈልጌ ነው፡፡
- ምን ተገኘ?
- በዚያው ይመርቁልኛል ብዬ ነው፡፡
- ምኑን?
- ቤቴን፡፡
- መቼ ገዛህ?
- ያው አገሬ ለመኖር ስለወሰንኩኝ አንድ ቤት ገዛሁ፡፡
- በጣም ጥሩ አድርገኸል፡፡
[ክቡር ሚኒስትሩ የዳያስፖራው ቤት ምሳ ለመብላት ሄዱ]
- ምግቡን ራስህ ነው እንዴ የምትሠራው?
- እኔ እኮ ውጭ ስለለመድኩት ችግር የለብኝም፡፡
- ሠራተኛ የለህም ማለት ነው፡፡
- እዚህ አገር እኮ የቤት ሠራተኛ ማግኘት አስቸጋሪ ነው፡፡
- ለምን ያስቸግራል?
- ደላሎቹ በጣም አስቸጋሪ ናቸው አሉ፡፡
- ወይ ደላላ?
- እንዴ ክቡር ሚኒስትር ይኼን ቤት ራሱ እንዴት ነው ያገኘሁት?
- ሠርተኸው መስሎኝ?
- ኧረ ገዝቼው ነው፡፡
- ከማን ነው የገዛኸው?
- ያው በደላላ በኩል ነዋ የገዛሁት፡፡
- እንዴ ደላላ የማይገባበት ነገር የለም ማለት ነው?
- ክቡር ሚኒስትር እዚህ አገር ሁሉ ነገር በደላላ ነው የሚገኘው፡፡
- እንዴ አገሪቷን ማን ነው እያስተዳደራት ያለው?
- እንዴት ክቡር ሚኒስትር?
- እኛ ነን ወይስ ደላላ?
[ክቡር ሚኒስትሩ ቢሯቸው ሲገቡ ለጸሐፊያቸው የክፍለ ከተማው ሥራ አስፈጻሚ ዘንድ ደውላ እንድታገናኛቸው ነገሯት፡፡ ደውላ አገናኘቻቸው]
- ፈለጉኝ ክቡር ሚኒስትር?
- ምን እየሠራችሁ ነው?
- ምን ሠራን ክቡር ሚኒስትር?
- በየመንገዱ የተለጠፉትን ማስታወቂያዎች አይተሃቸዋል?
- የምን ማስታወቂያ?
- የድለላ ሥራ ማስታወቂያ፡፡
- ምን ችግር አለው ታዲያ?
- አገር ውስጥ የለህም እንዴ?
- ኧረ አለሁ፡፡
- ደላላን ማስወገድ አለብን እያልን በየመንገዱ ማስታወቂያቸውን ሲለጥፉ ዝም ልንል?
- ክቡር ሚኒስትር የገባዎት አልመሰለኝም፡፡
- ምኑ?
- የድለላው ዓይነት፡፡
- ምንም ዓይነት ድለላ አንቀበልም፡፡
[ክቡር ሚኒስትሩ ከሾፌራቸው ጋር ወደ ቤት እየሄዱ ነው]
- እስቲ እባክህ ፈልግልኝ?
- ምን ክቡር ሚኒስትር?
- የቤት ሠራተኛ፡፡
- ምን ችግር አለ?
- ልታገኝልኝ ትችላለህ?
- አሁኑኑ ነዋ፡፡
- ከየት ታገኝልኛለህ?
- የትርፍ ጊዜ ሥራዬ ነው እኮ፡፡
- ምኑ?
- ድለላ!
