Friday, May 17, 2024
- Advertisement -
- Advertisement -

ማኅበራዊበወሰን ማስከበር ምክንያት በ4.7 ቢሊዮን ብር የሚካሄዱ የመንገድ ግንባታዎች እየተጓተቱ ነው

በወሰን ማስከበር ምክንያት በ4.7 ቢሊዮን ብር የሚካሄዱ የመንገድ ግንባታዎች እየተጓተቱ ነው

ቀን:

አዲስ አበባ ከተማ አስተዳደር በ4.7 ቢሊዮን ብር በጀት የሚገነባቸው ሁለት ግዙፍ የመንገድ ፕሮጀክቶች ውስጥ የሚገኙ የኤሌክትሪክ መስመሮች፣ በወቅቱ ባለመነሳታቸው ምክንያት እየተጓተቱ መሆኑ ታወቀ፡፡

      መነሻቸውን ከቃሊቲ የአሽከርካሪዎች ማሠልጠኛ አደባባይ በማድረግ በሁለት ኮሪደሮች ቃሊቲ-ቱሉዲምቱ አደባባይና ቃሊቲ-ቡልቡላ-ቂሊንጦ ድረስ የሚዘልቁት መንገዶች፣ ውላቸው ተፈርሞ ግንባታቸው የተጀመረው የካቲት 7 ቀን 2009 ዓ.ም. ነበር፡፡

      የሁለቱንም መንገዶች ግንባታ የተረከበው አዲስ አዳማ የፍጥነት መንገድን የገነባው የቻይናው ግዙፍ ኩባንያ ሲሲሲሲ ሲሆን፣ የግንባታው አጀማመርም ፈጣን የሚባል እንደሆነ ተገልጿል፡፡

- Advertisement -

ነገር ግን የአቃቂ ቃሊቲ ክፍለ ከተማ ከቦታው መነሳት ያለባቸውን ነዋሪዎች በወቅቱ ካሳና ምትክ በመስጠት ቢያነሳም፣ የኤሌክትሪክ ኃይል መስመሮች ግን በወቅቱ ባለመነሳታቸው ግንባታው እንደ አጀማመሩ ከመፍጠን ይልቅ እየተጓተተ መሆኑን ለማወቅ ተችሏል፡፡

የአቃቂ ቃሊቲ ክፍለ ከተማ ልማትና ማኔጅመንት ጽሕፈት ቤት ኃላፊ አቶ ሔኖክ አሥራት ለሪፖርተር እንደገለጹት፣ መንገዱ እጅግ አስፈላጊና መጠናቀቁ በጉጉት የሚጠበቅ ቢሆንም፣ የኢትዮጵያ ኤሌክትሪክ አገልግሎት መነሳት ያለባቸውን መስመሮች በወቅቱ እያነሳ ባለመሆኑ ፕሮጀክቱ በሚፈለገው ፍጥነት እንዳይሄድ አድርጎታል፡፡

‹‹95 በመቶ የሚሆነው የኤሌክትሪክ ምሰሶና መስመር አልተነሳም፡፡ ይህ የወሰን ማስከበር ሥራ በወቅቱ ባለመከናወኑ ፕሮጀክቱ እየተጓተተ ነው፤›› ሲሉ አቶ ሔኖክ ለሪፖርተር ገልጸዋል፡፡ የመንገድ ፕሮጀክቶቹን ግንባታ ለማስጀመር የመሠረት ድንጋይ በተጣለበት የካቲት 6 ቀን 2009 ዓ.ም. የአዲስ አበባ ከተማ አስተዳደር መንገዶች ባለሥልጣን ዋና ሥራ አስኪያጅ ሀብታሙ ተገኝ (ኢንጂነር) እንደተናገሩት፣ ፕሮጀክቶቹ በሦስት ዓመት ጊዜ ይጠናቀቃሉ፡፡

ነገር ግን የሚመለከታቸው ባለድርሻ አካላት ድጋፍ ከተጨመረበት  ከሦስት ዓመት ባነሰ ጊዜ የሚጠናቀቁበት ዕድል አለ ሲሉ ገልጸው ነበር፡፡ ነገር ግን የወሰን ማስከበር ሒደቱ እስካሁን ባለመጠናቀቁ ፕሮጀክቶቹ እያዘገሙ ነው፡፡

የኢትዮጵያ ኤሌክትሪክ አገልግሎት ዋና ሥራ አስፈጻሚ አቶ ጎሳዬ ተስፋዬ ለሪፖርተር እንደገለጹት፣ ሐሙስ መጋቢት 13 ቀን 2010 ዓ.ም. በሦስት አባላት የተዋቀረ ቡድን ወደ ቦታው ተሰማርቶ በ15 ቀናት ውስጥ ሥራው ይጠናቀቃል፡፡

የመንገድ ፕሮጀክቶቹ በአጠቃላይ 20.6 ኪሎ ሜትር ርዝመት ሲኖራቸው፣ ከላይና ከታች የትራፊክ ፍሰቱን የሚያስተናግድ አንድ አደባባይ፣ ሁለት ተሻጋሪ ድልድዮችና ሁለት 125 ሜትር ርዝመት ያላቸው ድልድዮች ያካትታል፡፡

በ40፣ በ50 እና በ60 ሜትር ስፋት የሚገነቡት መንገዶች ለአካባቢው ነዋሪዎችና ለኢንዱስትሪ ፓርኮች ከፍተኛ ጥቅም የሚሰጡ ከመሆናቸውም በላይ፣ ከፍጥነት መንገዱ ጋር የሚገናኙ ስለሆነም ለወጪና ገቢ ንግድ ትልቅ አስተዋጽኦ ይኖራቸዋል ተብሏል፡፡

 

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ