Thursday, October 6, 2022
ሌሎች ዓምዶች
    - Advertisement -
    - Advertisement -
    - Advertisement -

    ፌርማታ ፅሁፎች

    የኢትዮጵያ ንግድ ባንክ ወርቃማው ሕንፃ 50ኛ ዓመት

    ትኩስ ፅሁፎች

    ‹‹ግርማዊ ቀዳማዊ ኃይለ ሥላሴ ንጉሠ ነገሥት ዘኢትዮጵያ ለአገራቸው ልማትና ለሕዝባቸው ብልጽግናና ደህንነት ዛሬ ሕዳር 7 ቀን 1958 ዓ.ም. በ36ኛው ዘመነ መንግሥታቸው ይህን የባንክ ሕንፃ መርቀዋል፡፡›› ስድሳኛውን ዓመት እያከበረ ካለው የቀድሞው ቀዳማዊ ኃይለ ሥላሴ ቴአትር ቤት፣ ያሁኑ የኢትዮጵያ ብሔራዊ ቴአትር አቅራቢያ በሚገኘው ወርቃማውና አስደናቂው የኢትዮጵያ ንግድ ባንክ ሕንፃ ውስጣዊ ክፍል ውስጥ የሚገኝ ጽሑፍ ነው፡፡ የባንኩ ወርቃማ ሕንፃ ግንባታ ተጠናቅቆ የተመረቀበት 50ኛ ዓመት የወርቅ ኢዮቤልዩ ትናንትና ኅዳር 7 ቀን 2008 ዓ.ም. ላይ ውሏል፡፡ ‹‹የኢትዮጵያ የድል መታሰቢያ 25ኛው ዓመት›› ትልቅ መጽሐፍ ላይ እንደተገለጸው፣ የኢትዮጵያ መንግሥት ባንክ የተመሠረተው በ1934 ዓ.ም. ገደማ ሲሆን፣ መተዳደሪያው ቻርተር የተሰጠው ግን በ1945 ዓ.ም. ግድም ነው፡፡ መነሻ ሀብቱም አንድ ሚሊዮን የማሪያ ቴሬዛ ብር ነበር፡፡ አርባ ሠራተኞችን ይዞ ሥራውን ሲሠራ ቆይቶ፣ ታኅሣሥ 21 ቀን 1956 ዓ.ም. በብሔራዊ ባንክና በንግድ ባንክ ተከፍሎ ሥራውን ሲቀጥል በዚያን ጊዜ 902 ሠራተኞች በውስጡ ይሠሩ ነበር፡፡

    • ሔኖክ መደብር

    *********************

    ዋሸሁ

    ካንተ ተለይቼ .. እህልም አልበላ

          ብዬህ አልነበረም?

          ዋሸሁ በልቻለሁ

    ከተሸኘህ ወዲያ … ሳቅ ጨዋታ የለም

          ብዬህ አልነበረም?

    ሀሰት ነው ስቄአለሁ

          ከጎኔ ስትርቅ … ጤና ከየት መጥቶ

    ያልኩህ ሁሉ ሃሰት አልታመምኩም ከቶ

          ምድር ይጠበኛል …

    ሰው ይቸግረኛል … ብዬ እንዳልነበረ

          ቦታም አላነሰኝ

          ሰውም አልቸገረኝ

          ከሰው ጋር ’ውላለሁ

          ከሰው ጋር ’ስቃለሁ

                ከሰው ጋር …

                ከስው ጋር

    ከሰው ጋር ነው ያለሁ

    ከራሴ ጋር ብቻ ተለያይቻለሁ፡፡

    • ከብሩክታዊት ጎሳዬ፣ ጾመኛ ፍቅር፣ 2007 ዓ.ም.

    *************

    በዜጐች ለበጐ አድራጐት እጅ መዘርጋት ማይናማር የመጀመሪያዋ ለጋስ አገር ሆነች

    ቶምሰን ሮይተርስ ፋውንዴሽን ከጥቂት ቀናት በፊት ባወጣው ጥናት፣ ከዓለም አገሮች ማይናማር (በርማ) ለጋሷ ሆናለች፡፡ ማይናማር ይህን የአንደኝነት ደረጃ የያዘችው ከአሥር ዜጐቿ ዘጠኙ ለበጐ አድራጐት ሥራ እጃቸውን የሚዘረጉ በመሆኑ እንዲሁም ግማሽ ያህሉ ደግሞ ለበጐ አገልግሎት በፍቃደኝነት ጊዜአቸውን የሚሰጡ በመሆናቸው ነው፡፡

    በተቃራኒው ብሩንዲ ደግሞ ሉታኒያ፣ የመንና ቻይናን ተከትላ የመጨረሻዋ አገር ሆናለች፡፡

    *************

    ከሰርከስ ያመለጡት የሜዳ አህያዎች ለአንድ ሰዓት ያህል የትራፊክ ፍሰት አወኩ

    ዩኒቨርሳል ከተሰኘ የሰርከስ ማዕከል ያመለጡት ሁለት የሜዳ አህያዎች ለአንድ ሰዓት ያህል በፊላዴልፊያ ጐዳናዎች ሲንጐማለሉና ሲሮጡ የትራፊክ ፍሰት አውከው እንደነበር ሮይተርስ ዘግቧል፡፡ አንደኛው የሜዳ አህያ ከሁለት ማይል በላይ መሮጡ የተዘገበ ሲሆን፣ በመጨረሻ የሜዳ አህያዎቹ በፖሊስ ተይዘው ወደ ሰርከስ ማዕከሉ እንዲመለሱ ተደርጓል፡፡ የሜዳ አህያዎቹ እንዴት እንዳመለጡ ማወቅ ግን አልተቻለም፡፡

    *************

    የአሁኑ የኤሊኖ ተፅዕኖ በ15 ዓመት ውስጥ ከታየው ከባዱ ነው

    ኃይለኛ ድርቅ፣ ማዕበልና ጐርፍ እያስከተለ ያለው የኤሊኖ ክስተት፣ ባለፉት 15 ዓመታት ከታዩት ሁሉ የበረታ መሆኑን የዓለም ሜትሮሎጂ ድርጅት ሰኞ ዕለት ማስታወቁን ሮይተርስ ዘግቧል፡፡ ይህ የኤሊኖ ተፅዕኖ ከዓመቱ ማብቂያ (የፈረንጆች) በፊት ይበልጥ እንደሚጠነክርም ድርጅቱ አስታውቋል፡፡ ኤሊኖው ‹‹ምናልባት ከከባዶቹ ሦስት አልያም ሁለት አንዱ ይሆናል፡፡ ከባድ መሆኑን ግን በእርግጠኝነት መናገር ይቻላል›› ያሉት የድርጅቱ ዋና ፀሐፊ ሚሼል ጃራውድ ናቸው፡፡

    *************

    ዳላይላማ ለፓሪስ ስለመፀለይ

    ባለፈው ሳምንት በመቶዎች የሚቆጠሩን ሕይወት የቀጠፈውን የፓሪስ የሽብር ጥቃት ተከትሎ ብዙዎች ወዲያው የወሰዱት ዕርምጃ ፀሎት ነበር፡፡ የቲቤታዊው መንፈሳዊ መሪ ለፓሪስ ስለመፀለይ አስፈላጊነት በጀርመን ድምፅ ተጠይቀው የሰጡት መልስ ግን ‹‹ዓለም ሰው ሠራሽ ችግሮችን ለመፍታት ፈጣሪን መጠየቅ የለበትም›› የሚል ነው፡፡

    መንፈሳዊ መሪው አጥፍቶ ጠፊዎች አርቀው ማየት የማይችሉ በመሆናቸው የአጥፍቶ መጥፋት የቦንብ ጥቃቶች መብዛታቸውን ገልጸዋል፡፡ ‹‹በፀሎት አምናለሁ፡፡ ግን እንደዚህ ያሉ ችግሮችን በፀሎት መፍታት አንችልም፡፡ ይህን ችግር ፈጣሪ እንዲፈታው መጠበቅ ምክንያታዊ አይደለም›› ብለዋል፡፡

     

    - Advertisement -
    - Advertisement -

    ተጨማሪ ለማንበብ

    በብዛት የተነበቡ ፅሁፎች