Sunday, June 23, 2024
- Advertisement -
- Advertisement -

“በአሁኑ ዘመን ሥራ ፈጣሪ እንጂ ፈላጊ መሆን አያዋጣም” ሜጀር ጄኔራል መርደሳ ሊሊሳ

ሜጀር ጄኔራል መርደሳ ሊሊሳ የቀድሞው 18ኛ ተራራ ክፍለ ጦር አዛዥ የነበሩ ሲሆን በአሁኑ ጊዜ የዚሁ ክፍለ ጦር ብርሃን የመረዳጃ ዕድር የበላይ ጠባቂ ናቸው፡፡ ዕድሩ በሀዘንና በችግር ጊዜ ከመረዳዳት አልፎ በበጎ አድራጎት ተግባርና በሥራ ዕድል ፈጠራ ተሰማርቶ ማኅበራዊ አገልግሎት በማበርከት ላይ ይገኛል፡፡ በዕድሩ አመሠራረትና በማኅበራዊ አገልግሎቱ ዙሪያ  ታደሰ ገብረ ማርያም አነጋግሯቸዋል፡፡

ሪፖርተር፡- የዕድሩን አመሠራረትና አሁን ያለበትን ደረጃ ቢያስረዱን?

ሜጀ.ጄ መርዳሳ፡- ሰራዊቱ በቀድሞው ሥርዓት ከ29 ብሔር ብሔረሰቦች ተውጣጥቶ የተቋቋመ ነበር፡፡ በወቅቱ ከነበረውም መንግሥት የላቀ የጦር ሜዳ ሜዳይ ብቸኛ ተሸላሚ ለመሆን በቅቷል፡፡ የኅብረተሰቡን ሰብዓዊ መብት የሚያስከብር፣ የሕግ ጥሰቶችን የሚቃወም፣ የማንንም ሀብትና ንብረት የማይነካ ሰራዊት በመሆኑ ከፍተኛ የሆነ የሕዝብ ፍቅርና አመኔታን ያተረፈ ነበር፡፡ በ1982 ዓ.ም. ከመንግሥት ለውጥ በኋላ የተበታተነና ዕድል ወደመራበት አቅጣጫ እንጀራ ፍለጋ ያቀና ቢሆንም ከዛሬ ዘጠኝ ዓመት በፊት በዕድር ለመሰባሰብ በቅቷል፡፡ ዕድሩም ጉዳዩ ከሚመለከተው መንግሥታዊ አካል ሕጋዊ እውቅና አግኝቷል፡፡ ከዚህም ሌላ “ካክራ” በሚል መጠሪያ የሚታወቅ የጥበቃ የሰው ኃይል አቅርቦትና የፅዳት አገልግሎት አክሲዮን ማኅበር አቋቁሞ ወደ ሥራ ገብቷል፡፡ አክሲዮን ማኅበሩ በአሁኑ ጊዜ ከ100 በላይ ለሚሆኑ ወገኖች የሥራ ዕድል ፈጥሯል፡፡ የተቋቋመውም በኢትዮጵያ ንግድ ሕግ መሠረት የሚፈለግበትን ሁሉ ከሚመለከታቸው መንግሥታዊ አካላት አሟልቶና ፈቃድ ተሰጥቶት ነው፡፡ ከዚህም ሌላ የራሱ ራዕይ፣ ተልዕኮና እሴት ያለው ሲሆን ለዚህም ስኬታማነት ሌት ተቀን ይጥራል፡፡

ሪፖርተር፡- ካክራ ማለት ምን ማለት ነው? ይኼንንስ ስያሜ ለምን ተመረጠ?  

ሜጀ.ጄ መርዳሳ፡- “ካክራ” የሚለውን ቃል የተሰማ ሃብተሚካኤል ከሰቴ ከፍተኛ የአማርኛ መዝገበ ቃላት “ጠንካራ፣ ጎበዝ፣ የማይዝል” ሲል ይገልጸዋል፡፡ ከዚህ አንጻር ካክራ የጥበቃ የሰው ኃይል አቅርቦትና የፅዳት አገልግሎት አክሲዮን ማኅበር እንደ መጠርያው ጠንካሮች፣ የማይዝሉ፣ የማይደክሙና ጎበዝ የሆኑ የጥበቃና የጽዳት አገልግሎት የሚሰጡ ሥራ ፈላጊዎችን አሰልጥኖ ብቁ በማድረግ ለመንግሥታዊና መንግሥታዊ ላልሆኑ ድርጅቶች፣ ለኤምባሲዎች፣ ለባንኮች፣ ለኢንሹራንስ ድርጅቶች፣ ለፋብሪካዎች፣ ለባለ ኮከብ ሆቴሎች፣ ለካፍቴሪያዎች፣ ለኮንስትራክሽን ድርጅቶች እና ለመኖሪያ ቤቶች አስተማማኝ ጥበቃና የፅዳት አገልግሎት ለሚፈልጉ ሁሉ በሙያው ብቃት ያለውና በሥነ ሥርዓት የሰለጠነ የሰው ኃይል ለማቅረብ የተቋቋመ ነው፡፡ የአክሲዮን ማኅበሩ መሥራች አባላትም የተለያየ የትምህርት ደረጃ ያላቸው፤ በተለያየ የሙያ ዘርፍ በአገር ውስጥና በውጭ አገር የሰለጠኑና በማሰልጠን፣ በማስተባበር፣ በመምራትና በማስተማር በቂ ልምድ ያላቸው ናቸው፡፡

ሪፖርተር፡- ዓላማውን፣ ተልዕኮውንና እሴቱን በአጭሩ ሊነግሩን ይችላሉ?

ሜጀ.ጄ መርዳሳ፡- በአዲስ አበባም ሆነ በክልሎች ለሚገኙና በአጠቃላይ ሙያችንን ለሚፈልጉ ተቋማት ሁሉ የሰለጠነ የጥበቃና የፅዳት አገልግሎት የሚሰጥ የሰው ኃይል በማቅረብ የደንበኞቻችንን እርካታ፣ እፎይታና ደስታ ማግኘት የዕድሩ ዓላማ ሲሆን ተልዕኮው ደግሞ ዘመኑ በፈጠረው ቴክኖሎጂ በመታገዝ የደንበኞችን ንብረትና ሕይወት ሊደርስ ከሚችል አደጋና ጉዳት ከመንግሥት የፀጥታና የጥበቃ ኃይሎች ጋር በመተባበር ወንጀልን ለመቀነስ ብሎም ለማጥፋት መሥራት ነው፡፡ እሴቱም ከምን ጊዜም በላይ የደንበኞቹን ንጉሥነት አምኖ የተቀበለ መሆኑ ነው፡፡ በዚህም ለደንበኞች ታዛዥነትን፣ ሚስጥር ጠባቂነትን፣ ታማኝነትን፣ ለሥራ ተነሳሽነትን፣ ፍጥነትን፣ ጥንቃቄን፣ ግልጽነትና ትህትናን የተላበሰ የጥበቃ ኃይል ያቀርባል ብለን እናስባለን፡፡

ሪፖርተር፡-  የዕድሩን የወደፊት ትልም፣ ለአባላቱ የሚያደርገውን ድጋፍና ማኀበራዊ ኃላፊነቱን ለመወጣት እያደረገ ያለውን ጥረት ቢገልጹልን?

ሜጀ.ጄ መርዳሳ፡-  ዕድሩ አቅሙን በማጎልበት በሰፋፊ የልማት ሥራዎች ላይ የመሳተፍና የክፍለ ጦሩን ታሪክ የሚያወሳ መጽሐፍ የማሳተም ሐሳብ ሰንቋል፡፡ ለተግባራዊነቱም ኮሚቴ አቋቁሞ መረጃዎችን በማሰባሰብ ላይ ይገኛል፡፡ እንዲሁም የዕድሩ አባል ሀዘን ሲያጋጥመው ከሚደረግለት ድጋፍ ባሻገር በጤንነት መታወክ ሳቢያ ሆስፒታል ከገባ ቢያንስ ለሦስት ወራት ያህል የሕክምናውን ወጪ ይሸፍናል፡፡ ይህም እውን የሚሆነው አባሉ አቅም የሌለውና በዚህም የተነሳ ድጋፍ የሚያስፈልገው ሆኖ ከተገኘ ነው፡፡ ዕድሩ ለህዳሴ የኤሌክትሪክ ኃይል ማመንጫ ግንባታ አምስት ሺሕ ብር ኩፖን በመግዛት አሻራውን አኑሯል፡፡ በሁለት ትምህርት ቤቶች ለሚገኙ 30 ችግረኛ ተማሪዎች የትምህርት መርጃ መሳሪያና የምሣ አቅርቦት ድጋፍ እያደረገ ይገኛል፡፡ ዕድሩ አባቶቻቸው የሞቱባቸውን ልጆችም ያስተምራል፡፡ ለዚህም የሚያስፈልገውን ወጪ የሚሸፍነው ከዕድሩ አባላት መዋጮ ሲሆን ገንዘቡንም ገቢ የሚያደርጉት ከወርሃዊ የአባልነት ክፍያ ጋር አጠቃልለው ነው፡፡ ደጋፊ በማጣት ለችግር ለተዳረጉ አቅመ ደካማ አረጋውያን የአልባሳትና የገንዘብ ልገሳ ያደርጋል፡፡ ጥቅምት 28 ቀን 2008 ዓ.ም. ዕድሩ የተመሰረተበትን በዓል ሲያከብር፣ የመረዳጃ ዕድሩን ለማቋቋምና ለማደራጀት ከፍተኛ አስተዋጽኦ ያበረከቱ አባላት ተሸልመዋል፡፡ የዕድሩ አባላትና ቤተሰቦቻቸው እርስ በርሳቸው እንዲተዋወቁ ለማድረግ ተሞክሯል፡፡ ይህም ሁኔታ ዕድሩን የበለጠ ያጠናክረዋል የሚል ዕምነት አሳድሮብናል፡፡

ሪፖርተር፡- ለአረጋውያን ዕርዳታው የሚሰጣቸው የመንከባከቢያ ማዕከል በማቋቋም ነው ወይስ ከዚህ በተለየ መልኩ ነው?

ሜጀ.ጄ መርዳሳ፡-  ዕርዳታውን ለጊዜው የምንሰጠው ባሉበት ቦታ ሆነው ወይም በልመና በተሰማሩበት የዕምነት ተቋም ዘንድ ድረስ በመሄድ ነው፡፡ በዚህ መልኩ እምንረዳቸው አረጋውያን ወደ 40 ይጠጋሉ፡፡ መጠለያ አዘጋጅቶ ለመንከባከብ በቂ የሆነ የገንዘብ አቅም ይጠይቃል፡፡ ይህን ለማድረግ የማያቋርጥ የገቢ ምንጭ መፍጠር ግድ ይላል፡፡ በማዕከል አሰባስቦ መርዳት በረጅሙ ዕቅዳችን ውስጥ ያካተትነው ተግባር ነው፡፡ ለአረጋውያኑ አሁን ባሉበት ቦታ ድረስ እየሄዱ ዕርዳታ መስጠት ለዕቅዳችን ስኬታማነት መንደርደሪያ ይሆነናል ብለን እናስባለን፡፡ ለዚህም በበጎ አድራጎት ሥራ ላይ ጠንከር ያሉ ተግባር ከሚያከናውኑ ሌሎች ዕድሮች ልምድና ተሞክሮ እየቀሰምን ነው፡፡

ሪፖርተር፡- የዕድሩ አባላት የትምህርት ስብጥራቸው እንዴት ይታያል?

ሜጀ.ጄ መርዳሳ፡- በዕድሩ የታቀፉት አባላት በሙሉ ባለትዳርና የልጆች አባት ናቸው፡፡ ብዙዎቹም በማኔጀመንት፣ በምህንድስና እንዲሁም በልዩ ልዩ የትምህርት መስኮች ቢያንስ የመጀመሪያ ዲግሪ ያላቸው ይገኙባቸዋል፡፡

ሪፖርተር፡- ዕድሩ ያጋጠመው ችግርና ከመንግሥት የተደረገለትን ድጋፍ ሊነግሩን ይችላሉ?

ሜጀ.ጄ መርዳሳ፡-  ከመንግሥት ከፍተኛ የሆነ እገዛና ትብብር ነው የተደረገለን፡፡ ሕጋዊ ዕውቅና ለማግኘት ሰዓታት አልፈጀብንም፡፡ ዕድሩ የሚገኝበት ክፍለ ከተማም ሆነ ወረዳ መስተዳድር ጽሕፈት ቤት እንዲሁም ፖሊስ ለስብሰባ አዳራሽ በመፍቀድና ሁኔታዎችን በማመቻቸት ከጎናችን አልተለዩም፡፡ በተረፈ ዕድሩ እንደማንኛውም ዕድር እየተንቀሳቀሰ ነው፡፡ ያጋጠመው ችግር ቢኖር ያቋቋመው አክሲዮን ማኅበር በብዙ መንግሥታዊና መንግሥታዊ ባልሆኑ ድርጅቶች ዘንድ በስፋት አለመተዋወቁ ነው፡፡ ይህም ሆኖ ግን የሥራ ዕድል የማግኘት ዕድሉ እየተሳካልን ነው፡፡ በብዛትና በሰፊው ሲተዋወቅ ደግሞ ሥራ የማግኘት ሁኔታ እያደገ ይመጣል የሚል ዕምነት አለን፡፡ በአክሲዮኑ ጽሕፈት ቤት በልዩ ልዩ የሥራ ክፍል ተመድበው የሚያገለግሉትም በትምህርታቸው ቢያንስ የመጀመሪያ ዲግሪ ያላቸው፣ በልዩ ልዩ ሙያ የሰለጠኑ በሳልና ኃላፊነት የሚሰማቸው አመራሮች ናቸው፡፡

ሪፖርተር፡- የጥበቃ የሰው ኃይል አቅርቦትና የፅዳት አገልግሎት አክሲዮን ማኅበርን ለማቋቋም ያነሳሳችሁ ምክንያት ምንድነው?

ሜጀ.ጄ መርዳሳ፡- በአሁኑ ዘመን ሥራ ፈጣሪ እንጂ ፈላጊ መሆን ምንም አያዋጣም፡፡ አገሪቷን ከተዘፈቀችበት የድህነት አረንቋ ለመውጣት ወይም ለመላቀቅ ከሚቻልባቸው እንቅስቃሴዎች መካከል አንደኛው ዜጎች ሥራ ፈጠሪ ሆነው ሲገኙ ነው፡፡ ከዚህ ግንዛቤ በመነሳትና ሥራ አጥ አባሎቻችንም የሥራ ዕድል እንዲያገኙ በማሰብ አክሲዮን ማኅበሩን  ለማቋቋም በቅተናል፡፡

ተዛማጅ ፅሁፎች

- Advertisment -

ትኩስ ፅሁፎች ለማግኘት

በብዛት የተነበቡ ፅሁፎች

ተዛማጅ ፅሁፎች

ለቀድሞ የኢትዮጵያ ጦር ሠራዊት የቆመው የብርጋዲየር ጄኔራል ለገሠ ፋውንዴሽን

የቀድሞ የኢትዮጵያ የጦር ሠራዊት አባላት ለአገራቸው የሕይወት መስዋዕትን ለመክፈል የወደዱ፣ ለአገራቸው ክብር ዘብ የቆሙና ውለታን የዋሉ ናቸው፡፡ እነኚህ የአገር ጌጦች በአገሪቱ በተከሰተው የሥርዓት ለውጥ...

ገደብና አፈጻጸም የሚሹ የአየር ሙቀት መጠንና የካርቦን ልቀት

የአየር ንብረት ቀውሱን ለመቋቋም የዓለም ከተሞች ከንቲባዎችን የሚያስተሳስረው ቡድን (ግሩፕ) ሲ-40 (C-40) ተብሎ ይታወቃል፡፡ ከተቋሙ ድረ ገጽ መገንዘብ እንደሚቻለው፣ አዲስ አበባን ጨምሮ የ40ዎቹ ከተሞች...

ሕፃናትን ከመስማት ችግር የሚታደገው የቅድመ ምርመራ ጅማሮ

‹‹መስማት ለኢትዮጵያ›› በጎ አድራጎት ማኅበር በጨቅላ ሕፃናት ደረጃ የመስማት ችግር እንዳይከሰትና በሕክምናውም ዙሪያ በዘመኑ ሕክምና መሣሪያዎች በመታገዝ ሕክምና ለመስጠት ሚያዝያ 2014 ዓ.ም. የተመሠረተ ነው፡፡...