Tuesday, November 29, 2022
ሌሎች ዓምዶች
    - Advertisment -
    - Advertisment -

    በዓለም ዙሪያ እየተፈጸሙ ያሉ የሽብር ድርጊቶች የማንቂያ ደወል ናቸው!

      በሶማሊያ፣ በኬንያ፣ በናይጄሪያና በተለያዩ የአፍሪካ አገሮች በሰብዓዊ ፍጡራን ላይ የሽብር ጥቃቶች ተፈጽመው ብዙዎች ንፁኃን ለሕልፈት ተዳርገዋል፡፡ በሰሜን አፍሪካና በመካከለኛው ምሥራቅ በሽብርተኞች እጅ ንፁኃን ተፈጅተዋል፡፡ በእንግሊዝ፣ በሩሲያ፣ በስፔን፣ በቱርክና በሆላንድ የሽብር ጥቃቶች ተፈጽመዋል፡፡ በፈረንሣይ በአንድ ዓመት ውስጥ ሁለት ጊዜ በተፈጸሙ ጥቃቶች ንፁኃን አልቀዋል፡፡ በዓለም ዙሪያ በተደጋጋሚ እየተፈጸሙ ያሉ የሽብር ድርጊቶች እንዲህ ከመግነናቸው በፊት፣ አገራችን የሽብር ጥቃት ሰለባ እንደነበረች አይዘነጋም፡፡ አሁን ደግሞ በስፋት አገሮችን እያዳረሰ ያለው ይህ አስከፊ ድርጊት የማንቂያ ደወል ሊሆን ይገባል፡፡

    በአሁኑ ጊዜ ሽብርተኝነት የዓለም ትልቁ ሥጋት ሆኗል፡፡ ሽብርተኞች ሃይማኖትንና ፖለቲካን ከለላ በማድረግ ዓላማቸውን በኃይል ለማስፈን በሚያደርጉት እንቅስቃሴ ዒላማዎቻቸው ንፁኃን ሲቪሎች ናቸው፡፡ የሶማሊያው አልሸባብ፣ የናይጄሪያው ቦኮ ሐራም፣ የአፍጋኒስታንና የፓኪስታን ታሊባን፣ ከየመን እስከ ኢራቅ የሚንቀሳቀሰው አልቃይዳ፣ እንዲሁም በመካከለኛው ምሥራቅ በመንሰራፋት ላይ ያለው ኢስላሚክ ስቴት (አይኤስ) የሚፈጽሙዋቸው የሽብር ድርጊቶች በሙሉ በንፁኃን ላይ ያነጣጠሩ ናቸው፡፡ በቅርቡ ከተፈጸሙት ዘግናኝ የሽብር ድርጊቶች በግብፅ ሲናይ አየር ላይ በአሸባሪዎች በተጠመደ ቦምብ በጋየው የሩሲያ የመንገደኞች አውሮፕላን 224 ንፁኃን ሩሲያውያን አልቀዋል፡፡ በቤይሩት በተፈጸመ የቦምብ ጥቃት ከ40 በላይ ንፁኃን ተገድለዋል፡፡ በፈረንሣይ አሸባሪዎች በፈጸሙት ጥቃት 129 ንፁኃን ሞተዋል፡፡ ሁሉም ንፁኃንና ሲቪሎች ናቸው፡፡

    ባለፉት ዓመታት በአንፃራዊ ሁኔታ የተረጋጉ ነገር ግን በአምባገነን መንግሥታት ይተዳደሩ የነበሩ አገሮች የሽብርተኞች መናኸሪያ ሆነዋል፡፡ ከሁለት አሥርት ዓመታት በላይ መንግሥት አልባ የሆነችው የዚያድ ባሬ ሶማሊያ የአልሸባብ መጫወቻ ነበረች፡፡ በሳዳም ሁሴን የብረት መዳፍ ውስጥ የነበረችው ኢራቅ የአልቃይዳ ሰለባ ሆናለች፡፡ አሁን ደግሞ አይኤስ አበሳዋን ያሳያታል፡፡ በሙአመር ጋዳፊ አምባገነናዊ አገዛዝ ስትረገጥ የኖረችው ሊቢያ ሽብርተኞች ይፈነጩባታል፡፡ በአል አሳድ ቤተሰቦች ቁጥጥር ሥር የነበረችው ሶሪያ ወድማለች፡፡ አሸባሪዎች ነግሠውባታል፡፡ የአብደላ ሳላህ የመን ተንከታኩታለች፡፡ እዚህም የሽብር ኃይሎች አሉ፡፡ ለዚህ ሁሉ ትልቁ ችግር ምዕራባውያን አገሮች አምባገነኖችን ለማስወገድ ባደረጉት ጣልቃ ገብነት፣ በሰከነ ሁኔታ ችግሮችን ለመፍታት አለመቻላቸው ነው፡፡ በጥድፊያ አምባገነኖቹ እንዲወርዱ ከተደረገ በኋላ ክፍተቱ ባለመሞላቱ አገሮቹ የአሸባሪዎች መፈንጫ ሆነዋል፡፡

    በየቦታው የተለያዩ የፖለቲካ አጀንዳዎችን ይዘው የተነሱ የሽብር ቡድኖች ሃይማኖትን ከለላ ቢያደርጉም፣ በሰብዓዊ ፍጡራን ላይ በሚጽሙት ጭፍጨፋ ምክንያት ይወገዛሉ፡፡ የፈለገውን ያህል አጀንዳ ወይም ዓላማ ይኑራቸው ንፁኃንን ዒላማ ማድረጋቸውና አውዳሚነታቸው ይኮነናል፡፡ አይኤስ የተባለው ሽብርተኛ ቡድን በኢትዮጵያውያን ወገኖቻችን ላይ በሊቢያ የፈጸመው ዘግናኝ ጭፍጨፋ፣ አልሸባብ በሶማሊያና በኬንያ በተደጋጋሚ በንፁኃን ላይ የፈጸመው እልቂት፣ ቦኮ ሐራም በናይጄሪያ  ሲቪሎች ላይ ብቻ ያነጣጠረው ፍጅቱ፣ ወዘተ የሽብርን አስከፊነት ያሳያል፡፡ በመካከለኛው ምሥራቅም ሆነ በአውሮፓ ንፁኃንን ዒላማ ያደረጉ ጥቃቶችም እንዲሁ፡፡ እነዚህን ችግሮች ከአገራችን ተጨባጭ ሁኔታ አንፃር መመልከት አለብን፡፡

          ቀደም ተብሎ ለመጥቀስ እንደተሞከረው ከዓመታት በፊት ኢትዮጵያ ውስጥ በተለያዩ ሥፍራዎች የሽብር ተግባራት ተፈጽመዋል፡፡ የብዙዎቹ ጥቃቶች መነሻ ደግሞ መንግሥት አልባዋ ሶማሊያ ነበረች፡፡ የኢትዮጵያ መንግሥት በሶማሊያ ውስጥ ባደረጋቸው የተለያዩ ወታደራዊ ዘመቻዎች የሽብር ጥቃቱን ማስቆም ችሏል፡፡ ኬንያ በተለይ በአልሸባብ በተደጋጋሚ ጥቃት ሲፈጸምባት፣ ኢትዮጵያ ላይ መቃጣት አለመቻሉ የእነዚህ ዘመቻዎች ውጤት ነው፡፡ አልፎ አልፎ በምዕራባውያን የሚወጡ የሽብር ማስጠንቀቂያዎች ቢኖሩም፣ የአገሪቱ ፀጥታ በአስተማማኝነት ቀጥሏል፡፡ ይህ በጣም አኩሪ ጠንካራ ጎን በተከታታይና ዘላቂ በሆኑ አሠራሮች ካልታገዘ ችግር ይኖራል፡፡ አልሸባብ በተደጋጋሚ በደረሰበት ምት ቢመናመንም፣ አልቃይዳንና አይኤስን ከመሳሰሉ አሸባሪዎች ጋር ትስስር ስላለው አያገግምም ማለት የዋህነት ነው፡፡ ይልቁንም የተዳከመ መስሎ በማዘናጋት በሚወስደው ድንገተኛ ጥቃት መጠነ ሰፊ የሆነ የሽብር ተግባር ሊፈጽም ይችላል፡፡ ለዚህ ተግባር ደግሞ ከጎኑ የሚሠለፉ ይጠፋሉ ማለት አይቻልም፡፡

          አይኤስ የተባለው የሽብር ቡድን በሚያሰራጨው ፕሮፓጋንዳ የተወናበዱ የዋሆችና በአስተምህሮው የተማረኩ ተከታዮች፣ ለተፍረከረከው አልሸባብ ዳግሞ ማንሰራራት አስተዋጽኦ ሊያበረክቱ ስለሚችሉ ሊታሰብበት ይገባል፡፡ ለዚህ ትልቁ ተግባር መሆን ያለበት በሶማሊያ ውስጥ ያለውን መንግሥት ማጠናከር፣ የሲቪልና የደኅንነት ተቋማቱን በብቃት ማደራጀት፣ ወታደራዊ ክፍሉን በሰው ኃይልና በቁሳቁስ ብቁ ማድረግ፣ የሶማሊያ ወጣቶች የአልሸባብ ፕሮፓጋንዳ ሰለባ እንዳይሆኑ መሥራት፣ ወዘተ ተግባራት በኢትዮጵያ አስተባባሪነት በኢጋድ አባል አገሮች ተፈጻሚ እንዲሆኑ ማድረግ የግድ ይላል፡፡ በሶማሊያ ሲቪሉን ሕዝብ መልሶ በማቋቋም ሥራ መፍጠር፣ ትምህርት ቤቶችን በብዛት መክፈት፣ የመሠረተ ልማት ግንባታዎችን በስፋት ማከናወንና የመሳሰሉት ልማቶች መካሄድ አለባቸው፡፡ ሰላምና መረጋጋት የሚኖረው ልማትና ዴሞክራሲ ሲሰፍኑ እንጂ በድህነት ውስጥ አይደለም፡፡

          በሌላ በኩል በአገር ውስጥ እንደተለመደው የመከላከያ ሠራዊቱም ሆነ የፀጥታ ኃይሎች የማያቋርጥ የሰላም ማስከበር ተግባራቸውን ይቀጥሉ፡፡ ሲቪሎችን ዒላማ ያደረጉ ጥቃቶች በየትኛውም ሥፍራና ጊዜ ሊከሰቱ ስለሚችሉ የጥንቃቄና የዝግጁነት ተግባሩ ደረጃው ከፍ ማለት አለበት፡፡ በተለይ እንደ ኤርትራ ካለ መንግሥት ጋር ‹ሰላምም የለ ጦርነትም የለ› ዓይነት ለዓመታት የዘለቀው የድንበር ፍጥጫ ለሽብርተኞች አመቺ ሁኔታ ሊፈጥር ስለሚችል መፍትሔ ይፈለግለት፡፡ በአገር ውስጥ ካሉ ሰላማዊ የፖለቲካ ኃይሎች ጋር በብሔራዊ ጉዳዮች ላይ መግባባት ሊፈጥሩ የሚችሉ መድረኮች ይዘጋጁ፡፡ በሽብርተኝነት ላይ ተመሳሳይ አቋም መኖር ካልቻለ ጥሩ አይደለም፡፡ ብሔራዊ መግባባት መፈጠር አለበት፡፡ በሃይማኖትም ሆነ በፖለቲካ አመለካከት ልዩነት ምክንያት በሚፈጠር ሽኩቻ ለሽብርተኞች ክፍተት እንዳይፈጠር ይታሰብበት፡፡ ለዚህ ደግሞ መልካም አስተዳደር ማስፈን፣ ሙስናን በፅናት መታገል፣ ፍትሕን ለሁሉም በእኩልነት ማረጋገጥ፣ ዴሞክራሲን ማስፈንና ሰብዓዊ መብትን ማክበር ይታሰብባቸው፡፡ በሽብርተኞች ጥቃት ንፁኃን ማለቅ የለባቸውም፡፡ በዓለም ዙሪያ እየተፈጸሙ ያሉ የሽብር ድርጊቶችም የማንቂያ ደወል ናቸው!  

    በብዛት የተነበቡ ፅሁፎች

    ‹‹ከገበሬው እስከ ሸማቹ ያለውን የንግድ ቅብብሎሽ አመቻቻለሁ›› ያለው ፐርፐዝ ብላክ ውጥኑ ከምን ደረሰ?

    ከመቼውም ጊዜ በላይ በአሁኑ ወቅት በኢትዮጵያ በተደጋጋሚ የሚሰማ አንድ...

    ከመሬት ለአራሹ ወደ ደላላ የዞረው የመሬት ፖለቲካ

    ጠቅላይ ሚኒስትር ዓብይ አህመድ (ዶ/ር) በአንድ ወቅት ለመጀመርያ ጊዜ...

    ኢትዮጵያ በብድርና ዕርዳታ የምታገኘው ገንዘብ ለታለመለት ዓላማ እንዲውል ፓርላማው አሳሰበ

    በብድር የተገኘ ገንዘብ በሥልጠናና ውሎ አበል መልክ እንዳይባክን ተጠየቀ የሕዝብ...
    - Advertisment -

    ትኩስ ፅሁፎች

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...

    ከመሬት ለአራሹ ወደ ደላላ የዞረው የመሬት ፖለቲካ

    ጠቅላይ ሚኒስትር ዓብይ አህመድ (ዶ/ር) በአንድ ወቅት ለመጀመርያ ጊዜ...
    spot_img

    ተዛማጅ ፅሁፎች

    መንግሥት ለአገር የሚጠቅሙ ምክረ ሐሳቦችን ያዳምጥ!

    በሕዝብ ድምፅ የተመረጠ መንግሥት ለሕዝብ የሚጠቅሙ ሐሳቦችን የማዳመጥ ኃላፊነት አለበት፡፡ ሥራውን ሲያከናውንም በግልጽነት፣ በተጠያቂነትና በኃላፊነት መርህ መመራት ይኖርበታል፡፡ እያንዳንዱ ዕርምጃው በሕግ ከተሰጠው ኃላፊነት አኳያ...

    የሰላም ስምምነቱ ተግባራዊ ይደረግ!

    የሰላም ስምምነቱ ‹‹ታጥቦ ጭቃ›› ሊሆን የሚችልባቸው ምልክቶች እየተስተዋሉ ነው፡፡ ሚሊዮኖችን ለዕልቂት፣ ለመፈናቀል፣ ለከፍተኛ ሰብዓዊ መብት ጥሰትና መሰል ሰቆቃዎች የዳረገው አውዳሚ ጦርነት በፕሪቶሪያው ስምምነት መሠረት...

    ዘረፋ የሚቆመው በተቋማዊ አሠራር እንጂ በዘመቻ አይደለም!

    ኢትዮጵያ ውስጥ ሌብነት ከመንግሥት አቅም በላይ ሆኖ ለያዥ ለገናዥ ሲያስቸግር ከማየት በላይ አሰቃቂ ነገር የለም፡፡ በፌዴራል፣ በክልሎችና በከተማ አስተዳደሮች መረን የተለቀቀው ሌብነት አስነዋሪ መሆኑ...