Monday, November 28, 2022
ሌሎች ዓምዶች
    - ማስታወቂያ -
    - ማስታወቂያ -

    የቻይና ባቡር ኮርፖሬሽን የዕርዳታ እህል እንዲያጓጉዝ ኮንትራት ተሰጠው

    - ማስታወቂያ -

    ተዛማጅ ፅሁፎች

    – በወለንጪቲ አካባቢ ግዙፍ መጋዘን እንዲገነባ ታዟል

    በጂቡቲ ወደብ እየገባ የሚገኘውን የዕርዳታ እህል በማጓጓዝ በራሱ ጊዜያዊ መጋዘኖች እንዲያደርስ፣ የቻይና ሬልዌይ ኢንጂነሪንግ ኮርፖሬሽን ኮንትራት ተሰጠው፡፡

    የኩባንያው የሰው ሀብት አስተዳደር ኃላፊ ሚስተር ሊ ዊይ ለሪፖርተር እንደገለጹት፣ በድርቁ ምክንያት የሎጂስቲክ ዘርፉን ለመምራት የተቋቋመው አራት ተቋማትን ያካተተው ኮሚቴ የሎጂስቲክስ ሥራውን የቻይና ሬል ዌይ ኢንጂነሪንግ ኮርፖሬሽን እንዲያከናውን ተወስኗል፡፡

    የኢትዮጵያ ምድር ባቡር ኮርፖሬሽን፣ የኢትዮጵያ ባህር ትራንስፖርት ሎጅስቲክስ ኢንተርፕራይዝ፣ የኢትዮጵያ  ገቢዎችና ጉምሩክ ባለሥልጣንና የኢትዮጵያ እህል ንግድ ድርጅት ከቻይና ሬልዌይ ኢንጂነሪንግ ኮርፖሬሽን ጋር በቅርቡ ባደረጉት ውይይት ውሳኔው መተላለፉን ሚስተር ሊ ገልጸዋል፡፡

    የሎጂስቲክስ አገልግሎቱ እየተጠናቀቀ በሚገኘው የአዲስ አበባ-ጂቡቲ የባቡር መስመርን በመጠቀም፣ ወደብ የደረሰውን የአስቸኳይ የምግብ ዕርዳታ በናዝሬትና በወለንጪቲ ከተማ መካከል በምትገኘው መርመርሳ አካባቢ ማድረስ ነው፡፡

    የቻይና ሬልዌይ ኢንጂነሪንግ በመርመርሳ የሚገኘውን የባቡር መስመር ግንባታ ጣቢያው ግቢ ውስጥ የሚገኝ መሬት ላይ ጊዜያዊ መጋዘኖችን እየገነባ ሲሆን፣ እስካለፈው ቅዳሜ ኅዳር 11 ቀን 2008 ዓ.ም. ድረስ ሦስት ሰፋፊ መጋዘኖችን በተባለው ቀን ወደ አካባቢው ለሚደርስ የአስቸኳይ የምግብ ዕርዳታ ተሰናድቷል፡፡

          ከዚህ በተጨማሪም በዚያው አካባቢ ግዙፍ መጋዘን እንዲገነባና ዲዛይኑንም ራሱ እንዲያቀርብ ታዟል፡፡ የቻይና ሬልዌይ ኢንጂነሪንግ ኮርፖሬሽን ከአዲስ አበባ ሚኤሶ ድረስ ያለውን የባቡር መስመር እየገነባ የሚገኝ ሲሆን፣ ይህንን የሎጂስቲክስ አልግሎት እንዲሰጥ የተመረጠው በቻይና የሚገኘው እናት ድርጅቱ በዘርፉ የተሰማራና ልምድ ያለው በመሆኑ ነው ተብሏል፡፡

    ለሚሰጠው የሎጂስቲክስ አገልግሎትና የመጋዘን ግንባታ አገልግሎቱን እየሰጠ እንደሚደራደር ሚስተር ሊ ገልጸዋል፡፡

    ባለፈው ቅዳሜ መርመርሳ የደረሰው የአስቸኳይ ምግብ ዕርዳታ 50 ፉርጎዎችን በሚጎትት አንድ ባቡር ተጓጉዟል፡፡ በአጠቃላይም 1,125 ቶን የምግብ ዕርዳታ በአካባቢው የደረሰ ሲሆን፣ ከጅቡቲ መርመርሳ ለመድረስም 16 ሰዓት መፍጀቱን የአዲስ አበባ-ጂቡቲ የባቡር ፕሮጀክት ሥራ አስኪያጅ አቶ ነፃነት ሁሴን ገልጸዋል፡፡

    ይህ አገልግሎት የተሰጠው የባቡር ፕሮጀክቱ አገልግሎት ለመስጠት ባለው የ40 በመቶ አቅም ብቻ እንደሆነና በሙሉ አቅሙ ሲሠራ ከአሥር እስከ 12 ሰዓታት መድረስ እንደሚቻል አስረድተዋል፡፡

    ጂቡቲ ወደብ እየደረሰ ያለውን የዕርዳታ እህል መጠን 1.6 ሚሊዮን ቶን ሲሆን፣ ይህንን ለማጓጓዝ የቻይና ሬልዌይ ኢንጂነሪንግ ከሁለት እስከ ሦስት ባቡሮች በቀን እንደሚያንቀሳቅስ ገልጿል፡፡ የባቡሩ የመሸከም አቅም ሙሉ በሙሉ ሲሆን፣ ዘጠና ተሽከርካሪዎች የሚያነሱትን ጭነት በአንድ ጊዜ ማንሳት እንደሚቻል ታምኗል፡፡

    ይህም በአገር ውስጥ የትራንስፖርት ዘርፍ ተዋንያን ላይ ሥጋት ፈጥሯል፡፡ የሎጅስቲክስ ባለሙያዎች የኢትዮጵያ የኢኮኖሚ መጠን፣ የሚገባውና የሚወጣው ምርት ካለው የአገር ውስጥ ትራንስፖርት አቅርቦት ጋር ፈጽሞ ስለማይወዳደር፣ አቅርቦቱም ገና በዝቅተኛ ደረጃ ላይ የሚገኝ ስለሆነ ሥጋቱ ተገቢ አይደለም ይላሉ፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች