Friday, March 1, 2024
- Advertisement -
- Advertisement -
ማኅበራዊቅብብሎሽ

ቅብብሎሽ

ቀን:

አረጋዊነት እንደ ፍቅር ከትውልድ የማይደበቅ ፈጦ የሚታይ ተጨባጭ እውነት ነው፡፡ አረጋዊ መሆን የሚችሉም ሁሉም ሳይሆኑ ለዚህ የተመረጡት ብቻ ናቸው፡፡ አረጋዊነት ተፈጥሮ የምትቸረው ክብር ነው፡፡ ያለፉትን ደግ የሕይወት ዘመን በሸጋ ትዝታ እያስታወሱ መቀጠልም ክብር ነው፡፡ አረጋዊነት የሕይወት ጣዕምና የዕውቀት ማስተላለፊያ በር ነው ቢባልም ማጋነን አይሆንም፡፡

ከዚህ ግንዛቤ በመነሳት አረጋውያን በሕይወት ዘመናቸው ያካበቱትን ዕውቀት ለተተኪው ትውልድ የሚያስተላልፉበት መድረክ ተዘጋጅቶ ወደ ሥራ ከተገባ ውሎ አድሯል፡፡ ‹‹ትውልድ አገናኝ የዕውቀት ቅብብሎሽ፤›› የሚል መጠሪያ የያዘው ይህ ዓይነቱ መድረክ ለአምስተኛ ጊዜ ኅዳር 16 ቀን 2008 ዓ.ም. በግዮን ሆቴል ብሉ ሳሎን አዳራሽ ተካሂዷል፡፡ መድረኩም ያተኮረው በዶክተር የያህራድ ቅጣው የሕይወት ተሞክሮ ላይ ነው፡፡

ዶ/ር ያየህራድ በአገራችን ለአሥር ዓመታት ያህል በትምህርትና በጤና ዘርፎች ስላበረከቱት አስተዋጽኦና ውጤታማ ሥራዎች በዕለቱ ለተገኘው ታዳሚ አካፍለዋል፡፡ ካካፈሉትም የሕይወት ተሞክሮአቸው ለመረዳት እንደተቻለው፣ ዶ/ር ያየህራድ ቅጣው አዲስ አበባ ውስጥ ጉለሌ ራስ ደስታ ዳምጠው ሆስፒታል አካባቢ በ1932 ዓ.ም. ተወለዱ፡፡ ዕለቱ ጄኔራል ግራዚያኒ የተባለው የፋሽስት ኢጣሊያ ጦር አዛዥ በጀግኖች ኢትዮጵያውያን በተወረወረ ቦንብ የቆሰለበትና ራስ ደስታ ሆስፒታል ሕክምና ላይ የነበረበት ወቅት ነበር፡፡ በዚህም የተነሳ ሕዝቡ ላይ ከፍተኛ ችግር እንደተጋረጠበት አይዘነጋም፡፡ ወደ አሥር የሚሆኑ የዶ/ር ያየህራድ ቤተሰቦችም ከፍራቻ አንፃር በአንድ ጠባብ ቤት ውስጥ ተሰባስበው ይኖሩ ነበር፡፡ ዶ/ር ያየህራድም የተወለዱት በዚሁ ጠባብ ቤት ውስጥ ነው፡፡

- Advertisement -

Video from Enat Bank Youtube Channel.

ሲወለዱ እንደሌሎች ሕፃናት ባለማልቀሳቸው ‹‹ሞተዋል›› ተብለው ነበር፡፡ እናትና አባት ብዙ ወንድ ልጆች ከተወለዱ በኋላ እየሞቱባቸው ስለተቸገሩ ‹‹ይኼም እንደነኛው ሞቷል›› ቢሉም እህታቸው ሲመለከቷቸው ትንፋሽ አንዳላቸው በመረጋገጡ ከመቀበር ተርፈዋል፡፡ ወላጆቻቸው ከዚህ በፊት የወለዷቸው ወንዶች በሙሉ ስለሞቱባቸው ዶ/ር ያየህራድ እስከ ሰባት ዓመት ሴት ናቸው ተብለው ቀሚስ ለብሰው ነው ያደጉት፡፡ ስማቸውም ማሚቱ ነበር፡፡ ትምህርት ቤት እስከ ገቡ ድረስ በዚህ ስም ይጠሩ ነበር፡፡ የስዕለት ልጅ በመሆናቸው በቤተሰብ መካከል  ትልቅ ክብርና ተወዳጅነትም አላቸው፡፡

ሴት ናቸው ተብለው ይታሰቡ የነበሩት ወንድ መሆናቸው ይፋ ወጥቶ በሰባት ዓመታቸው የመጀመርያ ደረጃ ትምህርታቸውን መከታተል ጀመሩ፡፡ በ1948 ዓ.ም. የስምንተኛ ክፍል መልቀቂያ ብሔራዊ ፈተና ተፈትነው በጥሩ ውጤት በማለፋቸው ጄኔራል ዊንጌት ከፍተኛ ሁለተኛ ደረጃ ትምህርት ቤት ገቡ፡፡ የ12ኛ ክፍል መልቀቂያ ብሔራዊ ፈተናን ተፈትነው በወቅቱ በአገሪቱ ከፍተኛ ውጤት ያስመዘገቡትም እሳቸው ብቻ ነበሩ፡፡

በመሆኑም ለሐረር የጦር አካዳሚ ተመርጠዋል የሚል ጥሪ ደረሳቸው፣ ነገር ግን በወቅቱ ለነበሩት የመከላከያ ሚኒስትር፣ ለዩኒቨርሲቲ ኮሌጅ ይፈለጋል የሚል ደብዳቤ ጉዳዩ ከሚመለከተው አካል ስለደረሳቸው ከጥሪው ነፃ ሆኑ፡፡ ዩኒቨርሲቲ ኮሌጅ ገብተው በመማር ላይ እንዳሉም፣ ለባህር ኃይል ትፈለጋለህ ተባሉ፡፡ እሳቸው አልፈልግም ብለው ነበር፡፡ ነገር ግን የባህር ኃይል ዋና አዘጋጅ የነበሩት ኮሞዶር እስክንድር ደስታ ‹‹ሳይንቲስት ልናደርግህ እንፈልጋለን›› የሚል ቃል ስለገቡላቸው፣ ትምህርታቸውን አቋርጠው ባህር ኃይል ተመደቡ፡፡ እዚያም ከአንድ ወር ከ15 ቀናት ሥልጠና በኋላ ወደ ጅማ ጠፍተው ሄዱ፡፡

‹‹ከዩኒቨርሲቲ ኮሌጅ ከተመረቅህ በኋላ ባህር ኃይል ትሠራለህ፡፡ ስለዚህ አሁን ወደ ኮሌጅ መግባት ትችላለህ›› ተብሎ ተፈቀደላቸው፡፡ ያቋረጡትን የዩኒቨርሲቲ ኮሌጅ ትምህርት ቀጥለው በጥሩ ሁኔታ በመከታተል ላይ እንዳሉ፣ በባህር ኃይል በኩል ፈረንሳይ አገር ስኮርላሽፕ አገኙ፡፡ ወደ ፈረንሳይም አቀኑ፡፡ በፈረንሳይ የፐብሊክ ሜዲስን ሙያ ተማሩ፡፡ ያዘጋጁትም የጥናት ወረቀት እጅግ ከፍተኛ ውጤት አስመዝግቧል፡፡

አዲስ አበባ እንደገቡም በቀድሞ ቀዳማዊ ኃይለ ሥላሴ በአሁኑ የአዲስ አበባ  ዩኒቨርሲቲ በመምህርነት ተመደቡ፡፡ ሆኖም ባህር ኃይል፣ ውጭ አገር ልኮ ያስተማራቸው ምፀዋ ላይ ሆነው ባህር ኃይሉን እንዲያገለግሉ ስለነበር በማስተማሩ ሥራ ላይ ችግር ተፈጠረ፡፡ ነገር ግን በመግባባት ዩኒቨርሲቲ እያስተማሩ አዲስ አበባ በሚገኘው ባህር ኃይል ክሊኒክ እንዲያገለግሉ ተደረገ፡፡ ከጊዜ በኋላ ደግሞ በዩኒቨርሲቲው ሕክምና ፋክልቲ የሕክምና ትምህርት ዲፓርትመንት የመጀመርያው ኢትዮጵያዊ ኃላፊ ሆነው ሠርተዋል፡፡ ፋክልቲው ባለፈው ዓመት 50ኛ ዓመቱን ሲያከብርም የወርቅ ሜዳይ ሸልሟቸዋል፡፡

ከንጉሡ መውደቅ በኋላ በዩኒቨርሲቲው እያስተማሩ፣ የምርምር ጥናታቸውን ቀጥለውና የአሶሼት ፕሮፌሰርነት ማዕረግ ተሰጥቷቸው የሁለት ወር ደመወዛቸውን ሳይቀበሉ፣ ከደርግ ጽሕፈት ቤት ጥሪ ተደረገላቸው፡፡ ሊቀመንበር መንግሥቱ ኃይለ ማርያም ‹አሉባልታ ሰምተንና ተሳስተን ዕርምጃ ልንወስድብህ ነበር› ብለው ይቅርታ ጠየቋቸው፡፡ ቀጥለውም ‹አብረን እንሥራ› ብለው ጋበዟቸው፡፡ የብሔረሰቦች ጥናት ኢንስቲትዩት ምክትል ኃላፊ ሆነውም ተመደቡ፡፡

ኢንስቲትዩቱ የተቋቋመው ሕገ መንግሥት ለማርቀቅ፤ ብሔር ብሔረሰቦች እኩልነታቸው ታውቆና መብታቸው ተረጋግጦ በአንድ ኢትዮጵያ ውስጥ አብረው የሚኖሩበትን ሁኔታ ለማመቻቸት እንደነበር ዶ/ር ያየህራድ ገልጸዋል፡፡ በዚህም የተነሳ በአገሪቱ አሉ የተባሉና በልዩ ልዩ የሙያ መስክ የተሰማሩ ምሁራን በዚህ ሥራ ላይ እንዲሳተፉ ተደርጓል፡፡ ‹‹በጥናቱም ላይ የተሳተፍነው ሙያተኞች ሁሉ ስናካሂድ በነረበረው እንቅስቃሴ ላይ ሙሉ ለሙሉ ነፃነት ነበረን፤›› ብለዋል፡፡

በዚህም የተነሳ ብሔር ብሔረሰቦች እኩልነታቸውና አንድነታቸው ተረጋግጦ፣ እንዲሁም ቋንቋቸውና ባህላቸው ተከብሮ አንድ የሚሆኑበትና በዚህም አህዳዊ መንግሥት የሚመሠረትበትን ሕገ መንግሥት ለማርቀቅ ተችሎ እንደነበር ነው ከዶ/ር ያየህራድ ማብራሪያ ለመረዳት የተቻለው፡፡

ባለፉት ሁለትና አሁን ባለው ሥርዓቶች ሁሉ አቅምና የወቅቱ ሁኔታ በፈቀደ መጠን በከፍተኛ ደረጃ የመስፋፋትና የማደግ ምኞትና ፍላጎት አለ፡፡ ለዚህም ሕዝቡ ቁርጠኝነቱን በተግባር አሳይቷል፡፡ በደርግ ሥርዓት በተካሄደው የመሠረተ ትምህርት ዘመቻ ከመላው የአገሪቱ ሕዝቦች መካከል 75 ከመቶ ያህሉ ከመሃይምነት ነፃ ወጥቷል፡፡ መሠረተ ትምህርቱም በ15 የብሔር ብሔረሰቦች ቋንቋ ተተርጉሞ እንደተሰጠ ነው የተናገሩት፡፡ በመደበኛ ትምህርትም የተመዘገቡት የተማሪዎች ቁጥር በንጉሡ ዘመን ከነበረው 10 በመቶ ወደ 40 በመቶ ከፍ ብሎ እንደነበር አስታውሰዋል፡፡

ኢሕአዴግ እንደገባ ዶ/ር ያየህራድ በቁጥጥር ሥር ውለው ለአንድ ዓመት ከዘጠኝ ወራት ያህል ሰንዳፋ ታሰሩ፡፡ በኋላም ባቀረቡት ጥያቄ መሠረት ነፃ ወጡ፡፡ ወዲያውኑ መቀመጫውን ብራዛቢል ውስጥ ባደረገው የዓለም ጤና ድርጅት የአፍሪካ ሪጅን ኦፊሰርነት የሥራ ዕድል አገኙና ለመሄድ መንግሥትን የመውጫ ፈቃድ ሲጠይቁ ‹‹ተፈታህ እንጂ ከአገር መውጣት አትችልም›› ተባሉ፡፡ ይህንን አጋጣሚ ቢያጡም እስካሁን ድረስ ለአገር ውስጥና ለዓለም አቀፍ ተቋማት በጤናና በጎጂ ልማዶች ዙሪያ የማማከር፣ የምርምርና የጥናት ሥራ ያካሂዳሉ፡፡ ዶ/ር ያየህራድ አራት ልጆችን አፍርተዋል፡፡ የልጅ ልጆችን ለማየት በቅተዋል፡፡ በተለይም ልጆቻቸው በአገር ውስጥና በውጭ ባሉ ተቋማት ተመድበው እየሠሩ ይገኛሉ፡፡

የኢትዮጵያ አረጋውያንና ጡረተኞች ብሔራዊ ማኅበርና ኸልፕ ኤጅ ኢንተርናሽናል የኢትዮጵያ ጽሕፈት ቤት ከመንግሥት ተቋማትና ከሌሎችም አካላት ጋር ተቀናጅተው ባካሄዱት የሕይወት ተሞክሮ የውይይት ምሽት ላይ፣ የመንግሥት የሥራ ኃለፊዎች፣ ታዋቂ አርቲስቶች፣ በበጎ አድራጎት ላይ የተሰማሩ ኃላፊዎች አንጋፋና  ወጣት የዩኒቨርሲቲ ምሁራንና ተማሪዎች ተሳትፈዋል፡፡

 

  

   

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...