Wednesday, December 7, 2022
ሌሎች ዓምዶች
    - ማስታወቂያ -
    - ማስታወቂያ -

    የደረጃዎች ኤጀንሲ አዲስ አወቃቀር ለዓለም ንግድ ድርጅት አባልነት እንደሚያግዝ ተገለጸ

    - ማስታወቂያ -

    ተዛማጅ ፅሁፎች

    ከጀርመን መንግሥትና ከአውሮፓ ኅብረት በተገኘ የገንዘብ ድጋፍ ሲካሄድ የቆየውና የኢትዮጵያን የጥራትና የደረጃዎች መዋቅር እንደ አዲስ ለማደራጀት የተደረገው ጥናት፣ አገሪቱ ለዓለም ንግድ ድርጅት አባልነት ለምታደርገው እንቅስቃሴ አስተዋጽኦ እንደሚኖረው የኢትዮጵያ ደረጃዎች ኤጀንሲ አስታወቀ፡፡

    የኤጀንሲው ዋና ዳይሬክተር ወይዘሮ አልማዝ ካህሳይ ለሪፖርተር ይህንን የገለጹት፣ ላለፉት አሥር ዓመታት በጀርመን መንግሥትና በአውሮፓ ኅብረት የገንዘብ ድጋፍ ሲካሄድ የቆየው የደረጃዎችን ተቋማዊ መዋቅር ለማሻሻልና ለማዘመን የተሠራውን ጥናትና ውጤትን አስመልክቶ፣ በሸራተን አዲስ ኅዳር 27 ቀን 2008 ዓ.ም. በተካሄደ የመዝጊያ ፕሮግራም ላይ ነው፡፡

    ‹‹ላለፉት አሥር ዓመታት የአገሪቱ የጥራት መዋቅር ዓለም አቀፋዊ ደረጃ እንዲኖረው ጥናት ሲደረግ ቆይቷል፡፡ በጥናቱ መሠረት ከ2004 ዓ.ም. ጀምሮ አራት ድርጅቶች በአዋጅ ተቋቁመው ወደ ሥራ ገብተዋል፤›› ብለዋል፡፡

    ጥናቱን ተከትሎ ወደ ሥራ የገቡት አራት ድርጅቶች የኢትዮጵያ ደረጃዎች ኤጀንሲ፣ የኢትዮጵያ ተስማሚነት ምዘና ድርጅት፣ የብሔራዊ አክሬዲቴሽን ጽሕፈት ቤትና የኢትዮጵያ ሥነ ልክ ኢንስቲትዩት ናቸው፡፡

    ድርጅቶቹ ራሳቸውን ችለው መዋቀራቸው የሚኖረውን ጠቀሜታ አስመልክተው ያብራሩት ወይዘሮ አልማዝ፣ ‹‹በአብዛኛው አሠራራችንን ወደ ዓለም አቀፍ ደረጃ ማምጣት ስለሚጠበቅብን፣ በተለይ የዓለም ንግድ ድርጅት አባል በምንሆንበት ጊዜ እነዚህ ተቋማት ራሳቸውን ችለው መደራጀታቸው አንዱ መሥፈርት በመሆኑ፣ በዚህ መሥፈርት መሠረት ተቀባይነት አግኝተን የድርጅቱ አባል ለመሆን ያግዘናል፤›› ብለዋል፡፡

    ድርጅቶቹ ለየብቻቸው ከመቋቋማቸው በፊት የቀድሞው የኢትዮጵያ ጥራትና ደረጃዎች ባለሥልጣን ደረጃ የማውጣት፣ የመፈተሽና የመቆጣጠር ተግባራትን ይወጣ ነበር፡፡ በዓለም አቀፍ አሠራር ይህ ተቀባይነት እንደሌለው የገለጹት ወይዘሮ አልማዝ፣ አሁን የመቆጣጠር ሥልጣኑ ለንግድ ሚኒስቴር፣ ለምግብ ጤናና ደኅንነት፣ መድኃኒትና ቁጥጥር ባለሥልጣን ለመሳሰሉት ተላልፎ እየተሠራበት መሆኑን አመልክተዋል፡፡

    የፕሮጀክቱ መጠናቀቅን አስመልክቶ በተዘጋጀው ፕሮግራም ላይ ምክትል ጠቅላይ ሚኒስትር አቶ ደመቀ መኮንን፣ የሳይንስና ቴክኖሎጂ ሚኒስትር አቶ ዓብይ አህመድ፣ እንዲሁም የአውሮፓ ኅብረት የኢትዮጵያ ተጠሪ አምባሳደር ቻንቴል ሂበርትና የጂአይዜድ ዋና ዳይሬክተር አክሴል ክላፌክ ተገኝተዋል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች