Wednesday, February 8, 2023
- Advertisement -
- Advertisement -
ዜናከንቲባ ድሪባ ያቋቋሙት ቦርድ ስለአዲስ አበባ ከተማ ወሰን ጥያቄ አቀረበ

ከንቲባ ድሪባ ያቋቋሙት ቦርድ ስለአዲስ አበባ ከተማ ወሰን ጥያቄ አቀረበ

ቀን:

የአዲስ አበባ ከተማ አስተዳደር ከንቲባ ድሪባ ኩማ ባለፈው ዓመት ፀድቆ ተግባራዊ እየተደረገ የሚገኘውን ማስተር ፕላን አፈጻጸም እንዲያማክር ያቋቋሙት ቦርድ፣ የመጀመርያውን ስብሰባ ባካሄደበት ወቅት የአዲስ አበባ ከተማ ወሰን በግልጽ ይታወቅ ስለመሆኑ ጥያቄ ቀረበ፡፡ ቅዳሜ ሚያዝያ 6 ቀን 2010 ዓ.ም. በተካሄደው ስብሰባ ከቦርድ አባላት ለተነሳው ጥያቄ ከንቲባ ድሪባ ሲመልሱ፣ በ1986 ዓ.ም. የሁሉም ክልሎችና የከተማ አስተዳደር አካላት ወሰን በሚከለልበት ወቅት የአዲስ አበባና የኦሮሚያ ወሰን መከለሉን አስታውሰዋል፡፡

ነገር ግን ከሁለቱም አካላት የድንበር ጥያቄዎች እየቀረቡ በመሆኑ ከኦሮሚያ አንድ የባለሙያዎች ቡድን፣ ከአዲስ አበባም እንዲሁ አንድ የባለሙያዎች ቡድን ተቋቁሞ ጥናት ማካሄዱን ተናግረዋል፡፡ ‹‹በ1986 ዓ.ም. በአዲስ አበባና በኦሮሚያ ክልል ድንበር በሚካለልበት ወቅት የነበሩ አመራሮችና ባለሙያዎች፣ አሁን ለተቋቋሙ የባለሙያዎች ቡድኖች አስተያየታቸውን ሰጥተዋል፡፡ ከዚያ በኋላ ከአዲስ አበባም ወደ ኦሮሚያ ገብቶ ከሆነ፣ ከኦሮሚያም ወደ አዲስ አበባ ገብቶ ከሆነ የሚያመላክት ጥናት ተካሂዶ ለሚመለከታቸው አካላት ቀርቧል፡፡ በድጋሚ የሚቀርብ ቅሬታ ካለም ይታያል፤›› ሲሉ ከንቲባው ለተሰብሳቢዎች አስረድተዋል፡፡

በአዲስ አበባና በኦሮሚያ ወሰን አካባቢዎች ጥያቄዎች በመኖራቸው በሚካሄዱ ፕሮጀክቶች የተለያዩ ችግሮች ሲገጥሙ የቆዩ ሲሆን፣ ይህንን ችግር ለመፍታት በሁለቱም አካላት በተጠናው ጥናት መሠረት ውሳኔ ከተሰጠ በኋላ ችግሮቹ ተፈተው ፕሮጀክቶች እንደሚካሄዱ ሲገለጽ ቆይቷል፡፡

በስብሰባው ላይ የአዲስ አበባ ከተማ ምክር ቤት አፈ ጉባዔ ታቦር ገብረመድኅን (ዶ/ር) እንደተናገሩት፣ የአዲስ አበባ ከተማ ምክር ቤት የአዲስ አበባን ወሰን የመወሰን ሥልጣን የለውም፡፡

‹‹የከተማው ምክር ቤት ያፀደቀው የከተማውን ማስተር ፕላን ነው፡፡ ወሰኑን የማፅደቅ ሥልጣን የለውም፤›› በማለት ገልጸው፣ ‹‹በሁለቱ አስተዳደር አካላት ያለው ወሰን የሚወሰነው በሁለቱ አስተዳደር አካላት፣ አስፈላጊ ከሆነም የፌዴራል መንግሥት ተጨምሮበት የሚፈታ ጉዳይ ነው፤›› ብለዋል፡፡

‹‹ውዝግብ በሚነሳባቸው ቦታዎች አካባቢ ፕሮጀክቶች ቢኖሩም፣ ፕሮጀክቶቹ ይዘገያሉ እንጂ አይካሄዱም፤›› ሲሉ አክለዋል፡፡

የአዲስ አበባ ከተማ ማስተር ፕላን የማስፈጸም ኃላፊነት የሁሉም መሠረተ ልማት ተቋማት ቢሆንም፣ ተግባራዊነቱን የመቆጣጠርና የመከታተል ሥልጣን በአቶ ማቲዎስ አስፋው የሚመራው የከተማው ፕላን ኮሚሽን ነው፡፡

ኮሚሽኑ ሥራዎቹን በሚያካሂድበት ወቅት ጠቃሚ ሐሳብ የሚያመነጭና የሚያማክር 22 አባላት ያሉት ቦርድ ተቋቁሟል፡፡

ቦርዱ ከፌዴራል፣ ከአዲስ አበባና ከሙያ ማኅበራት እንዲሁም አምስት ግለሰቦችን አካቶ ይዟል፡፡ ከንቲባ ድሪባ እንዳሉት፣ ከዚህ በኋላ ከፕላን የወጣ አሠራር አይኖርም፡፡ ፕላን የሚጥስ የመንግሥትም ሆነ የግል ድርጅት በሕግ ተጠያቂ ይሆናል፡፡ የተቋቋመው ቦርድ ለማስተር ፕላኑ ተፈጻሚነት ትልቅ ድርሻ እንደሚኖረው ከንቲባ ድሪባ አስገንዝበዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ጥቁር የመልበስ ውዝግብና የእምነት ነፃነት በኢትዮጵያ

ጠቅላይ ሚኒስትር ዓብይ አህመድ (ዶ/ር) ኅዳር ወር ላይ በፓርላማ...

የኢንሹራንስ ዘርፉን የሚቆጠጠር ገለልተኛ ተቋም ለመመሥረት እንቅስቃሴ ተጀመረ

ከ70 በላይ አዳዲስ የፋይናንስ ተቋማት ዘርፉን ሊቀላቀሉ ነው የኢትዮጵያ ብሔራዊ...

እስቲ አንገፋፋ!

እነሆ መንገድ። ጊዜና ሥፍራ ተጋግዘው በውስንነት ይዘውናል። መፍጠን ያቃተው...