Thursday, December 1, 2022
ሌሎች ዓምዶች
    - ማስታወቂያ -
    - ማስታወቂያ -

    የሁለተኛው ፍጥነት መንገድ ግንባታ ተጀመረ

    - ማስታወቂያ -

    ተዛማጅ ፅሁፎች

    – ሁለት የኮሪያ ተቋራጮች ለኮንትራት ሁለት ፍጥነት መንገድ ግንባታ እየተፎካከሩ ነው

    በኢትዮጵያ ሁለተኛው የፍጥነት መንገድ ይሆናል ተብሎ የሚጠበቀው የሞጆ-ሐዋሳ ፍጥነት መንገድ ግንባታ አካል የሆነው የሞጆ-መቂ (ኮንትራት አንድ) የፍጥነት መንገድ ለመገንባት የወጣውን ጨረታ፣ በ3.6 ቢሊዮን ብር ለመገንባት የቻይናው ቻይና ሬልዌይ ሰባተኛ ግሩፕ በማሸነፍ ሐሙስ ኅዳር 30 ቀን 2008 ዓ.ም. ግንባታ ጀመረ፡፡

    በአራት ተከፋፍሎ የሚገነባው የሞጆ-ሐዋሳ የፍጥነት መንገድ የመጀመሪያው ክፍል የሆነው ከሞጆ-መቂ ድረስ ያለው 56.8 ኪሎ ሜትር ርዝማኔ ያለው ሲሆን፣ ግንባታው በ42 ወራት ይጠናቀቃል ተብሎ ይጠበቃል፡፡

    ጠቅላይ ሚኒስትር ኃይለ ማርያም ደሳለኝ በተገኙበት የተጀመረው የፍጥነት መንገዱ ግንባታ የሚያስፈልገው ጠቅላላ ወጪ የሚሸፈነው፣ ከአፍሪካ ልማት ባንክ በተገኘ ብድርና በኢትዮጵያ መንግሥት በሚመደብ በጀት ነው፡፡

    በሌላ በኩል የሞጆ-ሐዋሳ ዘመናዊ የፍጥነት መንገድ ፕሮጀክት ኮንትራት ሁለት የሆነውና 37 ኪሎ ሜትር የሚሸፍነው የመቂ-ዝዋይ መንገድ ግንባታን ለማካሄድ የሚያስችል የብድር ስምምነት፣ ከኮሪያ ኤግዚም ባንክ ጋር የተደረሰ መሆኑ ይታወሳል፡፡ በዚሁ መሠረት ለኮንትራት ሁለት ግንባታ የጨረታ ሒደት በመካሄድ ላይ በመሆኑ፣ የመጨረሻ ውጤቱ በሁለት ሳምንት ውስጥ እንደሚታወቅ የተገኘው መረጃ ያስረዳል፡፡

    በኮሪያ ኤግዚም ባንክ በሚገኝ ብድር የሚገነባው የፍጥነት መንገዱ ኮንትራት ሁለት ፕሮጀክት፣ ከዚህ ቀደም ኪንግናም የተባለው የኮሪያ ሥራ ተቋራጭ ከ110 ሚሊዮን ዶላር በላይ በሆነ ዋጋ ለመገንባት ጨረታውን አሸንፎ የነበረ ቢሆንም፣ ለጊዜው ባልታወቀ ምክንያት የጨረታው ውጤት ተሰርዞበታል፡፡

    ለዚህ ፕሮጀክት በድጋሚ በወጣው ጨረታም ሁለት የኮሪያ ተቋራጮች እየተፎካከሩ ሲሆን፣ አሸናፊ የሚሆነው ተቋራጭ ከሁለት ሳምንት በኋላ ታውቆ የኮንትራት ስምምነቱ ይፈረማል ተብሎ ይጠበቃል፡፡

    ኮንትራት ሦስት 60.2 ኪሎ ሜትር የሚሸፍነው የዝዋይ-አርሲ ነጌሌ መንገድ ግንባታን ለማካሄድ የሚያስችል የብድር ስምምነት ከዓለም ባንክ ጋር ተደርሷል፡፡ ይህ ኮንትራት ሦስት በጨረታ በሒደት ላይ የሚገኝ መሆኑን፣ የኢትዮጵያ መንገዶች ባለሥልጣን ገልጿል፡፡ ኮንትራት አራትና የመጨረሻው ክፍል 55 ኪሎ ሜትር የሚሸፍነው የአርሲ ነጌሌ-ሐዋሳ መንገድ ግንባታ ደግሞ ከቻይና ኤግዚም ባንክ በሚገኝ ብድር ይሸፈናል ተብሎ ይጠበቃል፡፡ ለዚህ መንገድ የሚፈለገው የብድር ስምምነት እስኪፈረም ድረስ ግን የግንባታ ጨረታው በሒደት ላይ ነው ተብሏል፡፡

    ከቀናት በፊት ግንባታው የተጀመረው የፍጥነት መንገድ ከሞጆ ከተማ በስተምሥራቅ በኩል ወጣ ብሎ፣ ከሞጆ ደረቅ ወደብ ሦስት ኪሎ ሜትር በስተ ምሥራቅ (ከአዲስ አበባ-አዳማ የፍጥነት መንገድ ጋር የሚገናኝበት ቦታ) እና ከአዲስ አበባ በደቡባዊ ምሥራቅ አቅጣጫ በሰባ ኪሎ ሜትር ርቀት ላይ ግንባታው የሚጀመረው የሞጆ-መቂ ዘመናዊ የፍጥነት መንገድ ፕሮጀክት፣ በዋናነት ወደ ደቡብ ምሥራቅ አቅጣጫ በመገንጠል እስከ መቂ ከተማ ድረስ የሚዘልቅ ነው፡፡

    የፍጥነት መንገዱ በሚጠናቀቅበት ጊዜ በአቅራቢያው የሚገኙ ከ12 በላይ የሚሆኑ የከተማ ማዕከላትን በቀላሉ በማገናኘት በከተሞቹ የሚኖሩ ከአንድ ሚሊዮን በላይ ነዋሪዎችን እንቅስቃሴ በማሻሻል፣ በኢኮኖሚ ዕድገት ላይ ከፍተኛ የሆነ ለውጥ ያመጣል ተብሎ እንደሚጠበቅ ባለሥልጣኑ ገልጿል፡፡ የሞጆ-ሐዋሳ የፍጥነት መንገድ በአጠቃላይ ከ700 ሚሊዮን ዶላር በላይ ይፈጃል ተብሎ ይገመታል፡፡  

    ይህ የፍጥነት መንገድ የአዲስ አበባ-ሞያሌ – ናይሮቢ-ሞምባሳ የመንገድ ኮሪደር አካል እንደሚሆንም ባለሥልጣኑ ገልጿል፡፡ የሞጆ-ሐዋሳ መንገድ በ32 ሜትር ስፋት የሚገነባ ሲሆን፣ መሀል ላይ ዘጠኝ ሜትር ስፋት ያለው አካፋይ ይኖረዋል፡፡ በአንድ ጊዜ በግራና በቀኝ አራት ተሽከርካሪዎችን እንደሚያስተናግድ ታውቋል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች