Wednesday, November 30, 2022
ሌሎች ዓምዶች
    - Advertisement -
    - Advertisement -
    ልናገርይድረስ ለጠቅላይ ሚኒስትር

    ይድረስ ለጠቅላይ ሚኒስትር

    ቀን:

    የወጣቱ መልዕክት

    በዳዊት በጋሻው

    ክቡር ጠቅላይ ሚኒስትር እንደምን አሉ? ሥራ ሰላም እንደሆነ ግምቴ ነው። እንኳን አንድን አገር በተለይም ከ90 ሚሊዮን ሕዝብ በላይ ያላትን ጥንታዊት አገር መምራት ይቅርና አንድን ቤተሰብ ያለ ችግር መምራት ከባድ እንደሆነ ይታወቃል። ይሁን እንጂ እርስዎ ይኼንን እየሠሩ ስለሆነ የኢትዮጵያ ሕዝብና መንግሥት ብሎም ታሪክ በመዝገቡ ላይ ማስፈሩ አይቀሬ ነው። እኔ በዕድሜም በዕውቀትም እርስዎ ዘንድ ለመድረስ ከፊቴ ብዙ የሚጠብቀኝ ብሆንም፣ አሁን ባለሁበት ደረጃ ግን አንዳንድ ነገሮችን ከእኔ ዕይታ አንፃር መጠቆም መጥፎ መስሎ ስላልታየኝ ልጽፍልዎት ተሰናዳሁ። ብዕሬንም እነሆ እላለሁ፡፡ ጊዜ ባይኖርዎት እንኳን እንደምንም ብለው እንዲያነቡት እማፀናለሁ።

    ኢትዮጵያ ቀድሞ ከነበረችበት በብዙ መልኩ ተቀይራለች፡፡ በወሬ ሳይሆን በበርካታ መመዘኛዎች። ለዚህም የሚታዩና ምስክር መሆን የሚችሉ መንገዶች፣ ሕንፃዎች፣ ኢንዱስትሪዎች፣ ግድቦች፣ ወዘተ ሊጠቀሱ ይችላሉ። ይሁን እንጂ የሰው ልጅ ፍላጎት ተሟልቷል ማለት በጣም ይከብዳል፡፡ እንኳን እንደኛ ላለ በምሥራቅ አፍሪካ ለሚገኝ ታዳጊ አገር።

    አገራችን የምትፈልግበት ደረጃ ማድረስ ቀላል ነገር አይደለም። ይልቁንም ብዙ ውጣ ውረዶች ያሉትና ብዙ ፈተናዎች የሚበዙበት ነው፡፡ ቢሆንም ይኼንን ማድረግ ደግሞ የሞት የሽረት ጉዳይ መሆን እንዳለበት መንግሥት አምኗል፡፡ ወደ ሥራም ገብቷል። ይሁን እንጂ የመንግሥትን እጅ የሚጎትቱ ምናልባትም ሊያስቆሙ የሚገዳደሩ ጉዳዮች ስለመኖራቸው ማስረጃዎችን ማስቀመጥ ከባድ አይሆንም። ለነዚህ ዕድገትን የሚፈታተኑ ሁኔታዎችን በአምበልነት የሚመራቸው ሙስናና ኪራይ ሰብሳቢነት ሲሆን፣ የመልካም አስተዳደር ዕጦች ደግሞ አሠልጣኛቸው ነው።

    ክቡር ጠቅላይ ሚኒስትር

    እርስዎ በጣም የተማሩ ምናልባትም ከዓለም የተማሩ መሪዎች ተርታ መሠለፍዎን አውቃለሁ፡፡ በእዚህም  እኔ ዕድለኛ ነን ባይ ነኝ፡፡ ምክንያቱም የተማረ መሪ ካልተማረ ስለመሻሉ ምንም ጥርጥር የለውም። እናም ባሳለፍናቸው ሳምንታት አነጋጋሪ ሆኖ የቆየው መልካም አስተዳደርንና ኪራይ ሰብሳቢነትን በተመለከተ የተናገሩት ነገር አለ። በዚያን ወቅት ለመላው ሕዝብ ያስተላለፉት መልዕክት ያለ ጥርጥር ምርጥ ስለመሆኑ በተለያዩ መንገዶች በተለይም በማኅበራዊ ሚዲያ ማረጋገጥ ችያለሁ። እዚያው ላይ በሕዝብ አስተያየት ተግባርስ የሚል ጥያቄ ተነስቷል። እናም ይኼንን መነሻ በማድረግ ያለኝ ሐሳብ ይቀጥላል፡፡

    አገር የምትለማውና የምትጠፋው በግለሰብ ብቻ ባይሆንም፣ ግለሰቦች ግን በዚያ ውስጥ ሚናቸው ትልቅ ነው። የቀድሞው የኢፌዲሪ ጠቅላይ ሚኒስትር መለስ ዜናዊ ‹‹ድርጅቶች ከግለሰቦች አይበልጡም፣ ነገር ግን በድርጅቶች ውስጥ የግለሰቦች ሚና ዜሮ ነው አይባልም፤›› እንዳሉት ነው። በመሆኑም እርስዎ አገሪቷን በበላይነት ይምሯት እንጂ የብዙ አካላት ሚና አብሮዎት ነው። ስለሆነም አሁን ይህችን አገር በጣም ለማበልፀግ ያሉንን መልካም ዕድሎችና አስቻጋሪ ሁኔታዎች በራሴ ዕይታ እንደሚከተለው አዘረዝራለሁ።

    መልካም ዕድሎች

    1. የገጽታ ግንባታ ሥራ ውጤታማ መሆን

    ኢትዮጵያ ከ25 እና ከ30 ዓመታት በፊት የነበራት ገጽታ ያለ ምንም ማብራርያ የድህነት፣ የእርስ በእርስ ግጭት፣ የድርቅና የሌሎች መጥፎ ነገሮች ሁሉ ነበር። ይኼ የጥንት ታሪክ ሳይሆን የቅርብ ማስረጃ ነው። የዓለም ሕዝብ በዘፈን ዕርዳታ ያሰባሰበልን ሕዝቦች ነበርን። አሁን ድህነትና ድርቅ የለም ባይባልም መሥራት የምንችል መሆናችንን፣ እኛ ከሌላ የምንፈልግ ብቻ ሳንሆን ሌላውም ከእኛ የሚፈልገው ነገር እንዳለ በመጠኑም ቢሆን አሳይተናል። ዓለም ኢትዮጵያ እንዴት ማደግ አለባት ሳይሆን፣ እንዴት አደገች እያለ ተሞክሮ የሚቀስምበት ደረጃ ላይ ደርሰናል ማለት እንችላለን። በርካታ አገሮች ከኢትዮጵያ ጋር መሥራት አዋጪ መሆኑን ያመኑበትም ያረጋገጡበትም ጊዜ አሁን ነው። ለዚህ ማስረጃ ማቅረብ ካስፈለገኝ የቻይናና የጃፓን መሪዎች እ.ኤ.አ. በ2014 በአንድ ሳምንት ልዩነት ውስጥ አዲስ አበባ በመምጣት፣ ከኢትዮጵያ ጋር መሥራት አለብን ብለዋል። የአሜሪካ ፕሬዚዳንት ባራክ ሁሴን ኦባማ አዲስ አበባ በመምጣት ጉብኝት አድርገዋል። እኛ በሚገባ ከተመለከትነው እነዚህና ሌሎች ሁኔታዎች  አገራችን ገጽታዋ የተገነባና ወደፊት ብሩህ ጊዜ የሚታያት መሆኗን ያሳያሉ።

    2. ታላቁ የህዳሴ ግድብ የኃይል ማመንጫ ፕሮጀክት ግንባታ

    ከዓለም አሥር ታላላቅ የኤሌክትሪክ ኃይል ማመንጫ ፕሮጀክቶች አንዱ፣ እንዲሁም ከአፍሪካ ቁጥር አንድ የኃይል ማመንጫ ፕሮጀክት በምሥራቅ አፍሪካ በኢትዮጵያ መገኘቱ ታላቅ የምሥራች ነው። ይኼ ፕሮጀክት በቀድሞው ጠቅላይ ሚኒስትር መለስ ዜናዊ የመሠረት ድንጋይ የተጣለ ታላቅ ቅርስ ሲሆን፣ ግንባታው የሚጠናቀቀው እርስዎ (ክቡር ጠቅላይ ሚኒስትር ኃይለ ማርያም ደሳለኝ) የአገሪቷ መሪ በሆኑበት ዘመን መሆኑ፣ በራሱ በግልዎም በአገር ደረጃም የሚያኮራዎት ነው። እናም ይኼ ፕሮጀክት ሲጠናቀቅ የሚኖረን የኃይል ፍጆታ ለራሳችን ኢንዱስትሪዎች ብቻ ሳይሆን፣ ለጎረቤት አገሮች ጭምር ታላቅ የምሥራች ነው። እናም ይኼ ታላቅ ፕሮጀክት ከኤሌክትሪክ ኃይልም በላይ ኢትዮጵያውያን የራሴ ብለው እየገነቡት ያለና ድህነትን ከበድ ባለ ኃይል የሚጥል ነው። ከዚህም በላይ ኢትዮጵያውያንን ያስተሳሰረና ብሔራዊ መግባባትን ማምጣት የቻለ ፕሮጀክት ነው። ይኼ አገርን ለማሳደግ ከሚያስፈልጉ ግብዓቶች አንዱ ነውና እንጠቀምበት፡፡

    3. የኢትዮጵያ ታሪክ

    ሌላው መልካም አጋጣሚ የአገራችን ታሪክ ሊሆን ይችላል። ምንም እንኳን  በአንድ ወቅት የረሃብና የድርቅ ተምሳሌት የሆንን ዜጎች ብንሆንም በርካታ አኩሪ ታሪኮች ያሉን መሆናችን እሙን ነው። የራሳችን የቀን መቁጠሪያ፣ በወራሪዎች ያልተንበረከክን፣ ለሰላም ዘብ የምንቆም መሆናችን ኮሪያ፣ ሶማሊያ፣ ኮንጎ፣ ላይቤሪያ፣ ሩዋንዳ፣ ብሩንዲ፣ ደቡብ ሱዳን ድረስ እየሄድን በተለያዩ ጊዜያት አስመስክረናል። ስለዚህ ይኼ ታላቅ አጋጣሚ ነውና በሚገባ እንጠቀምበት። መልካም አጋጣሚዎች በርካታ ቢሆኑም እነዚህን ለአብነት መጠቀምን መርጫለሁ።

    እነዚህ መልካም አጋጣሚዎች ለእርስዎና ለኢትዮጵያ ታላቅ ናቸውና በግለሰብ ደረጃ እርስዎ እነዚህን መልካም አጋጣሚዎች በመምራትና በማስተባበር ይህችን አገር ከድህነት እንዲያላቅቁ እማፀናለሁ።

    አስቻጋሪ ሁኔታዎች

    እንኳንስ እንደኛ ላለ ታዳጊ አገር ይቅርና ለኃያላኖቹም ቢሆን በርካታ አስቸጋሪ ሁኔታዎች አሉ። በመሆኑም እነዚህ አስቸጋሪ ሁኔታዎች ከካቢኔዎትና ከሕዝቡ ጋር በመሆን ማሸነፍና ወደ መልካም አጋጣሚዎች መውሰድ ይቻላል።

    ሙስናና ኪራይ ሰብሳቢነት

    በሁሉም አገሮች ሙስና እንዳለ መረጃዎች ይጠቁማሉ። እንዲያውም በጣም ሥራ ላይ ያለችውና ራሷን በሥራ አንቱ ያስባለችው ከጫማ ሶል መብላት ወደ ዓለም ቁጥር ሁለት ግዙፍ  የኢኮኖሚ ባለቤት የተመነደገችው ቻይና እንኳን፣ ሙስና ቁጥር አንድ እንቅፋቷ መሆኑን በመገንዘቧ የሙስና ፍርድ ቤት አቋቁማለች መባሉን ሰምቻለሁ። እናም የኢትዮጵያ ችግር ትልቁ ሙስና ይመስለኛል። ኢኮኖሚው የሚያመነጨውን ብዙውን እየወሰደ ነውና ሃይ ሊባል ይገባዋል።

    ክቡር ጠቅላይ ሚኒስትር

    እርስዎ ሙስናንና ኪራይ ሰብሳቢነትን በተመለከተ ካስተላለፉት ምርጥና የእልህ ንግግር በኋላ ብዙ ሰዎች በእርስዎና በመንግሥትዎ ላይ ዕምነት ማሳደራቸውን  ጨምረዋል። በመሆኑም የሙስና ጉዳይ ከበድ ያለ ነውና ከንግግርም ያለፈ የማስፈጸም ሥራ ያስፈልጋል። በመሆኑም  እርስዎን ጨምሮ የአስፈጻሚ አካላትን ቁርጠኝነት ይጠይቃል።

    እርስዎ ኢትዮጵያን ማገልገል የጀመሩት ከአርባ ምንጭ ዩኒቨርሲቲ ጀምሮ ቢሆንም፣ የአገሪቷ መሪ ከሆኑ ደግሞ አሁን አራተኛ ዓመትዎ ነው። በመጀመርያ ደረጃ የዚህች ታላቅ አገር መሪ በመሆንዎ ኩራት ሊሰማዎት ይገባል። ከዚህ በላይ ግን ትልቅ ኃላፊነት አለብዎት። አውቃለሁ ብቻዎትን ምንም ሊያደርጉ አይችሉም፡፡ ከሕዝብና ከመንግሥት ጋር ቢሆንም ግን ቁርጠኝነት የግድ ይላል።

    ዋናው ነገር እርስዎ እንዳሉት ንግግር ብቻ ሳይሆን ወደ ተግባር መምጣት ነው። ተግባር ሲባል ደግሞ ሙሰኞች ላይ ተገቢውን ማስረጃ በማቅረብ ወደ ፍርድ እንዲሄዱና ለሌሎች ማስተማሪያ እንዲሆኑ ማድረግ፡፡ አሁን እየተስፋፋ የመጣውን ችግር በከፊልም ቢሆን ማስቆምና የመሳሰሉትን መፈጸም የግድ ይላል። ይኼ ካልሆነ ግን ሌት ተቀን እየተጋ ያለው ሕዝብ የሚከፍለው ግብር የግለሰቦች መንደላቀቂያ ይሆንና ሕዝቡ ተስፋ ቢስ ይሆናል። ሕዝብ ተስፋ ከቆረጠ ሊሆን የሚችለውን ነገር ለመገመት ሊቅ መሆንን አይጠይቅም። በመሆኑም ሙስናንም መዋጋት ካላይ ይጀምራልና ከቅጣት እስክ አመለካከት ቀረፃ የግድ በተግባር መዋል አለባቸው። ሕዝብ ውስጥ ያለ አንድ አመለካከት አለ፡፡ ይኼንን አመለካከት ከማኅበራዊ ድረ ገጾች ለማየት ችያለሁ። ሙስናን መዋጋት ከላይ ነው መጀመር ያለበት የሚል።

    ክቡር ጠቅላይ ሚኒስትር

    ቁርጠኛ አመራርና አገር ወዳድ አመራር አገርን ከሌብነት ያድናል፣ ታሪክም ይሠራል፡፡ ንጉሥ ላሊበላ፣ አፄ ፋሲለደስ፣ ንጉሥ ኢዛና፣ ወዘተ እነዚህ ኢትዮጵያን ባስተዳደሩባቸው ጊዜያት በስማቸው ባከናወኑዋቸው ሥራዎች ዛሬም ከእኛ አልፎ በዩኔስኮ የተመዘገቡ ቅርሶችን ማነፅ ችለዋል። እርስዎ ደግሞ ዓባይን በመገደብ ድህነትን በድል የረታች አገር መሪ ተብለው ታሪክ የሚዘክርዎ መሪ ለመባል የሚቀርዎ ብዙ ነገር ቢኖርም፣ እንደሚያሳኩት የሚጠቁሙ በርካታ አመላካቾች አሉ። ለአብነትም ሕዝቡ ለውጥ ፈላጊ መሆኑ፣ እርስዎ ሙስናንና ኪራይ ሰብሳቢነትን ለመታገል እያሳዩ ያሉት ቁርጠኝነትና የመሳሰሉት ስኬትን እንደሚጠሩልዎ ግልጽ ነው።

    በመሆኑም እርስዎ እየወሰዱት ያለውን እቋም በማጠናከር ተግባሩን እንጀምር፡፡ አገራችን በጣም ሥራ ላይ ስለሆነች ይኼንን ሥራ ደግሞ በሕዝብ ተሳትፎና መልካም አስተዳደርን በማስፈን ልናግዘውና ልንመራው ይገባል። እርስዎ ቢሮዎን ክፍት በማድረግ ከሕዝብ ጎን ይቁሙ። ምክንያቱም ስንትና ስንት ሚሊዮን ሕዝብ በየቀኑ በኪራይ ሰብሳቢዎች እየተማረረ ነው። ይኼንን ሕዝብ መታደግ በራሱ ከዜግነት ግዴታም አልፎ በፈጣሪ ዘንድም መልካም ነው በሁሉም ዕምነቶች። እናም የሕዝቡ የኑሮ መሻሻል በዋናነት በእርስዎ ላይ ያለ ነው። አሁን አገራችን እያደገች ቢሆንም በርካታ ችግሮች አሉብን። አሁን የተከሰተብን የድርቅ ችግርን ጨምሮ ሕዝቡ ጠዋትና ማታ በትራንስፖርት ችግር፣ በኑሮ ውድነት፣ በኪራይ ሰብሳቢዎች፣ በመልካም አስተዳደር ችግር ምሬት ላይ ነው፡፡ እናም ምንም እንኳን በርካታ ሥራዎች ቢኖሩም፣ በሚቻለዎት መጠን ይኼንን ታታሪና አገር ወዳድ ሕዝብ ይታደጉት። የአመራር ቁርጠኝነት ሁሉንም ነገር ማድረግ ይችላል። ድህነት እንዳይናድና ከሕዝብ ይልቅ የግለሰቦችን ዕድገት ብቻ የሚያስቀድሙ ሃይ ሊባሉ ይገባል። ኪራይ ሰብሳቢ ባለሀብቶችና ባለሥልጣናት ልማታዊ መስመሩን እስካልተከተሉ ድረስ እኛም ዝም ልንላቸው አይገባም። ይልቁንስ ተባብረን ማጥፋት አለብን። እኔ ሙስናን መቀነስ የሚለውን ስትራቴጂንም እቃወማለሁ። ሙስናን መቀነስ ካልን አሁንም መንግሥት እያለ ሙስናን ፈቀድን ማለት ነው፡፡ ያ ማለት ደግሞ እስኪያዙ ይሥሩ እንደማለት ነው። ስለዚህ ሙስናን ማድረቅና ማጥፋት የነገና የከነገ ወዲያ ሥራ ሳይሆን የዛሬና የዛሬ ብቻ ነው። የአገር ሀብት ከተዘረፈ በኋላ መጮህ የለብንም እላለሁ።

    መገናኛ ብዙኃንን በተመለከተ

    መገናኛ ብዙኃን ለአንድ አገር ዕድገትና ውድቀት የሚያበረክቱትን አስተዋፅኦ መጥቀስ የዋህነት ነው፡፡ በጣም ስለሚታወቅ ማለት ነው። እናም የአገራችን መገናኛ ብዙኃን ከጥገኝነት ተላቀው ሚዛናዊ ዘገባዎችን ይዘግቡ ዘንድ የእርስዎ ሚና ከፍተኛ መሆን አለበት። በተለይ ዘንድሮ የምርመራ ጋዜጠኝነትን በሚመለከት ያሳዩት ቁርጠኝነት ወሳኝ ነው። ይኼ ግን በተግባር ቢታይ መልካም ነው እላለሁ። መገናኛ ብዙኃን እንዲጠናከሩና ሥልጠናዎችን በአገርም በዓለም አቀፍም ደረጃ እንዲወስዱ ማድረግም የእርስዎና የመንግሥትዎ ድጋፍ ወሳኝ ነው። ሰሞኑን የሪፖርተር ጋዜጣ ዋና አዘጋጆች በጽሕፈት ቤትዎ በመገኘት ያደረጉት ቃለ ምልልስ በጣም ጥሩ ነበር፡፡ ይኼ ተጠናክሮ መቀጠል አለበት። የግል መገናኛ ብዙኃንም ቢሆኑ እንዲጠናከሩ ማድረግ ለነገ የማይባል ሥራ ነው። ስህተት ሲሠሩ ስህተትን ማሳየትና እንዲታረሙ ማድረግ ሳይንሳዊ ሥራዎችንና ሚዛናዊ ዘገባዎችን እንዲዘግቡ ያስችላቸዋል። መንግሥት ከማንም በላይ ሆደ ሰፊ (ቻይ) መሆን ይኖርበታል። ይኼ የሚሆነው ግን ሕግን ባለ ማክበር አይደለም። ጋዜጠኞች እንዳይሸማቀቁና በሥራቸው ምክንያት ማኅበራዊ ኑሯቸው እንዳይስተጓጎል መንግሥት ትልቅ ሥራ ይጠብቀዋል። በአጠቃላይ የጋዜጠኝነትና የኮሙዩኒኬሽን ሥራዎችን መደገፍ አለበት። የኮሙዩኒኬሽን ሥራ በዋናነት ብሔራዊ መግባባትን ላመምጣትና ገጽታን ለመገንባት እንደታሰበው ሁሉ፣ ጋዜጠኝነትም የዕድገታችን አብሳሪ፣ የሙስና አጋላጭ በመሆን ዜጎች የተሻለች አገርን እንዲመኙና እንዲፈጥሩ ያደርግ ዘንድ መንግሥት ትልቅ አስተዋፅኦ አለው። መረጃን የሚደብቁ ከፍተኛ የሥራ ኃላፊዎችንም ጭምር ሥልጠና (የኮሙዩኒኬሽን) እንዲያገኙ ማድረግ ጥሩ ሳይሆን አይቀርም።

    የተሻለች ኢትዮጵያን በቅርብ ዕውን እናድርግ

    አመሰግናለሁ።

    ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ መሆኑን እየገለጽን፣ ጸሐፊውን በኢሜይል አድራሻቸው[email protected] ማግኘት ይቻላል፡፡

     

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...