Wednesday, October 5, 2022
ሌሎች ዓምዶች
    - ማስታወቂያ -
    - ማስታወቂያ -

    ቡና ኢንተርናሽናል ባንክ ከዕቅዱ በላይ ማትረፉን ገለጸ

    - ማስታወቂያ -

    ተዛማጅ ፅሁፎች

    ሥራ ከጀመረ ሰባተኛ ዓመቱን የያዘው ቡና ኢንተርናሽናል ባንክ በ2007 በጀት ዓመት አገኘዋለሁ ብሎ ካቀደው በላይ ትርፍ ማስመዝገቡን ገለጸ፡፡

    ባንኩ ባለፈው እሑድ ባካሄደው የባለአክሲየኖች ጠቅላላ ጉባዔ እንዳስታወቀው፣ በበጀት ዓመቱ እደርስበታለሁ ብሎ በዕቅድ ይዞ የነበረው ከታክስ በፊት 175.4 ሚሊዮን ብር ለማትረፍ ቢሆንም፣ አፈጻጸሙ ግን ከዕቅዱ 3.7 በመቶ ብልጫ በማሳየት 181.8 ሚሊዮን ብር አትርፏል፡፡

    በበጀት ዓመቱ ያገኘው ትርፍ ከቀዳሚው በጀት ዓመት ጋር በንጽጽር ሲቀመጥ 74.2 ሚሊዮን ብር ወይም 69 በመቶ ብልጫ እንዳለው አመልክቷል፡፡ ባንኩ በቀደመው በጀት ዓመት ከታክስ በፊት አስመዘግቦት የነበረው ትርፍ 107.6 ሚሊዮን ብር እንደነበር ይታወሳል፡፡ የበጀት ዓመቱ የተጣራ ትርፍ ደግሞ 134.5 ሚሊዮን ብር በመሆኑ፣ ሕጋዊ መጠባበቂያው 84.7 ሚሊዮን ብር ተቀንሶ ባለአክሲዮኖች እንዲከፋፈሉ ወስኗል፡፡

    ባንኩ በበጀት ዓመቱ ያገኘው የእያንዳንዱ አክሲዮን ድርሻም 286.6 ብር ሲሆን፣ አምና 227.7 ብር እንደነበር ተገልጿል፡፡

     ከ17ቱ የግል ባንኮች ጋር በመወዳደር ሊኖረኝ ይገባል ያለው የገበያ ድርሻም ከጠበኩት በላይ ሆኗል ያለው ቡና ባንክ፣ በ2007 በጀት ዓመት አቅዶት የነበረው የ2.5 በመቶ የገበያ ድርሻን ወደ 2.96 በመቶ ማሳደግ ችሏል፡፡

    ባንኩ ተቀማጭ የገንዘብ መጠኑን 3.26 ቢሊዮን ብር ለማድረስ ቢያቅድም፣ 3.5 ቢሊዮን ብር ማድረስ መቻሉን አመልክቷል፡፡ ባንኩ የ2006 በጀት ዓመት መጨረሻ ላይ የነበረው ተቀማጭ ገንዘብ መጠን 2.15 ቢሊዮን ብር ነበር፡፡

    ባንኩ በበጀት ዓመቱ የሰጠው አዲስ ብድር ደግሞ 1.45 ቢሊዮን ብር እንደሆነ አመልክቷል፡፡ ይህም ባንኩ እሰጠዋለሁ ብሎ አቅዶት ከነበረው የብድር መጠን ጋር ሲነጻጸር በ196.3 ሚሊዮን ብር ብልጫ አለው፡፡ ባንኩ ከሰጠው አጠቃላይ ብድር ውስጥ ብልጫ ያለውን የተሰጠው ለአገር ውስጥ ንግድና አገልግሎት ዘርፍ ነው፡፡ ለአገር ውስጥ ንግድና አገልግሎት የሰጠው ብድር ከጠቅላላው ብድር 26.4 በመቶውን የያዘ ሲሆን፣ በበጀት ዓመቱ ለዘርፉ 645 ሚሊዮን ብር ብድር ሰጥቷል፡፡ የትራንስፖርትና መገናኛ ዘርፍ 493 ሚሊዮን ብር እንዲሁም ለቤቶች ግንባታ 400 ሚሊዮን ብር ሰጥቷል፡፡ የባንኩ የተበላሸ የብድር መጠን ደግሞ ሦስት በመቶ መድረሱም ተገልጿል፡፡

    የባንኩ አጠቃላይ ሀብት በ1.49 ቢሊዮን ብር በመጨመር 4.5 ቢሊዮን ብር ስለመድረሱም በሪፖርቱ ተገልጿል፡፡ በ2007 በጀት ዓመት የባንኩ ጠቅላላ ሀብት መድረስ አለበት ተብሎ የተቀመጠው ዕቅድ 4.4 ቢሊዮን ብር ነበር፡፡  

    በአንፃሩ ግን የአንዳንድ ዕቅዶቹ አፈጻጸም ከታሰበው በታች ስለመሆናቸው ዓመታዊ ሪፖርቱ ያመላክታል፡፡ ለምሳሌ የባንኩ ከወለድ ነክ ያልሆኑ ገቢዎቹ ከታሰበው በታች ሆነዋል፡፡ በበጀት ዓመቱ ባንኩ ወለድ ነክ ካልሆኑ ገቢዎች አገኛለሁ ብሎ ያሰበው 221.5 ሚሊዮን ብር ሲሆን፣ በተጨባጭ ያገኘው ግን 173.8 ሚሊዮን ብር ሆኗል፡፡ ይህም 21.6 በመቶ ወይም የ47.7 ሚሊዮን ብር ልዩነት አሳይቷል፡፡

    በውጭ ምንዛሪ ግኝት ረገድም በተመሳሳይ ባቀደው ልክ አላገኘም፡፡ በበጀት ዓመቱ ይገኛል የተባለው የውጭ ምንዛሪ ግኝት 91.1 ሚሊዮን ዶላር ሲሆን፣ ሊያገኝ የቻለው ግን 80.1 ሚሊዮን ዶላር ብቻ ነው፡፡

    ይህም አገኘዋለሁ ካለው ዕቅድ ጋር ሲነጻጸር የ10.9 ሚሊዮን ዶላር ልዩነት አሳይቷል፡፡ ይህ የውጭ ምንዛሪ ግኝት ግን ከቀደመው በጀት ዓመት ጋር ሲተያይ በ27.2 ሚሊዮን ዶላር ብልጫ አለው፡፡ ቡና ኢንተርናሽናል ባንክ በአሁኑ ወቅት 80 ቅርንጫፎች አሉት፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -