Saturday, December 3, 2022
ሌሎች ዓምዶች
    - ማስታወቂያ -
    - ማስታወቂያ -

    የአዲስ አበባ አስተዳደር አዲስ የኢንዱስትሪ ዞን ለመገንባት ስምምነት ተፈራረመ

    - ማስታወቂያ -

    ተዛማጅ ፅሁፎች

    የአዲስ አበባ ከተማ አስተዳደር በአነስተኛና በመካከለኛ ማኑፋክቸርኒግ ዘርፍ ለሚሰማሩ ኩባንያዎች መሬት በተናጠል ማቅረብ አቁሞ፣ ኢንቨስተሮቹ በጋራ የሚስተናገዱበት አዲስ የኢንዱስትሪ ዞን ለመገንባት የሚያስችል ስምምነት ተፈረመ፡፡

    የአዲስ አበባ ከተማ ካቢኔ በደንብ ቁጥር 83/2009 ያቋቋመው የአነስተኛና መካከለኛ ማኑፋክቸሪንግ ኢንዱስትሪ ክላስተር ልማት ኮርፖሬሽን፣ የኢንዱስትሪ ዞኑን ለመገንባት የሚያስችለውን ዲዛይን፣ ሱፐርቪዥንና የውል አስተዳደር ሥራ እንዲሠራለት ከኢትዮጵያ ኮንስትራክሽን ዲዛይንና ሱፐርቪዥን ሥራዎች ኮርፖሬሽን ጋር ሰኞ ሚያዝያ 15 ቀን 2010 ዓ.ም. ስምምነት ተፈራርሟል፡፡

    በዚህ መሠረት ጥናቱን ለማካሄድ ስምምነት የፈጸመው ኮርፖሬሽን እስከ ነሐሴ 30 ቀን 2010 ዓ.ም. ሥራውን አጠናቆ ለግንባታ ዝግጁ ያደርገዋል ተብሏል፡፡

    የኢንዱስትሪ ዞን ግንባታው የሚካሄደው ማስተር ፕላኑ ለኢንዱስትሪ በለየው አቃቂ ቃሊቲ ክፍለ ከተማ ወረዳ 10 ቂሊንጦ አካባቢ ነው፡፡

    የአዲስ አበባ ከተማ አስተዳደር ለዚህ ግንባታ የሚያስፈልገውን 93.9 ሔክታር መሬት ለኮርፖሬሽኑ እንዲሰጥ የፈቀደ ሲሆን፣ የአቃቂ ቃሊቲ ክፍለ ከተማ ከተማ ማደስና መሬት ባንክ ጽሕፈት ቤት ቦታውን ከሰው ንክኪ ነፃ ለማድረግ የተለያዩ ሥራዎችን በማካሄድ ላይ ነው፡፡

    የከተማው አነስተኛና መካከለኛ ማኑፋክቸሪንግ ኢንዱስትሪ ክላስተር ልማት ኮርፖሬሽን ዋና ሥራ አስኪያጅ አቶ ያብባል አዲስ በፊርማ ሥነ ሥርዓቱ ላይ እንደገለጹት፣ ለግንባታው የሚያስፈልገው ጥናት፣ ዲዛይን፣ ሱፐርቪዥንና የውል አስተዳደር ሥራ በአገር አቀፍ ደረጃ ብዙ ልምድ ላለው የኢትዮጵያ ኮንስትራክሽን ዲዛይንና ሱፐርቪዥን ሥራዎች ኮርፖሬሽን እንዲሰጥ ሥራ አመራር ቦርዱ ወስኗል፡፡

    በዚህ መሠረትም ኮርፖሬሽኑ 21 ሚሊዮን ብር የሚያስገኝለትን የዲዛይን ሥራ ያለ ጨረታ ተረክቧል፡፡ ይኼ ገንዘብ የሱፐርቪዥንና የውል አስተዳደር ሥራዎችን አያካትትም፡፡

    በኢንዱስትሪ ዞኑ ከፍተኛ ብክለት የሌላቸው ጨርቃ ጨርቅ፣ ቆዳና ቆዳ ውጤቶች፣ ምግብና መጠጥ፣ ብረታ ብረትና ኢንጂነሪንግ ላይ ያተኮሩ ኢንዱስትሪዎች ይሰማራሉ ተብሏል፡፡

    የኢትዮጵያ ኮንስትራክሽን ዲዛይንና ሱፐርቪዥን ሥራዎች ኮርፖሬሽን ዋና ሥራ አስፈጻሚ ነገደ አባተ (ዶ/ር ኢንጂነር) በፊርማ ሥነ ሥርዓቱ ላይ እንደገለጹት፣ ኮርፖሬሽናቸው ባለፉት አሠርት ዓመታት ከፍተኛ ልምድ ያካበተ ተቋም ነው፡፡ ይኼንን ጥናትም ዓለም አቀፍ ደረጃዎችን በማሟላት በወቅቱ አጠናቀው እንደሚያስረክቡ ቃል ገብተዋል፡፡

    በርካታ ግንባታዎችን ባስተናገደችው አዲስ አበባ የመሬት እጥረት እያጋጠመ በመሆኑ፣ ለማምረቻ ኢንዱስትሪዎች ቦታ ማቅረብ ቆሟል፡፡ ኢንዱስትሪዎቹ የሚስተናገዱት በኢንዱስትሪ ዞኖች እንዲሆን በመወሰኑ፣ ኮርፖሬሽኑ ከዚህ በተጨማሪ ሌሎች የኢንዱስትሪ ዞኖችን ያለማል ተብሎ ይጠበቃል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች