Monday, February 6, 2023
- ማስታወቂያ -
- ማስታወቂያ -

የንግዱ ማኅበረሰብ አንገብጋቢ ያላቸውን ችግሮችና ቅሬታዎችን በማሰባሰብ ለጠቅላይ ሚኒስትሩ ጽሕፈት ቤት መላክ ጀመረ

- ማስታወቂያ -

ተዛማጅ ፅሁፎች

  • ንግድ ምክር ቤት ከ50 በላይ ቅሬታዎችን እንዳሰባሰበ ገልጿል

ጠቅላይ ሚኒስትር ዓብይ አህመድ (ዶ/ር) ሚያዝያ 8 ቀን 2010 ዓ.ም. ከንግዱ ማኅበረሰብ ጋር ውይይት ባደረጉበት ወቅት፣ የንግዱ ማኅበረሰብ ዋነኛ ችግሮች እንደሆኑ ተለይተው ለቀረቡ ጥያቄዎች ምላሽ መስጠት ይቻል ዘንድ መመርያና  ማሳሰቢያ ሰጥተው ነበር፡፡ በዚህ መሠረትም እስካሁን ከተሰባሰቡ ጥያቄዎች ውስጥ በርከት ያሉት ለጠቅላይ ሚኒስትር ጽሕፈት ቤት መላካቸውን የኢትዮጵያ ንግድ ምክር ቤት አስታውቋል፡፡

ይህም በዕለቱ ከቀረቡ ጥያቄዎች ውስጥ ዋና ዋና ችግሮች የተባሉትን በሦስት ከፍለው ከሚመለከታቸው የመንግሥት አካላት ጋር እንዲመከርባቸው ማሳሰባቸው ይታወሳል፡፡ በዚህ መሠረት በአንድ ሳምንት ጊዜ ውስጥ ከንግዱ ማኅበረሰብ ከቀረቡ በኋላ እንዲመከርባቸው የተለዩት የመሬት፣ የገቢዎችና ጉምሩክ እንዲሁም የብድር አቅርቦትን የሚመለከቱ ናቸው፡፡

በእነዚህ ላይ ችግር አጋጥሞናል በማለት አቤቱታ ያቀረቡ የንግዱ ማኅበረሰብ አባላት፣ ጉዳያቸውን ለኢትዮጵያ ንግድና የዘርፍ ማኅበራት ምክር ቤት አቅርበው ከሚመለከታቸው የመንግሥት ኃላፊዎች ጋር ውይይት እንዲደረግባቸው፣ ውይይቱም የመገናኛ ብዙኃን በተገኙበትና ሽፋን እንዲሰጡት በሚችሉበት አግባብ እንዲካሄድ በማድረግ መፍትሔ ለማበጀት የታሰበበት ነው፡፡ ጠቅላይ ሚስትሩ በስብሰባው ወቅት እንደገለጹት፣ የተናጠል ውይይቶች የሚያሳዩት አቅጣጫ ታይቶ ውሳኔ መስጠት እንደሚቻል ነው፡፡

ከጠቅላይ ሚኒስትሩ ማሳሰቢያ በኋላ፣ የንግድ ምክር ቤቱ በመሬት፣ በጉምሩክና በባንኮች ብድር አሰጣጥ ዙሪያ ነጋዴዎች የገጠሟቸውን ችግሮች የሚያመለክቱ መረጃዎችን ይዘው እንዲቀርቡ ማስታወቂያ በማስነገር ቅሬታዎችን ሲያሰባስብ ቆይቷል፡፡

የጠቅላይ ሚኒስትሩን የንግዱ ማኅበረሰብ የምክክር መድረክ ከተካሄደ ማግሥት ጀምሮ እስካለፈው ዓርብ፣ ሚያዝያ 12 ቀን 2010 ዓ.ም. ድረስ ንግድ ምክር ቤቱ ከ50 በላይ ቅሬታዎችን እንደተቀበለ ታውቋል፡፡ ከምክር ቤቱ የተገኘው መረጃ እንደሚያስረዳው፣ በሚዲያ ጥሪ ከተደረገበት ዕለት ጀምሮ በእነዚህ ሦስት ጉዳዮች ላይ የገጠሟቸውን ችግሮች ካቀረቡ የንግድ ማኅበረሰብ አባላት ውስጥ አብዛኞቹ የጉምሩክና የመሬት ጉዳዮች ላይ አተኩረዋል፡፡ እስካሁንም ከ33 ያላነሱ ጥያቄዎች ከመሬት ጋር የተያያዙ በመሆናቸው ለአዲስ አበባ ከንቲባ መቅረባቸውን የኢትዮጵያ ንግድ ምክር ቤት ዋና ጸሐፊ አቶ እንዳልካቸው ስሜ ለሪፖርተር ገልጸዋል፡፡

በውይይቱ ወቅት ጠቅላይ ሚኒስትሩ አፅንኦት የሰጡት ጉዳይ ቢኖር በሦስቱም ጉዳዮች ላይ የሚመለከታቸው የመንግሥት አካላት ተወካዮች የንግድ ማኅበረሰቡ ባነሷቸውና በሚያነሷቸው ጥያቄዎች ዙሪያ የሚደረጉ ውይይቶች ላይ መገናኛ ብዙኃን መገኘት እንዳለባቸውና እንዲዘግቡት ማመቻቸቱ ላይ ነው፡፡

የኢትዮጵያ ንግድ ምክር ቤት ያሰባሰባቸውን ጥያቄዎች ለአዲስ አበባ ከተማ አስተዳደር፣ ለኢትዮጵያ ገቢዎችና ጉምሩክ ባለሥልጣን እንዲሁም ለመንግሥት ባንኮች የእንደሚያሰራጭ ሲታወቅ፣ ከእነዚሁ መሥሪያ ቤቶች ጋር ባለጉዳዮቹ ባሉበት ምክክር እንደሚደረግም ይጠበቃል፡፡

ትኩረት ተሰጧቸው ግልጽ ውይይት እንዲደረግባቸው የተመረጡት ሐሳቦች ከጠቅላይ ሚኒስትሩ ጋር በተደረገው ውይይትም ከንግድ ማኅበረሰቡ በተደጋጋሚ ሲቀርቡ የነበሩና ንግድ ምክር ቤቱም ከመንግሥት ምላሽ እንዲሰጥባቸው ካቀረባቸው ጥያቄዎች ውስጥ የተካተቱ ናቸው፡፡ በመሆኑም ጠቅላይ ሚኒስትሩ በእነዚህ ሦስት ጉዳዮች ላይ የሚታዩት ችግሮች እንዲፈቱ የሚረዳ መድረክ እንዲዘጋጅ በማለታቸው ጥቀቄዎቹ ተሰባስበዋል፡፡

‹‹በርካታ ጥያቄ ያየሁት መሬት ላይ ነው፡፡ በመሬት ጉዳይ ላይ በአዲስ አበባ አስተዳደር በኩል የሚታይ ችግር አለ፤›› በማለት የገለጹት ጠቅላይ ሚኒስትሩ፣ ከመሬት ጋር ተያይዞ ላለፉት 15 ዓመታት ተቸግረናል የሚሉ ነጋዴዎች የሚያቀርቧቸው ጥያቄዎች በዝርዝር ተመዝገበው እንዲያዙና እያንዳንዱ ጉዳይም በተናጠል ይታያል በማለት ቃል ገብተዋል፡፡ ይህንን በማድረግ በግለሰብ ደረጃ የቀረቡ ጥያቄዎችን ከግራና ቀኙ ካለው እውነታ ጋር በማስተያየት ችግሩን ለመፍታት እንደሚረዳ በወቅቱ ከቀረበው ገለጻ ለመረዳት ተችሏል፡፡

በአዲስ አበባ ከተማ አስተዳደር ላይ ከመሬት ጋር ተያይዞ ከባለሀብቱ የቀረቡትን ጥያቄዎች በሚቀጥለው ሳምንት ውስጥ አንዱን ቀን በማመቻቸት ከንቲባ ድሪባ ኩማ ከሚመለከታቸው ኃላፊዎች ጋር በመሆን ባለጉዳዮቹን እንደሚያነጋግሯቸውም ዶ/ር ዓብይ ገልጸዋል፡፡ በዚህ ወቅት ለከንቲባውና ለሚመለከታቸው የከተማ አስተዳደሩ ኃላፊዎች ዝርዝር ጉዳዩን ነጋዴዎቹ እንዲያቀርቡ የጠየቁት ጠቅላይ ሚኒስትሩ፣ አያይዘውም ‹‹እዚህ ያላችሁ የሚዲያ ሰዎችም የሚጠየቀውንና የሚመለሰውን አስተላልፉ፡፡ በዚያውም እኛ እንድንሰማው አድርጉ፤›› ብለው ነበር፡፡

በምክክሩ ወቅት በመንግሥት አካላትና በባለሀብቶቹ መካከል ከሚነሳው ጥያቄና መልስ ተነስቶ፣ የበላይ አካል ማገዝ የሚችለው ነገር ካለም እንደሚያግዝ አስታውቀዋል፡፡ ከባንኮች የብድር አሰጣጥ ጋር በተያያዘ የቀረቡ ጥያቄዎችን በአግባቡ ለመመለስ እንዲቻልም የኢትዮጵያ ብሔራዊ ባንክና የሁለቱ የመንግሥት ባንኮች (ንግድ ባንክና ልማት ባንክ) ኃላፊዎች በተገኙበት በብድር አሰጣጡ ላይ ችግር ገጥሞናል ያሉ ባለሀብቶች ፊት ለፊት ተገናኝተው እንዲነጋገሩ አሳስበው ነበር፡፡ ጠቅላይ ሚኒስትሩ አጥብቀው ያሳሰቡትም እያንዳንዱ ቅሬታ አቅራቢ ችግሩን በግልጽ እንዲናገር ነው፡፡

‹‹ስትጠይቁ ግን ታጭበረብራላችሁ፡፡ ለእንትና አበድራችሁ ለእኔ አላበደራችሁም የሚል ቅሬታ ካለ እንዳትደብቁ፡፡ ዲፕሎማቲክ ከሆናችሁ መልስ አታገኙም፡፡ በደንብ ጠይቁ፡፡ ምላሹን ሰምተን እንድናስተካክል፤›› በማለት ጠቅላይ ሚኒስትሩ ማሳሰባቸው አይዘነጋም፡፡ እንዲህ ዓይነቱ ሁኔታ እንዲመቻች ያደረጉትም ከሁሉም ዘርፍ ተዋናዮች ጋር በዝርዝር መነጋገር እንደማይችሉና ሁሉም ዘርፍ ላይ እንደ ባለሙያዎቹ ሆነው ምላሽ መስጠት እንደማይችሉ በማስረዳት ነው፡፡

በሦስቱም ጉዳዮች ላይ ውይይት ሲደረግ ሚዲያው እንዲገኝ ያሉበት ምክንያትም ‹‹ውይይቱ የሚዲያ ሽፋን ሲያገኝ እኛም እንሰማለን፤ ሕዝቡም ይሰማል፡፡ ተደምረን የሚያስቸግረውን ለመያዝ እንድንችል ነው፡፡ ገቢዎችና ጉምሩክ ላይ በሚቀጥለው ሳምንት አመራሮቹን ስለምናገኝ ችግሩን አውቀው መፍትሔ ማበጀት እንዲችሉ ችግሮቹን ለዩልኝ፡፡ ‹‹በዚህ ላይ ውይይት ይደረጋል፡፡ ሚዲያም ሽፋን ይሰጠዋል፡፡ እሱን ከሰማን በኋላ የምንችለውን ፈትተን፣ የማንችለውን ግን በሚዲያ አንችልም እንላችኋለን፤›› ማለታቸውም ይታወሳል፡፡

በቅርቡ በተካሄደው ውይይት መድረክ ወቅት አንዲት ባለሀብት ኢንቨስትመንት ፕሮጀክታቸው የግንባታ ቦታ ለማግኘት የአዲስ አበባ ከተማ አስተዳደርን ከጠየቁ አምስት ዓመታት እንዳላፋቸውና በእነዚህ ዓመታት ውስጥም ለዚሁ ጉዳይ በሳምንት ሦስት ቀን ወደ አስተዳደሩ ሲመላለሱ መቆየታቸውን ገልጸው ነበር፡፡ በከንቲባው ቦታው ይፈቀድላቸው የሚል መመርያ ተሰጥቶም ተፈጻሚነት ሳያገኝ ሁለት ዓመታት ማስቆጠሩን በምሬት ገልጸዋል፡፡

በገቢዎችና ጉምሩክ ባለሥልጣን በኩልም ቀርበው ከነበሩ ጥያቄዎች እስካሁን የሚሠራበትን አሠራር ቀይሮ አዲስ የአሠራር ዘዴ እከተላለሁ ማለቱ የፈጠረውን ችግር የሚመለከት ይገኝበታል፡፡ ጠቅላይ ሚኒስትሩ ከአንድ ሳምንት በኋላ በዝርዝር ይመከርባቸዋል ያሏቸው ጉዳዮች ላይ ጥያቄዎች እየተሰባሰቡ፣ ለጽሕፈት ቤታቸውም ሆነ ለሚመለከታው መንግሥታዊ መሥሪያ ቤቶች በመቅረብ ላይ ቢሆኑም፣ ውይይቶቹ መቼ እንደሚካሄዱ ግን እስካሁን አልተገለጸም፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች