Wednesday, October 5, 2022
ሌሎች ዓምዶች
    - Advertisement -
    - Advertisement -
    ዜናኢትዮጵያ በጂቡቲ ወደብ በጋራ እንድታለማ ጠቅላይ ሚኒስትሩ ጠየቁ

    ኢትዮጵያ በጂቡቲ ወደብ በጋራ እንድታለማ ጠቅላይ ሚኒስትሩ ጠየቁ

    ቀን:

    ጠቅላይ ሚኒስትር ዓብይ አህመድ (ዶ/ር)፣ ኢትዮጵያ በጂቡቲ ወደብ በጋራ ለማልማት ዕድል እንዲሰጣት ለጂቡቲ መንግሥት ጥያቄ አቀረቡ፡፡

    ጠቅላይ ሚኒስትሩ ጥያቄውን ያቀረቡት በጂቡቲ ለሁለት ቀናት ይፋዊ የሥራ ጉብኝት ሲያደርጉ፣ በሁለቱ አገሮችና በቀጣናዊ ጉዳዮች ላይ ከፕሬዚዳንት እስማኤል ኦማር ጊሌ ጋር ባደረጉት ውይይት መሆኑ ታውቋል፡፡

    ጠቅላይ ሚኒስተር ዓብይ ከፕሬዚዳንት ጊሌ ጋር ባደረጉት ውይይት የሁለቱን አገሮች ኢኮኖሚያዊ ትብብር ወደ ላቀ ደረጃ ለማሸጋገር፣ ኢትዮጵያ በጂቡቲ ወደብ ላይ ድርሻ እንዲሰጣትና በጋራ እንድታለማ መጠየቃቸውን ለመገናኛ ብዙኃን ይፋ አድርገዋል፡፡

    ኢትዮጵያ ከጂቡቲ ጋር በወደብ ልማት እንድትሳተፍ ስትጠይቅ፣ ጂቡቲ ደግሞ በኢትዮጵያ ቴሌኮምና ሌሎች ልማቶች ላይ በትብብር ብትሠራ የሁለቱ አገሮች ግንኙነት እንደሚጠናከር አስታውቀዋል፡፡

    በሁለቱ አገሮች ሕዝቦች መካከል ለዘመናት የዘለቀው ማኅበራዊ ትስስርን በማጎልበትና በልማቱም በማጠናከር፣ ግንኙነቱ ብዙ ርቀት እንዲሄድ ማድረግ አስፈላጊ መሆኑንም ጠቅላይ ሚኒስትሩ ከጂቡቲው ፕሬዚዳንት ጋር መወያየታቸውን ገልጸዋል፡፡

    የመሠረተ ልማት ትስስሩንና የንግድ ለውውጡን ለማጠናከርም ከፍተኛ ጥረት ይደረጋል ያሉት ጠቅላይ ሚኒስትር ዓብይ፣ ይኼንን ጅምር ከዳር ለማድረስ ግን የሁለቱም አገሮች ቁርጠኝነት ወሳኝ መሆኑን አክለዋል፡፡

    የጂቡቲና የኢትዮጵያ ሕዝቦችን ተጠቃሚ ለማድረግ ሁለቱ አገሮች አብረው መሥራት እንዳለባቸው የገለጹት ደግሞ፣ የጂቡቲው ፕሬዚዳንት ጊሌ ናቸው፡፡ የመሠረተ ልማት ትስስር ለመፍጠርና የተቀላጠፈ የወደብ አገልግሎት ለመስጠት ጥረት እንደሚደረግ ገልጸዋል፡፡ ቀጣናዊ ሰላምና መረጋጋት ለማስፈንም ሁለቱም አገሮች ጠንክረው እንደሚሠሩና እየሠሩ መሆኑን ጠቁመው፣ በዚህ ላይ ከጠቅላይ ሚኒስትር ዓብይ ጋር በትኩረት መወያየታቸውን ተናግረዋል፡፡

    ጠቅላይ ሚኒስትር ዓብይ በጂቡቲ ፓርላማ ተገኝተው ንግግር አድርገዋል፡፡  የሕዝብ ለሕዝብ ግንኙነቱንና ኢኮኖሚያዊ ትስስሩን በማጠናከር፣ የሁለቱን አገሮች ፖሊሲዎች ለማጣጣም ጠንክሮ መሥራት እንደሚገባ አስረድተዋል፡፡ ጠቅላይ ሚኒስትሩ በሁለት ቀናት ጉብኝታቸው የኢኮኖሚው ውህደቱን ዕውን ለማድረግና ሁለቱ አገሮች በጋራ የሚያስተዳድሩት ወደብ ለማልማት በመሠረተ ሐሳብ ስምምነት ማድረጋቸው ታውቋል፡፡    

    - Advertisement -

    ይመዝገቡ

    spot_img
    spot_img