Tuesday, July 23, 2024
- ማስታወቂያ -
- ማስታወቂያ -

የ150 ሜጋ ዋት የኤሌክትሪክ ኃይል ማመንጫ ግድብ ግንባታ ለማካሄድ የአዋጭነት ጥናት ስምምነት ተፈረመ

ተዛማጅ ፅሁፎች

  • አጥኚው መንግሥታዊ ተቋም በውጭ አገሮችም ፕሮጀክቶችን መረከቡ ታውቋል 

የውኃ፣ መስኖና ኤሌክትሪክ ሚኒስቴር፣ ከኢትዮጵያ የኮንስትራክሽን ዲዛይንና ሱፐርቪዥን ሥራዎች ኮርፖሬሽን ባደረጉት ስምምነት መሠረት 150 ሜጋ ዋት የኃይድሮ ኤሌክትሪክ ኃይል ለማመንጨት የሚያስችል የቅድመ አዋጭነትና የአዋጭነት ጥናት ለማካሄድ ተፈራርመዋል፡፡

በመሥሪያ ቤቶቹ መካከል ሐሙስ፣ ሚያዝያ 25 ቀን 2010 ዓ.ም. በተደረገው ስምምነት መሠረት፣ የኮንስትራክሽን ዲዛይንና ሱፐርቪዥን ሥራዎች ኮርፖሬሽን በ14 ወራት ውስጥ የአዋጭነት ጥናቶቹን አጠቃሎ እንደሚያስረክብ ይጠበቃል፡፡ ለዚህ ሥራም ከሚኒስቴሩ የ22.3 ሚሊዮን ብር ክፍያ እንደሚፈጸምለት ለማወቅ ተችሏል፡፡

በኮርፖሬሽኑ የኮርፖሬት ዕቅድ፣ ፕሮግራምና ፕሮጀክት አስተዳደር ቢሮ ኃላፊ አቶ ዓብይ ፀጋዬ ለሪፖርተር እንደገለጹት፣ የአዋጭነት ጥናቱ የሚካሄድበት የኤሌክትሪክ ኃይል ማመንጫ ግድብ እንደሚገነባ የሚጠበቀው በደቡብ ክልል፣ ጉራጌ ዞን ወልቂጤ አካባቢ ሲሆን፣ የፕሮጀክቱ ስያሜም ዋቢ ኃይድሮ ኤሌክትሪክ ኃይል ማመንጫ ፕሮጀክት እንደሆነ አብራርተዋል፡፡

ኮርፖሬሽኑ የቅደመ አዋጭነትና የአዋጭነት ጥናቱን የሚያካሂደው ከዚህ ቀደም በተካሄደ ጥናት፣ እስከ 70 ሜጋ ዋት ኃይል እንደሚያመነጭ የሚገመተውን የዋቢ ኃይድሮ ኤሌክትሪክ ኃይል ማመንጫ ፕሮጀክት ወደ 150 ሜጋ ዋት ኃይል ከፍ ማድረግ የሚቻልበት አቅም እንዳለ ለማረጋገጥ ነው፡፡ ከጥናቱ ውጤት በኋላ ፕሮጀክቱን ለመገንባት የሚያስፈልገው ወጪና ሌሎችም ጉዳዮች እንደሚታወቁ የጠቀሱት አቶ ዓብይ፣ ኮርፖሬሽኑ እንዲህ ባለው ፕሮጀክት ሲሳተፍ ይህ የመጀመሪያው እንደሆነም አልሸሸጉም፡፡ 

የልማት ድርጅት የሆነው ይህ ኮርፖሬሽን ከዚህ ቀደም በውኃና ኢነርጂ፣ በሕንፃና ከተማ ልማት እንዲሁም በትራንስፖርት ዘርፎች የጥናት፣ የዲዛይንና የግንባታ ቁጥጥር ሥራዎችን በማወከናወን ተሳትፏል፡፡ ለአብነትም በመገጭ፣ በርብ፣ በጊዳቦና በመሳሰሉት የመስኖ ግድብ ፕሮጀክቶች ውስጥ ከመሳተፉም በተጨማሪ፣ በአዲስ አበባ ከተማ አስተዳደር ሥር የአቃቂ ቃሊቲ የከርሰ ምድር የመጠጥ ውኃ ፕሮጀክትን ከጥንስስ ሐሳብ ጀምሮ እስከ ፕሮጀክቱ ግንባታ ድረስ ከዲዛይንና በግንባታ ቁጥጥር ሥራዎች ውስጥ ስለመሳተፉ አቶ ዓብይ  አስውስተዋል፡፡

ከአገር ውስጥ በተጨማሪም በታንዛንያ የ2,100 ሜጋ ዋት ኃይል እንዲሚያመነጭ ለሚጠበቀው የሩፊጂ ኃይድሮ ኤሌክትሪክ ኃይል ማመንጫ ፕሮጀክት ጥናት በማካሄድ ባደረገው ተሳትፎ ከ1.2 ሚሊዮን ዶላር በላይ የውጭ ምንዛሪ ማስገኘቱን አቶ ዓብይ አስታውቀዋል፡፡ ይህ ፕሮጀክት በአሁኑ ወቅት 1,400 ሜጋ ዋት የኤሌክትሪክ ኃይል ለምታመነጨው ታንዛንያ ከፍተኛ ድርሻ የሚይዝና የኃይል አቅርቦቷንም ከሁለት እጥፍ በላይ እንደሚጨምረው ይጠበቃል፡፡

ከዚህ በተጓዳኝም አምስት ኢትዮጵያውያን ባለሙያዎች የተሳተፉባቸው ሁለት የናይጄሪያ መንግሥት የመስኖ ልማት ፕሮጀክቶችም በኮርፖሬሽኑ አማካይነት ጥናት የተከናወነባቸው ናቸው፡፡ በናይጄሪያ ካዱና ግዛት ውስጥ በሚገኙ ሁለት ቦታዎች ላይ በሚገነቡ የመስኖ ፕሮጀክቶች በጠቅላላው 37 ሺሕ ሔክታር መሬት ለማልማት የሚያስችለውን ጥናት እንዲያካሂድ የተመረጠው ኮርፖሬሽኑ ለአገልግሎቱ ከግማሽ ሚሊዮን ዶላር በላይ ክፍያ እንደሚያገኝ አቶ ዓብይ አስታውቀዋል፡፡

በ2008 ዓ.ም. እንደ አዲስ በልማት ድርጅትነት የተመሠረተው የኮንስትራክሽን ዲዛይንና ሱፐርቪዥን ሥራዎች ኮርፖሬሽን፣ ከዚህ ቀደም ለየብቻ ይንቀሳቀሱ የነበሩ መንግሥታዊ የዲዛይን፣ የማማከርና የግንባታ ቁጥጥር ሥራዎች ያከናውኑ የነበሩ ተቋማትን በአንድ በማዋሀድ የተመሠረተ ድርጅት ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች