Sunday, December 4, 2022
ሌሎች ዓምዶች

    የኮንጎ ዲሞክራቲክ ሪፐብሊክ ኤምባሲ በኢትዮጵያውያን ላይ በፈጸመው የመብት ጥሰት ውጭ ጉዳይ ሚኒስቴር ተተቸ

    - Advertisement -spot_img

    በብዛት የተነበቡ

    በአዲስ አበባ የሚገኘው የዲሞክራቲክ ሪፐብሊክ ኮንጎ ኤምባሲ ውስጥ ተቀጥረው ሲሠሩ በነበሩ 14 ኢትዮጵያውያን ላይ ደመወዝ መከልከልን ጨምሮ ኤምባሲው ለፈጸመው የመብት ጥሰት፣ የውጭ ጉዳይ ሚኒስቴር መፍትሔ ባለመስጠቱ የሕዝብ ተወካዮች ምክር ቤት አባላት ወቀሳ ሰነዘሩ፡፡

    የውጭ ጉዳይ ሚኒስቴር በበኩሉ ተደጋጋሚ ዲፕሎማሲያዊ ጥረት አድርጐ ከኮንጎ ዲሞክራቲክ ሪፐብሊክ አቻው ምላሽ ባለማግኘቱ፣ ለአገሪቱ መሪ በቅርቡ እንደሚያሳውቅ ገልጿል፡፡

    የውጭ ጉዳይ ሚኒስትሩ ዶ/ር ቴድሮስ አድሃኖም ዓርብ ታኅሳስ 22 ቀን 2008 ዓ.ም. ለፓርላማው የውጭ ጉዳዮች ቋሚ ኮሚቴ የሩብ ዓመት ሥራ አፈጻጸም ሲያቀርቡ፣ ከቋሚ ኮሚቴው አባላት ጠንከር ያሉ ጥያቄዎች ቀርበውላቸው ነበር፡፡

    ከእነዚህም መካከል ኤምባሲው በዜጐች ላይ ፈጽሞታል የተባለው የመብት ጥሰት በምክር ቤቱ በየዓመቱ ቢነሳም፣ የውጭ ጉዳይ ሚኒስቴር አፋጣኝ ምላሽ ሊሰጥበት አለመቻሉ ጥያቄ ቀርቦበታል፡፡

    በተለይም የውጭ ጉዳይ ሚኒስቴር በተደጋጋሚ ደብዳቤዎችን ለኮንጎ የውጭ ጉዳይ ሚኒስቴር ቢልክም ምላሽ እንዳልተሰጠው ዶ/ር ቴድሮስ ጠቁመዋል፡፡ ሆኖም ‹‹ለምን በአካል ኪንሻሳ ድረስ ሄዳችሁ አልጠየቃችሁም?›› የሚሉ ጥያቄዎችን በማስከተል አባላቱ ሚኒስትሩን አፋጠዋቸዋል፡፡

    ‹‹የእነዚህን ዜጐቻችንን ጉዳይ ለበርካታ ዓመታት አንስተን ተወያይተናል፡፡ አምናም እንዲሁ ጉዳዩን ብናነሳውም አጥጋቢ መልስ ሳናገኝ አልፏል፡፡ ታዲያ በአካል እዚያው ድረስ በመሄድ ለመጠየቅ ለምን አልተቻለም?›› ሲሉ አንድ የምክር ቤት አባል ለዶ/ር ቴድሮስ ጥያቄ አቅርበዋል፡፡

    በተጨማሪም ፀዋሀብ ታደሰ የተባሉ የቋሚ ኮሚቴው አባል፣ ‹‹እንደዚህ አድርገናል ማለት ብቻ ሳይሆን ለዜጐቻችንን መንገላታት በአግባቡ ወጥ የሆነ መልስ መስጠት ያስፈልጋል፡፡ ይህን አደረግን ብላችሁ የምትነግሩንን ሳይሆን አንድ ሥራ ሠርታችሁ ማየት ብቻ ነው የምንፈልገው፤›› በማለት ግልጽ አቋማቸውን ሰንዝረዋል፡፡

    እኚሁ የኮሚቴው አባል አያይዘውም፣ ‹‹እንደ መንግሥት እዚህ ተቀምጠን ዜጐቻችን 15 ዓመታት ሙሉ መንገላታታቸውን ብቻ መስማት ያሳምማል፤›› በማለት የተሰማቸውን ገልጸዋል፡፡

    የውጭ ጉዳይ ሚኒስትሩ በድጋሚ በሰጡት ማብራሪያና ምላሽ፣ ‹‹ሁላችንም በቪዬና ስምምነት መሠረት ነው የምንመራው፡፡ ማድረግ በምንፈልጋቸው ጉዳዮች ላይ በሕጉ ውስንነቶች ይኖራሉ፡፡ ነገር ግን ጉዳዩን በዲፕሎማሲያዊ መስመራችን በመሄድ መፍትሔ እንፈልጋለን፡፡ እናንተ የተሰማችሁን ዓይነት ስሜት እኛም ይሰማናል፡፡ ነገር ግን ወደ ክስ ከመሄድ ይልቅ ጉዳዩን በሰላማዊ መንገድ ብናከናውን ለእኛም ሆነ ለተጐጂ ዜጐች ይበጃል ብለን ነው፤›› ብለዋል፡፡ 

    የውጭ ጉዳይ ሚኒስትሩ ከዚህ ቀደም የኮንጎውን አምባሳደር ጠርተው ያነጋገሩ መሆኑንና ተደጋጋሚ የደብዳቤ ልውውጦች ተደርጐ ምላሽ ባለመገኘቱ፣ በኡጋንዳ የሚገኙትን የኢትዮጵያ አምባሳደርን ኪንሻሳ ድረስ በአካል ሄደው ለአገሪቱ የውጭ ጉዳይ ሚኒስቴር ደብዳቤ ማስገባታቸውን አስታውሰዋል፡፡

    አሁንም ቢሆን ጉዳዩን ለአንዴና ለመጨረሻ ጊዜ ለመዝጋት በሚቀጥለው ወር በአዲስ አበባ በሚዘጋጀው የአፍሪካ ኅብረት የመሪዎች ጉባዔ ላይ እንደሚገኙ ለሚጠበቁት የኮንጎ ፕሬዚዳንት ጉዳዩን ለማንሳት፣ የኢትዮጵያ መንግሥት መወሰኑን ዶ/ር ቴድሮስ ገልጸዋል፡፡  

    spot_img
    - Advertisement -

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -