Sunday, January 29, 2023
- Advertisement -
- Advertisement -
ዓለምሶሪያን የመታው ረሃብ

ሶሪያን የመታው ረሃብ

ቀን:

ሶሪያውያን ከገቡበት የርስ በርስ ጦርነት ሳይወጡ አገሪቷ በረሃብ ተመትታለች ተብሏል፡፡ አምስተኛ ዓመቱን ባስቆጠረው የእርስ በርስ ጦርነት የላሸቀው ሕዝቧ አሁን ደግሞ በድርቅ ብቻ ሳይሆን በረሃብ ተመትቷል፡፡ ረሃቡን በሞቀ ውኃና በቅጠል በመወጣት ቀናት ያሳለፉ ሶሪያውያን፣ ዛሬ ይህን ማድረግ ተስኗቸዋል፡፡ በአገሪቱ ክረምት በመግባቱ ቅጠሎች እየረገፉ ነው፡፡ የሚቀመስ ጠፍቶም በሶሪያ ማዳያ አካባቢና በሌሎች ሥፍራዎች የሚኖሩ ዜጐች በረሃብ ተመትተዋል፡፡ በጦርነት ላይ ረሃብ የተጨመረባቸው ሶሪያውያንን ለመድረስ በሊባኖስ በኩል ሶሪያን በሚያዋስነው ድንበር ወደምትገኘው ማዳያ የዕርዳታ ምግብና የሕክምና ቁሳቁስ የያዙ የተባበሩት መንግሥታት ድርጅት (ተመድ) ተሽከርካሪዎች መግባት ጀምረዋል፡፡ በኢድሊብ ቀጣና የሚገኙት ፉአና ካፋራያ በረሃብ ከተመቱ ሥፍራዎች ይጠቀሳሉ፡፡

ሲኤንኤን እንደዘገበው፣ ጦርነት ባሽመደመዳት ሶሪያ የተከሰተው ረሃብ የከፋና ስፋት ያለው ሊሆን ይችላል፡፡ ረሃቡም የአገሪቱን አብዛኛውን ክፍል ሊያጠቃ ይችላል፡፡ የመካከለኛው ምሥራቅና የሰሜን አፍሪካ የአምነስቲ ኢንተርናሽናል ዳይሬክተር ፊሊፕ ሉተር፣ ሶሪያውያን በየቦታው እየሞቱና እየተሰቃዩ ነው ብለዋል፡፡ ‹‹የሶሪያ መንግሥትም ሆነ ሸማቂዎች ሕዝቡን በረሃብ መቅጣትን እንደ አንድ የጦር መሣሪያ እየተጠቀሙበት ነው፤›› ሲሉም መንግሥትንና ሸማቂዎችን ኮንነዋል፡፡ ‹‹በመቶ ሺዎች የሚቆጠሩ ሰዎችን እንደ አሻንጉሊት እየተጫወቱባቸው ነው፤›› የሚሉት ሉተር፣ ሰዎችን ለጦርነት ዓላማ ማስራብ የጦር ወንጀል እንደሆነ ተናግረዋል፡፡

የአምነስቲ ሪፖርት በሶሪያ በጦርነት ውስጥ ከሚሳተፉት ወገኖች የትኛው መልካም እንደሆነ ለመለየት አስቸጋሪ ሆኗል፡፡ ፕሬዚዳንት በሽር አል አሳድ በግድያና በማሰቃየት ይወቀሳሉ፡፡ የአሳድ መንግሥት ተቃዋሚ ከሆኑት ቡድኖች ግንባር ቀደም እየሆነ የመጣው አይኤስ ደግሞ የአሸባሪ ቡድን ነው፡፡ ሁለቱም ጽንፎች በሚያደርጉት ውጊያ ሕዝቡ እየተራበ ነው፡፡ ዕርዳታ ሰጪዎችም የትኛውን ወገን አምነው አብረው እንደሚሠሩ ተቸግረዋል፡፡ ነዋሪዎችም የሚላከው ዕርዳታ በአግባቡ እንደማይደርሳቸው እየተናገሩ ነው፡፡

በማዳያ ነዋሪ የሆኑት ሎኤይ፣ ‹‹ለመጨረሻ ጊዜ ሙሉ ምግብ የበላሁት ከአንድ ወር ከ15 ቀናት በፊት ነው፡፡ አሁን ውኃና ቅጠል ብቻ ነው ያለኝ፡፡ ሆኖም ክረምቱ እየገባ ነው፡፡ ቅጠሎች ይረግፋሉ፡፡ እንዴት እንደምከርም አላውቅም፤›› ሲሉ ለአምነስቲ ኢንተርናሽናል ተናግረዋል፡፡ ኡም ሱልጣን የተባለች ሴት በየቀኑ ሰዎች ሲያቃትቱና ታመው አልጋ ላይ ሲወድቁ እንደምታይ አስረድታለች፡፡ ‹‹ባለቤቴ ታመው አልጋ ላይ ከወደቁት ሶሪያውያን አንዱ ነው፡፡ ከአልጋ መነሳት አይችልም፡፡ ከተነሳ ራሱን ስቶ ይወድቃል፡፡ ቆዳውና አጥንቱ ብቻ ቀርተዋል፤›› ብላለች፡፡

በረሃብ በጣም በተመታው ማዳያ አካባቢ ገበያ ውስጥ ምግብ ቢኖርም፣ ዋጋው ውድ ነው፡፡ በደማስቆ አንድ ኪሎ ዱቄት 79 ሳንቲም ሲሆን፣ በማዳያ 120 ዶላር ነው፡፡ ወተት በደማስቆ በሊትር 1.06 ዶላር ሲሆን፣ በማዳያ 300 ዶላር ነው፡፡ በመሆኑም የተራበ ሆድ ምግብን ማየት እንጂ መብላት አይችልም እንደ ሲኤንኤን ዘገባ፡፡

በረሃብ ምክንያት የሞቱ ሰዎችን ቁጥር በተመለከተ ወጥ የሆነ መረጃ ባይኖርም፣ የተባበሩት መንግሥታት ድርጅት በረሃብ ምክንያት ሞት ስለመከሰቱ የተረጋገጠ ሪፖርት አለኝ ብሏል፡፡ የሶሪያ መንግሥትም የዕርዳታ ተሽከርካሪዎች በማዳያ፣ ፉአና ካፋራያ ይግቡ ብሎ መስማማቱን አሳውቋል ብሏል፡፡ የድንበር የለሽ ሐኪሞች ቡድን ከኅዳር ጀምሮ 23 ሰዎች ሞተዋል ሲል፣ አንድ የሰብዓዊ መብት አቀንቃኝ ቡድን ቁጥሩን 41 አድርሶታል፡፡ የተባበሩት መንግሥታት ድርጅት ሪፖርት ደግሞ አንድ የ53 ዓመት ሰው ብቻ መሞቱን ማረጋገጡን፣ አምስቱ የሟች ቤተሰቦች ለከፋ የተመጣጠነ ምግብ ችግር (ጠኔ) መጋለጣቸውን አሳውቋል፡፡

ማዳያ በሸማቂ ቡድኖች ቁጥጥር ሥር የነበረች ከተማ በመሆኗ ነዋሪዎቹ በረሃብ ተመትተዋል፡፡ መንግሥትም ወደ ሥፍራው ምንም ዓይነት ዕርዳታ እንዳይገባ ላለፉት ስድስት ወራት አግዶ ስለነበር ሕዝቡ ተጐድቷል፡፡ ሆኖም በመንግሥት ቁጥጥር ሥር በመግባቷና የተባበሩት መንግሥታት ድርጅት ከሶሪያ መንግሥት ፈቃድ በማግኘቱ ለ40 ሺሕ ሰዎች ምግብ ያከፋፍላል፡፡

የዕርዳታ ምግብ የጫኑ መኪኖች በየመንደሩ ገብተው ምግብ ለማደል ግን ተቸግረዋል፡፡ በየቦታው የሚገኙ ሸማቂዎች መኪኖችን ለማስገባት ፈቃደኞች አይደሉም፡፡ የዕርዳታ ምግብ የጫኑ መኪኖች ኢድሊብ መግባት የቻሉትም በድርድር ነው፡፡ በፉአና ካፋራያ ያለው ሁኔታም የከፋ ነው፡፡ 20 ሺሕ የሚሆኑ ሰዎች ላለፉት ዘጠኝ ወራት ዕርዳታ አግኝተው አያውቁም፡፡

የዓለም አቀፉ ቀይ መስቀል ኮሚቴ አባል ፓዎል ራዛይስክ በማዳያ ያለውን ሁኔታ ሲገልጹ፣ ‹‹ነዋሪው በየአምስት ደቂቃው እየተመላለሰ ‘ምግብና መድኃኒት አምጥታችኋል ይለናል’፡፡ አንዳንዶች ይስቃሉ፣ እጃቸውን ያውለበልባሉ፡፡ ብዙዎቹ ግን ተዳክመዋል፡፡ በደከመና ተስፋ በቆረጠ ዓይን አይተውናል፤›› ብለዋል፡፡

በሶሪያ የሚደረገው ሰብዓዊ ዕርዳታ በጦርነትና በግጭት የተከበበ ነው፡፡ በሸማቂዎች ቁጥጥር ሥርም ሆነ በመንግሥት ቁጥጥር ሥር ለሚገኙት ሥፍራዎች የሚደረገው ዕርዳታ በሸማቂዎቹ ምክንያት የተወሳሰበ ሆኗል፡፡

ቢቢሲ እንደሚለው የአል አሳድ ደጋፊዎችና ተባባሪያቸው የሊባኖስ ሒዝቦላህ፣  አማፅያን በማዳያ የሚደርሰውን የምግብ ዕርዳታ ለራሳቸው ያስቀራሉ፣ ለሕዝቡ አይደርስም ሲሉ ይኮንናሉ፡፡ አንዳንዶች ረሃብ አለ ለማለት ያስመስላሉ፣ ያታልላሉ፡፡ ሆኖም ማዳያ በሶሪያ ስላለው የስቃይ ኑሮ ማሳያ ናት፡፡ በረሃብ ለተጐዱ አካባቢዎች ዕርዳታ ማቅረቡ አስቸጋሪ ቢሆንም፣ የተባበሩት መንግሥታት ድርጅት ዕርዳታውን መስጠት ጀምሯል፡፡

የ17 ዓመቷ ሂባ አብዱልራህማን ለአጃንስ ፍራንስ ፕሬስ እንደተናገረችው፣ እሷና የምታውቃቸው ሰዎች ለ15 ቀናት ያህል ሾርባ ብቻ እየተመገቡ ቆይተዋል፡፡ ‹‹አንድ ሰው ድመት ገድሎ የጥንቸል ሥጋ ነው በማለት ለቤተሰቡ መግቧል፡፡ ብዙ ሰዎች ወደ ቆሻሻ ገንዳ በመሄድ ምግብ መለቃቀም ጀምረዋል፡፡ አንዳንዶች ሳር እየበሉ ነው፡፡ ተዋጊዎች ምግብ እንዲሰጡን ስንጠይቃቸው ግን ይከለክሉናል፤›› ብላለች፡፡

በሶሪያ ረሃብ ስለመግባቱ የተባበሩ መንግሥታት ድርጅት አረጋግጫለሁ ቢልም፣ በሶሪያ ሚዲያዎች የሚተላለፉት የተጣረሱ መረጃዎች መሆናቸውን ቢቢሲ ዘግቧል፡፡ ከሐምሌ 2007 ዓ.ም. ጀምሮ በመንግሥት ቁጥጥር ሥር በዋለችውና የሸማቂ ጠንካራ ይዞታ የነበረችው ማዳያ የዓረብ ሚዲያ ዋና መነጋገሪያ ናት፡፡ ልብ የሚሰብሩ አሳዛኝ ዜናዎችን ከማቅረብ እስከ የውሸት ፎቶዎችንም ሆነ ተንቀሳቃሽ ምሥሎች በመጠቀም ነዋሪው በችግር እንዳለ ያሳያሉ፡፡

ቢቢሲ እንደሚለው፣ የፓን ዓረብ የሳተላይት ቴሌቪዥን ጣቢያዎች የሆኑት በሳዑዲ ዓረቢያ የሚደገፈው አል ዓረቢያ (የአማፅያን ደጋፊ ነው) እና የኳታሩ አልጄዚራ የሶሪያ መንግሥትና አጋሩ ሒዝቦላህ ‹‹ማዳያን እስከ ሞት እያስራቡ›› ነው ሲሉ ዘግበዋል፡፡ ሆኖም የሶሪያ መንግሥትና አጋር የሚዲያ ተቋማት፣ አል ዓረቢያና አልጄዚራ የሚያስተላልፉት ከአሉባልታ የዘለለ አይደለም ይላሉ፡፡

አል-ባዝ ጋዜጣ፣ አልጄዚራና አል ዓረቢያ ‹‹የታመሙና ከመኖሪያቸው የተፈናቀሉ ሰዎችን ፎቶ በመጠቀም አሳሳች ዘመቻ እያደረጉ ነው፣ ሸማቂዎች ሰላማዊ ሰዎችን የራሳቸውን አጀንዳ ለማስፈጸም መጠለያ እያደረጉ ነው፤›› ሲል ዘግቧል፡፡ በሶሪያ 4.5 ሚሊዮን የሚጠጉ ሰዎችን በዕርዳታ ለመድረስ አስቸጋሪ ነው፡፡ ምክንያቱም ነዋሪዎቹ ያሉባቸው ከ15 በላይ ሥፍራዎች በጦርነት ውስጥ ይገኛሉ፡፡  

በሶሪያ የእርስ በርስ ጦርነት ከተጀመረ ካለፉት አምስት ዓመታት ወዲህ፣ ከ250 ሺሕ የሚበልጡ ዜጐች ሞተዋል፡፡ ከ11 ሚሊዮን የሚበልጡት ደግሞ የአሳድና የአይኤስ በመባባል እርስ በርስ በመዋጋት ከቀያቸው ተፈናቅለዋል፡፡ አብዛኛዎቹ የሶሪያ መሠረተ ልማቶች ወድመዋል፡፡ ከአራት ሚሊዮን በላይ ሕዝብ ሲሰደድ፣ አገር ውስጥ ያሉት ደግሞ ረሃብ ተጋርጦባቸዋል ተብሏል፡፡        

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የገጠር መሬት ማሻሻያና የመሬት ባለቤትነት ጥያቄ በኢትዮጵያ

በኢትዮጵያ ከቅርብ ወራት ወዲህ መሬትን በተመለከተ ጠንከር ያሉ የለውጥ...

በፖለቲከኞች እጅ ያለው ቁልፍ

ኢትዮጵያ በተለይ ካለፉት አምስት ዓመታት ወዲህ ሰላሟ መረጋጋት አቅቶታል፡፡...

የኤክሳይስ ታክስ ረቂቅ አዋጅ ፓርላማው ያፀደቀውን አዋጅ የሚጥሱ ድንጋጌዎችን በማካተቱ እንዳይፀድቅ ተጠየቀ

ሰሞኑን ለሕዝብ ተወካዮች ምክር ቤት የቀረበው የኤክሳይስ ታክስ ማሻሻያ...

በፀጥታ ችግር ሳቢያ ከተለያዩ አካባቢዎች ተፈናቅለው አማራ ክልል የገቡ ዜጎች ቁጥር 800 ሺሕ መድረሱ ተነገረ

በቤኒሻንጉል ጉሙዝ ክልል 112 ሺሕ ተማሪዎች ከትምህርት ገበታ ውጪ...