Monday, June 24, 2024
- Advertisement -
- Advertisement -
ስፖርትየዮሐንስ ሳህሌ ስብስብና ችግሩን በውል ያልተገነዘበው ጫና

የዮሐንስ ሳህሌ ስብስብና ችግሩን በውል ያልተገነዘበው ጫና

ቀን:

የኢትዮጵያ ብሔራዊ ቡድን በሩዋንዳ እየተካሄደ ባለው አራተኛው የቻን ውድድር የመክፈቻ ጨዋታውን ከዲሞክራቲክ ሪፐብሊክ ኮንጎ ጋር አድርጎ 3ለ0 በሆነ ውጤት ተሸንፏል፡፡ ይህንን ውጤት ተከትሎም በአብዛኛው የእግር ኳሱ ተመልካች ዘንድ ቅሬታ ተፈጥሯል፡፡ ብሔራዊ ቡድኑ ከደቡብ አፍሪካው የአፍሪካ ዋንጫ በኋላ በዚያው በደቡብ አፍሪካ በተካሄደው የሦስተኛው የቻን ውድድርም እንዲሁ የወረደ አቋም አሳይቶ በጊዜ ከውድድሩ መሰናበቱ ይታወሳል፡፡ በወቅቱ የብሔራዊ ቡድኑ አሠልጣኝ የነበሩት ሰውነት ቢሻውም ከኃላፊነታቸው የተነሱት በዚሁ የቻን ውድድር ላይ ቡድናቸው ያሳየውን ደካማ አቋም መሠረት በማድረግ ነበር፡፡ በተተኪነት ከውጭ አገር ከፍተኛ ደመወዝ ተከፍሏቸው የተቀጠሩት ማሪያኖ ባሬቶም የገነቡት ቡድን ይህ ነው የሚባል ነገር ሳያሳይና ከፊቱ የነበሩትን የማጣሪያ ጨዋታዎች በሙሉ ተሸንፎ ለአፍሪካ ዋንጫና ለዓለም ዋንጫ የተጠበቀውን ያህል መጓዝ ባለመቻሉ ፖርቱጋላዊው አሠልጣኝ ተባረዋል፡፡ ለእሳቸው ደመወዝ የተከፈለው ከፍተኛ ገንዘብም ያለ አንዳች ፋይዳ ባክኖ ተከታዩን የአገር ውስጥ አሠልጣኝ ለኃላፊነት እንዲበቁ አደረገ፡፡

በአገሪቱ ረዥም የእግር ኳስ ታሪክ ውስጥ የደጋፊን ቀልብ የሚገዛና የውጤት ረሃብን የሚያስታግስ የተሟላ ብሔራዊ ቡድንን ለመገንባት የተደረጉ ጥረቶች በሁለት መሠረታዊ ክፍሎች ሊታዩ እንደሚገባቸው የሚጠቁሙ ባለሙያዎች የኢትዮጵያ እግር ኳስ ሥር ነቀል ለውጥ ካልተካሄደበት በቀር አሠልጣኝ በመቀያየርም ሆነ ትውልድን ተስፋ በማድረግ የሚመጣ ዘለቄታና መፍትሔ እንደማይገኝ ይሞግታሉ፡፡ ሁለት መሠረታዊ ክፍሎች የሚሏቸውንም ሲገልፁ፣ አንደኛው ቀደም ሲል የነበረውንና በተወሰነ መጠን ውጤታማ ያደረገውን እግር ኳሳዊ አደረጃጀት ማስፈን የሚል ሲሆን፣ ሁለተኛው ደግሞ ዘመኑ የሚጠይቀውን የእግር ኳስ ሳይንስ መሠረት ያደረገና ታች የወረደ ሥልጠናንን ተመርኩዞ ወደ ላይ የሚያድግ መዋቅር መዘርጋት የሚሉ ናቸው፡፡

በ1950ዎቹና በ1960ዎቹ የኢትዮጵያ እግር ኳስ በአፍሪካ ደረጃ ጥሩ ከሚባሉት ተርታ የሚመደብ እንደነበር የሚመሰክሩት የቀድሞ ተጫዋቾች፣ ለዚህ ሁነኛ ምክንያቱ ደግሞ እግር ኳሱን የሚመሩትና የሚያደራጁት ግለሰቦች ስለ እግር ኳሱ በቂ ዕውቀትና ግንዛቤ የነበራቸው ከመሆኑ ጋር አያይዘው ይገልጻሉ፡፡ በሌላ በኩል በአሁኑ ጊዜ የኢትዮጵያ እግር ኳስ መሠረታዊ የቴክኒክና የታክቲክ ፍልስፍናዎችን በቅጡ ያልጠበቀና ለይድረስ ይድረስ በሚገነቡ ክለቦችና ብሔራዊ ቡድኖች የታጀበ በመሆኑ ምክንያት በእግር ኳሱ ላቅ ያለ ደረጃ ላይ ከሚገኙ ቡድኖች ጋር ሲጫወቱ ለከፍተኛ ትችትና ኋላቀር የአጨዋወት ዘይቤ እንደሚዳረጉ በመጠቆም ችግሩ፣ ‹‹አልከፈት ያለውን በር ቁልፍ መቀየር ሆኖ ሳለ ከፋቹን ማቀያየር›› እንደሆነ ክፍተቱን እየጠበቁ የሚተቹ እንዲበራከቱ አድርጓል፡፡

በዚህ ሁኔታ ውስጥ ሆኖ ለአሠልጣኝ ዮሐንስ ሳህሌ የደረሰው ዕጣ ፈንታም ከሌሎቹ የተለየ አለመሆኑንና እንዲያውም አሠልጣኙ በውጭ አገር ያዳበሩትን ዘመናዊ የእግር ኳስ አስተሳሰብ ከግምት በመውሰድና አሁን በእግር ኳሱ ያለውን አጠቃላይ ሁኔታ በማነጻጸር አሠልጣኙን፣ ‹‹ዕድለ ቢስ›› ብለው የሚገልጿቸውም አልጠፉም፡፡ ከአሠልጣኝ ሰውነት ቢሻው መልካም ውጤት ጋር በማወዳደርም አሠልጣኝ ዮሐንስ ሳህሌን ለቦታው የማይመጥኑ መሆናቸውን ጭምር ይዘረዝራሉ፡፡ ይሁንና የብሔራዊ ቡድኑን መሠረታዊ ችግሮች መንጥረው የሚያወጡ የእግር ኳስ ባለሙያዎችና አሠልጣኞች ባለው አደረጃጀት ለመወቀስ በየትኛውም መስፈርት የአንበሳውን ድርሻ መውሰድ እንደማይገባቸው በመጥቀስ ለዓመታት ተቋጥሮ ሲንከባለል የመጣውን የችግሩን ውል ለይቶ በመተርተር ሥር ነቀል ለውጥ ማምጣት እንደሚገባ ይገልጻሉ፡፡

የአሠልጣኝ ዮሐንስ ሳህሌ ስብስብ መጀመሪያ በወጣቶች የተዋቀረ መሆኑ ቀደም ሲል ፖርቱጋላዊው አሠልጣኝ ሞክረውት ከነበረው የቡድን ግንባታ ጋር የሚመሳሰል ነበር፡፡ በሌላ በኩል ከሚዲያውና ከክለቦች አመራር አካባቢ የሚመጣውን ጫና ለማለሳለስ በሚመስል መልኩ በዕድሜ የገፉና አንጋፋ ተጨዋቾችን ያሰባጠረ የቡድን ግንባታ አድርገው ወደ ሩዋንዳ ማቅናታቸውን ተከትሎም አንዳንዶች የስብስባቸውን ደካማነት የዘይትና የውኃ ያህል የማይዋኸድ ሲሉ ይተቻሉ፡፡ በመክፈቻ ጨዋታው ላይ በግልጽ እንደታየውም ብዙዎቹ አንጋፋ ተጨዋቾች የአቋም መውረድ የሚታይባቸውና ከወጣቶቹ ጉልበት ጋር የማይወዳደር ብቃት ይዘው መገኘታቸውን በመጠቆምና አንጋፋዎቹ ለብዙ ዓመታት የተኮተኮቱበትን የአጨዋወት ዘይቤን መሠረት በማድረግ የአሠልጣኙን ስብስብ ይተቻሉ፡፡ በሌላ በኩል አሠልጣኙን ‹‹ዕድለ ቢስ›› በማለት የሚገልጿቸው ደጋፊዎች ደግሞ በአጋጣሚ በጣም ጥሩ የሚባሉ ተጨዋቾች ዕድሜያቸው ገፍቶና አቋማቸው ወርዶ በመገኘቱ ምክንያት እንጂ ከወጣቶቹ ጋር በመጣመር ጥሩ ነገር ማሳየት ይችሉ እንደነበር በመጠቆም የሩዋንዳ ቆይታቸው በአጭሩ ሊቀጭ እንደሚችል ግምታቸውን ይሰጣሉ፡፡

በአጠቃላይ የኢትዮጵያ እግር ኳስ ችግር ብዙ የባለሙያ ልፋትን የሚጠይቅና ሥር ነቀል ለውጥን የሚፈልግ መሆኑ ግን  ዛሬ ላይ ጥሩ ምልከታ እንደሚሰጥ ብዙዎችን ያስማማል፡፡ ከአገር ውስጥና ከውጭ አገር የተውጣጡ አሠልጣኞችም ሆኑ ተጨዋቾች የአንድ ሰሞን ፌሽታን ከማሳየት ያለፈ ዘለቄታዊ እመርታን ያላሳዩ በመሆናቸው አሁንም ችግሩ አልታወቀም፤ አልያም ችግሩ ያለበት ቦታ ተትቶ በዙሪያው ርብርቦሽ ማድረግ መመረጡን በመጠቆም በርካቶች የችግሩን (የበሩን) ‹‹ቁልፍ›› መቀየር በሚል አስተያየታቸውን ይደመድማሉ፡፡ በዋናነትም አሠልጣኝ ሲባረር ቦታውን ለመተካት ከመረባረብ ይልቅ ለፕሮጀክቶችና ታዳጊ ወጣቶች ጊዜ ሰጥቶ መሥራት የግድ መሆኑንም ያስረዳሉ፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...