Friday, May 24, 2024
- ማስታወቂያ -
- ማስታወቂያ -

የዕድገትና ትራንስፎርሜሽን ዕቅዱን ለማሳካት ፈተና እንደገጠመው መንግሥት አመነ

spot_img

ተዛማጅ ፅሁፎች

የውጭ ብድር ክፍያ ጫናና የውጭ ምንዛሪ እጥረት አዙሪት ውስጥ ገብቷል

ሁለተኛውን የዕድገትና ትራንስፎርሜሽን ዕቅድ ዋና ዋና ግቦችን ለማሳካት አዳጋች ሁኔታ እንደገጠመው መንግሥት አመነ፡፡

የኢትዮጵያ ፕላን ኮሚሽን የዕቅዱን የግማሽ ዘመን አፈጻጸም በመገምገም በሁሉም የመንግሥት መዋቅሮች ውይይት እንዲደረግበት ያቀረበ ሲሆን፣ የዚህ የግምገማ ሰነድ ቅጂን ለማግኘት ተችሏል፡፡

ይኸው ሰነድ እንደገመገመው የኢኮኖሚ መዋቅራዊ ለውጥ ማረጋገጥ ለዕድገቱ ዘላቂነት ወሳኝ መሆኑ ቢታወቅም፣ በታቀደውና በሚጠበቀው እንዲሁም በኢኮኖሚው ልክ እየተፈጸመ ባለመሆኑ ትልቅ ፈተና እንደሚሆን ድምዳሜ ላይ ተደርሷል፡፡

የወጪ ንግድ አፈጻጸም ባለፉት ሁለት ዓመታት ከገቢ ንግድ አፈጻጸም በእጅጉ ያነሰ መሆኑ፣ የአገሪቱ የውጭ ምንዛሪ የማፍራት አቅም ውስን መሆንና አጠቃላይ የውጭ ምንዛሪ አቅርቦት ከአጠቃላይ ፍላጎት ያለመመጣጠን፣ በሌላ በኩል ደግሞ የአገሪቱ የውጭ ዕዳ ጫና ከጊዜ ወደ ጊዜ እየጨመረ መምጣት፣ እንዲሁም የታክስ ገቢ የመሰብሰብ አቅም ከታቀደው ግብ አኳያ ከፍተኛ ጉድለት ያለበት መሆኑ የኢኮኖሚው ከፍተኛ ፈተናዎች መሆናቸውን ሰነዱ ያትታል፡፡

ሁለተኛው የዕድገትና ትራንስፎርሜሽን ዕቅድ ትግበራ የተጀመረው በ2008 ዓ.ም. ሲሆን፣ መጠናቀቂያው ደግሞ በ2012 ዓ.ም. መጨረሻ መሆኑ ይታወቃል፡፡ የዚህ የአምስት ዓመት መርሐ ግብር አጋማሽ ዘመን ግምገማ እንደሚያሳየው በ2008 ዓ.ም. እና በ2009 ዓ.ም. በአማካይ 11.2 እና 11.1 በመቶ የኢኮኖሚ ዕድገት ለማስመዝገብ ታቅዶ፣ የተፈጸመው ግን 8.0 በመቶና 10.9 በመቶ እንደነበር ያስረዳል፡፡ አፈጻጸሙ ከዕቅድ በታች ቢሆንም፣ የዘላቂ ልማት ግቦችን ለማሳካት ታዳጊ አገሮች እንዲያስመዘግቡ ከሚጠበቅባቸው የሰባት በመቶ አማካይ ዕድገት አንፃር ከፍ ያለ መሆኑን ይጠቁማል፡፡

በ2008 ዓ.ም. እና በ2009 ዓ.ም የተገኘው የውጭ ብድር እንደ ቅደም ተከተላቸው 3.4 ቢሊዮን ዶላር እና 2.8 ቢሊዮን ዶላር ሲሆን፣ በ2007 ዓ.ም. ብቻ ተገኝቶ ከነበረው 6.4 ቢሊዮን ዶላር ጋር ሲነፃፀር በ53 በመቶና በ56 በመቶ ዝቅተኛ ነው፡፡

በ2010 ዓ.ም. ስድስት ወራት የተገኘው አጠቃላይ የውጭ ብድር 1.3 ቢሊዮን ዶላር መሆኑን የሚጠቅሰው ሰነዱ፣ አጠቃላይ የአገሪቱ የውጭ ብድር ክምችት 24.7 ቢሊዮን ዶላር መድረሱን ይጠቁማል፡፡

የውጭ ብድር ክምችቱ ከፍተኛ መሆን፣ እንዲሁም የውጭ ምንዛሪ እጥረትና የውጭ ብድር የመክፈል ግዴታ ከፍ እያለ መምጣት ለኢኮኖሚ ዕድገቱ ቀጣይነት ፈተና እንዳይሆን ትኩረት ተሰጥቶ ሊሠራ እንደሚገባ ያሳስባል፡፡

በ2008 ዓ.ም. እና በ2009 ዓ.ም. ለውጭ ብድሮች የወለድና የዋና ብድር ክፍያ እንደቅደም ተከተላቸው 1.1 ቢሊዮን ዶላር እና 1.2 ቢሊዮን ዶላር መከፈሉን፣ በ2010 ዓ.ም. ስድስት ወራት ደግሞ 688 ሚሊዮን ዶላር መከፈሉን ሰነዱ ያስረዳል፡፡

አጠቃላይ የንግድ ሚዛን ጉድለቱ መቀነስ ሲገባው በ2008 ዓ.ም. 13.9 ቢሊዮን ዶላር፣ በ2009 ዓ.ም. ደግሞ 12.9 ቢሊዮን ዶላር እንደነበር ያመለክታል፡፡ በ2009 ዓ.ም. ከወጪ ንግድ 8.7 ቢሊዮን ዶላር ለማግኘት ታቅዶ የነበረ ቢሆንም፣ የተገኘው ግን በጣም ዝቅተኛ እንደነበር በመጥቀስ፣ በተለየ ትኩረት ካልተሠራ በስተቀር የወጪ ንግድ ገቢ ከጠቅላላ የአገር ውስጥ ምርት ድርሻ በዕቅዱ ዘመን መጨረሻ 20.6 በመቶ ማድረስ አዳጋች መሆኑን ገልጿል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች