Sunday, June 23, 2024
- ማስታወቂያ -
- ማስታወቂያ -

የበርበሬ ዋጋ ከዚህም በላይ ሊቀንስ እንደሚገባ ተጠቆመ

spot_img

ተዛማጅ ፅሁፎች

ባለፈው ዓመት በከፍተኛ ደረጃ ዋጋቸው ጨምሮ ከነበሩ ምግብ ነክ ምርቶች መካከል አንዱ የሆነው የዛላ በርበሬ ዋጋ እየቀነሰ በመምጣት ሰሞኑን የአንድ ኪሎ በርበሬ ዋጋ እስከ 60 ብር እየተሸጠ ነው፡፡

ካለፈው ዓመት አጋማሽ ጀምሮ በተከታታይ ወራት ዋጋው እየጨመረ በመሔድ በበርበሬ ግብይት ያልታየ የመሸጫ ዋጋ ተቆርጦለት የአንድ ኪሎ ዛላ በርበሬ ዋጋ እስከ 170 ብር መድረሱ ይታወሳል፡፡

ከጥር ወር መጀመሪያ ሳምንት ወዲህ ግን ዋጋው እየቀነሰ በመምጣት በዚህ ሳምንት በአዲስ አበባ የተለያዩ የገበያ ሥፍራዎች የአንድ ኪሎ ዛላ በርበሬ ዋጋ በአማካይ 60 ብር በመሸጥ ላይ ነው፡፡

ከሰሞኑ የታየው የዋጋ ቅናሽ የተጠበቀውን ያህል ባይሆንም፣ ባለፈው ዓመት የመጨረሻ ወራት አካባቢ ከነበረው ዋጋ ጋር ሲነጻጸር ከ70 በመቶ በላይ ቅናሽ አሳይቷል፡፡

አምና በጥር ወር ውስጥ የአንድ ኪሎ ዛላ በርበሬ ተወደደ ተብሎ ከ35 እስከ 45 ብር ሲሸጥ የቆየ ሲሆን፣ ኅዳርና ታኅሳስ 2007 ዓ.ም. ደግሞ ከ30 እስከ 35 ብር ሲሸጥ እንደነበር ይታወሳል፡፡

ከ2007 ዓ.ም. ቀደም ብሎ ባሉ ተከታታይ ዓመታት በተለይ ከኅዳር ወር ጀምሮ የአንድ ኪሎ ዛላ በርበሬ ዋጋ ከ30 ብር በልጦ አያውቅም፡፡ የበርበሬ ምርት ከሚደርስበት ኅዳር ወር በኋላም ቢሆን እስከ ቀጣዩ የምርት ዘመን ድረስ ባሉ ወራቶችም ቢሆን ተወደደ ከተባለ ከ60 ብር እንደማይበልጥ ያነጋገርናቸው ነጋዴዎች ይገልጻሉ፡፡

በ2007 ዓ.ም. ግን በቂ ምርት የለም በሚል በኅዳር ወር 30 ብር ሲሸጥ የቆየው በርበሬ፣ በቀጣይ ባሉ ተከታታይ ወራት ዋጋው ባልተጠበቀ መንገድ እየጨመረ መዝለቁ ይታወሳል፡፡ የዛላ በርበሬ ዋጋ መጨመርም ተዘጋጅቶና ታሽጐ በሚቀርበው በርበሬ የመሸጫ ዋጋ ላይ ተፅዕኖ በማሳረፉ፣ የአንድ ኪሎ ተፈጭቶና ታሽጐ የሚቀርበው በርበሬ ዋጋ እስከ 250 ብር ደርሶ ነበር፡፡

እንደ አንዳንድ ሸማቾች ገለጻ ሰሞኑን የበርበሬ ዋጋ እየቀነሰ ቢሆንም፣ ወቅቱ በርበሬ የሚደርስበትና ዋጋውም የሚቀንስበት ከመሆኑ አንፃር አሁንም ኪሎው ዛላ በርበሬ በ60 ብር መሸጡ ትክክለኛ የገበያ ዋጋው ሊሆን አይችልም ብለዋል፡፡

በተለይ በቀደመው ዓመት ጥቅምትና ኅዳር ወሮች ይሸጥበት ከነበረው የመሸጫ ዋጋ በእጥፍ የጨመረ በመሆኑ፣ ከዚህም በላይ ሊቀንስ ይገባው ነበር በማለትም አስተያየት ይሰጣሉ፡፡

የበርበሬ ዋጋ አምና ሐምሌና ነሐሴ ይሸጥበት ከነበረው ዋጋ እየቀነሰ በመምጣት በጥቅምት 2008 ዓ.ም. ከ90 እስከ 100 ብር፣ ባለፈው ወር ደግሞ ከ70 እስከ 80 ብር ሲሸጥ ቆይቶ አሁን 60 ብር ሊደርስ ችሏል፡፡

በተመሳሳይ መንገድ ባለፈው ዓመት የአንዱ ኪሎ ዛላ ሚጥሚጣ ዋጋ እስከ 200 ብር ሲሸጥ የነበረ ሲሆን፣ በሰሞኑ ገበያ ግን የመሸጫ ዋጋው 60 ብር ደርሷል፡፡ ይህም ከፍተኛ ቅናሽ እንዳሳየ ያመላከተ ነው፡፡

በሁለቱ ምርቶች ላይ ከፍተኛ የሆነ ቅናሽ የታየ ሲሆን፣ ተፈጭቶና ታሽገው ለገበያ በሚቀርቡ በርበሬና ሚጥሚጣ ምርቶች ላይ ግን ብዙም የዋጋ ለውጥ እየታየ አይደለም እየተባለ ነው፡፡

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች