Sunday, June 23, 2024
- Advertisement -
- Advertisement -
ዜናየፌዴራል ፖሊስ ወንጀል ምርመራ ሠራተኞች ለተመሳሳይ ሥራ የተለያየ ክፍያ መፈጸሙን ተቃወሙ

የፌዴራል ፖሊስ ወንጀል ምርመራ ሠራተኞች ለተመሳሳይ ሥራ የተለያየ ክፍያ መፈጸሙን ተቃወሙ

ቀን:

የፌዴራል ጠቅላይ ዓቃቤ ሕግ በአዋጅ ቁጥር 943/2008 እንደገና በመቋቋሙ ምክንያት አራት የተለያዩ ተቋማት የወንጀል ምርመራ ሠራተኞች ወደ አንድ የምርመራ ሥርዓት እንዲጠቃለሉ የተደረጉ ቢሆንም፣ ለተመሳሳይ ሥራ የተለያየ ክፍያ መፈጸሙን ተቃወሙ፡፡

በተለያየ ስያሜና ተቋም ይሠሩ የነበሩት የፌዴራል የሥነ ምግባርና ፀረ ሙስና ኮሚሽን፣ የገቢዎችና ጉምሩክ ባለሥልጣን፣ የንግድ ውድድርና ሸማቾች ጥበቃ ባለሥልጣንና የፌዴራል ፖሊስ ወንጀል ምርመራ ሠራተኞች ናቸው፡፡ በአራቱም ተቋማት ውስጥ ይከፈላቸው የነበረው ደመወዝ የተለያየ በመሆኑ የተሰማቸውን ቅሬታ የፌዴራል የምርመራ ሠራተኞች ለሪፖርተር ተናግረዋል፡፡

የአራቱም ተቋማት ወንጀል ምርመራ ሠራተኞች አንድ ላይ በመጣመር በፌዴራል ፖሊስ ሥር ሆነው እየሠሩ ቢሆንም፣ ከ2008 ዓ.ም. መጨረሻ ጀምሮ እየተከፈላቸው ያለው ደመወዝ ለተመሳሳይ ሥራ የተለያየ መጠን ያለው መሆኑን ተናግረዋል፡፡

በፌዴራል ፖሊስ ኮሚሽን ኮሚሽነር ጄኔራል፣ በወንጀል ምርመራ ቢሮ ኃላፊና በሌሎች የሥራ ኃላፊዎች ተጠንቶ ለጠቅላይ ሚኒስትሩ ቢሮ መላኩ የተነገራቸው ቢሆንም፣ ‹‹ጠቅላይ ሚኒስትሩ አልፈረሙም›› እና ሌሎች ማባበያ ተስፋዎችን ከመስጠት በስተቀር፣ ተግባራዊ ሊሆንላቸው እንዳልቻለ ተናግረዋል፡፡

ላለፉት 24 ወራት ተመሳሳይ ሥራ የሚሠሩ የወንጀል መርማሪዎች አራትና አምስት እጥፍ ልዩነት ክፍያ እየተፈጸመ መሆኑን ቁጥር በመጥቀስ የሚቃወሙት የወንጀል ምርመራ ቢሮ አባላት፣ ከጥቅማ ጥቅም ውጪ ለአንደኛው ዘርፍ ዳይሬክተር 25,000 ብር ወርኃዊ ደመወዝ ሲከፈል ለሌላኛው ዘርፍ ዳይሬክተር 7,000 ብር እንደሚከፈል ጠቁመዋል፡፡ የአንደኛው ዘርፍ ዝቅተኛ የመርማሪ ደመወዝ 9,000 ብር ሲሆን፣ የሌላኛው ዘርፍ 3,000 ብር መሆኑን በማነፃፀር አስረድተዋል፡፡

በየዓመቱ በቢሊዮኖች የሚቆጠሩ የተመዘበሩ ንብረቶችንና ገንዘቦችን ወደ መንግሥት ካዝና ገቢ የሚያደርግ ተቋም መሆኑን የጠቆሙት አባላቱ፣ ለሠራተኞቹ መብትና ጥቅም የማይቆም መሆኑ ደግሞ እያሳዘናቸው እንደሆነ አስረድተዋል፡፡ ችግሩ ሊፈታ ባለመቻሉም በርካታ ልምድ ያላቸው መርማሪዎች መልቀቃቸውን ጠቁመው፣ የተቋሙ አመራር ሠራተኛውን ‹‹ምን ሠራህ?›› እንጂ ‹‹ምን ትፈልጋለህ? ምን ችግር አለብህ?›› ብሎ ስለማይጠይቅ፣ የአባላቱ መብት በግዴታ መሸፈኑን ተናግረዋል፡፡

የሚመለከተው የመንግሥት አካል ያለውን ልዩነት፣ ችግርና ሌሎች ተግዳሮቶች ተመልክቶ አፋጣኝ ማስተካከያና ማሻሻያ ካልተደረገ፣ በርካታ የቢሮው አባላት ሳይወዱ በግድ የሚወዱትን ተቋም ሊለቁ እንደሚገደዱ አስታውቀዋል፡፡

የፌዴራል ፖሊስ ወንጀል ምርመራ ቢሮ አባላት ያነሷቸውን መሠረታዊ ጥያቄዎች ለሚመለከተው ኃላፊ በማቅረብ ማብራሪያ ለማግኘት የፌዴራል ፖሊስና የፌዴራል ጠቅላይ ዓቃቤ ሕግ ኃላፊዎችን ምላሽ ለማግኘት የተደረገው ጥረት አልተሳካም፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

አስጨናቂው የኑሮ ውድነት ወዴት እያመራ ነው?

ከቅርብ ጊዜያት ወዲህ የኑሮ ውድነት እንደ አገር ከባድ ፈተና...

‹‹ወላድ ላማቸውን አርደው ከደኸዩት ወንድማማቾች›› ሁሉም ይማር

በንጉሥ ወዳጅነው   የዕለቱን ጽሑፍ በአንድ አንጋፋ አባት ወግ ልጀምር፡፡ ‹‹የአንድ...

የመጋቢቱ ለውጥና ፈተናዎቹ

በታደሰ ሻንቆ ሀ) ችኩሎችና ገታሮች፣ መፈናቀልና ሞትን ያነገሡበት ጊዜ እላይ ...

ጥራት ያለው አገልግሎት መስጠት የሚያስችል ሥርዓት ሳይዘረጉ አገልግሎት ለመስጠት መነሳት ስህተት ነው!

በተለያዩ የመንግሥትና የግል ተቋማት ውስጥ ተገልጋዮች በከፈሉት ልክ የሚፈልጉትን...