Monday, October 3, 2022
ሌሎች ዓምዶች
    - Advertisement -
    - Advertisement -
    ማኅበራዊ​የጤና አገልግሎት ጥራት ኦዲት ሊካሄድ ነው

    ​የጤና አገልግሎት ጥራት ኦዲት ሊካሄድ ነው

    ቀን:

    የጤና አገልግሎት ጥራት አገራዊ ደረጃውን ጠብቆ ይካሄዳል ወይ? የሚለውን ለማወቅ የሚያስችል የክሊኒካል ኦዲት ሥራ በየጊዜው ለማከናወን መታሰቡን ዶ/ር ከሰተብርሃን አድማሱ የጤና ጥበቃ ሚኒስትር ገለጹ፡፡

    ለአራት ቀናት የሚካሄደውን የኢትዮጵያ ሕክምና ማኅበር 52ኛ ዓመታዊ ሳይንሳዊ ጉባኤን የካቲት 3 ቀን 2008 ዓ.ም. ከከፈቱ በኋላ ከጋዜጠኞች ጋር ባካሄዱት ቃለ ምልልስ ሚኒስትሩ እንደገለጹት፣ የጤና አገልግሎት ጥራት ኦዲት የሚካሄደው በቡድን የተደራጁ የሕክምና ባለሙያዎችን ወደ ሕክምና ተቋም በመላክ ነው፡፡

    ታካሚው አለበት ተብሎ የሚታሰበው ሕመም የሚጠይቀውን ዓይነት የሕክምና ምርመራ ተደርጎለታል ወይ? አገራዊ ደረጃውን የጠበቀ ሕክምናና ተገቢ ምክር ተሰጥቷል ወይ? የሚባለውንና ተያያዥ ጉዳዮች ላይ ኦዲት ያከናውናሉ፡፡

    የቁጥጥሩን ሥራም የኢትዮጵያ ሕክምና ማኅበር ከጤና ጥበቃ ሚኒስቴርና ከክልል ቢሮዎች ጋር አብሮ ይሠራል ተብሎ ይጠበቃል፡፡

    ኦዲቱ፣ የሕክምና ግድፈቶችን ለመቀነስና ለመቆጣጠር ትልቅ አቅም የሚኖረው ሲሆን፣ ከዚህም ሌላ ኅብረተሰቡ ስለ ጤናውና መብቱ እንዲያውቅ ትምህርት ለመስጠት ታስቧል፡፡

    ትምህርቱ ሕዝቡ ወደ ጤና ተቋም ሲሄድ ስለ ሕክምናውና በሕግ ስለተቀመጡ መብቶቹ የማሳወቅ ጉዳይንም ያካትታል፡፡ ለዚህም የጤና ኤክስቴሽን ፕሮግራሙንና የጤና ልማት ሠራዊቱን በዋነኛነት እንደሚጠቀሙ ዶ/ር ከሰተብርሃን ተናግረዋል፡፡

    ለካንሰር ስፔሻላይዜሽን ዩኒቨርሲቲ የሚገቡ ሐኪሞች ቁጥር እየጨመረ መምጣቱን፣ በአገሪቱ የተሟላ የካንሰር ሕክምና አገልግሎት ለመስጠት የሚያስችል ዝግጅት መጀመሩንና ከአዲስ አበባ ውጭ በሚገኙ አምስት የመንግሥት ዩኒቨርሲቲዎች የጨረር ሕክምና ለጀመር መታቀዱን አክለዋል፡፡

    እንደዚህ ዓይነት ከባድ ሕክምና በሚጠይቁ አገለግሎቶች ላይ የግሉ ዘርፍ ቢሳተፍ፣ ለሕዝቡ አማራጭ ሆኖ ሊቀርብለት እንደሚችልና የግል ባለሀብቶች በዚህ ዘርፍ ኢንቨስት ቢያደርጉ በመንግሥት በኩል እገዛ የሚደረግ መሆኑን ሚኒስትሩ ገልጸዋል፡፡

    ዶ/ር ገመቺስ ማሞ የኢትዮጵያ ሕክምና ማኅበር ፕሬዚዳንት ‹‹በሕክምና ሙያ የሚሳተፉ የዛሬ ተማሪዎች ጥራቱን የጠበቀ ትምህርት ያገኙ ዘንድ ማኅበሩ የበኩሉን ግዴታ እንደሚወጣ፣ ይህንንም መሠረት በማድረግ ጉዳዩ ከሚመለከታቸው ባለድርሻ አካላት ጋር በመወያየት ራሱን የቻለ ኮሚቴ አዋቅረው በመንቀሳቀስ ላይ መሆናቸውን ተናግረዋል፤››

    በአገሪቱ ውስጥ ያሉትን ሐኪሞች ግማሹን ያህል እንኳን ያላቀፈ ማኅበር ጠንካራ ነው ለማለት እንደማያስደፍር፣ የአባላቱ ቁጥር መመናመንን በተመለከተ መንስኤዎችን ለመለየት የሚያስችል ዳሰሳ እንደተካሄደ፣ በዚህም ዳሳሰ ከቀረቡት ምክንያቶች አንደኛው ማኅበሩ ለሐኪሞ መብት አይቆምም የሚል እንደሆነ አስረድተዋል፡፡

    ለአባላት ቁጥር መመናመን ሌላው ምክንያት ሐኪሞች በተለያዩ የስፔሻሊቲ ማኅበራት መደራጀትና የኢትዮጵያ ሐኪሞች ማኅበርን አስፈላጊነት መጠራጠር ነው፡፡ በመሆኑም ማኅበሩ ተቀራርቦ ለመሥራት እየተንቀሳቀሰ ይገኛል ሲሉ ገልጸዋል፡፡

    በተባበሩት መንግሥታት የስብሰባ ማዕከል በተከናወነው በዚሁ ጉባኤ ላይ በሕክምናው ዘርፍ የላቀ አገልግሎት ያበረከቱ የሕክምና ባለሙያዎች ማኅበሩ ያዘጋጀላቸውን ሽልማት ከሚኒስትሩ እጅ ተቀብለዋል፡፡

    - Advertisement -

    ይመዝገቡ

    spot_img
    spot_img