Saturday, May 25, 2024
- Advertisement -
- Advertisement -

ዜና​የአንድነት ፓርቲ አመራር የነበረው አቶ ሀብታሙ አያሌው ከእስር ተፈታ

​የአንድነት ፓርቲ አመራር የነበረው አቶ ሀብታሙ አያሌው ከእስር ተፈታ

ቀን:

  • ሌሎቹ የፖለቲካ አመራሮች ዛሬ ፍርድ ቤት ይቀርባሉ

በአንድነት ለዴሞክራሲና ለፍትሕ ፓርቲ (አንድነት) ውስጥ በተለያዩ ኃላፊነቶች አመራር ሆኖ ሲሠራ የነበረው አቶ ሀብታሙ አያሌውና በተመሳሳይ የክስ መዝገብ ተካቶ የነበረው መምህር አብረሃም ሰለሞን፣ ማክሰኞ የካቲት 8 ቀን 2008 ዓ.ም. ከእስር ተፈትተው ከቤተሰቦቻቸው ተቀላቀሉ፡፡

የፌዴራል ጠቅላይ ፍርድ ቤት ይግባኝ ሰሚ ችሎት የካቲት 3 ቀን 2008 ዓ.ም. አቶ ሀብታሙ አያሌው፣ አቶ ዳንኤል ሺበሺ፣ አቶ አብረሃ ደስታ፣ አቶ የሺዋስ አሰፋና መምህር አብረሃም ሰለሞን ከእስር እንዲፈቱ፣ ለፌዴራል ማረሚያ ቤቶች የመፍቻ ትዕዛዝ እንዲደርሰው ትዕዛዝ ሰጥቶ ነበር፡፡

ፍርድ ቤቱ በሰጠው ትዕዛዝ መሠረት በማግሥቱ የካቲት 4 ቀን 2008 ዓ.ም. ከሰዓት በፊት የመፍቻ ትዕዛዝ ለማረሚያ ቤት አስተዳደር መድረሱ የተረጋገጠ ቢሆንም፣ የፍርድ ቤቱ ትዕዛዝ ተከብሮ እስረኞቹ ሊፈቱ አልቻሉም፡፡

- Advertisement -

ተከሳሾቹ የካቲት 3 ቀን 2008 ዓ.ም. በማረሚያ ቤቱ እየተፈጸመባቸው የሚገኘውን በደል ለፍርድ ቤቱ አስረድተው፣ የማረሚያ ቤቱ ኃላፊዎች እንዲጠየቁላቸው አመልክተው ነበር፡፡ ሆኖም ፍርድ ቤቱ ትዕዛዝ ሳይሰጥበት አልፎ ነበር፡፡

ከሳሽ ዓቃቤ ሕግ ለማስረጃነት የተጠቀመበትና የሥር ፍርድ ቤት እንዳልመረመረለት የገለጸውን ከብሔራዊ መረጃና ደኅንነት አገልግሎት ተገኘ የተባለውን ትክክለኛ (Original) ሰነድ ለመመርመር ለየካቲት 7 ቀን 2008 ዓ.ም. በሰጠው ቀጠሮ ላይ፣ ሁሉም ተከሳሾች ከማረሚያ ቤት ቀርበው በፍርድ ቤቱ ትዕዛዝ መሠረትም እንዳልተፈቱ አመልክተዋል፡፡

የፍርድ ቤቱ ትዕዛዝ እንዳልተከበረ ያመለከቱት ተከሳሾቹ ማረሚያ ቤቱ እንዲጠየቅላቸው አመልክተው፣ እነሱን አጅበው የመጡት የማረሚያ ቤቱ ተወካይ ተጠይቀዋል፡፡

ተወካዩ ለፍርድ ቤቱ እንዳስረዱት ፍርድ ቤቱ ያዘዘውን በሙሉ ለኃላፊዎቻቸው አስረድተዋል፡፡ ነገር ግን ሊረዷቸው ስላልቻሉ ፍርድ ቤቱ በድጋሚ በደንብ ጽፎ እንዲሰጣቸው ጠይቀዋል፡፡ በሌላ በኩል ተከሳሾቹ ችሎት በመድፈር ወንጀል የተቀጡ በመሆናቸው ጊዜው ገና መሆኑንም አስረድተዋል፡፡

ችሎት በመድፈር ወንጀል ስለተቀጡበት ሁኔታ ተከሳሾቹ ለፍርድ ቤቱ እንዳስረዱት የሥር ፍርድ ቤት ቅጣቱን ሲጥልባቸው፣ ‹‹እጃችሁ ከተያዘበት ቀን ጀምሮ ይታሰባል፤›› ስላላቸው መጨረሳቸውን ተናግረዋል፡፡ ቅጣቱ ከመቼ ጀምሮ እንደታሰበ የሥር ፍርድ ቤትን ውሳኔ መመልከት እንደሚያስፈልግ ፍርድ ቤቱ ጠቁሞ፣ አሠራሩ ግን ችሎት ተደፍሯል ከተባለበት ዕለት ጀምሮ እንደሚቆጠር በመጠቆም፣ የእነሱም ቅጣት፣ ‹‹ችሎት ደፍራችኋል›› ከተባለበት ቀን ጀምሮ ሊሆን እንደሚችል ገልጿል፡፡ የማረሚያ ቤቱ ኃላፊዎች ከፍርድ ቤቱ ጋር ተስማምተው እንደሚሠሩ የተናገሩት ዳኛው ዳኜ መላኩ በጽሕፈት ቤት በኩል አስጠርተው፣ ‹‹ለምን የፍርድ ቤቱ ትዕዛዝ ተከብሮ መፈታት ያለባቸው እንዳልተፈቱ እንጠይቃለን፤›› ካሉ በኋላ፣ በተለይ አቶ ሀብታሙ አያሌውና መምህር አብርሃም ሰለሞን የካቲት 7 ቀን 2008 ዓ.ም. ከእስር እንዲፈቱ ትዕዛዝ ሰጥተው ነበር፡፡ ማረሚያ ቤቱ የፈታቸው ግን በማግሥቱ የካቲት 8 ቀን 2008 ዓ.ም. ረፋዱ ላይ መሆኑ ታውቋል፡፡

ችሎት በመድፈር ወንጀል በሥር ፍርድ ቤት ቅጣት የተጣለባቸው አቶ አብረሃ ደስታ (16 ወራት) አቶ ዳንኤል ሺበሺና አቶ የሺዋስ አሰፋ (14 ወራት) የካቲት 3 ቀን 2008 ዓ.ም. አቅርበውት የነበረውን አቤቱታ እንዲያሰሙ ፍርድ ቤቱ ፈቅዶላቸው እንዳስረዱት ቤተሰብ እንደማይጠይቃቸው፣ ከሌሎች ታራሚዎች በተለየ ሁኔታ ለብቻቸው መታሰራቸውን፣ ዛቻና ማስፈራሪያ እየደረሰባቸው መሆኑን ገልጸዋል፡፡ አቶ ዳንኤል ቀደም ባሉት ጊዜያት ባለቤቱ ትጠይቀው እንደነበር፣ ነገር ግን በቅርቡ ማንም እንደማይጠይቀው አመልክቶ ሕይወቱ አደጋ ላይ መሆኑን አመልክቷል፡፡ ሌሎች ታራሚዎች እንደታሰሩት እሱም እንዲስተካከልለት ጠይቋል፡፡

ፍርድ ቤቱ ከብሔራዊ መረጃና ደኅንነት አገልግሎት መቅረቡ የተገለጸውን 367 ገጽ ማስረጃ ለእያንዳንዳቸው ተከሳሾች በችሎት እንዲሰጣቸው፣ የማረሚያ ቤት ኃላፊዎች ስለቀረበው አቤቱታ ቀርበው እንዲያስረዱና የሥር ፍርድ ቤት በችሎት መድፈር ቅጣት የጣለባቸው ተከሳሾች ከመቼ ጀምሮ ቅጣቱ እንደሚቆጠርላቸው ብይኑ ታይቶ እንዲቀርብለት ለረቡዕ የካቲት 9 ቀን 2008 ዓ.ም. ቀጠሮ ሰጥቷል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የማዳበሪያ አቅርቦትና ውጣ ውረዱ

በቅፅል ስሙ “The Father of Chemical Warfare” እየተባለ የሚጠራው...

የኢትዮጵያ ልማት ባንክ የትርፍ ምጣኔውን ከ70 በመቶ በላይ አሳደገ

ከሁለቱ መንግሥታዊ ባንኮች መካከል አንዱ የሆነው የኢትዮጵያ ልማት ባንክ...