Wednesday, June 19, 2024
- ማስታወቂያ -
- ማስታወቂያ -

​ግብፅ ከኢትዮጵያ ጋር የሕክምና ቱሪዝም እንደምትጀምር አስታወቀች

spot_img

ተዛማጅ ፅሁፎች

  • በመድኃኒትና በሥጋ ዘርፍ የሁለቱ አገሮች ንግድ ሊጠናከር እንደሚችል ይጠበቃል

በግብፅና በኢትዮጵያ ግንኙነት መካከል ትልቅ ትኩረት የሚስበው የፖለቲካ ክራሞት ቢሆንም፣ በየጊዜው ብቅ ብቅ የሚሉ የንግድና የኢንቨስትመንት እንቅስቃሴዎች አልጠፉም፡፡ ከእነዚህ መካከል በኢትዮጵያና በግብፅ መካከል ይጀመራል የተባለው የሕክምና ቱሪዝም አንዱ ነው፡፡

በመጪው የካቲት 18 ቀን 2008 ዓ.ም. በራዲሰን ብሉ በግብፅ ኤምባሲ የግብፅ የንግድ ጽሕፈት ቤት አስተባባሪነት በአዲስ አበባ የሚያካሒደውን የግብፃውያን የሕክምና ኢንዱስትሪዎች ሴሚናር አስመልክቶ የካቲት 8 ቀን መግለጫ ተሰጧል፡፡ የጽሕፈት ቤቱ ኃላፊ ዋሊድ አልዛውመርና ባልደረቦቻቸው በሰጡት መግለጫ እንዳስታወቁት፣ የሚካሔደው ሴሚናር ትኩረቱን በሕክምናና በመድኃኒት ዘርፍ ላይ ያደርጋል፡፡ በመሆኑም በመድኃኒት፣ በእንስሳት ሕክምና፣ በሕክምና ቁሳቁሶች አቅርቦት፣ በመዋቢያ ምርቶችና በሕክምና ቱሪዝም መስክ ላይ የሚያተኩረው ሴሚናር ላይ ለመሳተፍ ከ25 ያላነሱ የግብፅ ኩባንያዎች አዲስ አበባ እንደሚገቡ አልዛውመር ጠቁመዋል፡፡ ከኢትዮጵያ ወገን ከ100 እስከ 120 ተሳታፊዎች ይጠበቃሉ ተብሏል፡፡

ለመጀመሪያ ጊዜ በሕክምናና በመድኃኒት ዘርፍ በማተኮር የሚካሔደው ሴሚናር፣ ይበልጡን በመድኃኒትና በሕክምና ቱሪዝም መስክ ግብፅ እንደምታተኩርና ይህንንም እንደምትገፋበት አልዛውመር አስረድተዋል፡፡ ከኢትዮጵያ ሕሙማንን ወደ ግብፅ ሔደው እንዲታከሙ የሚያስችል የሕክምና አገልግሎት ለመስጠት ያለመውና በሕክምና ቱሪዝም ሥር የታቀፈው ይህ አካሔድ፣ የተመረጡ የግብፅ ሆስፒታሎች ከኢትዮጵያ መንግሥት ጋር በመነጋገር ስምምነት ለማድረግ ዝግጅት እያደረጉ እንደሚገኙ ገልጸዋል፡፡ ይህንን ተከትሎም በቅርቡ ከጤና ጥበቃ ሚኒስቴር ጋር የመግባቢያ ስምምነት እንደሚፈረም ኃላፊው ጠቁመዋል፡፡ በአንፃሩ ኢትዮጵያ ለአሥር ዓመት የመድኃኒት ዘርፍን የሚመራ ማስተር ፕላን በቅርቡ ይፋ ማድረጓ ይታወሳል፡፡ በዚህ ዕቅድ መሠረት በርካታ የአገር ውስጥ መድኃኒት አምራቾች በማምረትና ኤክስፖርት በማድረግ ሥራዎች ላይ ይሳተፋሉ ተብሎ ይጠበቃል፡፡

በመሆኑም የስምምነቱ ሒደት እንደተጠናቀቀ የግብፅ መንግሥት ወደ ውጭ ሔደው እንዲታከሙ ለሚታዘዝላቸው ሕሙማን የቪዛ አገልግሎትን ጨምሮ የተሟላ የሕክምና ፓኬጅ ማዘጋጀቱን አልዛውመር አስታውቀዋል፡፡

በግብፅና በኢትዮጵያ መካከል የንግድና የኢኮኖሚ ትስስር ለመፍጠር ተስፋ ተጥሎበታል የተባለው የሕክምና ዘርፍ፣ ከግብፅ ወገን ወደ ኢትዮጵያ መድኃኒቶች፣ የሕክምና ቁሳቁሶች፣ መዋቢያ ምርቶችና መሰል ምርቶችን ለማስገባት ታልሟል፡፡ ከኢትዮጵያ ወገን ደግሞ ላለፉት ሁለት ዓመታት ተቋርጦ የቆየውን የሥጋ ኤክስፖርት ለማስቀጠል ግብፅ ፍላጎት እንዳላት አልዛውመር አስታውቀዋል፡፡ ከዚህ ቀደም ወደ ግብፅ ይላክ የነበረው የሥጋ ምርት ጤናውን አልጠበቀም በሚል ሰበብ ሲቋረጥ መቆየቱ ይታወቃል፡፡

ይሁንና በአሁኑ ወቅት ይህ ለግብፅ አሳሳቢ ጉዳይ እንዳልሆነ በመግለጽ ሥጋት እንደማይሆን አረጋግጠዋል፡፡ ከሥጋ ባሻገር የቁም እንስሳት ወጪ ንግድ፣ ቅባት እህሎች በተለይም ሰሊጥ፣ እንዲሁም የአየር ትራንስፖርት ዋናዎቹ ወደ ግብፅ ሲላኩ የቆዩ ምርቶችና አገልግሎቶች ናቸው፡፡ በአንፃሩ ኢትዮጵያ ከግብፅ ከምትገዛቸው ምርቶች መካከል የሕክምና መገልገያዎችና መድኃኒቶች፣ የስንዴ ዱቄትን ጭምሮ ልዩ ልዩ የምግብ ሸቀጦች ይጠቀሳሉ፡፡

ባለፈው ዓመት 76 ሚሊዮን ዶላር የወጪ ንግድ በማስገኘት ከታቀደለት እጅጉን ያነሰ አፈጻጸም ያስመዘገበው የሥጋና የወተት ኢንዱስትሪ ንዑስ ዘርፍ፣ በአገሪቱ እየተገነቡ ካሉ የኤክስፖርት ሥጋ ማቀነባበሪያ ፋብሪካዎች ብዙ ይጠብቃል፡፡ የሥጋ ዘርፉ በይበልጥ ወደ መካከለኛው ምሥራቅ በሚደረግ የወጪ ንግድ ላይ ተንጠላጥሎ የቆየ ሲሆን፣ የኢትዮጵያ የሥጋና ወተት ኢንዱስትሪ ቴክኖሎጂ ልማት ኢንስቲትዩት እንደ ቻይና ያሉ ትልልቅ ገበያዎች ላይ እንደሚያተኩር ሲገልጽ ይደመጣል፡፡ ቻይናውያን የከብት ሥጋ ማዘውተር በመጀመራቸው ትልቅ ገበያ ቢፈጠርም፣ አብዛኛው የሥጋ ወጪ ንግድ ከደቡብ አሜሪካ አገሮች ወደ ቻይና እንደሚላክ የኢንስቲትዩቱ ኃላፊዎች ይገልጻሉ፡፡ ኢትዮጵያ ካላት ጂኦግራፊያዊ ቅርበት አኳያ ግብፅን ጨምሮ እስከ ቻይና ያሉ ገበያዎችን የማዳረስ ፍላጎት አላት፡፡

እ.ኤ.አ. በ2014 በግብፅና በኢትዮጵያ መካከል የነበረው የንግድ ግንኙነት 250 ሚሊዮን ዶላር ገደማ እንዳስመዘገበ አልዛውመር አስታውሰዋል፡፡ ከዚህ ውስጥ ግብፅ ወደ ኢትዮጵያ ከላከቻቸው ምርቶችና አገልግሎቶች ያገኘችው 170 ሚሊዮን ዶላር ሲሆን፣ ቀሪውን ገንዘብ ኢትዮጵያ ወደ ግብፅ ከላከቻቸው ምርቶችና አገልግሎቶች አግኝታለች፡፡  ይሁንና በቀጣዩ የ2015 በጀት ዓመት ኢትዮጵያ ወደ ግብፅ ያደረገችው የወጪ ንግድ እንቅስቃሴ እጅጉን እንደተቀዛቀዘ ይህም ከድርቁ ጋር በተያያዘ ሊሆን እንደሚችል ግምታቸውን ገልጸዋል፡፡ ይሁንና ግብፅ ወደ ኢትዮጵያ ያደረገችው የወጪ ንግድ እንቅስቃሴ እ.ኤ.አ. ከ2014 አኳያ የ27 ከመቶ ዕድገት ታይቶበታል፡፡

በኢትዮጵያና በግብፅ የንግድና ኢኮኖሚ ግንኙነት ላይ ትልቁን ድርሻ የያዘው የሕክምና ዘርፍ እንደሆነ ያብራሩት አልዛውመር፣ በተለያዩ ጊዜያት የግብፅ የሕክምና ተጓዥ ቡድን አባላት ወደ ኢትዮጵያ በመምጣት አገልግሎት ሲሰጡ እንደቆዩ ይናገራሉ፡፡

በአሌክሳንድሪያ የኮፕቲክ ኦርቶዶክስ የኢትዮጵያ ቤተ ክርስቲያን ተጠሪ የሆኑት አባ አንጌሎስ ኢልናቃዲ፣ በሁለቱ አገሮች መካከል ያለው የወንድማማች ግንኙነት ከቅድመ ታሪክ ጀምሮ እንደሚመዘዝ ጠቅሰዋል፡፡ ከመጀመሪያው ፓትሪያክ ከአቡ ሰላማ ከሳቴብርሃን (በግብፅ ስማቸው ቅዱስ ፍሬምናጦስ) ጀምሮም የሁለቱ አገሮች ግንኙነት እየተጠናከረ መምጣቱን አውስተዋል፡፡

በአሁኑ ወቅት የግብፅ ኮፕቲክ ቤተ ክርስቲያን አባላት የሚሳተፉበት የሕክምና ቡድን በወሊሶ፣ በሰበታ እንዲሁም በዓለምገና የሕክምና አገልግሎት መስጫ አካባቢዎች ድጋፍ እያደረገ እንደሚገኝ አባ አንጌሎስ ኢልናቃዲ ገልጸዋል፡፡ ከዚህም በተጨማሪ በአዲስ አበባ ቅዱስ ጳውሎስ ሚሊኒየም ሆፒስታልን ጨምሮ በሜቄዶንያና በሌሎች በጎ አድራጎት ድርጅቶች ውስጥ ድጋፍ የሚያድርጉ የሕክምና ቡድን አበላት በየሦስት ወሩ እየመጡ አገልግሎት ሲሰጡ እንደሰነበቱ ገልጸዋል፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች