Thursday, February 9, 2023
- Advertisment -
- Advertisment -

​​​​​​​መንግሥት ለወጣቶች ምን እያደረገላቸው ነው?

በአሁኗ ኢትዮጵያ ወጣቱን የኅብረተሰብ ክፍል የሁሉም ነገሮች መነሻና መድረሻ ማድረግ በጣም አስፈላጊ ነው፡፡ ምክንያቱ ደግሞ ታዳጊዎችን ጨምሮ የወጣቶች ቁጥር ከአጠቃላዩ የሕዝብ ብዛት አንፃር ሲታይ 70 በመቶ ያህል በመሆኑ ነው፡፡ በአገሪቱ ውስጥ የሚከናወኑ ፖለቲካዊ፣ ኢኮኖሚያዊና ማኅበራዊ ጉዳዮች ወጣቱን የኅብረተሰብ ክፍል ታሳቢ ማድረግ ብቻ ሳይሆን፣ ይልቁንም በማናቸውም ውሳኔዎች ላይ በቀጥታም ሆነ በተዘዋዋሪ ዋነኛ ተሳታፊ ማድረግ የግድ ይላል፡፡ አሁን በአገሪቱ ያለው የወጣቶች አጠቃላይ ሁኔታ ሲገመገም፣ ለወጣቶች የተሰጠው ትኩረት ብርቱ ጥያቄ ይነሳበታል፡፡

በእርግጥ በአሁኑ ጊዜ 30 ሚሊዮን ያህል ወጣቶች በትምህርት ገበታ ላይ ይገኛሉ፡፡ በገጠር ከሚገኙ የመጀመርያ ደረጃ ትምህርት ቤቶች አንስቶ እስከ ከፍተኛ ትምህርት ተቋማት ድረስ ወጣቶች እየተማሩ ነው፡፡ ከመደበኛ ትምህርት በተጨማሪ በልዩ ልዩ የሙያና የቴክኒክ ሥልጠናዎችም ተሳትፎ እያደረጉ ነው፡፡ ነገር ግን ወጣቶችን ከትምህርትም ሆነ ከተለያዩ ቁም ነገሮች የሚለዩዋቸው በርካታ እንቅፋቶችም ከበዋቸዋል፡፡ ከመኖሪያ አካባቢያቸው ጀምሮ በትምህርት ቤቶች፣ በሥራ አካባቢዎችና በመሳሰሉት እንደ ሰንሰለት ተቀጣጥለው የከተሙት መጠጥ ቤቶች፣ መቃሚያዎች፣ የሺሻ ማጨሺያዎች፣ ቁማር ቤቶች፣ ሕገወጥ ድርጊት የሚፈጸምባቸው ማሳጅ ቤቶች፣ አልቤርጎዎችና የመሳሰሉት ወጣቶችን ከብሩህ ዓላማዎቻቸው እያሰናከሏቸው ነው፡፡ መንግሥት የት ነው ያለው? ቤተሰብና ኅብረተቡስ?

በየደረጃው ያሉ የሚመለከታቸው የመንግሥት መሥሪያ ቤቶች (ወረዳ፣ ክፍለ ከተማ፣ ዞን …) በየመዋቅሩ ያሉ የወጣቶችና የስፖርት ጉዳይ የሚመለከታቸው ተቋማት፣ ሕዝብን ወክለው በተለያዩ ደረጃዎች ያሉ ምክር ቤቶች፣ የሃይማኖት ተቋማት፣ ሕዝባዊ ማኅበራትና የመሳሰሉት የወጣቶች ጉዳይ ካልተመለከታቸው ማን ነው የሚመለከተው? ወጣቶች የሚማሩባቸው ትምህርት ቤቶች የግል ጥቅማቸውን ብቻ በሚያስቡ የጥፋት ንግድ ተቋማት ተከበዋል፡፡ እነዚህ አልባሌ ነገር ግን አጥፊ የንግድ ተቋማት በመኖሪያ ሠፈሮች ውስጥ በሚያስደነግጥ ሁኔታ ተንሠራፍተዋል፡፡ ትምህርት ቤቶችንና የመኖሪያ ሠፈሮችን ሱስ ለሚያሲዙና ወጣቶችን ለጥፋት ለሚዳርጉ አደገኛ ነገሮች አጋልጦ ሰጥቶ የምን ልማት ነው? የምን ዕድገት ነው?

በአዲስ አበባም ሆነ በተለያዩ የአገሪቱ ከተሞች ውስጥ ወጣቶች የሚዝናኑት የት ነው? ጫት ቤት፣ መጠጥ ቤት፣ ቁማር ቤትና የመሳሰሉት ሞራል የሚላሽቅባቸው ሥፍራዎች ነው፡፡ የወጣቶች ስፖርት ማዘውተሪያ ሥፍራዎች እየተሸነሸኑ ሕንፃዎች ይገነቡባቸዋል፡፡ ስለ አብያተ መጻሕፍት ግንባታ ጉዳይ የሚናገር የለም፡፡ ለአረንጓዴ ቦታዎች ትኩረት በመነፈጉ ወጣቶችም ሆኑ አረጋውያን የሚያስፈልጓቸው ፓርኮች የሉም፡፡ ግለሰቦች ጥረት ሲያደርጉ የሚያበረታታ የለም፡፡ አትሌቲክስ፣ እግር ኳስ፣ መረብ ኳስ፣ ቅርጫት ኳስ፣ ውኃ ዋና፣ ሜዳ ቴኒስና የመሳሰሉትን ስፖርታዊ እንቅስቃሴዎች ማድረግ የሚፈልጉ ወጣቶች አማራጭ ሲያጡ ሱስ ውስጥ ይነከራሉ፡፡ ይኼ ፈፅሞ አገሪቱ ልትታገሰው የማይገባ ከንቱ ተግባር ነው፡፡ አገር የሚያስተዳድር መንግሥት የት ነው የሚያስብሉ አሰቃቂ ድርጊቶች በዝተዋል፡፡

በአዲስ አበባ ከተማ የተለያዩ ሥፍራዎች የሚንቀሳቀስ ማንም ሰው በሕንፃዎችና በመኖሪያ ቤቶች ግንባታ መብዛት ይገረማል፡፡ የከተማው ማደግና መልማት ጥሩ ሆኖ ሳለ፣ ከቁሳዊው ዕድገት ባልተናነሰ ለሰብዓዊው ዕድገት ትኩረት መሰጠት ሲገባው ወጣቶች በጥፋት መልክዕተኞች እየተሰናከሉ ነው፡፡ በከተማው በበርካታ ሥፍራዎች ለጋ ወጣቶች የሚታደሙባቸው የቀን ፓርቲዎችና ጭፈራ ቤቶች እየደሩ ነው፡፡ በተለያዩ ሱሶችና በመጠጥ የናወዙ ለግላጋ ወጣቶች ከጉለሌ እስከ ቦሌ በብዛት ይታያሉ፡፡ ለአቅመ አዳም/ሔዋን ያልድረሱ ታዳጊዎች ለዝሙት ተዳርገዋል፡፡ በየሳምንቱ መጨረሻ ረብጣ ብሮች ከወላጆቻቸው (ከባለሥልጣናትና ከሀብታሞች) እየተቀበሉ በየጭፈራ ቤቶች የሚያነጉ ሞልተዋል፡፡ ‹‹ከ18 ዓመት በታች ለሆኑ የተከለከለ ነው›› የሚባልላቸው ቢራዎችና የአልኮል መጠጦች ወጣቱን እያጠፉት ነው፡፡ መንግሥት እነዚህን ችግሮች እያየ ለምን ያልፋል? የሚመለከታቸው አካላትስ ምን እያደረጉ ነው? ወጣቶቻችንን ማን ይታደጋቸው?

የወጣቶችና የስፖርት ሚኒስቴር የሚባል ተቋም አለ፡፡ ይህ ተቋም ለአገሪቱ ወጣቶች የወጣውን ፖሊሲ ለማስፈጸም መቋቋሙም ይታወቃል፡፡ ነገር ግን የተለያዩ ስፖርቶችን ያህል ለወጣቶች ምን እያደረገ ነው? ሌላው ይቅርና የስፖርት ማዘውተሪያ ሥፍራዎቻቸውን በልማት ስም ተነጥቀው ወደተለያዩ አልባሌ ተግባራት እየነጎዱ ያሉትን ወጣቶች ጉዳይ ምን እያደረገ ነው? ከመፈክር ወጣ ተብሎ በድርጊት መርሐ ግብር ላይ በሚገባ ሠፍሮ የሚደረግ እንቅስቃሴ አለ? ወይስ ያንኑ ከቀን ወደ ቀን መፍትሔ እያጣ ያለውና የወጣቶችን ትኩረት መሳብ ያቃተው እግር ኳስ ብቻ ላይ ነው ትኩረቱ? አትሌቲክሱ በግለሰቦች ጥረት እስካሁን አገር ሲያስጠራ፣ የእግር ኳሱ ሞት ምክንያት ታዳጊዎችን የሚያፈሩ ሜዳዎችና ውድድሮች መጥፋት መሆኑ አልታወቀም? ሜዳዎችና ውድድሮች ሲጠፉ ወጣቶች ወዴት እየነጎዱ  እንደሆነ አይታወቅም? ከታዳጊነት ጀምሮ መኮትኮት ያለባቸው ወጣቶች የማይሳተፉበት ስፖርት አለ ማለት ይቻላል? ወይስ በደመነፍስ ነው ያለው? ይኼ በሚገባ ካልተጤነ ውድቀቱ የአገር ነው፡፡ ይኼ አሳሳቢ ሁኔታ መንግሥትን ካላሳሰበው ማንን ያሳስባል?

የወጣቶች ችግር በጣም ያሳስባል፡፡ ይዘርዘር ቢባል ብዙ የሚነገሩ ጉዶች አሉ፡፡ ተስፋ በመቁረጥ ከሚሰደዱት ወጣቶች ጀምሮ ወንጀል ውስጥ የሚገቡት ችግሩ ከመጠን በላይ በመናሩ ነው፡፡ ከማጅራት መቺነት እስከ መንገድ ላይ ሴተኛ አዳሪነት እየበዙ ያሉት ወጣቱ ትኩረት በመነፈጉ ነው፡፡ ድህነት የሚቀንሰው ብሎም የሚጠፋው ሕንፃ በመደርደር፣ ወይም የተለያዩ መሠረተ ልማቶችን በመገንባት ብቻ አይደለም፡፡ ወጣቶች በተቻለ መጠን እንዲማሩ፣ የአካል ብቃት እንቅስቃሴ እንዲያደርጉ፣ ከሱስና ከመሰል የጥፋት ሥፍራዎች እንዲርቁና የወደፊቱ አገር ተረካቢ እንዲሆኑ ማብቃት ያስፈልጋል፡፡ ወጣቶች አካላዊ፣ ሥነ ልቦናዊና ሥነ አዕምሮአዊ ብቃትን እያዳበሩ በራስ መተማመን መንፈስ እንዲያድጉ መደረግ አለበት፡፡ ሞራሉ የላሸቀ ትውልድ እንኳን አገር ሊረከብ ለራሱም እርባና የለውም፡፡ ቤተሰብና ኅብረተሰብ የራሳቸውን ብርቱ ጥረት እያደረጉ፣ መንግሥትን ወጥረው መያዝ አለባቸው፡፡ ወጣቶች የሚለሙበት እንጂ የሚወድሙበት ተግባር በአስቸኳይ ሊገታ ይገባል በማለት ይሞግቱ፡፡ የወጣቶችን የስፖርት ማዘውተሪያዎች እየቀሙ ሕንፃ በመገንባት ሺሻና ጫት፣ መጠጥና ማሳጅ፣ ሐሺሽና ዝሙት ማስፋፋት ይቁም፡፡ በስመ ንግድ ወጣቱን ትኩረት ያደረጉ የመጠጥና የሱስ ማስታወቂያዎችና ድርጊቶች ይብቃቸው፡፡ በዚህ ሁኔታ መቀጠል አይቻልም፡፡ መንግሥት ቤተሰብን፣ ማኅበረሰቡንና የሚመለከታቸውን አካላት በማስተባበር የወጣቶችን ችግር የመፍታት ኃላፊነት አለበት፡፡ ለዚህም ነው መንግሥት ለወጣቶች ምን እያደረገላቸው ነው የሚል ጥያቄ የሚነሳው!

 

 

በብዛት የተነበቡ ፅሁፎች

በኦሮሚያ ክልል በስድስት ከተሞች የተዋቀረውን ሸገር ከተማን የማደራጀት ሥራ ተጀመረ

በአዲስ አበባ ዙሪያ በሚገኙ ስድስት ከተሞች የተዋቀረው ሸገር ከተማን...

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

ጥቁር የመልበስ ውዝግብና የእምነት ነፃነት በኢትዮጵያ

ጠቅላይ ሚኒስትር ዓብይ አህመድ (ዶ/ር) ኅዳር ወር ላይ በፓርላማ...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...
- Advertisment -

ትኩስ ፅሁፎች

ጥቁር የመልበስ ውዝግብና የእምነት ነፃነት በኢትዮጵያ

ጠቅላይ ሚኒስትር ዓብይ አህመድ (ዶ/ር) ኅዳር ወር ላይ በፓርላማ...

የኢንሹራንስ ዘርፉን የሚቆጠጠር ገለልተኛ ተቋም ለመመሥረት እንቅስቃሴ ተጀመረ

ከ70 በላይ አዳዲስ የፋይናንስ ተቋማት ዘርፉን ሊቀላቀሉ ነው የኢትዮጵያ ብሔራዊ...

እስቲ አንገፋፋ!

እነሆ መንገድ። ጊዜና ሥፍራ ተጋግዘው በውስንነት ይዘውናል። መፍጠን ያቃተው...

ሆድና የሆድ ነገር (ክፍል አንድ)

በጀማል ሙሀመድ ኃይሌ (ዶ/ር) "ሆድ ባዶ ይጠላል..." "ከሆድ የገባ ያገለግላል…” ከጥቂት ዓመታት...
spot_img

ተዛማጅ ፅሁፎች

የአገር ሰላም እንዳይናጋ ከፍተኛ ጥንቃቄ ይደረግ!

የሰሜን ኢትዮጵያ አውዳሚ ጦርነት በውጭ ኃይሎች ጣልቃ ገብነት እንዲገታ ተደርጎ ጠባሳው ሳይሽር፣ አገርን ሌላ አስከፊ ቀውስ ውስጥ የሚከት የሃይማኖት ውዝግብ ተፈጥሯል፡፡ ኢትዮጵያ ሰላም አግኝታ...

ኢትዮጵያ ከገባችበት አረንቋ ውስጥ በፍጥነት ትውጣ!

የአገር ህልውና ከሕዝብ ሰላምና ደኅንነት ጋር በእጅጉ የተቆራኘ ነው፡፡ አገር ሰላም ውላ ማደር የምትችለው ደግሞ የሕዝብ ደኅንነት አስተማማኝ ሲሆን ነው፡፡ ሕዝብና መንግሥት በአገር ህልውና...

የፈተናው ውጤት የፖለቲካው ዝቅጠት ማሳያ ነው!

በ12ኛ ክፍል መልቀቂያ ፈተና ከአጠቃላይ ተፈታኞች ውስጥ 3.3 በመቶ ያህሉ ብቻ ማለፋቸው፣ የአገሪቱን የትምህርት ጥራት ደረጃ በሚገባ ያመላከተ መስተዋት እንደሆነ አድርጎ መቀበል ተገቢ ነው፡፡...