Sunday, February 5, 2023
- Advertisment -
- Advertisment -

​ሁሉም ወገን ኃላፊነቱን ከተወጣ የማይፈታ ችግር የለም!

ዓለም በበርካታ ችግሮች በተተበተበችበት በዚህ ዘመን፣ እያንዳንዱ አገርም የራሱ ድርሻ ይኖረዋል፡፡ በጦርነት የሚታመሱና በተለያዩ ነውጦች የሚናጡ አገሮች ካሉበት አስቸጋሪ ሁኔታ አንፃር ሲታይ አገራችን የተረጋጋች ብትሆንም፣ ዙሪያዋን የከበቡዋት ችግሮች ግን ነገን አሳሳቢ ያደርጉታል፡፡ እንደ ተራ ጉዳይ የሚታዩና ችላ የሚባሉ ችግሮች አፋጣኝ መፍትሔ እንዲያገኙ ካልተደረገ፣ ጊዜ በወሰዱ ቁጥር ጣጣቸው እየበረከተ ይሄዳል፡፡ ነገር ግን የችግሮችን መንስዔና ባህሪ አውቆ በዘለቄታ ለመፍታት ጥረት ሲደረግና ሁሉም የሚመለከተው ወገን ኃላፊነቱን ሲወጣ መፍትሔው አያስቸግርም፡፡ አንዳንድ ጉዳዮችን እንጠቃቅስ፡፡

በአገሪቱ ውስጥ ለዘመናት ሲንከባለሉ የመጡ በርካታ ዘርፈ ብዙ ችግሮች አሉ፡፡ እነዚህን ችግሮች ለመቀነስ ወይም ለማስወገድ በሚደረግ ጥረት በተለይ የሕዝቡ ቀጥታ ተሳትፎ ወሳኝ ነው፡፡ መንግሥት ኃላፊነቱን በግልጽና በተጠያቂነት መንፈስ እንዲያከናውን፣ የሕግ የበላይነትን እንዲያስከብር፣ የሕዝቡን ሰላምና ደኅንነት እንዲያስጠብቅ፣ ዴሞክራሲያዊና ሰብዓዊ መብቶችን እንዲያከብር፣ ፍትሕ ለሁሉም ዜጎች እንዲዳረስ እንዲያደርግ፣ የዜጎችን መሠረታዊ ፍላጎቶች እንዲያሟላ፣ ፍትሐዊ የሀብት ክፍፍል እንዲኖር እንዲያመቻች፣ ሙስናን በፅናት እንዲዋጋና ለመሳሰሉት አዎንታዊ ተግባራት የሕዝብ የማያቋርጥ ውትወታ ያስፈልጋል፡፡ ይመለከተናል የሚሉ ወገኖች ደግሞ ኃላፊነታቸውን ሊወጡ ይገባል፡፡ መንግሥትም በዚህ መሠረት ኃላፊነቱን ለመወጣት ራሱን ዝግጁ ያድርግ፡፡

በአሁኑ ጊዜ በአገሪቱ ውስጥ በጉልህ ከሚታዩ ችግሮች መካከል የመልካም አስተዳደር ዕጦት፣ የፍትሕ መጓደልና ሙስና ተጠቃሽ ናቸው፡፡ ከእነዚህ በተጨማሪ በአገሪቱ የተለያዩ አካባቢዎች በመከሰት ላይ ያሉ ብጥብጦች፣ የዜጎች ሕይወት ሕልፈት፣ የአካል ጉዳትና የንብረት ውድመት በጣም ያሳስባሉ፡፡ በተለያዩ መንግሥታዊ ተቋማት ውስጥ የሚታዩ ብልሹ አሠራሮችና ሕገወጥነቶች መብዛት የምሬት ምክንያት ናቸው፡፡ በውጭ ምንዛሪ እጥረት ሳቢያ የሚሰሙ ብሶቶች የችግሮቹን መጠን ይጨምራሉ፡፡ በግብይት ሥርዓቱ መበላሸት ምክንያት የሚታየው ሰው ሠራሽ የዋጋ ንረትና በመኖሪያ ቤት ዕጦት ምክንያት ኑሮ ዳገት የሆነባቸው ዜጎች ጉዳይ አሳሳቢ ነው፡፡ አሁንም አጥንት ድረስ ዘልቆ የሚሰማ ድህነት አለ፡፡ ወደ ፖለቲካው መንደር ጎራ ሲባል ምኅዳሩ የተበላሸ በመሆኑ ኩርፊያው ከመቼውም ጊዜ በላይ ጨምሯል፡፡ እነዚህ አፋጣኝ መፍትሔዎች የሚሹ ጉዳዮች ናቸው፡፡ የሁሉንም ወገን ትኩረት ይሻሉ፡፡

እንዲህ ዓይነት ተደራራቢ ችግሮች ያሉባት አገር ተደላድላ መቀመጥ ስለማይቻላት፣ መንግሥትን ጨምሮ የሚመለከታቸው አካላት በሙሉ መላ ሊመቱ ይገባል፡፡ በአገር ጉዳይ የምሁራን አንደበት እስከ መቼ ይሸበባል? የአገራችን ጉዳይ ያገባናል የሚሉ ወገኖች ዝምታ ምን የሚሉት ነው? በዴሞክራሲያዊ መንገድ ተቀራርቦ ባሉ ችግሮች ላይ በግልጽ ለመወያየት የምን መፍራት ነው? የአገሬ ጉዳይ ያገባኛል የሚል ማንኛውም ዜጋ በሠለጠነና በሕጋዊ መንገድ መብቶቹን እያስከበረ፣ ለአገር ጠቃሚ ነው ብሎ የሚያስበውን ሐሳብ ለመሰንዘር ለምን ይቸገራል? በሌላ በኩል መንግሥት ዜጎች በነፃነት የመሰላቸውን ሐሳብ እንዲያንፀባርቁ መድረኩን ለምን ይዘጋጋዋል? ለአገር የሚጠቅሙ ሐሳቦች ከየትም አቅጣጫ ይምጡ ለምን አይስተናገዱም? ሁሉም ወገን ኃላፊነቱን መወጣት ከቻለ በየጊዜው እየተደራረቡ የሚያስቸግሩ ችግሮችን ለማስወገድ ጠቃሚ ስለሆነ ሊታሰብበት ይገባል፡፡

ስለመልካም አስተዳደር ችግሮች፣ ስለፍትሕ መጓደልና ስለሙስና ስንነጋገር በጊዜ ካልተፈቱ የሚያስከትሉት ቀውስ ከፍተኛ ነው፡፡ የመንግሥት ከፍተኛ ባለሥልጣናት፣ በመካከለኛ ደረጃ ያሉ አመራሮችና ሌሎችም የሚመለከታቸው አካላት እርስ በርስ እየተፈራሩ የሚሸፋፍኑ ከሆነ አገሪቱን የማትወጣበት አዘቅት ውስጥ ነው የሚከቷት፡፡ የተለያዩ የኅብረተሰብ ክፍሎችም እነዚህን ችግሮች ከማጋለጥ ጀምሮ የመፍትሔ ሐሳብ በማመንጨት የአገር ባለቤትነት ስሜት ማሳየት አለባቸው፡፡ መንግሥትን የሚመሩ አካላትም ዜጎች በነፃነት ተሳታፊ እንዲሆኑና የመፍትሔ አካል መሆናቸው እንዲረጋገጥ ማድረግ ይኖርባቸዋል፡፡ የሕግ የበላይነት ልዕልና እንዲያገኝና ሕገወጥ ተግባራት እንዲወገዱ ሲፈለግ፣ የዜጎች መብትና የተሳትፎ ደረጃ በከፍተኛ ደረጃ ትኩረት ሊሰጠው ይገባል፡፡

የአገሪቱ ዜጎች በማያስማሙዋቸው ዋነኛ ጉዳዮች ላይ የጋራ አቋም እየያዙና ልዩነቶቻቸውን ደግሞ በሠለጠነ መንገድ እያንፀባረቁ ችግሮችን ለመፍታት መትጋት አለባቸው፡፡ በዚህች አገር ውስጥ በጣም መለመድ ያለበት ዓቢይ ቁም ነገር ማንም ሰው ባለሥልጣንም ይሁን ምን ከሕግ በታች እንደሆነ መረጋገጥ አለበት፡፡ ሕግ ባለበት አገር ውስጥ ራሳቸውን ከሕግ በላይ የሚያደርጉ ወይም የአምባገነንነት ባህርይ ያላቸው ተቀባይነት እንደሌላቸው ሊረዱ ይገባል፡፡ በመሆኑም ዜጎች ራሳቸውን ከሕገወጥ ተግባራት እያራቁ ለሕግ የበላይነት መስፈን መትጋት አለባቸው፡፡ ችግሮች የፈለገውን ያህል ውስብስብ ቢመስሉም በተባበረ ክንድ ስለሚፈቱ፣ በተቻለ መጠን የያገባኛልና የባለቤትነት መንፈስን ማጠናከር ተገቢ ነው፡፡

ብዙ ጊዜ በመንግሥት በኩል የሚስተዋሉ ችግሮች ባለቤት የሌላቸው ይመስል ችላ ሲባሉ ይታያል፡፡ ነገር ግን በየደረጃው ኃላፊነት የተሰጠው ተሿሚ መፍትሔ አመንጪ መሆን አለበት፡፡ ወደ መንግሥት ተቋማት አገልግሎት ፍለጋ የሚሄዱ ዜጎች ጉዳያቸውን በአቋራጭ ለማስጨረስ ከሚሯሯጡ ይልቅ፣ በቀጥተኛው መንገድ መብታቸውን ማስከበር አለባቸው፡፡ ብልሹ አሠራሮች የሚንሠራፉት እያንዳንዱ ዜጋ መብቱን በሕጋዊ መንገድ ማስከበር ሲያቅተው ነው፡፡ ፍትሕ ፍለጋ ፍርድ ቤቶች የሚሄድ ዜጋ ፍትሕ ሲነፈግ ማጋለጥ አለበት፡፡ በመማለጃ ወይም በጉቦ ፍትሕ ለማግኘት ከመሞከር ይልቅ፣ መብትን በሕጋዊ መንገድ ማስከበር ያኮራል፡፡ ራስ ወዳዶች የአገር ሀብት ሲዘርፉ በይሉኝታ ከማየት ይልቅ፣ በአደባባይ አጋልጦ ክብር ማግኘት ያስደስታል፡፡ ምንም እንኳ መስዋዕትነት የሚያስከፍል ቢሆንም፣ ለአገር ህልውና ሲባል ራስን መስጠት የግድ ይላል፡፡ ችግሮችን ተሸክሞ ከመዞር አራግፎ መገላገል ይበልጣል፡፡ ለዚህ ደግሞ በአግባቡ ኃላፊነትን መወጣት ይጠይቃል፡፡

ባለንበት ዘመን በዓለም ዙሪያ በርካታ ችግሮች አሉ፡፡ ሌላው ቀርቶ በሶሪያ በየቀኑ በርካታ ሰዎች ይገደላሉ፡፡ ባለፉት አምስት ዓመታት ከግማሽ ሚሊዮን በላይ ሶሪያውያን አልቀዋል፡፡ በመላው ዓለም በሚሊዮን የሚቆጠሩ ተሰደዋል፡፡ ሌላው ቀርቶ ከ400 ሺሕ በላይ የሚሆኑት ደግሞ በጦር ቀጣናዎች ውስጥ የሚላስ የሚቀመስ አጥተው ታግተዋል፡፡ ይኼ ሁሉ የመጣው ለዓመታት ሲንከባለሉ የነበሩ ችግሮች መፍትሔ ባለማግኘታቸው ዘግይቶ በተቀሰቀሰ አመፅ ነው፡፡ አመፁ አቅጣጫውን ስቶ ሶሪያውያን ለእልቂትና ለመበተን ሲዳረጉ አገራቸው ደግሞ ወድማለች፡፡ ሕግና ሥርዓት ሲጠፋ ውጤቱ ቀውስ ነው፡፡ አሁንም በአገራችን የሚታዩ የዘመናት ችግሮች እንዲፈቱ ከፍተኛ የሆነ የአስተሳሰብ ለውጥ ያስፈልጋል፡፡ ችግሮችን እያድበሰበሱና ጊዜያዊ የማስታገሻ መፍትሔዎች ላይ ብቻ እያነጣጠሩ ፋታ ለማግኘት መሞከር፣ በሐሰተኛ ሪፖርቶችና መረጃዎች ላይ ብቻ በመንተራስ ችግሮችን ማንኳሰስና በተጨባጭ ሁኔታዎች ላይ የተመሠረተ ግምገማ አለማድረግ ፈተናው የከበደ ነው፡፡ ነገር ግን አሁን ያሉትን ችግሮች አንጥሮ አውጥቶ በግልጽና በኃላፊነት መንፈስ መፍትሔ መፈለግ ለአገር ህልውና ጠቃሚ ነው፡፡ የዜጎች ግንባር ቀደም ተሳትፎ ሲታከልበት ደግሞ ውጤቱ አመርቂ ነው፡፡ በዚህ መሠረት መጓዝ ሲቻል ለጊዜው ከባድ የሚመስሉ ችግሮች በሙሉ ይፈታሉ፡፡ ለዚህ ደግሞ እንደ አገር አንድ ላይ መቆም የግድ ይላል፡፡ ሁሉም ወገን ኃላፊነቱን ከተወጣ የማይፈታ ችግር የለም! 

በብዛት የተነበቡ ፅሁፎች

ከውጭ ይገቡ የነበሩ 38 ዓይነት ምርቶች እንዳይገቡ ዕግድ ተጣለ

የኢትዮጵያ ብሔራዊ ባንክ 38 ከውጪ የሚገቡ ምርቶች ላይ ዕገዳ...

የአየር መንገድ ተጓዦች በሻንጣ የሚያስገቡትን የልብስና የጫማ ብዛት የሚገድብ ረቂቅ መመርያ ተዘጋጀ

ከቀረጥ ነፃ ይገቡ የነበሩ ዕቃዎች 87 በመቶ እንዲቀንሱ ተደርጓል መንገደኞች...

አሜሪካ ሕወሓትን በማሳመንና በመጫን በሰላም ሒደቱ ትልቅ ሚና መጫወቷን የኢትዮጵያ ዋና ተደራዳሪ አስታወቁ

የተመድና የአውሮፓ ኅብረት አበርክቶ አሉታዊ እንደነበር ጠቁመዋል በመንግሥትና በሕወሓት መካከል...

ኢትዮጵያ በ2023 የሚኖራት የውጭ ምንዛሪ ክምችት ለ18 ቀናት ግዢ መፈጸሚያ ብቻ እንደሚሆን አይኤምኤፍ ተነበየ

ኢትዮጵያ በ2023 የሚኖራት የውጭ ምንዛሪ ክምችት ለ0.6 ወር ወይም...
- Advertisment -

ትኩስ ፅሁፎች

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...

አዲስ ሲኖዶስ አቋቁመዋል በተባሉና በኦሮሚያ መንግሥት ላይ ክስ ለመመሥረት...
spot_img

ተዛማጅ ፅሁፎች

ኢትዮጵያ ከገባችበት አረንቋ ውስጥ በፍጥነት ትውጣ!

የአገር ህልውና ከሕዝብ ሰላምና ደኅንነት ጋር በእጅጉ የተቆራኘ ነው፡፡ አገር ሰላም ውላ ማደር የምትችለው ደግሞ የሕዝብ ደኅንነት አስተማማኝ ሲሆን ነው፡፡ ሕዝብና መንግሥት በአገር ህልውና...

የፈተናው ውጤት የፖለቲካው ዝቅጠት ማሳያ ነው!

በ12ኛ ክፍል መልቀቂያ ፈተና ከአጠቃላይ ተፈታኞች ውስጥ 3.3 በመቶ ያህሉ ብቻ ማለፋቸው፣ የአገሪቱን የትምህርት ጥራት ደረጃ በሚገባ ያመላከተ መስተዋት እንደሆነ አድርጎ መቀበል ተገቢ ነው፡፡...

የምግብ ችግር አገራዊ ሥጋት ስለደቀነ ፈጣን ዕርምጃ ይወሰድ!

ኢትዮጵያ ውስጥ የሰው ልጆችን አቅም በብርቱ እየፈተኑ ያሉ በርካታ ችግሮች አሉ፡፡ ከችግሮቹ ብዛት የተነሳ አንዱን ከሌላው ለማስቀደም የማይቻልበት ደረጃ ላይ የተደረሰ ቢሆንም፣ የምግብና የሰላም...