Tuesday, October 4, 2022
ሌሎች ዓምዶች
    - ማስታወቂያ -
    - ማስታወቂያ -

    ​ኢትዮ ቴሌኮም የሞባይል ኢንተርኔት ታሪፍ ቀነሰ

    - ማስታወቂያ -

    ተዛማጅ ፅሁፎች

    • አዳዲስ አገልግሎቶችንም መጀመሩን ገለጸ

    ኢትዮ ቴሌኮም   በሞባይል ኢንተርኔት ታሪፍ ላይ ቅናሽ ማድረጉንና አዳዲስ አገልግሎቶችንም እንደጀመረ አስታወቀ፡፡

    ኢትዮ ቴሌኮም   የካቲት 15 ቀን 2008 ዓ.ም. ይፋ ባደረገው መግለጫ በተለያዩ የሞባይል ኢንተርኔት አገልግሎቶች ላይ ያደረገው የዋጋ ቅናሽ እስከ 70 በመቶ ይደርሳል፡፡ አዲሱ የትርፍ ማሻሻያም በአፍሪካ ካለው ለአገልግሎቱ ከሚከፈለው ዋጋ ጋር ሲነፃፀር አነስተኛ ዋጋ የሚከፈልበት መሆኑን፣ የኢትዮ ቴሌኮም ኮርፖሬት ኮሙዩኒኬሽን ኦፊሰር አቶ አብዱራሒም አህመድ ገልጸዋል፡፡

    ከየካቲት 15 ቀን 2008 ጀምሮ ተግባራዊ ይሆናል የተባለው አዲሱ ታሪፍ በአፍሪካ ለአገልግሎቱ ከሚከፈለው አማካይ ዋጋ በታች መሆኑን የገለጹት አቶ አብዱራሒም፣ በምሳሌነትም በግብፅ ለሞባይል ኢንተርኔት አገልግሎት 0.21 የአሜሪካ ሣንቲም፣ በኬንያ 0.08 የአሜሪካ ሣንቲም፣ በሞሪሸስ ደግሞ 0.17 የአሜሪካ ሣንቲም ታሪፍ የወጣለት ነው ብለዋል፡፡ በኢትዮ ቴሌኮም አዲስ ታሪፍ መሠረት ግን ለሞባይል ኢንተርኔት አገልግሎት በኢትዮጵያ 0.05 የአሜሪካ ሣንቲም የሚጠየቅ ስለሚሆን የኢትዮጵያ ዋጋ ዝቅተኛ እንዲሆን ያስችለዋል ብለዋል፡፡ በአፍሪካ ደረጃም ቢታይ ለአገልግሎቱ የሚጠየቀው አማካይ ዋጋው ደግሞ 0.15 ሣንቲም መሆኑን አስታውሰዋል፡፡

    ኢትዮ ቴሌኮም ተግባራዊ ያደረጋቸውና የሚያደርጋቸው የሞባይል ኢንተርኔት የታሪፍ ቅናሽና አዳዲስ አገልግሎቶቹ ወደ ዘጠኝ የሚደርሱ ናቸው፡፡ የሞባይል ኢንተርኔት ታሪፍ ቅናሽ የሚደረግባቸው 2ጂ፣ 3ጂ፣ 4ጂ አገልግሎቶች ናቸው፡፡ በእነዚህ አገልግሎቶች ቀደም ሲል በሜጋ ባይት ከ46 እስከ 55 ሣንቲም ይከፈልባቸው የነበረ ሲሆን፣ አሁን ግን ሁሉም ተመሳሳይ ዋጋ ኖሯቸው በሜጋ ባይት 35 ሣንቲም እንዲከፈልባቸው ተወስኗል፡፡

    ከዚህም በተጨማሪ አዳዲስ የ2ጂ፣ የ3ጂ፣ የ4ጂ የሞባይል ኢንተርኔት ጥቅል አገልግሎቶች ላይ ተጨማሪ አገልግሎት መጀመሩንም ገልጿል፡፡ በቀን፣ በሳምንትና በወር የተመደቡት አዳዲስ የሞባይል ኢንተርኔት አገልግሎቶችን በጥቅል መግዛትም ለተገልጋዩ የዋጋ ቅናሽ ያስገኝለታል ተብሏል፡፡ በዚህ መሠረት ከተደረገው የዋጋ ቅናሽ ጋር ተያይዞም በጥቅል አገልግሎት ላይ የተተመነው ዋጋ እንደየአገልግሎቱ ዓይነት የተለየ ሲሆን፣ በቀን 25 ሜጋ ባይት ለመጠቀም የሚፈልግ ደንበኛ የጥቅል አገልግሎት ክፍያ አምስት ብር መሆኑን ይገልጻል፡፡ በቀን 100 ሜጋ ባይት ለመጠቀም ደግሞ 15 ብር ዋጋ የተተመነ መሆኑ ተመልክቷል፡፡ በዚህ አዲስ አገልግሎት ለሳምንት ከ100 እስከ 250 ሜጋ ባይት የሚሆን ጥቅል የሞባይል አገልግሎት ለሚፈልግም የተተመነው ዋጋ ከ20 እስከ 50 ብር ይደርሳል፡፡ ለወር ተጠቃሚዎችም ከ500 ሜጋ ባይት እስከ 30 ሜጋ ባይት ጥቅል መጠን ያለው አገልግሎት ቀርቧል፡፡

    በኢትዮ ቴሌኮም የዋጋ ቅናሽ የተደረገበት ሌላኛው የአገልግሎት ዘርፍ ደግሞ በነባሩ የ3ጂ እና የ4ጂ ኤልቲኤ ወርኃዊ የኢንተርኔት ጥቅል አገልግሎቶች ላይ የተደረገው ወርኃዊ ክፍያ ነው፡፡ በአዲሱ ታሪፍ መሠረት በወር ለአንድ ጊጋ ባይት ይከፈል የነበረው 46 ሣንቲም ወደ 35 ሣንቲም ወርዷል፡፡ ለ4ጂ ኤልቲኤ ይከፈል የነበረውም ክፍያ በተመሳሳይ እንዲቀንስ ተደርጓል፡፡ እንደ ኢትዮ ቴሌኮም መግለጫ ከዚህ ቀደም በወር ለሁለት ጊጋ ባይት ይከፈል የነበረው 420 ብር በአዲሱ ታሪፍ ወደ 320 ብር ወርዷል፡፡ ለ30 ጊጋ ባይት ይከፈል የነበረው 3,600 ብር ወደ 3,000 ብር እንዲወርድ ተደርጓል፡፡

    በኢቪዲኦ ኢንተርኔት አገልግሎት ዋጋ ላይም ከፍተኛ ቅናሽ መደረጉን የገለጹት አቶ አብዱራሒም፣ ከዚህ ቀደም ለአንድ ጊጋ ባይት 300 ብር ይከፈል እንደነበር አስታውሰው፣ አዲሱ ታሪፍ ግን 65 ብር ሆኗል፡፡ በተመሳሳይም እንደ ጊጋ ባይቱ ዓይነት ዋጋው ቅናሽ ተደርጐበታል፡፡

    የኢቪዲኦ ቪፒኤን አገልግሎት ታሪፍም በተመሳሳይ የቀነሰ ሲሆን፣ ከዚህ ቀደም ለኢቪዲኦ ሲፒኤን አገልግሎት ለደንበኝነት ይከፈል የነበረው 3,165 ብር ወደ አንድ ሺሕ ብር ዝቅ ብሏል፡፡ ለዚሁ አገልግሎት በወር ይጠየቅ የነበረው 2,185 ብር ወደ 2,000 ብር ወርዷል፡፡

    3ጂ፣ ለ4ጂ ኤልቲኤና ኢቪዲኦ አገልግሎቶች ላይ ከ60 እስከ 300 ብር ይጠየቅ የነበረው የደንበኝነት አገልግሎት ክፍያም ወደ 30 ብር ወርዷል፡፡ ሌላው ለውጥ የተደረገበት አገልግሎት ደግሞ የሲዲኤምኤ ኢንተርኔት አገልግሎት ነው፡፡ በዚህ የአገልግሎት ዓይነት ሲዲኤምኤ ከዚህ ቀደም እስከ 1,300 ደቂቃ ለሚጠቀሙ በደቂቃ 12 ሣንቲም፣ ከ1,300 ደቂቃዎች በላይ ለሚጠቀሙ ደግሞ በደቂቃ ስምንት ሣንቲም ክፍያ ይጠየቅ ነበር፡፡ አሁን ግን የአገልግሎቱ የክፍያ ሁኔታ በፊት ከነበረው በአጠቃቀም ጊዜ (በደቂቃ) መሆኑ ቀርቶ በሜጋ ባይት እንዲሆን ተደርጓል፡፡ በዚህም መሠረት በአንድ ሜጋ ባይት 35 ሣንቲም ዋጋ የሚጠይቅበት ይሆናል፡፡

    ኢትዮ ቴሌኮም አዳዲስ የአጭር ጽሑፍ መልዕክት ጥቅሎች በሚል ያዘጋጃቸው አገልግሎቶችም ደንበኞች በቀን፣ በሳምንትና በወር የተደለደሉ ጥቅል አገልግሎቶችን ገዝተው እንዲጠቀሙ የሚያስችል ነው፡፡ ለምሳሌ አሥር ኤስኤምኤስ ጥቅል አገልግሎት የሚፈልግ ሁለት ብር ይከፍላል፡፡ 40 ጥቅል አገልግሎት ያለውን ደግሞ በአምስት ብር መግዛት የሚቻል ሲሆን፣ ደንበኛው በ24 ሰዓት ውስጥ ሊገለገልበት ይገባል፣ ይህ ካልሆነ ይቃጠላል፡፡ የኢትዮ ቴሌኮም ተጠባባቂ ማርኬቲንግ ኦፊሰር አቶ መሐመድ ሐጂ እንደገለጹት፣ ከዋጋ ቅናሹ ባሻገር ለሁሉም አገልግሎቶች ደንበኞች ወደ ኢትዮ ቴሌኮም ቢሮዎች መምጣት ሳያስፈልጋቸው በሞባይላቸው አገልግሎት ማግኘት ይችላሉ፡፡ ደንበኞች የሚሞሉትን ካርድ የተወሰነውን ለኢንተርኔት ብቻ ብለው መጠቀም የሚያስችልም ነው ተብሏል፡፡    

    እንዲህ ዓይነቱ ቅናሽ ደንበኞችን የበለጠ ለመጥቀም የተደረገ መሆኑን፣ በአነስተኛ ክፍያ የሚሰጥ አገልግሎትም በርካታ ተጠቃሚዎችን አስገኝቶ ለገቢ ከፍ ማለትም እንደሚረዳ ተገልጿል፡፡ አቶ አብዱራሒም ኢትዮ ቴሌኮም በቅርቡ አዳዲስ አገልግሎቶችን እንደሚጀምርና ሌሎች የዋጋ ማሻሻያዎችም እንደሚጠበቁ ገልጸዋል፡፡     

    - Advertisement -spot_img

    የ ጋዜጠኛው ሌሎች ፅሁፎች