Monday, July 15, 2024
- ማስታወቂያ -
- ማስታወቂያ -

በኤችአይቪ ምርመራ መሣርያ ጨረታ አሸናፊነቱ ውድቅ የተደረገበት ድርጅት እንደገና አሸነፈ

ተዛማጅ ፅሁፎች

በመድኃኒት ፈንድና አቅርቦት ኤጀንሲ አማካይነት ለጤና ጥበቃ ሚኒስቴር የኤችአይቪ ምርመራ መሣሪያ እንዲገዛ ጨረታ ወጥቶበት አሸናፊነቱ ውድቅ የተደረገበት ድርጅት፣ በሌላ ጨረታ አሸንፎ የመሣሪያውን ግዥ ሊፈጸም ነው፡፡

ከአምስት ሚሊዮን ዶላር በላይ ያወጣል ተብሎ የሚገመተውና የኤችአይቪ ፈጣን የቅድመ ምርመራ ኪት ለመግዛት የመድኃኒት ፈንድና አቅርቦት ኤጀንሲ ባወጣው ጨረታ፣ ‹‹First Responsible HIV1/2 – Card test›› የሚለውን ኪት አቅርቦ አሸናፊ የተባለው ባዮቴክ ፒኤልሲ ድርጅት ነበር፡፡ የመንግሥት ግዥና አፈጻጸምና ንብረት አወጋገድ አቤቱታ አጣሪና ውሳኔ ሰጪ ቦርድ፣ ጥር 9 ቀን 2008 ዓ.ም. በጻፈው ደብዳቤ የጨረታውን ውጤት ውድቅ ማድረጉን መዘገባችን ይታወሳል፡፡

ቦርዱ የጨረታውን ውጤት ውድቅ ያደረገው፣ አሸናፊ የተባለው ድርጅት የዓለም የጤና ድርጅት ቅድመ ምርመራ (WHO Prequalified Diagnostics) ያስቀመጠውን መሥፈርት የማያሟላ፣ ቀድሞም ቢሆን ከሒደቱ ውጪ መደረግ የነበረበት ተጫራች አሸናፊ እንዲሆን መደረጉ ሕግን የጣሰ ነው ብሎ ነበር፡፡ ቦርዱ በዚሁ ውሳኔው በተቀሩት ተጫራቾች መካከል የጨረታ ሰነዱንና የግዥ ሕጉን ብቻ ተከትሎ፣ ግምገማው እንደገና እንዲከናወንና በ15 ቀናት ውስጥ ግዥው እንዲፈጸም ትዕዛዝ ሰጥቶም ነበር፡፡

ኤጀንሲው የተባለውን ጨረታና ግምገማ በመሰረዝ አንድ የኔዘርላንድ ድርጅት (Global Supply Chain, Pooled Procurement Mechanism – PPM) ጨረታውንና ግዥውን እንዲያስፈጽምለት በመስማማት ጨረታውን በድጋሚ አውጥቷል፡፡ ስሙ ያልተጠቀሰ የአገር ውስጥ ድርጅት ያሸነፈ መሆኑን ላልተሳካላቸው ተሳታፊዎች ተገልጾላቸዋል፡፡ አስቸኳይ የጨረታ ሒደት ያከናወነው ተቀማጭነቱ ኔዘርላንድ የሆነው አስፈጻሚ ድርጅት ባካሄደው በዚሁ ጨረታ፣ አሸናፊ የሆነው ድርጅት ቀደም ሲል በኤጀንሲው አሸናፊ ተብሎ በመንግሥት የግዥ ቦርድ የጨረታው ውጤት ውድቅ የተደረገበት መሆኑን ከኤጀንሲው የተገኘው መረጃ ያመለክታል፡፡

‹‹HIV Rapid Test›› የሚባለውን ኪት ለማቅረብ ድርጅት ማሸነፉን የገለጸው አስፈጻሚው የኔዘርላንዱ ድርጅት፣ አሸናፊና ተሸናፊ የተለዩባቸው ዋና ምክንያቶች በዝቅተኛ ዋጋ ማቅረብና ግዥውን ለመፈጸም የሚወስደው ጊዜ መሆናቸውን አስታውቋል፡፡ አሸናፊው ድርጅት በስምንት ቀናት ውስጥ የምርመራ መሣሪያውን አገር ቤት ያደርሳል ተብሏል፡፡

የዓለም የጤና ድርጅት ከኤችአይቪ ኤድስ የምርመራ መሣሪያዎች ግዥ ጋር በተያያዘ ባዘጋጀው ሰነድ፣ በጣም የጠበቀና የግዥ ሕግን ብቻ በተከተለ አግባብ እንዲፈጸም ያዛል፡፡ የቀረበው ዋጋ ምንም ይሁን ምን መሣሪያውን ለመግዛት የሚወጣው የጨረታ መሥፈርት የዓለም የጤና ድርጅትን የመሣሪያ ጥራትና ትክክለኛነት ብቻ መሠረት ያደረገ መሆን እንዳለበት በሰነዱ አስፍሯል፡፡   

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች