Tuesday, September 27, 2022
ሌሎች ዓምዶች
    - ማስታወቂያ -
    - ማስታወቂያ -

    በግል ኩባንያ የሚተዳደር የመጀመርያ የኤሌክትሪክ ኃይል ማመንጫ ፕሮጀክት ጨረታ ወጣ

    - ማስታወቂያ -

    ተዛማጅ ፅሁፎች

    የኢትዮጵያ ኤሌክትሪክ ኃይል ለመጀመርያ ጊዜ በግል የኤሌክትሪክ ኃይል ለማመንጨት መሳተፍ ለሚፈልጉ ኩባንያዎች ጨረታ አወጣ፡፡

    ከፀሐይ የኤሌክትሪክ ኃይል አመንጭቶ ለኢትዮጵያ መንግሥት ለመሸጥ ፍላጎት ያለው ኩባንያ በጨረታው መሳተፍ እንደሚችል ተገልጿል፡፡

    ይህ ፕሮጀክት እንዲካሄድ የታቀደው ከአዲስ አበባ በ200 ኪሎ ሜትር ርቀት ላይ በምሥራቅ ሸዋ ዞን መተሐራ ከተማ አካባቢ ነው፡፡ አካባቢው ሜዳማ ከመሆኑም በላይ  ወደ ጂቡቲ በሚወስደው ዋና መንገድ ላይ የሚገኝ ስለሆነ ለተጫራቾች እንደ ጥሩ አጋጣሚ ተወስዷል፡፡

    መንግሥት በግል የኤሌክትሪክ ኃይል ማመንጨት ተግባራዊ ለማድረግ የሕግ ማዕቀፎችን ሲያዘጋጅ ቆይቷል፡፡ ይወጣሉ ተብለው የሚጠበቁት ሕግጋት ወደ ማጠቃለያው የደረሱ በመሆናቸው፣ መንግሥት ይህንን የፀሐይ ኃይል ማመንጫ ፕሮጀክት እንዲጀምር እንዳደረገው መረጃዎች አመልክተዋል፡፡

    ከዚህ ቀደም የአይስላንድ ኩባንያ የሆነው ሬክቪክ ኮርቤቲ አካባቢ ከጂኦተርማል የኤሌክትሪክ ኃይል ለማመንጨት የሚያስችለውን የመግባቢያ ስምምነት ተፈራርሞ ወደ ሥራ መግባቱ ይታወቃል፡፡ ይህ ፕሮጀክት 1,000 ሜጋ ዋት ኤሌክትሪክ ማመንጨት የሚያስችል ሲሆን፣ አራት ቢሊዮን ዶላር በጀት እንደተያዘለት በወቅቱ መገለጹ ይታወቃል፡፡

    ከዚህ ኩባንያ በተጨማሪ 20 ኩባንያዎች በኢትዮጵያ በግል የኤሌክትሪክ ኃይል ለማመንጨት፣ በመንግሥትና በግል በሚደረግ ስምምነት የኤሌክትሪክ ኃይል የማመንጨት ተግባር ለመሳተፍ ፍላጎታቸውን ለመንግሥት አቅርበዋል፡፡

    በቅርቡ የውኃ፣ መስኖና ኤሌክትሪክ ሚኒስትሩ አቶ ሞቱማ መቃሳ ለሪፖርተር እንደገለጹት፣ የኤሌክትሪክ ኃይል ለማመንጨት ፍላጎት ያሳዩ ኩባንያዎችን ለማስተናገድ  የሚያስችል ሕግ በቅርቡ ለሚኒስትሮች ምክር ቤት ቀርቦ ይፀድቃል፡፡

    የምሥራቅ አፍሪካ የኤሌክትሪክ ማዕከል ለመሆን እየሠራች የምትገኘው ኢትዮጵያ፣ በራሷ አቅም ብቻ ፕሮጀክቶችን ማካሄድ እንደሌለባት መግባባት ላይ ተደርሷል፡፡ ምክንያቱም ፕሮጀክቶቹ ግዙፍ በመሆናቸው ሁሉንም ፕሮጀክቶች በመንግሥት አቅምና በውጭ ብድር ብቻ ማካሄድ ስለማይቻል፣ መንግሥት አቅም ላላቸው ኩባንያዎች በሩ ክፍት እንዲደረግ ውሳኔ አሳልፏል፡፡

    በዚህ መሠረት የኢትዮጵያ ኤሌክትሪክ ኃይል የመጀመርያውን የ100 ሜጋ ዋት የፀሐይ ኃይል ማመንጫ ፕሮጀክት ጨረታ አውጥቷል፡፡ በዚህ ጨረታ ኩባንያው ልምድ ያለውና ከዚህ በፊት ቢያንስ 120 ሚሊዮን ዶላር የሚያወጣ ፕሮጀክት ያንቀሳቀሰ መሆኑን የሚገልጽ መረጃ ማቅረብ እንደሚኖርበት ተገልጿል፡፡

    የፕሮጀክቱ ዲዛይን፣ ግንባታና ኦፕሬሽን በራሱ አቅም ማንቀሳቀስ የሚችል ኩባንያ መሆን ያለበት ሲሆን፣ የጨረታውን ሰነድ መጋቢት 9 ቀን 2008 ዓ.ም. መግባት እንዳለበት የኤሌክትሪክ ኃይል ያወጣው የጨረታ ሰነድ ይገልጻል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች