Tuesday, October 4, 2022
ሌሎች ዓምዶች
    - ማስታወቂያ -
    - ማስታወቂያ -

    ​ባለሥልጣኑ አዲስ የደመወዝ ስኬል አስጠንቶ ለመንግሥት ሊያቀርብ ነው

    - ማስታወቂያ -

    ተዛማጅ ፅሁፎች

    የኢትዮጵያ መንገዶች ባለሥልጣን በመንገድ የልማት ዘርፍ የተጣለበትን ኃላፊነት በብቃት ለመወጣት ያስችለኛል ያለውን አዲስ የደመወዝ፣ የጥቅማ ጥቅምና የማትጊያ ሥርዓት በአማካሪ ድርጅት በማስጠናት ለመንግሥት ሊያቀርብ መሆኑ ተገለጸ፡፡

    እንደ ባለሥልጣን መሥሪያ ቤቱ መረጃ ከሆነ ይህንን ጥናት ለማስጠናትና ለመንግሥት ለማቅረብ ውሳኔ ላይ ከደረሰባቸው ምክንያቶች አንዱ ከሰው ኃይል ፍልሰት ጋር የተያያዘ ነው፡፡

    ‹‹የኢትዮጵያ መንገዶች ባለሥልጣን በመንገድ ልማት ዘርፍ በተለይ አምስትና አሥር ዓመታት ከፍተኛ ውጤት አስመዝግቧል፤›› የሚለው የባለሥልጣኑ መረጃ፣ ለውጤቱ መገኘት ዋናው መንግሥት ለዘርፉ የሰጠው ከፍተኛ ትኩረትና ድጋፍ እንዲሁም የባለሥልጣኑ መሥሪያ ቤት መላው ሠራተኞችና ማኔጅመንቱ ባደረጉት ርብርብ እንደሆነም ይጠቀሳል፡፡

    በሁለተኛው የዕድገትና ትራንስፎርሜሽን የዕቅድ ዘመን ከ240 ያላነሱ ፕሮጀክቶች ተይዘው ትግበራው መጀመሩን ያስታወሰው ይኸው መረጃ፣ እነዚህን ፕሮጀክቶች ለማስተዳደርና ዳር ለማድረስ ደግሞ የሰው ኃይል ወሳኝ ነው ብሏል፡፡ ይሁን እንጂ በተለይ ከቅርብ ጊዜ ወዲህ በገበያ ላይ የተሻለ ደመወዝና ጥቅማ ጥቅም በማግኘት በባለሥልጣን መሥሪያ ቤቱ ከፍተኛ የባለሙያ የሥራ መልቀቅ እየገጠመው በመሆኑ፣ ይህንን ችግር ለመቅረፍ አዲስ የደመወዝ ስኬልን ለማስጠናት አማካሪ ድርጅቶችን ወደ መምረጥ ገብቷል፡፡

    ‹‹በተለይ የባለሙያዎች ፍልሰት ባጭሩ ካልተቀየረ የታቀዱት የመንገድ ልማት ፕሮጀክቶች ይሳካሉ ብሎ ማሰብ ከባድ ከመሆኑም በላይ የተገኘውን ውጤት ወደኋላ መመለስ ይሆናል፤›› በማለትም፣ አዲስ የደመወዝ፣ የጥቅማ ጥቅምና የማትጊያ ሥርዓት አስፈላጊ መሆኑን አመልክቷል፡፡ ችግሩን ለመቅረፍና ያሉትን ጥቂት ልምድ ያላቸውን ባለሙያዎች ለማቆየትና ተተኪ ለማፍራት እንዲሁም ልምድ ያላቸውን ባለሙያዎች ከገበያ ለመሳብ፣ ጀማሪዎችን ለመቅጠርና አሠልጥኖ ለማሰማራት የተሻለ ደመወዝና ጥቅማ ጥቅም እንዲሁም የማትጊያ ሥርዓት ለመተግበር ጥናቱን ለመንግሥት እንደሚያቀርብ ተገልጿል፡፡

    ይህም ጥናት በጨረታ በሚመረጥ የአማካሪ ድርጅት የሚከናወን ሲሆን፣ የጥናቱ ውጤትም ለመንግሥት ቀርቦ ውሳኔ እንዲሰጥበት ይደረጋል ተብሎ ይጠበቃል፡፡ በጥናቱ ይጠቃለሉ ተብለው ከሚጠበቁ ጉዳዮች ውስጥ የባለሥልጣን መሥሪያ ቤቱ የደመወዝ ደረጃ ጥቅማ ጥቅምና የማትጊያ ሥርዓትን መከለስ፣ የተለየ የጥቅማ ጥቅምና የማትጊያ አማራጮችን ማቅረብ ይሆናል ተብሏል፡፡

    ከዚህ ጥናት የሚጠበቀውም ውጤት የባለሥልጣን መሥሪያ ቤቱን የመክፈል አቅምና የወቅቱን የገበያ ሁኔታ ያገናዘበ የደመወዝ መጠን፣ ደረጃ፣ የማትጊያና የጥቅማ ጥቅም የማበረታቻ ሥርዓት ማዘጋጀትና አተገባበሩንም የሚያመለክቱ መመርያዎችን ያካተተ ነው፡፡

    ጥናቱን ለማካሄድ አሸናፊ የሚሆነው አማካሪ ድርጅት በ2008 በጀት ዓመት መጨረሻ ጥናቱን እንዲያጠና ይደረጋል ተብሏል፡፡ በጥናቱ መሠረት ጥያቄውን መንግሥት የሚቀበለው ከሆነ በ2009 በጀት ዓመት ተግባራዊ ለማድረግ የታሰበ ነው፡፡ ባለሥልጣኑ በሁለተኛው የዕድገትና ትራንስፎርሜሽን የዕቅድ ዘመን ከሚያከናውናቸው ሥራዎች ውስጥ ዘመናዊ የመንገድ ግንባታዎች የተካተቱበት በመሆኑ፣ በተለይ በፍጥነት መንገዶች ግንባታዎች ረገድ የአዳማ-አዋሽ፣ የአዲስ አበባ-ጅማና የድሬዳዋ-መኢሶ የፍጥነት መንገዶችን ለመገንባት ታቅዷል፡፡

    ከ2700 በላይ ሠራተኞች ያሉት የኢትዮጵያ መንገዶች ባለሥልጣን ከፍተኛ በጀት ከሚያዝላቸው መንግሥታዊ መሥሪያ ቤቶች አንዱ ነው፡፡ በ2008 በጀት ዓመት 34 ቢሊዮን ብር በጀት እንደተያዘለት ይታወቃል፡፡ 

    - Advertisement -spot_img

    የ ጋዜጠኛው ሌሎች ፅሁፎች