Sunday, June 23, 2024
- ማስታወቂያ -
- ማስታወቂያ -

ከመሬት ጋር በተያያዘ ተጠርጥረው በታሰሩ አመራሮች ላይ የክስ ማቅረቢያ ጊዜ ተጠየቀባቸው

spot_img

ተዛማጅ ፅሁፎች

በአዲስ አበባ በአሥሩም ክፍላተ ከተሞች ከመሬት ጋር በተያያዘ ሙስና በመፈጸም ተጠርጥረው የታሰሩ ከ100 በላይ አመራሮችና ሠራተኞች፣ ማክሰኞ መጋቢት 6 ቀን 2008 ዓ.ም. ፍርድ ቤት ቀርበው ክስ የማቅረቢያና ተጨማሪ የምርመራ ጊዜ ተጠየቀባቸው፡፡

የተጠርጣሪዎቹን ጉዳይ እየመረመረው ለሚገኘው የፌዴራል ከፍተኛ ፍርድ ቤት ሁለተኛ ወንጀል ችሎት ተጨማሪ የምርመራና ክስ የመመሥረቻ ጊዜውን የጠየቀው፣ የፌዴራል የሥነ ምግባርና ፀረ ሙስና ኮሚሽን ወንጀል ምርመራ ቡድን ነው፡፡

በተለያዩ የክስ መዝገቦች ተካተው በተለያዩ መርማሪ ቡድኖች ችሎት የቀረቡት ተጠርጣሪዎች፣ ከንፋስ ስልክ ላፍቶ ክፍለ ከተማ በተለይ ወረዳ አንድ፣ ከየካ ክፍለ ከተማና ከአዲስ ከተማ ክፍለ ከተማ የተያዙት አመራሮችና ሠራተኞች ከፍተኛውን ቁጥር የያዙ ናቸው፡፡ አብዛኞቹ ተጠርጣሪዎች ወጣቶች ናቸው፡፡

ከ1997 ዓ.ም. በፊት ተይዘው የሚገኙ ሰነድ አልባ ይዞታዎች በወረዳ ተጣርቶና በክፍለ ከተማ አልፎ ሕጋዊ ማድረግ የሚገባ ቢሆንም፣ በተለይ የንፋስ ስልክ ላፍቶ ክፍለ ከተማ ወረዳ አንድ አስተዳደር አጣርቶ እንዳስተላለፈ በማስመሰል ከ19 በላይ ለሚሆኑ ግለሰቦች 500 ካሬ ሜትር ስፋት ያለው ቦታ የማረጋገጫ ሰነድ (ካርታ) መስጠታቸውን መርማሪ ቡድኑ ለፍርድ ቤቱ አስረድቷል፡፡

ተጠርጣሪዎቹ የመንግሥትን ይዞታ ወደ ግል ቀላቅሎ መስጠት፣ ሕገወጥ ሰነድ (ካርታ) አትሞ መስጠት፣ የግንባታ ፈቃድ ሳይኖር ግንባታ መፍቀድ፣ የሌላን ይዞታ አሳልፎ መስጠት፣ በተለያዩ ሕገወጥ ሰነዶች ላይ መፈረም፣ መንግሥት ከመሬት ማግኘት የሚገባውን ገቢ ያለ ክፍያ መስጠት፣ የመሬት ጨረታን ዋጋ አሳንሶ መተመንና ሌሎችም በርካታ ወንጀሎችን በመፈጸም መጠርጠራቸውን መርማሪ ቡድኑ ለፍርድ ቤቱ አስረድቷል፡፡ የተለያዩ ሰነዶችን መሰብሰቡንና የሰዎችን የምስክርነት ቃል መቀበሉን በማስረዳት፣ የምርመራ ሰነዶቹን አዘጋጅቶ ለዓቃቤ ሕግ የሚያስተላልፍበትና ዓቃቤ ሕግ ክስ የሚመሠርትበት የ15 ቀናት ጊዜ እንዲሰጠው ጠይቋል፡፡ ነገር ግን በተወሰኑ ተጠርጣሪዎች ላይ መቀበል የሚቀረው የምስክሮች ቃልና የሚያሰባስባቸው ሰነዶች እንዳሉት በመግለጽ፣ ለእነሱ ተጨማሪ የ14 የምርመራ ቀናት ጊዜ እንዲሰጠውም ጠይቋል፡፡

ተጠርጣሪዎቹ ምንም የፈጸሙት ወንጀል እንደሌለ፣ ያለሥራቸውና ኃላፊነታቸው ታስረው እየተንገላቱ መሆኑን፣ በስመ ሞክሼ መታሰራቸውን፣ በዕረፍት ላይ ሆነው መያዛቸውን፣ መንግሥት እያስተማራቸው ከዓመት በላይ በትምህርት ላይ መሆናቸውን፣ ለአራት ወራት ታግደው ሲጠሩ ፖሊስ ጣቢያ ድረስ መጥተው ቃል መስጠታቸውንና ያለምንም ምክንያት መታሰራቸውን፣ ሕመምተኛ ቤተሰብ አስተዳዳሪ መሆናቸውንና ሌሎችንም ምክንያቶች ፍርድ ቤቱ ለእያንዳንዳቸው ጊዜ ሰጥቷቸው ካስረዱ በኋላ፣ የዋስትና መብታቸው እንዲከበርላቸው ጠይቀዋል፡፡

ፍርድ ቤቱ የሁለቱንም ወገኖች ክርክር ካዳመጠ በኋላ፣ ተጠርጣሪዎቹ የጠየቁትን ዋስትና ውድቅ አድርጓል፡፡ መርማሪ ቡድኑ የጠየቀውን ጊዜ በመፍቀድ ተለዋጭ ቀጠሮ ለመጋቢት 16፣ 20 እና 21 ቀን 2008 ዓ.ም. ሰጥቷል፡፡     

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች