Friday, October 7, 2022
ሌሎች ዓምዶች
    - ማስታወቂያ -
    - ማስታወቂያ -

    ኢትዮጵያና አሜሪካ በአቪዬሽን መስክ ያላቸውን ትብብር ለማጠናከር ተስማሙ

    - ማስታወቂያ -

    ተዛማጅ ፅሁፎች

    የአሜሪካ ኩባንያዎች ኢንቨስትመንት አነስተኛ እንደሆነ ተገለጸ

    ዘመናትን ያስቆጠረውን የኢትዮጵያና የአሜሪካ በአቪዬሽን መስክ ያላቸውን ትብብር የበለጠ ለማጠናከር ተስማሙ፡፡

    የአሜሪካ ምክትል የንግድ ሚኒስትር ሚስተር ጊልበርት ካፓላን 60 አባላት ያሉት የንግድ ልዑክ በመምራት ኢትዮጵያን በዚህ ሳምንት ጎብኝተዋል፡፡ ከ23 በላይ ታዋቂ የአሜሪካ ኩባንያዎች ያቀፈው ከፍተኛ ልዑክ፣ በኢትዮጵያ ያለውን የንግድና የኢንቨስትመንት ዕድሎች ገምግሟል፡፡ እንደ ጄኔራል ኤሌክትሪክ፣ ሃኒዌልና ሴብር ያሉ ግዙፍ የአቪዬሽን ቴክኖሎጂ ኩባንያዎች በልዑኩ ውስጥ ይገኙበታል፡፡

    ሰኞ ሰኔ 18 ቀን 2010 ዓ.ም. ሚስተር ጊልበርት ካፓላን የንግድ ልዑኩን በማስከተል የኢትዮጵያ አየር መንድን በጎበኙበት ወቅት፣ የኢትዮጵያ አየር መንገድ ዋና ሥራ አስፈጻሚ አቶ ተወልደ ገብረ ማርያምና ሌሎች ከፍተኛ የማኔጅመንት አባላት አቀባበል አድርገውላቸዋል፡፡

    በሥነ ሥርዓቱ ላይ ንግግር ያደረጉት አቶ ተወልደ ኢትዮጵያ ገበያዋን እየከፈተች ያለች አገር በመሆኗ፣ ያሉትን የኢንቨስትመንትና ንግድ ዕድሎች ለመመልከት ትክክለኛው ወቅት እንደሆነ አስረድተዋል፡፡ የኢትዮጵያ አየር መንገድ ከአሜሪካ ኩባንያዎች ጋር ለረዥም ዓመታት ሲሠራ እንደቆየ ገልጸዋል፡፡ ቲደብሊውኤ የተሰኘው የአሜሪካ አየር መንገድ የኢትዮጵያ አየር መንገድን በመመሥረቱ ሒደት ጠንካራ መሠረት ማስቀመጡን ያስታወሱት አቶ ተወልደ፣ የኢትዮጵያ አየር መንገድ ከቦይንግ ኩባንያ ጋር ከ60 ዓመታት በላይ ተባብሮ መሥራቱን ገልጸዋል፡፡ ከቦይንግ በተጨማሪ ከጄኔራል ኤሌክትሪክ፣ ሃኒዌል፣ ሴብርና ዩታስ ከመሳሰሉ የአሜሪካ ኩባንያዎች ጋር አብሮ እንደሚሠራ ተናግረዋል፡፡

    የኢትዮጵያ አየር መንገድ ከተለያዩ የአሜሪካ ኩባንያዎች አውሮፕላን፣ የአውሮፕላን ሞተሮችና ሌሎች የተለያዩ ቴክኖሎጂዎች የሚገዛ ቢሆንም የአሜሪካ ኩባንያዎች በኢትዮጵያ ያደረጉት ኢንቨስትመንት አነስተኛ መሆኑን በመግለጽ፣ በኢትዮጵያ ኢንቨስት እንዲያደርጉ ጥሪያቸውን አስተላልፈዋል፡፡ የኢትዮጵያ አየር መንገድ በአሜሪካ አራት መዳረሻዎች እንዳሉት የገለጹት አቶ ተወልደ፣ አሜሪካና ኢትዮጵያ የቱሪዝም ኢንዱስትሪውን ለማሳደግ በጋራ ሊሠሩ እንደሚገባ ጠቁመዋል፡፡ ‹‹የኢትዮጵያ የቱሪዝም መስህቦችን በአሜሪካ በማስተዋወቅ በቂ ሥራ አልሠራንም፤›› ያሉት አቶ ተወልደ፣ ኢትዮጵያን በአሜሪካ በማስተዋወቅ ረገድ ብዙ ሥራ ሊከናወን እንደሚገባ ተናግረዋል፡፡

    ሚስተር ካፓላን በበኩላቸው የኢትዮጵያ አየር መንገድ ፈጣን ዕድገትና አፍሪካን ከአሜሪካና ከሌሎች አኅጉሮች ጋር በማስተሳሰር የሚጫወተውን ሚና እንደሚያደንቁ ተናግረዋል፡፡ የኢትዮጵያ አየር መንገድ ከአሜሪካ ኩባንያዎች ጋር ትልቅ የንግድ ልውውጥ እንደሚያደርግ ገልጸው፣ ይህ ግንኙነት ተጠናክሮ ሊቀጥል ይገባል ብለዋል፡፡

    ‹‹የአሜሪካ ኩባንያዎች አፍሪካ ውስጥ የታሉ ብለው ለሚጠይቁ መልሳችን ይኸው መጥተናል የሚል ነው፤›› ያሉት ሚስተር ካፓላን በኢትዮጵያ፣ በኬንያ፣ በኮትዲቯርና በጊኒ ጉብኝት በማድረግ ያሉትን የኢንቨስትመንትና የንግድ ዕድሎች በመመልከትና እንቅፋቶችን በመለየት ምክረ ሐሳብ ለመንግሥታቸው እንደሚያቀርቡ ጠቁመዋል፡፡ በቱሪዝም ልማት ዘርፍም ኢትዮጵያና አሜሪካ ተባብረው ሊሠሩ እንደሚችሉ ገልጸዋል፡፡

    በዕለቱ የተለያዩ የግዥና ትብብር ስምምነቶች ተፈርመዋል፡፡ የኢትዮጵያ አየር መንገድ ከጄኔራል ኤሌክትሪክ ለቦይንግ 787 አውሮፕላኖች የሚሆኑ 12 ሞተሮች ለመግዛት ውል ተፈራርሟል፡፡ የአውሮፕላን ሞተሮቹ ዋጋ 444 ሚሊዮን ዶላር የሚገመት ሲሆን፣ በተጨማሪም ለአሥር ዓመት የሚፀና የጥገና አገልግሎት ውል ተፈርሟል፡፡ የጥገና አገልግሎቱ ዋጋ 473.5 ሚሊዮን ዶላር ይገመታል፡፡

    የኢትዮጵያ አየር መንገድ ሃኒዌል ከተባለው ኩባንያ ጋር ሁለት ስምምነቶች ተፈራርሟል፡፡ አንደኛው ለአዲስ አበባ ኤርፖርት ማስፋፊያ ፕሮጀክት የሚውል የቴክኖሎጂ ግዥ ውል ሲሆን፣ ሁለተኛው የኤፒዩ (አጋዥ የአውሮፕላን ሞተር) አገልግሎት ግዥ ነው፡፡ የኮንትራት ውሉ በገንዘብ ሲሰላ 17.4 ሚሊዮን ዶላር ተተምኗል፡፡

    የአሜሪካ የንግድ ልማት ኤጀንሲ ለኢትዮጵያ አየር መንገድ ለሰው ኃይል ልማት ድጋፍ የሚያደርግ ሲሆን፣ በዕለቱም ለኢንፎርሜሽን ቴክኖሎጂ ባለሙያዎች ሥልጠና የሚውል የገንዘብ ድጋፍ ስምምነት ተፈርሟል፡፡ ሴብር የተሰኘው ታዋቂ የአሜሪካ ኩባንያ ለኢትዮጵያ አየር መንገድ የሰው ኃይል ሥልጠና፣ የቴክኖሎጂ አቅርቦትና ማማከር አገልግሎት ሊሰጥ የሚችልበት ስምምነት ፈርሟል፡፡ የአሜሪካ የንግድ ልማት ኤጀንሲ እስከ 21.2 ሚሊዮን ዶላር ድጋፍ ሊያደርግ እንደሚችል ተገልጿል፡፡ ሴብር የመንገደኞች ሪዘርቬሽንና ቼክ ኢን ማድረጊያ ፕሮግራሞች ለኢትዮጵያ አየር መንገድ በማቅረብ ላይ ነው፡፡

    - Advertisement -spot_img

    የ ጋዜጠኛው ሌሎች ፅሁፎች