Tuesday, February 20, 2024
- Advertisment -
- Advertisment -

ክቡር ሚኒስትሩ በጣም ተናደው ከሚስታቸው ጋር እያወሩ ነው

[ለክቡር ሚኒስትሩ በጣም ተናደው መኪናቸው ውስጥ ሲገቡ ሾፌራቸው እያነጋገራቸው ነው]

  • ምነው ክቡር ሚኒስትር?
  • ምነው?
  • ፊትዎ በጣም ጠቋቁሯል፡፡
  • ዛሬ እኮ ስንትና ስንት ስልክ ነው የተቀበልኩት፡፡
  • የምን ስልክ?
  • ሁሉም የሚደውልልኝ የቀን ጅብ ተባልኩ ምናምን ሲለኝ ግራ ገብቶኝ ነው፡፡
  • ለምን ግራ ገባዎት?
  • ይኼ ነገር እኔንም ይመለከተኛል ወይ ብዬ ነዋ?
  • እሱን እንኳን እኔ አላውቅም ክቡር ሚኒስትር፡፡
  • ምን የሚሉት ፈሊጥ ነው ግን ይኼ የቀን ጅብ?
  • እሱ እውነት ነው ክቡር ሚኒስትር፡፡
  • እንዴት?
  • ክቡር ሚኒስትር ብዙ ጊዜ ቢሮ ስለሚውሉ አያውቁም ማለት ነው፡፡
  • ምኑን ነው የማላውቀው?
  • ከተማዋ እኮ በቀን ጅቦች ተወራለች፡፡
  • ምን ማለት ነው?
  • በየሄዱበት የቀን ጅብ ብቻ አይደለም እንዴ ያለው?
  • አልገባኝም?
  • ዝም ብለው ቀበሌ ሲሄዱ ቀጠን ቀጠን ያሉ የቀን ጅቦች ያገኛሉ፡፡
  • ምን ማለት ነው?
  • መታወቂያ ለማሳደስም ሆነ ለማውጣት ወይም የሆነ ማስረጃ ለማግኘት ኪስዎን ካልዳበሱ አገልግሎት ማግኘት አይችሉም፡፡
  • እሱን እንኳን አውቃለሁ፡፡
  • ስለዚህ እነዚህ የሕዝብ ስልኮች የቀን ጅብ ነው የሚባሉት፡፡
  • እነዚህን ነው እንዴ ሰው የቀን ጅቦች የሚለው?
  • እዚህ ብቻ አይቆምም፡፡
  • ሌላ ደግሞ ምን አለ?
  • ለምሳሌ ሚስትዎ ልትወልድ ብላ ሆስፒታል ሲሄዱ በቀዶ ጥገና እንጂ በምጥ መውለድ አትችልም የሚሉ አሉ፡፡
  • ይኼ እኮ የእነሱ ሙያ ነው፡፡
  • እንዳይሳሳቱ ክቡር ሚኒስትር በቀዶ ጥገና የምትወልደው ሴት በምጥ ከምትወልደው የምትከፍለው ገንዘብ ከእጥፍ በላይ ስለሆነ አውቀው ነው እንዲህ የሚሉት፡፡
  • ኧረ በሰው ሙያ አትግባ?
  • ክቡር ሚኒስትር ነገርኩዎ እነዚህ ሐኪሞችም የቀን ጅቦች ናቸው፡፡
  • ስማ ታዲያ ሐኪምና የቀበሌ ጉዳይ ፈጻሚን ነው ሰው የቀን ጅብ እያለ የሚያወራው?
  • ከአስኮ እስከ መርካቶ ያለው ነጋዴ ሕዝብ ላይ 500 ፐርሰንት አትርፎ አይደል እንዴ የሚሸጠው?
  • ይኼ እኮ የነፃ ገበያ መርህ ነው፡፡
  • ክቡር ሚኒስትር ይኼ የቀን ጅብነት ነው፡፡
  • ወይ ጣጣ?
  • ሌላ ልጨምርልዎ ክቡር ሚኒስትር?
  • እሺ ቀጥል፡፡
  • የፍትሕ ሥርዓቱን መለከቱ ገንዘብዎ ነው ፍትሕ የሚያመጣልዎት፡፡
  • እ. . .
  • እንዲያውም የፍትሕ ሥርዓት ከሚባል የገንዘብ ሥርዓት ቢባል ይቀላል፡፡
  • እና በየዘርፉ ነው የቀን ጅቦች ያሉት?
  • ክቡር ሚኒስትር የቀን ጅብ ሃይማኖት፣ ብሔርና ዜግነት የለውም፡፡
  • ምን ማለት ነው?
  • የቀን ጅብ ማለት የማይገባውን ጥቅም ባልተገባ መንገድ ለማግኘት የሚጥር ሰው ማለት ነው፡፡
  • እ . . .
  • ክቡር ሚኒስትር የቀን ጅብ ነጭ ወይም ጥቁር፣ ወንድ ወይም ሴት፣ ትንሽ ወይም ትልቅ ሳይመርጥ ብቻ በየትኛውም ማንነት ሊኖር የሚችል ነው፡፡
  • አሁን ገባኝ፡፡
  • ለማንኛውም እርስዎም ከቀን ጅቦች ቢጠነቀቁ ጥሩ ነው፡፡
  • እነዚህ ጅቦች ግን ማታ ማታ ይወጣሉ?
  • ክቡር ሚኒስትር አይቀልዱ እንጂ?
  • ኧረ እኔ እየቀለድኩ አይደለም፡፡
  • ለነገሩ ሁኔታዎን ሳየው እርስዎም እየመሰሉኝ ነው፡፡
  • ምን?
  • የቀን ጅብ!

[ክቡር ሚኒስትሩ በጣም ተናደው ከሚስታቸው ጋር እያወሩ ነው]

  • ወይ ጉድ፡፡
  • ምን ሆንክ?
  • በተከበርኩበት አገር እንደዚህ ልዋረድ?
  • ምን ሆንክ?
  • ይኼው የራሴ ሾፌር የቀን ጅብ ብሎኝ አረፈ፡፡
  • መቼ?
  • አሁን በመኪና እየመጣን፡፡
  • ምን አለህ?
  • ሳይህ ሳይህ የቀን ጅብ ትመስላለህ አይለኝ መሰለሽ?
  • ከእሱ ጋር መቀላለድህ እኮ ነው እንዲህ ያስደፈረህ?
  • የተደፈርኩትማ በሌላ በመደፈሬ ነው፡፡
  • ማን ደፈረህ?
  • ስሚ እኔ ለዚህች አገር ሰለቸን ደከመኝ ሳልል ሠርቼ የተረፈኝ አንድ ነገር ነው፡፡
  • ምን?
  • በሽታና ስድብ፡፡
  • ምን እያልክ ነው?
  • ስኳርና ደሜን ተሸክሜ ባገለገልኩ ይኼው ስድብ ተጨመረልኝ፡፡
  • ሾፌር ሰደበኝ ብለህ ነው?
  • አለቃችንስ ቢሆኑ በአደባባይ አይደለም እንዴ የቀን ጅብ ያሉን?
  • አለቃችሁ እኮ ሥራችሁን አይቶ ነው የቀን ጅብ ያላችሁ፡፡
  • አሁን ግን በዛ፡፡
  • እንዴት ማለት?
  • የቀን ጅቡን ተቀብዬ ብቀመጥ ሌላ ተጨመረልኝ፡፡
  • ሌላ ምን?
  • ይኼው ነገ ደግሞ እሾህ ሊለኝ ነው፡፡
  • እሱስ ልክ ነህ፡፡
  • ከነገ ወዲያ ደግሞ ጠማማ ዛፍ ልባል ነው፡፡
  • ምን ይደረግ ታዲያ?
  • ሳምንት ደግሞ አይጥ ልባል ነው፡፡
  • ምነው እንደዚህ ከነከነህ ግን?
  • ስሚ ይችን አገር ባቀና ጠማማ ዛፍ ልባል?
  • እሱን እንኳን ተወው፡፡
  • ምነው?
  • አገሪቱን ስላጣመምካት እኮ ነው ጠማማ ዛፍ የተባልከው፡፡
  • እሺ ሌላው ቢቀር አገሪቱ ላይ እሾህ የሆኑባትን እነ ድህነት እየነቀልኩ እሾህ ልባል?
  • አሁን አንተ ድህነትን ነቀልክ ወይስ ተከልክ?
  • አንቺም ከእነሱ ጋር ተደመርሽ?
  • ሥራህን ታውቀዋለህ ብዬ ነው፡፡
  • እሺ ሁሉም ይቅርና እኔን ክብር ያለኝን ሰው አይጥ ብሎ ማዋረድ አይከብድም?
  • እሱንም እኮ ያገኘኸው በይቅርታ ነው፡፡
  • የምን ይቅርታ?
  • ከጅብነት ወደ አይጥነት የተደረገልህ በይቅርታ መርህ ነው፡፡
  • አንቺ ራሱ የምታወሪውን አታውቂም፡፡
  • ለማንኛውም እኔንም አንድ የአይጥና የድመት ፊልምን አስታወስከኝ፡፡
  • የምን ፊልም?
  • ፊልሙ ላይ አይጧ ልክ እንደ አንተ ሌባ፣ አጥፊ፣ ተንኮለኛና ሴረኛ ነች፡፡
  • ምንድነው የምታወራው?
  • ስለዚህ እኔም ከዚህ በኋላ አዲስ የቤት ስም አውጥቼልሃለሁ፡፡
  • ማን ልትይኝ?
  • ጄሪ!

[ክቡር ሚኒስትሩ ከደላላ ወዳጃቸው ጋር ቢሮ ተገናኝተው እያወሩ ነው]

  • ክቡር ሚኒስትር ሰሞኑን በጣም ብፈልግዎም ላገኝዎ ግን አልቻልኩም፡፡
  • ሰውዬ በዚህ ጊዜ ከአንተ ጋር መገናኘት የለብኝም፡፡
  • ለምን ክቡር ሚኒስትር?
  • ስማ እኔ ሌላ ጣጣ ውስጥ መግባት አልፈልግም፡፡
  • ክቡር ሚኒስትር እኔ ምን ያህል በጥንቃቄ እንደምንቀሳቀስ መቼም ያውቃሉ?
  • ምን ፈልገህ ነው ቢሮ የመጣኸው?
  • አዲስ ለምንከፍተው ድርጅት የብቃት ማረጋገጫ ያስፈልጋል፡፡
  • የምን የብቃት ማረጋገጫ?
  • ድርጅቱን ለመክፈት ኃላፊው ሦስት ማስተርስ ሊኖረው ይገባል፡፡
  • ምን አሰብክ ታዲያ?
  • ያው በዚህ በአሥራ አምስት ቀናት ውስጥ ለእርስዎ ሦስተኛ ማስተርስ አመጣለሁ፡፡
  • ከየት ነው የምታመጣው?
  • ከሚመጣበት ነዋ ክቡር ሚኒስትር፡፡
  • እ . . . 
  • ባለፈው ያስመጣሁልዎት የምን ነበር?
  • ትራንስፎርሜሽናል ሊደርሽፕ፡፡
  • የበፊቱ ኤምቢኤ ነበር አይደል?
  • በትክክል፡፡
  • ስለዚህ አሁን በሲስተማቲክ ማኔጅመንት አመጣልዎታለሁ፡፡
  • እንደዚያ የሚባል የትምህርት ዘርፍ አለ እንዴ?
  • ባይኖርም እንፈጥራለና፡፡
  • ካልክማ ይሁን፡፡
  • ባይሆን ቤት ትንሽ ዝግጅት አድርገው ጋዋን ለብሰው መነሳት አለብዎ፡፡
  • ድግስ ያስፈልጋል ብለህ ነው?
  • እሱማ ወሳኝ ነው ክቡር ሚኒስትር፡፡
  • ለምን?
  • አዩ አገሪቱ እንደዚህ እየጦዘች እርስዎ ሦስተኛ ማስተርስ መያዝዎ የዓላማ ፅናት እንዳለዎት ነው የሚያሳው፡፡
  • የአንተ አስተሳሰብ እኮ ይገርመኛል፡፡
  • ለሌላ ኃላፊነትም ሊያበቃዎ ይችላል፡፡
  • እሱስ ልክ ብለሃል፡፡
  • አሁን ወደ ዋናው ቁም ነገሮች እንሂድ፡፡
  • ምንድነው እሱ?
  • ሲመረቁ እኮ የሚያገኙት ሁለት ነገሮች ነው፡፡
  • ምንድን ናቸው፡፡
  • አንደኛው ዲግሪዎን ነው፡፡
  • እሺ፡፡
  • ሁለተኛው ደግሞ ፕሮጀክቱ ሲፈጸም ዕድገትዎን ያገኛሉ፡፡
  • የምን ዕድገት?
  • የታክስ ከፋይነትዎ ዕድገት ያመጣል፡፡
  • እኮ ምን ዓይነት ዕድገት?
  • ያው ከፍ ማለትዎ አይቀርማ፡፡
  • ወደ ምን?
  • ወደ ደረጃ ሀ!

[ክቡር ሚኒስትሩ አማካሪያቸውን ቢሯቸው ያስጠሩታል]

  • ያስጠራሁህ አንድ ጉዳይ ላይ እንድንወያይ ነው፡፡
  • የምን ጉዳይ ክቡር ሚኒስትር?
  • የሚኒስቴር መሥሪያ ቤታችን የሚሠራቸውን ሥራዎች ለምን ለሚዲያ ይፋ አናደርግም?
  • ባለፈው ከነገርናቸው ውጪ የሠራነው ሥራ የለም እኮ?
  • ቢሆንም ከሚዲያ ጋር ግንኙንት መፍጠሩ መልካም ነው፡፡
  • ያው በኋላ ላይ ሚዲያዎቹ ራሳቸው እንዳያፋጥጡን ብዬ ነው፡፡
  • ልማታዊ ሚዲያዎቹን ጥራልኝ፡፡
  • የትኞቹን ሚዲያዎች?
  • ለነገሩ አሁን ልማታዊ ሚዲያ የት አለ?
  • እንዴት ክቡር ሚኒስትር?
  • አንዴ ሠልፍ ነው፣ ሌላ ጊዜ የሰብዓዊ መብት ጥሰት ነው፣ ወይም ደግሞ ግጭት ነው የሚዘግቡት፡፡
  • ታዲያ ይኼን መዘገብ ምን ችግር አለው?
  • አገሪቱ ውስጥ እኮ ከዳር እስከ ዳር ልማት ነው እየተካሄደ ያለው፡፡
  • ኧረ ይተው ክቡር ሚኒስትር፡፡
  • ለምንድነው የምተወው?
  • ስለእንደዚያ ዓይነት ልማት ሰው መስማት አይፈልግም፡፡
  • ታዲያ መስማት የሚፈልገው ስለደም ልገሳና ሠልፍ ነው?
  • ምን ሆኑ ክቡር ሚኒስትር?
  • ምን ሆንኩ?
  • ሰው መስማት የሚፈልገው ስለአንድነት፣ ስለፍቅር፣ ስለይቅርታና ስለመደመር ነው፡፡
  • የምን ፍቅር ነው በየቦታው ግጭት አይደል እንዴ ያለው?
  • ክቡር ሚኒስትር አገሪቱ ለመፍረስ አፋፍ ላይ ደርሳ ነው የተረፈችው፡፡
  • እስኪ ተወኝ፡፡
  • ለማንኛውም ጊዜው የፍቅር፣ የአንድነት፣ የይቅርታና የመደመር ነው፡፡
  • ኦ ኦ . . . ሰውዬ?
  • እኔ የምመክርዎ እንዲደመሩ ነው፡፡
  • የምን መደመር ነው?
  • የማይደመሩ ከሆነ የሚጠብቅዎ ምን እንደሆነ ያውቁታል፡፡
  • ምንድነው የሚጠብቀኝ?
  • መቀነስ!

በብዛት የተነበቡ ፅሁፎች

- Advertisment -

ትኩስ ፅሁፎች

የካቲት አብዮት – ጥያቄዎችሽ ዛሬም እየወዘወዙን ነው!

በበቀለ ሹሜ አጭር መግቢያ የዚህ ጽሑፍ አቅራቢ ከ1960ዎች ወጣቶች ርዝራዦች አንዱ...

የሰሞኑ የ“መኖሪያ ቤቶች” የጨረታ ሽያጭ ምን ዓይነት ሕጋዊ መሠረት አለው?   

በዳዊት ዮሐንስ ሰሞኑን በአዲስ አበባ ከተማ አየር ላይ ከሚንሸረሸሩ ዜናዎች...

ሁለቱ ወጎች፡ ከሰማየ ሰማያት አድርሶ መላሹ ቋንቋ! እስከ በዓሉ ቤርሙዳ

በተክለ ጻድቅ በላቸው ሰማየ ሰማያት አድርሶ መላሹ ቋንቋ! ከሁለት ሦስት ዓመት...

ለትግራይ ክልል ድርቅ ተፈናቃዮች አፋጣኝና ቀጣይነት ያለው ድጋፍ እንዲደረግ ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዩች ቋሚ...
spot_img

ተዛማጅ ፅሁፎች

[የክቡር ሚኒስትሩ ባለቤት ሞባይል ስልካቸው ላይ አተኩረው ሲመለከቱ ቆይተው፣ በድንገት ካቀረቀሩበት ቀና ብለው ባቤታቸውን ጠየቁ]

ምን ጉድ ነው የማየው? ምን ገጠመሽ? የመንግሥት ሚዲያዎች የሚያሠራጩት ምንድነው? ምን አሠራጩ? አልሰማህም? አልሰማሁም፣ ምንድነው? ዳግማዊ አፄ ምኒልክ መልዕከት አስተላለፉ እያሉ ነው እኮ። እ... እሱን ነው እንዴ? አዎ። የምታውቀው ነገር አለ? አዎ። የዓድዋ...

[ክቡር ሚኒስትሩ  የኢትዮጵያ ዲያስፖራ አባላትን በአዲስ አበባ የተለያዩ አካባቢዎች እያዞሩ እያስጎበኙ ከአንድ ዲያስፖራ ጋር እየተወያዩ ነው]

ክቡር ሚኒስትር የዛሬ ሁለት ዓመታት ገደማ ወደ አዲስ አበባ መጥቼ ከተማዋን ጎብኝቼ ነበር። እውነት? አዎ። ታዲያ ልዩነቱን እንዴት አዩት? በጣም ይደንቃል። ሌላ ከተማ እኮ ነው የመሰለችው። አይደል? አዎ። እንዴት ነው...

[ክቡር ሚኒስትሩ አገር ለመጎብኘት ከመጡ በውጭ የሚኖሩ ኢትዮጵያውያንና ትውልደ ኢትዮጵያውያን ጋር እየተወያዩ ነው]

ባደረጋችሁት ጉብኝት አገራችሁ ያለችበትን ትክክለኛ ገጽታ ለመመልከት እንደቻላችሁ እርግጠኛ ነኝ። ልክ ነዎት ክቡር ሚኒስትር። ታዲያ ጉብኝቱን እንዴት አገኛችሁት? አንዳንድ ጉዳዮች በጥንቃቄ ከተያዙ አገራችን ተስፋ እንዳላት ተገንዝበናል። እስኪ በጥንቃቄ...