Wednesday, December 7, 2022
ሌሎች ዓምዶች
    - ማስታወቂያ -
    - ማስታወቂያ -

    ኢትዮጵያን የባህረኞች አገር ለማድረግ የተያዘው ዕቅድ በኮብላዮች ምክንያት ተግዳሮት ገጠመው

    - ማስታወቂያ -

    ተዛማጅ ፅሁፎች

    ኢትዮጵያ የባህረኞች መፍለቂያ አገር ለመሆን የያዘችው ግዙፍ ዕቅድ በአውሮፓ ማሪታይም ሴፍቲ ኤጀንሲ ዕውቅና አግኝቶ የተለያዩ አገሮች የኢትዮጵያን ባህረኞች መቅጠር የጀመሩ ቢሆንም፣ እየኮበለሉ የሚገኙ ባህረኞች ቁጥር እየጨመረ በመምጣቱ ቀጣሪ የውጭ አገር መርከብ ኩባንያዎች ከፍተኛ ቅሬታ እያቀረቡ መሆኑ ተገለጸ፡፡

    ኢትዮጵያ ከአሜሪካ ኩባንያ ጋር በጋራ በባህር ዳር ዩኒቨርሲቲ ሥር የሚገኝ የማሪታይም ማሠልጠኛ፣ እንዲሁም ደብረዘይት በሚገኘው ባቦጋያ ማሪታይምና ሎጂስቲክስ ኢኮኖሚ በርካታ ባህረኞችን በማሠልጠን ላይ ትገኛለች፡፡ በተለይ እነዚህን የማሠልጠኛ ተቋማት በአፍሪካ ብዙም ባልተለመደ መንገድ በአውሮፓ ማሪታይም ደኅንነት ኤጀንሲ ኦዲት በማስደረግ ዕውቅና የተገኘ ሲሆን፣ ይህም ውጤት በርካታ የሰው ኃይል አሠልጥኖ በውጭ የባህር ትራንስፖርት ኩባንያዎች ማስቀጠር ያስችላል፡፡

    በዚህ ሒደት በተለይ 19 አገሮች ከኢትዮጵያ ባህረኞችን ለመቅጠር መግባቢያ ስምምነት ሰነድ የተፈራረሙ ሲሆን፣ ኢትዮጵያም ከዚህ ቀድሞ ከነበረው በተሻለ ደረጃ ሠራተኞች መላክ ጀምራለች፡፡

    ሐሙስ ሰኔ 28 ቀን 2010 ዓ.ም. የኢትዮጵያ ማሪታይም ጉዳይ ባለሥልጣን በዚህ ጉዳይ ላይ ከሚመለከታቸው አካላት ጋር መክሯል፡፡ የባለሥልጣኑ የማሪታይም አስተዳደር ተጠባባቂ ዳይሬክተር ካፒቴን ጌትነት ዓባይ እንደገለጹት፣ ኢትዮጵያን የባህረኞች አገር ለማድረግ የተያዘው ግዙፍ ዕቅድ በተደረገው ኦዲት ውጤት በመገኘቱ ፍሬ አፍርቷል፡፡

    በዚህም አገሪቱ በርካታ ሥራ ፈላጊ ዜጎች ያሏት አገር በመሆኗ ለሥራ ፈጠራ ትልቅ አስተዋጽኦ እንዳለው፣ አገሪቱም ትልቅ የውጭ ምንዛሪ የምታገኝበት ነው ብለዋል፡፡

    ነገር ግን ይህ ውጤታማ ሥራ ተግዳሮት እየገጠመው መሆኑን ካፒቴኑ ጠቁመዋል፡፡ ‹‹እስካሁን ሠልጥነው ቅጥር ካገኙት መካከል 78 ያህሉ በአውሮፓ፣ በአሜሪካ፣ በአውስትራሊያና በደቡብ ኮሪያ ወደቦች ኮብልለዋል፡፡ በየቀኑም የሚኮበልሉ አሉ፤›› በማለት የችግሩን መሠረት አብራርተዋል፡፡

    ‹‹ይህ ድርጊት ቀጣሪ የመርከብ ድርጅቶችን እያስቆጣ ነው፡፡ ባህረኞች ወደብ ሲደርሱ በሚኮበልሉበት ወቅት አገሮች ኩባንያዎቹን ይቀጣሉ፡፡ ከዚህ ባለፈም የጉዞ መስተጓጎል ይፈጠርባቸዋል፡፡ ስለዚህ ከኢትዮጵያ ባህረኞች አንቀጥርም ማለት የጀመሩ አሉ፤›› ሲሉ ካፒቴን ጌትነት አስረድተዋል፡፡

    ‹‹ተቀጣሪ ኢትዮጵያዊ ባህረኞች በሚኮበልሉበት ወቅት የባህር ትራንስፖርት ኩባንያዎች ሌሎችን ስለማይቀጥሩ የሌሎች ዕድል ይዘጋል፡፡ ይህ በመሆኑም ለአጭር ጊዜ ጥቅም ሲባል መኮብለል እንዲቆም፣ ይህ ካልሆነ ግን መንግሥት ጉዳዩን ለመከላከል በወንጀል ሕጉ ውስጥ እንዲካተት ይደረጋል፤›› ብለዋል፡፡  

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች