Wednesday, October 5, 2022
ሌሎች ዓምዶች
    - ማስታወቂያ -
    - ማስታወቂያ -

    ሥጋ ላኪዎች ወደ ሳዑዲ መላክ የነበረበት ሥጋ ሳይላክ በመዘግየቱ አየር መንገዱ ካሳ እንዲከፍል ጠየቁ

    - ማስታወቂያ -

    ተዛማጅ ፅሁፎች

    – ያልተላከው ሥጋ አወጋገድ ላኪዎች እንደማይመለከታቸው አስታውቀዋል 

    ባለፈው ሳምንት ማክሰኞ ወደ ሳዑዲ ዓረቢያ መላክ የነበረበት ሥጋ እስከ ሐሙስ መጋቢት 22 ቀን 2008 ዓ.ም. ድረስ ሳይላክ በኢትዮጵያ አየር መንገድ የካርጎ ማቀዝቀዣ ውስጥ በመቆየቱ ምክንያት፣ ላኪዎች ለደረሰባቸው ኪሳራ አየር መንገዱ ካሳ እንዲከፍላቸው ጠየቁ፡፡ አየር መንገዱ በበኩሉ ሥጋው ሳይላክ የቆየው በወቅቱ ባጋጠመው የካርጎ አውሮፕላን እጥረት መሆኑን አስታውቋል፡፡

    ሪፖርተር ያነጋገራቸው ላኪዎች እንደገለጹት፣ ወደ ሳዑዲ እንዲላክ ይጠበቅ የነበረው ሥጋ ከመላኪያው ቀን በመዘግየቱ በደንበኞቻቸው ዘንድ የብልሽትና የጥራት ጥያቄ ከማስነሳት አልፎ ለከባድ ጉዳት እንዳያጋልጣቸው ሥጋት አድሮባቸዋል፡፡

    ሆኖም አየር መንገዱ መጋቢት 22 ቀን 2008 ዓ.ም. አውሮፕላን ማዘጋጀቱን ቢያሳውቃቸውም ሥጋው እንዳይላክ በመጠየቃቸው አየር መንገዱ ከመላክ መቆጠቡን፣ የካርጎ ኤክስፖርት ክፍል ምክትል ኃላፊ አቶ ብርሃኑ ካሳ ከሪፖርተር ለቀረበላቸው ጥያቄ በሰጡት ምላሽ ገልጸዋል፡፡ በአየር መንገዱ የማቀዝቀዣ ክፍል ውስጥ ሥጋው ተደራርቦ መቀመጡ በቶሎ ለመበላሸት ዕድል ስለሚሰጠው፣ ሥጋው እንዳይላክ ማድረጋቸውን ላኪዎች ገልጸዋል፡፡

    ሳይላክ የቀረው የሥጋ መጠን ምን ያህል እንደሆነ አቶ ብርሃኑ ከመግለጽ ቢቆጠቡም፣ እስካሁን ሦስት ላኪዎች በድምሩ ለ27 ሺሕ ኪሎ ግራም ሥጋ ካሳ እንደጠየቁ ሪፖርተር ለኅትመት እስከገባበት እስካለፈው ዓርብ ምሽት ድረስ ለማወቅ ተችሏል፡፡ በዚህም መሠረት ከላይ የተጠቀሰው መጠን ሥጋ ብቻ ከሦስት ሚሊዮን ብር በላይ ያወጣል ተብሎ ይገመታል፡፡ ሳይላክ የቀረው ሥጋ ግን ከዚህም በላይ ሊሆን እንደሚችል ምንጮች ገልጸዋል፡፡

    ያልተላከው ሥጋ በሚወገድበት ሁኔታ ላይ አየር መንገዱና ላኪዎች የተፋጠጡ ይመስላል፡፡ አየር መንገዱ ሥጋውን እንዲያስወግዱ ላኪዎችን ቢጠይቅም ሳይቀበሉት መቅረታቸውን ሪፖርተር ያነጋገራቸው ላኪዎች አስታውቀዋል፡፡ በላኪዎች በኩል ያለው አቋም ሥጋውን በተባለው ጊዜ ውስጥ እንዲልክ ኃላፊነት የተሰጠው አካል፣ ኃላፊነቱን ባለመወጣቱ የማስወገድ ግዴታ እንደሌለባቸውና ለዚህ የሚያስገድዳቸው ምክንያት እንደሌለ ተከራክረዋል፡፡

    በካሳ ክፍያ ጥያቄዎችና መሰል ዝርዝር ጉዳዮች ላይ አየር መንገዱ ከላኪዎች ጋር በመነጋገር ላይ በመሆኑ፣ አወጋገዱም ሆነ ሌሎች ጥያቄዎች ገና ምላሽ እንደሚሰጥባቸው አቶ ብርሃኑ አስታውቀዋል፡፡ ሆኖም ይህ ክስተት ጊዜያዊና ከዚህ ቀደም በዱባይ በሥጋ ኤክስፐርተሮች ላይ ከተከሰተው ዕገታ ጋር ተያያዥነት እንደሌለውም ገልጸዋል፡፡

    በቅርቡ በዱባይ ለንግድ ትርዒት በሄዱበት በዚያው ከአገር እንዳይወጡ የታገዱ የኢትዮጵያ ሥጋ ላኪዎች የታገቱበት ምክንያት፣ እንዲልኩ ስምምነት የተደረገበት የሥጋ ጥራትና የተላከው ሥጋ አጓድሏል በተባለው ጥራት ሳቢያ እንደሆነ ከዱባይ ተሰምቷል፡፡ ከኢትዮጵያ ወገን የቀረበው መከራከሪያ ደግሞ ገዥው ወገን በላካቸው ባለሙያዎች ተፈትሾ ጥራቱ የተጠበቀ ሥጋ መላኩ የተገለጸ ቢሆንም፣ ላኪዎቹ የሚገኙበት ሁኔታ እስካሁን ድረስ ሳይለይለት በዱባይ እንደታገቱ ከአንድ ወር በላይ ማሳለፋቸው ታውቋል፡፡

    - Advertisement -spot_img

    የ ጋዜጠኛው ሌሎች ፅሁፎች