Monday, December 5, 2022
ሌሎች ዓምዶች
    - Advertisement -
    - Advertisement -
    ዜናበጋዜጠኞች ላይ በደረሰው ጥቃት የሰው ሕይወት ቢጠፋም የፖሊስ ምርመራ ገና አልተጀመረም

    በጋዜጠኞች ላይ በደረሰው ጥቃት የሰው ሕይወት ቢጠፋም የፖሊስ ምርመራ ገና አልተጀመረም

    ቀን:

    ሐምሌ 6 ቀን 2010 ዓ.ም. ከድሬዳዋ ወደ አዲስ አበባ ሲጓዙ በነበሩ የድሬዳዋ መገናኛ ብዙኃን ድርጅት ጋዜጠኞች ላይ በደረሰው ጥቃት የሰው ሕይወት ቢጠፋም፣ ምንም ዓይነት የፖሊስ ምርመራ እንዳልተጀመረና ጥቃት አድራሾቹም እንዳልተያዙ ተገለጸ፡፡

    የድሬዳዋ መገናኛ ብዙኃን ጋዜጠኞች ቡድን ቅዳሜ ሐምሌ 7 ቀን 2010 ዓ.ም. በአዲስ አበባ ይከናወን የነበረውን የኤርትራ ፕሬዚዳንት ኢሳያስ አፈወርቂን የአቀባበል ሥነ ሥርዓት ለመዘገብ ወደ አዲስ አበባ እየተጓዙ በነበረበት ወቅት፣ ሚኤሶ ከተማ ጋዜጠኞቹን ጭኖ ይጓዝ የነበረ ሚኒባስ እንዲቆም ከተደረገ በኋላ ባልታወቁ ግለሰቦች ጥቃት እንደደረሰበት መዘገባችን ይታወሳል፡፡

    በደረሰው ጥቃት ከአምስቱ የጋዜጠኞች ቡድን አባላት ውስጥ የሚኒባሱ አሽከርካሪ አቶ ሱሌይማን አህመድ ሕይወታቸው አልፏል፡፡

    አቶ ሱሌይማን ለቀናት በድሬዳዋ ድል ጮራ ሆስፒታልና ሐረር ከተማ በሚገኘው ሕይወት ፋና ሆስፒታል የሕክምና ክትትል ሲደረግላቸው ቢቆይም፣ ሕይወታቸውን ማትረፍ ሳይቻል ቀርቷል፡፡

    በወቅቱ ጥቃቱን የፈጸሙት ግለሰቦች በተለይ የኦሮሚኛ ቋንቋ የሚችሉትን ጋዜጠኞች ገንዘብ ተከፍሏችሁ እየሰለላችሁ ነው በማለት፣ ሁሉንም የቡድኑ አባላት ጥቃት እንደፈጸሙባቸው፣ ከድሬዳዋ መገናኛ ብዙኃን ድርጅት የተገኘው መረጃ ያስረዳል፡፡  

    በተለይም ጭንቅላታቸውና ጎናቸው ላይ ክፉኛ ድብደባ የደረሰባቸው የ37 ዓመቱ አቶ ሱሌይማን በወቅቱ የከፋ ጥቃት እንደተፈጸመባቸው ተገልጿል፡፡

    ሐሙስ ሐምሌ 12 ቀን 2010 ዓ.ም. ከረፋዱ 5፡00 ሰዓት ያረፉት አቶ ሱሌይማን የሦስት ልጆች አባት የነበሩ ሲሆን፣ ከነፍሰ ጡር ባለቤታቸው አራተኛ ልጅ ይጠብቁ እንደነበር ታውቋል፡፡

    ጥቃቱ ከተፈጸመ አንድ ሳምንት ቢቆጠርም የኦሮሚያ ክልልም ሆነ የወረዳው ፖሊስ ምርመራ እንዳልጀመሩ፣ ጥቃት ያደረሱ ተጠርጣሪዎችም አለመያዛቸው ታውቋል፡፡

    ‹‹ጥቃቱ ከደረሰባቸው የሥራ ባልደረቦች ጋር ውይይት አድርገናል፤›› ያሉት የድሬዳዋ ከተማ ከንቲባና የድሬዳዋ መገናኛ ብዙኃን ቦርድ ሰብሳቢ አቶ ኢብራሂም ኡስማን፣ ጉዳዩ ትኩረት እንዲደረግበት እንሠራለን ሲሉ ለሪፖርተር ተናግረዋል፡፡

    ከዚህ ጋር በተያያዘ ስለጉዳዩ በአካባቢው ለሚገኙት የፌዴራል ፖሊስና የመከላከያ ሠራዊት ማሳወቃቸውን አስረድተዋል፡፡

    ስለተፈጸመው ጥቃት እያጣራሁ ነው ያለው የኢትዮጵያ ሰብዓዊ መብቶች ጉባዔ፣ መንግሥት አፋጣኝ የሆነ ፍትሕ ለተበዳዮች እንዲሰጥ ጠይቋል፡፡

    ‹‹እስካሁን ባለን መረጃ ምንም ዓይነት ምርመራ አልተጀመረም፡፡ ተጠርጣሪዎችም እንዲያዙ አልተደረገም፤›› ሲሉ የጉባዔው ተቀዳሚ ዳይሬክተር አቶ ቢኒያም ደባላ ለሪፖርተር ተናግረዋል፡፡

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    ዳግም ነፍስ የዘራው የተማሪዎች ማርች ባንድ

    የሙያው ፍቅር ያደረባቸው ገና በልጅነታቸው ነው፡፡ በ1970ዎቹ መጀመርያ፣ ለቀለም...

    በስንደዶና ሰበዝ የተቃኘው ጥበብ

    በአንዋር አባቢ ተወልዳ ያደገችው መሀል አዲስ አበባ አራት ኪሎ ነው፡፡...

    አዲስ ጥረት የሚጠይቀው  ኤችአይቪ  ኤድስን  የመግታት  ንቅናቄ

    ‹‹ኤችአይቪ በመላው ዓለም  በሚሊዮን የሚቆጠሩ ሰዎችን የሚያጠቃ ዋነኛ የሕዝብ...

    የኅትመት ብርሃን ያየው ‹‹የቃቄ ወርድዎት›› ቴአትር

    ከአራት ዓመታት በፊት በኢትዮጵያ ብሔራዊ ቴአትር መድረክ ላይ ይታይ...