Monday, July 15, 2024
- Advertisment -
- Advertisment -

የተፈጠረው ሰላምና መረጋጋት ለንግዱ ዘርፍ የላቀ ትርጉም አለው

በተስፋዬ ታደሰ

ዓብይ አህመድ (ዶ/ር) መጋቢት 24 ቀን 2010 ዓ.ም. በሕዝብ ተወካዮች ምክር ቤት ጠቅላይ ሚኒስትር ሆነው መሰየማቸው ይታወሳል፡፡ ጠቅላይ ሚኒስትሩ በበዓለ ሲመታቸው ላይ ካደረጉትና የኢትዮጵያውያንን ቀልብ ከሳበ ንግግራቸው ጀምሮ አገሪቷን ከገባችበት ቀውስ ለማውጣት በተለያዩ አካባቢዎች ተጉዘው ከሕዝብ ጋር ባደረጓቸው ውይይቶች፣ በተለያዩ ጊዜያት እንደ አገር ባስተላለፏቸው ውሳኔዎች፣ በሰጧቸው መንግሥታዊ መግለጫዎችና ባሳዩት የሕዝብ አገልጋይነት አቋም የተነሳ ተስፋ ቆርጣ የነበረችው አገራችን ተስፋዋ ዳግም ለምልሟል፡፡ ተደፍተው የነበሩ አንገቶች ቀና ብለዋል፣ ተቆልፈው የነበሩ አንደበቶች ተከፍተዋል፡፡

የጠቅላይ ሚኒስትሩ የለውጥ ንቅናቄዎች ከበዓለ ሲመታቸው ቀን ጀምሮ በነበሩት በሦስት ወራት ጊዜ ውስጥ ‹‹የመደመር›› እሳቤያቸው በመላው ኢትዮጵያውያን ዘንድ ከአጥናፍ እስከ አጥናፍ የጋራ ዜማ መሆኑ እጅግ አስገራሚ ሆኗል፡፡ ኤርትራን ጨምሮ በበርካታ የጎረቤት አገሮች ባደረጓቸው ዲፕሎማሲያዊ ግንኙነቶች ያነሷቸው የሰላም፣ የፍቅርና የመደመር እሳቤ ውጤቶች ከኢትዮጵያም አልፎ ለአፍሪካ፣ ከአፍሪካም ለዓለም ሕዝቦች የፍቅርና የመተሳሰብ አዲስ ብርሃን ፈንጥቋል፡፡ በኢትዮጵያ የመተሳሰብ ዘር ዘሪነት በአፍሪካ የሰላም ቀጣና በቅሎና አብቦ እንዲያፈራ የሚያስችል የፍቅር፣ የአንድነት፣ የሰላምና የይቅር ባይነት ዝናብ በኢትዮጵያ ሰማይ በዶ/ር ዓብይ  አስተምህሮ ዘንቧል፡፡

በታሪክ አጋጣሚ በተፈጠረ ክስተት የጎሪጥ ይተያዩ የነበሩ ኢትዮጵያና ኤርትራ አስታራቂ ሽማግሌም ሳያስፈልግ ዛሬ ሁለቱ አገሮች በስስት ዓይን የሚተያዩ አንድ አምሳል ሆነው በእኛነት መንፈስ በአንድነት ለመልማት፣ በአንድነት ለማደግ አንድ ቀበቶ ታጥቀዋል፣ በፍቅር መቀነት ተሳስረዋል፡፡ በእኔ እምነት የሰላምን፣ የልማትን፣ የዕድገትንና የአንድነትን ጠቀሜታ አስፍቶ በማየት የተፈጠረው ይህ የእኛነት አጀንዳ ታዲያ አጥሯን እያጠበቀች አትድረሱብኝ እያለች ለምትቧርቀው አሜሪካም ሆነ ለሰሜን ኮሪያ የተጋረደባቸውን ‹‹የእኔ ብቻ›› የሚል ግለኛ የአስተሳሰብ ጨለማ የሚገፍ ይመስለኛል፡፡

የአሜሪካው ፕሬዚዳንት ዶናልድ ትራምፕ ወደ ሥልጣን ሲመጡ ‹‹አሜሪካንን ለአሜሪካውያን ብቻ›› የሚለው እሳቤ አመዝኖባቸው አገሪቷ ከዚህ በፊት ታደርጋቸው የነበረውን የንግድና የኢኮኖሚ ግንኙነቶች ከማቋረጥ በተጨማሪ ከውጭ አገሮች በሚገቡ ምርቶች ላይ በጣም ከፍተኛ ቀረጥ በመጫን አዲስ የንግድ ጦርነት ሲከፍቱና የሌላ አገር ዜጎች ወደ አገራቸው እንዳይገቡ የሚያደርጉ ልዩ ልዩ ቢሮክራሲዎችን ሲነድፉ አስተውለናል፡፡ በእኔ እምነት አሜሪካ በሯን ዘግታ በራሷ ዕድገትና ብልፅግናን ብቻ እንድታስብ እያደረጓት ያሉት ትራምፕ፣ ከአራቱ የሒሳብ ስሌቶች በመደመር የግላዊነትን  ቅንፍ በመስበር ያላቸውን ለሌሎች ለማካፈል ከአገራችን ተራማጅ እሳቤ ተሞክሮ ቢወስዱ በአሜሪካ መሥፈርት መሠረት ለፕሬዚዳንትነት ለመወዳደር ካበቃቸው የግል ሀብታቸው የበለጠ የዕውቀትና የአስተሳሰብ ሀብት ያገኛሉ ባይ ነኝ፡፡

በአገራችን ዘላቂ ሰላምን፣ የልማት ተጠቃሚነትንና የሕዝቦች አንድነትን በማረጋገጥ ወደ ቀጣይ የልማትና የዕድገት ጉዞ ለመዝመት ፖለቲካዊ፣ ማኅበራዊና ኢኮኖሚያዊ የሪፎርም ሥራዎች እየተሠሩ ነው፡፡ በአገር ውስጥ የሕዝብን አንድነት  በማስጠበቅ ከጎረቤት አገሮች ጋር ሰላም በመፍጠር ቀጣይነት ያለው የኢኮኖሚ ተጠቃሚነትን ለማረጋገጥ መንግሥት እያካሄደ ያለው አገራዊ ለውጥና ንቅናቄ በተለይም ለንግዱ ዘርፍ የላቀ ትርጉም አለው፡፡

ንግድ ለአገራችን ኢኮኖሚ መጎልበት ከግብርናው ያልተናነሰ ሚና አለው፡፡ የኢኮኖሚያችን ማርሽ በሆነው የንግዱ ዘርፍ የሚፈለገውን ለውጥና ዕድገት ማምጣት የሚቻለው በሁላችንም ተሳትፎ ዘላቂ ሰላም ሲረጋገጥ ብቻ ነው፡፡ ከአገር ውስጥና ከጎረቤት አገሮች ጋር የተረጋጋና ቀጣይነት ያለው ዘላቂ ሰላም ሲረጋገጥ ጤናማ የንግድ እንቅስቃሴ ይኖራል፡፡ ከክልል ክልልና ከአካባቢ አካባቢ ጤናማ የሆነ የንግድ ዕቃዎችና አገልግሎቶች የሚንቀሳቀሱትና የተረጋጋ ገበያ የሚኖረው በሰላም የበላይ ጠባቂነት ብቻ ነው፡፡ ታዲያ የሁሉም ነገር ቁንጮ የሆነውን ዘላቂ ሰላም ለመንከባከብ ከሁላችንም የሚጠበቅብንን ሁሉ ማድረግ የለብንም ትላላችሁ? አለብን እንደምትሉ በማመን መልካም ንባብ ብያችኋለሁ፡፡

አንኳር ወደ ሆነው ጉዳይ ልመለስና የወጪ ንግድ የአገራችን ኢኮኖሚ ዕድገት መሰላል እንደመሆኑ መጠን ምርቶቻችንን ወደ ውጭ በመላክ የውጭ ምንዛሪ ግኝታችንን ለማሳደግ አሁን የተጀመረው አገራዊ ንቅናቄ፣ አንድነትና ሰላም ለአገር ውስጥም ሆነ ለወጪ ንግዳችን ውጤታማ አፈጻጸም በጣም ወሳኝ ነው፡፡ ለዚህም ደግሞ በመጽሐፍ ቅዱስም ሆነ በቅዱስ ቁርአን መማል ሳያስፈልግ ምስክር ይሆነኝ ዘንድ ሸገር ታይምስ መጽሔት (Shegertimes magazine) በድረ ገጹ ጁን 6 ቀን 2018 ሮይተርስን ጠቅሶ ያወጣውን እንዲህ አቅርቤዋለሁ፡፡

‹‹ሮይተርስ እንደዘገበው የአገሪቱ የአንድ ቦንድ ዋጋ በ0.583 ሳንቲም ዶላር ጭማሪ በማሳየት በ100.25 ዶላሮች ለመሸጥ በቅቷል፡፡ የአገሪቱ ቦንድ ካለፈው ሳምንት ረቡዕ ወዲህ ብቻ የሦስት ዶላር ጭማሪ ዋጋ አስመዝግቧል ተብሏል፡፡

‹‹በናይሮቢ ስታንቢክ ባንክ የምሥራቅ አፍሪካ ኢኮኖሚስት ጂብራን ቁሬይሺ ሲናገሩ በአገሪቱ እየታየ ባለው ፖለቲካዊና ኢኮኖሚያዊ ለውጦች የተነሳ ዓለም አቀፍ ኢንቨስተሮች የኢትዮጵያን ቦንድ ለመጫረት ከፍተኛ ፍላጎት እያሳዩ ይገኛል ብለዋል፡፡ የሮይተርሱ ዘገባ አክሎም የኢትዮጵያ ቦንድ በአሥር ሳምንታት ውስጥ ከፍተኛ ጭማሪ አስመዝግቧል ይላል፡፡ ይህ የሆነው ደግሞ የአገሪቱ መሪ ጠቅላይ ሚኒስትር ዓብይ አህመድ ከኤርትራው ፕሬዚዳንት ኢሳያስ አፈወርቂ ጋር ተገናኝተው የሁለቱን አገሮች ግንኙነት ለማጠናከር ከተስማሙ በኋላ ነው ይላል፡፡

‹‹ዓብይ አህመድ (ዶ/ር) አገራቸውን ብቻ ሳይሆን ምሥራቅ አፍሪካን ጭምር እለውጣለሁ ብለው መነሳታቸውን የጠቀሰው ዘገባው የወሰዱት የኢኮኖሚና የፖለቲካ ለውጥ ደግሞ ከወዲሁ በዓለም የቦንድ ገበያ ላይ የአገሪቱን ተፈላጊነት ከፍ በማድረግ ውጤት እያመጣላቸው ነው፤›› ሲል አስቀምጧል፡፡

ሌላም አለኝ! በኢትዮጵያ መደበኛ ባልሆነው የውጭ ምንዛሪ ገበያ (ጥቁር ገበያ) አንድ የአሜሪካን ዶላር 40 የኢትዮጵያ ብር ገብቶ የነበረው ባለፉት ጥቂት ቀናት ውስጥ ብቻ በፍጥነት ወርዶ 27.30 ብር ከነበረው የመደበኛ ገበያ ምንዛሪ ጋር ተስተካክሏል፡፡ ስለዚህ ‹‹እኔ፣ አንተና አንቺ ስንደመር እኛ እንሆናለን፣ እኛ ማለት ደግሞ ስንኖር ኢትዮጵያዊ ስንሞት ኢትዮጵያ ነን፤›› የተባለው አካላችንን በምግብነት አዕምሯችንን በመልካምነት እየገነባው ይመስለኛል፡፡

ሲጠቃለል ይኼንን እጃችን ላይ የገባውን ዕድል ተጠቅመን የንግድ ሥርዓታችን ከሕገ ወጥነት ተላቆ ሸማቹ ማኅበረሰብ ለሚከፍለው ገንዘብ ተመጣጣኝ የሆነ ምርት የሚያገኝበት፣ ሕጋዊ ነጋዴዎችን የሚያበረታታና ሕገ ወጥነትን የሚያቀጭጭ፣ የውጭ ባለሀብቶችን ሊጋብዝ የሚችል ፍትሐዊና ተደራሽ አገልግሎትና አሰጣጡ ቀልጣፋና ለጤናማ ውድድር ምቹ እንዲሆን ከንግድ ሴክተሩ አመራሮችና ሠራተኞች ጀምሮ መንግሥት በሸማችነትም ሆነ በነጋዴነት የሚሳተፍ የዚች አገር ተዋናይ ሁሉ አበክሮ መሥራት ይኖርበታል፡፡

የውጭ ምንዛሪ ግኝታችን ዋና ቋት የሆነው የወጪ ንግድ ካንቀላፋበት ነቅቶ ወደፊት እንዲራመድና የኢትዮጵያና የሕዝቧ ኢኮኖሚ ከለጋነት ወደ ጎልማሳነት፣ ከችግኝነት ወደ ዛፍነት ተቀይሮ ፀሐይ ሲሆን ከፀሐይ፤ ዝናብ ሲሆን ከዝናብ ልንጠለልበትና ሊያድነን የሚችል እንዲሆን፣ ለወጪ ንግድ የምናቀርባቸው ምርቶች ጥራት፣ ብዛትና ዋጋቸው በዓለም ገበያ ብቁ ተወዳዳሪ በመሆን የውጭ ምንዛሪ ግኝትን በከፍተኛ ደረጃ የሚያሻሽሉ መሆን አለባቸው፡፡ ይኼንን ለማድረግ አምራቹ፣ ነጋዴው፣ ላኪውና የንግድ ሴክተሩ የሕዝብና የመንግሥት ክንፍ አካላት ተናበውና ተቀናጅተው መሥራት ይኖርባቸዋል፡፡

ላኪዎቻችን የአገራችንን ምርት ገዝቶ ከመላክ ይልቅ ፊታቸውን ወደ አምራች ኢንዱስትሪው መለስ አድርገው እሴት ጨምረው መላክን መላመድ አለባቸው፡፡ የአገር ውስጥ ምርቶችን ወደ ኢንዱስትሪ ግብዓትነት ቀይሮ ያለቀለት ምርት ማምረት ጠቀሜታው ወደ ውጭ በመላክ የሚገኘው ጠቀም ያለ ገንዘብ ብቻ ሳይሆን፣ ከውጭ አገር የምናስመጣቸውን ምርቶች በአገር ውስጥ ምርት በመተካት የውጭ ምንዛሪ እጥረትን ለማቃለል ፍቱን አማራጭም ነው፡፡       መንግሥት የውጭና የአገር ውስጥ ባለሀባቶች እንዲሁም አስመጪና ላኪ ነጋዴዎች ወደ ኢንዱስትሪው እንዲያመዝኑ ማበረታታት፣ አማራጮችንና ምቹ ሁኔታዎችን መፍጠር፣ ኢትዮጵያን ከሌሎች አገሮች ጋር የሚያገናኙ መሠረተ ልማቶችን መገንባት አለበት እላለሁ፡፡ መልካም እንዲሆንልን ተመኘሁ፡፡

ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ ሲሆን በኢሜይል አድራሻቸው   [email protected]   ማግኘት ይቻላል፡

spot_imgspot_img
- Advertisment -

በብዛት የተነበቡ ፅሁፎች

Related Articles