Tuesday, July 23, 2024
- Advertisement -
- Advertisement -
ልናገርየጠቅላይ ሚኒስትሩ የሚኒሶታ ጉብኝትና የኢትዮጵያ የፖለቲካ አቅጣጫ

የጠቅላይ ሚኒስትሩ የሚኒሶታ ጉብኝትና የኢትዮጵያ የፖለቲካ አቅጣጫ

ቀን:

በመርስ ኤ ኪዳን

ከሐምሌ 21 እስከ ሐምሌ 23 ቀን 2010 ዓ.ም. ክቡር ዶ/ር ዓብይ አህመድና ክቡር አቶ ለማ መገርሳ በሰሜን አሜሪካ ሦስት ግዛቶች ባደረጓቸው ስብሰባዎች ዙሪያ ከብዙ ወገን ብዙ እየተባለ ነው። እኔም በሚኒሶታ የተደረጉት ስብሰባዎች አዘጋጅ ኮሚቴ አባላት ከሆኑት አንዱ በመሆኔ፣ በሒደቱ የታዘብኳቸው አንዳንድ ነገሮች ላይ አስተያየት መስጠት አስፈላጊ ሆኖ አግኝቼዋለሁ።

በቅድሚያ ክቡር ዶ/ር ዓብይ በአገራችን ጥላቻ፣ ጥርጣሬ፣ መናናቅ፣ ተወግደው ሰላም፣ ፍቅርና አንድነት እንዲሰፍን ጥረት እያደረጉ ያሉ፣ በኢትዮጵያ ሕዝብና በወንድማችን በኤርትራ ሕዝብ መካከል ሰፍኖ የቆየውን ግንብ አፍርሰው የፍቅር ድልድይ የሠሩ፣ በታላላቆቹ የኦርቶዶክስ ተዋህዶ ቤተ ክርስቲያንና የእስልምና እምነት አባቶች መካከል ያለውን ልዩነት በሰላም እየፈቱ ያሉ፣ በተለያዩ አገሮች በእስር ቤቶች እየተሰቃዩ ያሉ ኢትዮጵያውያን ወገኖቻችንን እያስፈቱ ወደ አገራቸው እየመለሱ ያሉ ታላቅ መሪ በመሆናቸው፣ ክቡር አቶ ለማ ደግሞ የዚህ የለውጥ ሒደት ፈር ቀዳጅ በመሆናቸው ለሁለቱም መሪዎቻችን የተደረገላቸው አቀባበልና ፍቅር ተገቢ መሆኑን ለመጥቀስ እወዳለሁ።

በሚኒሶታ የአዘጋጅ ኮሚቴው ፈተና

ሚኒሶታ እስከ ሃምሳ ሺሕ የሚገመቱ ኢትዮጵያውያን የሚኖሩባት የአሜሪካ ግዛት ናት። ከእነሱም እጅግ የሚበዙት የኦሮሞ ብሔር አባላት በመሆናቸው ትንሿ ኦሮሚያ በመባል ትታወቃለች። የሚኒሶታ ኦሮሞ ማኅበረሰብ በብዛት ብቻ ሳይሆን፣ በአደረጃጀትም ከሌሎች የኢትዮጵያ ማኅበረሰቦች እጅግ የላቀ ነው። የሚኒሶታ የኦሮሞ ማኅበረሰብ ይህ የዶ/ር ዓብይ ጉዞ ከመታሰቡ በፊት የኦሮሚያ ብሔራዊ ክልላዊ መንግሥት ርዕሰ መስተዳድርን ክቡር አቶ ለማን ጋብዞ ከፍተኛ አቀባበል ለማድረግ ኮሚቴዎች አዋቅሮ ዝግጅት በማድረግ ላይ እያለ ነው የክቡር ዶ/ር ዓብይ መምጣትን ዜና ከኤምባሲው የሰማው። ኤምባሲው የኦሮሞ ማኅበረሰብን ብቻ ሳይሆን፣ ሁሉንም በሚኒሶታ የሚኖሩ ኢትዮጵያውያን አደረጃጀቶች በመጋበዝ መሪዎቹን ለመቀበል በጋራ እንዲሠሩ ነው የጠየቀው። ሆኖም የኦሮሞ ማኅበረሰብ አስቀድሞ አቶ ለማ መገርሳን ለመቀበል ኮሚቴዎች አዋቅሮ ቆይቶ ስለነበር፣ ሌሎቻችን በእነዚያው ኮሚቴዎች ታቅፈን እንድንሠራ በጋራ ወሰንን።

አዘጋጅ ኮሚቴው ሁሉንም ማኅበረሰቦች ማቀፉ የሁላችንንም ደስታ የፈጠረ ቢሆንም፣ ለብዙ ዓመታት በጠላትነት ስንተያይ የነበርን በመሆናችን ብዙ ሥራዎች ላይ መተማመን እንዳይኖርና ነገሮችን ሁሉ በጥርጣሬ የማየት አዝማሚያ ፈጥሯል።

ስለሆነም በመካከላችን የነበረው የመረጃ ልውውጥና አሠራር ግልጽነት የጎደለው እንዲሆን አድርጓል። በዚህ ሒደት የተሳተፍን  አብዛኞቹ  የኮሚቴ  አባላት  የተረዳነው  አንድ  ቁም ነገር  ቢኖር፣  ሁላችንንም  የሚያቅፍ  አንድ  ጠንካራ የኢትዮጵያውያን ማኅበር አለመኖር አሠራራችን እጅግ ደካማ እንዲሆን አድርጎታል። በብሔራዊ ማንነታቸው ራሳቸውን ማደራጀት የማይፈልጉ ብዙ ኢትዮጵያውያንንም በተገቢው መንገድ እንዳናሳትፍ አድርጓል። ስለሆነም መላው በሚኒሶታ የምንኖር ኢትዮጵያውያን አንድ ጠንካራ የኢትዮጵያ ማኅበር የመፍጠሩን ነገር በርትተን ልንሠራበት ይገባል። እንደ ከዚህ ቀደሙ አንድን አመለካከት የሚወክል ሳይሆን፣ ለሁሉም ኢትዮጵያዊ የሚመች ማኅበር ማቋቋም አስፈላጊ ነው።

በዚህ ሒደት የነበረው መጠራጠር፣ መደባበቅና አለመተማመን እንደተጠበቀ ሆኖ በአንፃሩ ደግሞ እንዲህ ለብዙ ዓመታት ዓይን ለዓይን መተያየት የማይፈልጉ ሰዎችን ሳይወዱ በግዳቸው ሰላምታ እንዲለዋወጡና አብረው እንዲሠሩ አድርጓቸዋል። በመካከላችን የነበረው መከባበርና መቻቻልም እጅግ የሚያስመሰግን ነው። በእኔ እምነት የእነ ዶ/ር ዓብይ ጉዞ ዋና መልዕክት የሆነው፣ ‹‹ግድግዳው ይፍረስ ድልድዩ ይገንባ›› የሚለው ዓላማ በዚህ ሒደት ግቡን መምታት ጀምሯል።

በመካከላችን ከፍተኛ የጥላቻ ግንብ የነበረን የኦሮሞ፣ የአማራ፣ የሶማሌ፣ የትግራይና የተለያዩ በኢትዮጵያዊነት የተደራጁ ማኅበራት (ለሦስት የተከፈሉትን የኢትዮጵያ ኦርቶዶክስ ቤተ ክርስቲያናት ሳይቀር) በአንድ ላይ ተሰባስበን በኢትዮጵያዊነት ድልድይ እንድንሠራ መንገድ የከፈተ ሒደት ነው። ይህ እጅግ በጎ ገጽታው ነው።

የታርጌት ሴንተር ዝግጅት

 በሚኒያፖሊስ ታርጌት ሴንተር በመባል በሚታወቀው ስታዲዮም የተደረገውን  ዝግጅት  ስንመለከት  አንዳንድ  ብስለት የጎደላቸው ሰዎች የራሳቸውን ባህል፣ ባንዲራና ሙዚቃ ብቻ እንዲጎላና የሌላው ኢትዮጵያዊ ባህል፣ ባንዲራና ሙዚቃ እንዳይጎላ ጥረት ሲያደርጉ ተስተውሏል። በዚህም ብዙ ሰዎች ቅር ተሰኝተዋል። ሆኖም ሁለቱ መሪዎች በተለይም አቶ ለማ ይህን የእኔ ብሔር ብቻ ጎልቶ ይታይ የሚል አስተሳሰብ የሚያርም ግሩም ንግግር አድርገዋል።

በተለይ በሰንደቅ ዓላማ ጉዳይ ያለው ልዩነት በሚኒሶታ እጅግ ጎልቶ ታይቷል። በሰንደቅ ዓላማ ጉዳይ የሚንፀባረቁት አመለካከቶች አሳሳቢ የሚያደርጋቸው ነገር ቢኖር አንዱን ሰንደቅ ዓላማ የሚደግፉ ሰዎች ሌሎቹ ባንዲራዎች ላይ የሚያሳዩት የከረረ ጥላቻ ነው። በዚህ ጉዳይ የማኅበረሰብ ልሒቃን ብዙ ሥራ ይጠበቅብናል። እኛ  ማተኮር ያለብን የባንዲራዎቹ ቀለሞች ላይ ሳይሆን፣ በአገራችን የሚሰፍነው ሥርዓት ላይ ነው። ኮከብ ያለው ባንዲራ ሆኖ የብሔር መብት ላይከበር ይችላል፡፡ የኮከቡ መኖር የብሔር መብት መኖርን አያረጋግጥም። በተመሳሳይ ልሙጡ ባንዲራ ሆኖ የኢትዮጵያ አንድነት አደጋ ውስጥ ሊወድቅ ይችላል፡፡ የባንዲራው ልሙጥ መሆን አንድነትን አያረጋግጥም። የብሔር መብትም ሆነ የኢትዮጵያ አንድነት የሚከበሩት አንዳችን ሌላውን ለማክበር ስንፈቅድ ነው። በመካከላችን መከባበር ካለ የባንዲራው ጉዳይ ብዙም አሳሳቢ አይሆንም።

ክቡር ዶ/ር ዓብይ ከሕወሓት ጋር የገቡበትን መቃቃር ግልጽ ካደረጉበት መንገድ አንዱ በታርጌት ሴንተር ያደረጉት ንግግራቸው አንዱ ነው። በዚህ ንግግራቸው ላይ ቲም ለማ ከኦሕዴድ አቶ ለማንና እሳቸውን ራሳቸውን፣ ከብአዴን ደመቀ መኮንንና ገዱ አንዳርጋቸውን፣ ከደኢሕዴግ ሙፈሪሃት ካሚልን እንደሚያካትት ጠቅሰው ሕወሓትን ዘለውታል። በእርግጥ ሕወሓት ውስጥ ከዶ/ር ዓብይ ጋር ለመሥራት የሚፈልጉ የለውጥ ኃይሎች ሳይኖሩ ቀርተው ከሆነ እጅግ አሳሳቢ ጉዳይ ነው።

የእራት ግብዣ ጥያቄና መልስ

 በእራት ግብዣው ላይ ዋነኛው ትኩረት የጥያቄና መልስ ሒደቱ ነበር። በአዳራሹ የተገኘው ከአንድ ሺሕ በላይ ሰው በሙሉ ለዶ/ር ዓብይ ጥያቄና መልዕክት ነበረው። ስለሆነም ጊዜው ማስተናገድ ከሚችለው በላይ የጠያቂ ብዛት ተሠልፎ ነበር።

ከተነሱት ጥያቂዎች መሀል በብዛት አትኩሮት የሳበው በእህታችን በልልይቲና በእኔ ለተነሱት ጥያቄዎች ጠቅላይ ሚኒስትሩ የሰጧቸው ምላሾች ናቸው። እኔ ብዙ ጥያቄዎች ቢኖሩኝም በሚኒሶታ የትግራይ ማኅበረሰብን ወክዬ ስለተገኘሁ ያነሳኋቸው ጥያቄዎችም ያን ማኅበረሰብ የተመለከቱ ነበሩ። ዶ/ር ዓብይ ለእኛ ጥያቄዎች ከመለሷቸው መልሶችም ሆነ ከንግግራቸው፣ እንዲሁም በኤርፖርት ስንቀበላቸው ከሰጡኝ አስተያየት ልረዳ የቻልኩት ጠቅላይ ሚኒስትራችን ከሕወሓት አመራሮች ጋር ከፍተኛ እልህ ውስጥ መግባታቸውን ነው። ይህ ከሕወሓት አመራሮች ጋር የገቡበት እልህ ደግሞ ማንኛውንም ከትግራይ የሚመጣ ጥያቄን ሲመልሱ ስሜታዊ እንዲሆኑ አድርጓቸዋል። በእህቴ በልልይቲ ለተነሱት ጥያቄዎችም በቀጥታ መልስ ከመስጠት ይልቅ፣ ለሕወሓት ሰዎች መልዕክት ማስተላለፉን መርጠዋል። የእኔ ጥያቄዎች በቅንነት የተነሱ መሆናቸውን ከገለጹ በኋላ፣ ጥያቄዎቹን በቀጥታ ከመመለስ ይልቅ ለሕወሓት ሰዎች መልዕክት ማስተላለፉን መርጠዋል። እኔ ያነሳኋቸውን የተራው ሕዝብ ጥያቄዎችን  ሳይመልሱ  አልፈዋቸዋል። እዚያው ደግሞ ጥያቄዬን በሌላ ተርጉመው ስለመለሱልኝ ይቅርታ ጠይቀውኛል። ብዙ የትግራይ ማኅበረሰብ አባላት ዶ/ር ዓብይ የያዘውን የፍቅርና የአንድነት ዓላማ ደግፈው በቦታው ተገኝተው የነበሩ ሲሆን፣ ለእኔና ለልልይቲ የሰጡት መልስ ግን እሳቸው ከሚሰብኩት የፍቅር የአንድነትና የመቻቻል ዓላማ ጋር የማይሄድ ሆኖባቸው ግራ ተጋብተዋል።

በቲም ለማና በሕወሓት መካከል ያለው ውጥረት

ዶ/ር ዓብይን ያህል ፍቅርንና መቻቻልን የሚሰብክ ሰው እንዲህ እልህ ተጋብቶ ስመለከት የነገሩን ከባድነት ያሳየኛል። ስለሆነም ሁላችንም አገር ወዳድ ኢትዮጵያውያን ይህ በቲም ለማና በሕወሓት መካከል ያለው ውጥረት ተፈትቶ፣ ሕወሓትም ቲም ለማን የሚቀላቀልበትን (የሚደመርበትን) መንገድ መፈለግ ይገባናል። የዚህ ጉዳይ አሳሳቢነት ከገባቸው ሰዎች አንዱ ጃዋር መሐመድ ነው።

ዶ/ር ዓብይን ለመቀበል በሚኒያፖሊስ አውሮፕላን ማረፊያ ከእንግዳ ማረፊያው እስከ አውሮፕላኑ ከጃዋር ጋር በአንድ መኪና ነው የሄድነው። ባለችን ትንሽ ደቂቃም ስንጨዋወት በቲም ለማና በሕወሓት አመራሮች መካከል የሰፈነው መካረር እንዳሳሰበው፣ ሁላችንም ይህን ለመፍታት መጣር እንዳለብን፣ እሱም ይህን ችግር ለመፍታት ከሁለቱም ጋር እንደሚነጋገር ነግሮኛል። በዚህ አጋጣሚ በሃይማኖት አባቶች መካከል ያለውን ችግር በመፍታት ላይ ያሉ የአገር ሽማግሌዎች፣ በቲም ለማና በሕወሓት መካከል ያለውን ችግር ለመፍታት መሸምገል ይኖርባቸዋል።

በሕወሓት አመራር በኩል የለውጥ ኃይል የሆኑት አሸንፈው በመውጣት የለውጡ ባቡር ላይ መሳፈር ብቻ ሳይሆን፣ ከእነ ዓብይ ጋር በጋራ መምራት ይገባቸዋል። በትንንሽ ጉዳዮች ላይ የሚኖርን ልዩነት ተመልክቶ እልህ ከመጋባት ይልቅ፣ ትልቁን የአገርና የሕዝብ ጉዳይ ተመልክቶ ግማሽ መንገድ ሄዶ በጋራ ለመሥራት መዘጋጀት ይኖርባቸዋል። በመጪው ድርጅታዊ ጉባዔ የለውጡ ኃይል አሸናፊ ሆኖ በአዲስ ኃይል ሊወጣ ይገባዋል። የለውጡ ኃይል ማሸነፍ ያለበት ከእነ ዶ/ር ዓብይ ጋር አብሮ ለመሥራት ብቻ ሳይሆን፣ በዋናነት የትግራይ ሕዝብ ልክ እንደሌላው ኢትዮጵያዊ ለውጥ እንዲመጣ ስለሚፈልግ ነው።

በቲም ለማ በኩልም ከሌሎች ኃይሎች ጋር ለመታረቅና ይቅር ለመባባል የሚደረገው ጥረት ከሕወሓት ጋርም ሊደረግ ይገባል። በአላስፈላጊ ነገር እልህ መጋባት የተጀመረውን የሰላምና የእርቅ ጥረት ሊያበላሽ አገሪቱንም የከፋ አደጋ ውስጥ ሊከታት ይችላል። ስለሆነም በሰጥቶ መቀበልና በመቻቻል ሕወሓት ውስጥ ያሉ የለውጥ ኃይሎችን መሳብ ያስፈልጋል።

ጠቅላይ ሚኒስትራችንም ከዚህ በኋላ የአገር መሪ መሆናቸውን ተረድተው የሚናገሯቸውን ቃላት መምረጥ ይኖርባቸዋል። የትግራይ አክቲቪስቶችና የማኅበራዊ ሚዲያ ተጠቃሚዎች ሰሞኑን በትግራይ ኢትዮጵያውያን ላይ የሚደርሰውን የአካል፣ የመንፈስና የሕይወት ጉዳት በመመልከት ጠቅላይ ሚኒስትሩም ይህን ችግር በተመለከተ ምንም ባለማለታቸው ወደ ጥርጣሬ እየሄዳችሁ እንደሆነ ይታያል። ነገር ግን ጉዳዩን በስክነት ማየት ያስፈልጋል። በአገሪቱ ውስጥ እየተከሰቱ ካሉ ችግሮች አንፃር የትግራይ ተወላጆች በተለየ ትልቅ የሚያስብለው ሁኔታ የለም። ከሚሊዮን የማያንሱ ኦሮሞዎችና ኢትዮጵያውያን ሶማሌዎች የተፈናቀሉበት፣ በመቶዎች የሚቆጠሩ ኦሮሞዎችና ኢትዮጵያውያን ሶማሌዎች እየሞቱ ያሉበት ሁኔታ ነው ያለው። በቤኒሻንጉልና አንዳንድ የኦሮሚያ ከተሞችም በመቶዎች የሚቆጠሩ የአማራ ተወላጆች እየሞቱ ያሉበት ሁኔታ ነው ያለው። በደቡብም በመቶዎች የሚቆጠሩ ወላይታዎች፣ ስልጤዎች፣ ጌዴኦዎችና ጉጂዎች እየሞቱ ያለበት ሁኔታ ነው ያለው።

ጠቅላይ ሚኒስትሩ ይኼ ሁሉ ጉዳይ ይመለከታቸዋል። ሁሉንም ነገር በአጭር ጊዜም ለመፍታት የሚያስችል ሁኔታም የለም። ስለሆነም ጊዜ መስጠት ብቻ ሳይሆን፣ እኛም የሰላም ጥረቱ አካል በመሆን ልናግዛቸው ይገባል። አንዱ ጥረት መሆን ያለበት በሕወሓት ውስጥ የለውጥ ኃይሉ አሸንፎ እንዲወጣ ዕገዛ ማድረግ ነው። ቀጥሎም በሕወሓትና በቲም ለማ መካከል ያለውን ውጥረት እንዲረግብ በሁለቱም በኩል የበኩላችንን ግፊት ማድረግ ነው።

ሌሎች አክቲቪስቶችና የማኅበራዊ ሚዲያ ተጠቃሚዎችም በጊዜያዊ ስሜት እየተነሳሳን የምናስተላልፋቸው አሉታዊ መልዕክቶች ሄደው፣ ሄደው ሁላችንንም የሚጎዱ መሆናቸውን ተረድተን ሰከን ባለ ሁኔታ መጓዝ ይኖርብናል። መነቋቆሩን ትተን ወንድሜን ላክብረው እህቴን ላክብራት መባባል ይገባናል። መሠልጠን ማለት የልዩነት መጥፋት አይደለም፡፡ ልዩነትን በመከባበርና በመተሳሰብ መፍታት ወይም ማስኬድ ነው።

ሰላም ለሁላችን፡፡ አምላክ አገራችንን ኢትዮጵያን ይባርክ፡፡

ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ መሆኑን እየገለጽን በኢሜይል አድራሻቸው mersea.kidan@gmail.com ማግኘት ይቻላል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ኢትዮጵያዊ ማን ነው/ናት? ለምክክሩስ መግባባት አለን?

በደምስ ጫንያለው (ዶ/ር) የጽሑፉ መነሻ ዛሬ በአገራችን ውስጥ በተለያዩ አካባቢዎች ግጭቶችና...

ዴሞክራሲ ጫካ ውስጥ አይደገስም

በገነት ዓለሙ የዛሬ ሳምንት ባነሳሁት የኢሰመኮ ሪፖርት መነሻነትና በዚያም ምክንያት...

ኢትዮጵያ በምግብ ራሷን የምትችለው መቼ ነው?

መድረኩ ጠንከር ያሉ የፖሊሲ ጉዳዮች የተነሱበት ነበር፡፡ ስለረሃብ፣ ስለምግብ፣...

ደረጃውን የጠበቀ ስታዲየም በሌላት አገር ዘመናዊ ስታዲየም እየገነቡ ያሉ ክልሎች

አዲሱ የማዕከላዊ ኢትዮጵያ ክልል ዘመናዊ ስታዲየም ለማስገንባት ከ500 ሚሊዮን...