Friday, December 2, 2022
ሌሎች ዓምዶች
    - ማስታወቂያ -
    - ማስታወቂያ -

    አቶ ኤርሚያስ አመልጋ ሐሰተኛ ሰነድ በመጠቀም ወንጀል በመጠርጠራቸው አልተፈቱም

    - ማስታወቂያ -

    ተዛማጅ ፅሁፎች

    ከሐሰተኛ የኮንስትራክሽን ፈቃድ ጋር ሊገናኝ ይችላል ተብሏል

    የሚያዙበት ገንዘብ ሳይኖራቸው ገንዘብ በማውጣት (ቼክ በመጻፍ) ወንጀል በተከሰሱበትና በማታለል ወንጀል ተጠርጥረው ከታሰሩበት በድምሩ በ1.1 ሚሊዮን ብር ዋስትና እስር እንዲፈቱ የተፈቀደላቸው አቶ ኤርሚያስ አመልጋ፣ ሐሰተኛ ሰነድ በመጠቀም ወንጀል ተጠርጥረው ሳይፈቱ ቀሩ፡፡

    የፌዴራል ፖሊስ ወንጀል ምርመራ ዘርፍ ሚያዝያ 20 ቀን 2008 ዓ.ም. ጽፎ ለፌዴራል ከፍተኛ ፍርድ ቤት ልደታ ምድብ ሁለተኛ ወንጀል ችሎት ባቀረበው ማመልከቻ እንደገለጸው፣ አቶ ኤርሚያስ ካልተያዙ ግብረ አበሮቻቸው ጋር በጥቅም በመመሳጠር የሰሌዳ ቁጥሩ ኮድ 3- 09022 አአ የሆነ ተሽከርካሪ በ1999 ዓ.ም. በስማቸው ገዝተዋል፡፡ በ2003 ዓ.ም. ኤርሚያስ አመልጋ የሚለው ስም ኤርሚያስ ጠቅል አመልጋ ሆኖ በተዘጋጀ ሊብሬ የተሽከርካሪው ባለቤት መሆናቸውን የሚገልጽ ሐሰተኛ ሰነድ ማሠራታቸውንም ገልጿል፡፡ ሊብሬውን ለተለያዩ ግለሰቦች በመስጠት ከ30,000 ብር እስከ 50,000 ብር የሚቀበሉ መሆኑን ጥቆማ እንደደረሰውና እየመረመረ እንደሚገኝ የምርመራ ዘርፉ ገልጿል፡፡

    አቶ ኤርሚያስ አሠርተውታል የተባለው ሐሰተኛ ሰነድ (ሊብሬ) ከሐሰተኛ የኮንስትራክሽን ሥራ ፈቃድ ጋር ሊገናኝ ይችላል የሚል ጥርጣሬ እንዳለውም የምርመራ ዘርፉ በማመልከቻው ጠቁሟል፡፡ ድርጊቱ በአገር ኢኮኖሚ ላይ ከፍተኛ ጉዳት እያደረሰ እንደሚገኝና አሠራሩም ውስብስብ እንደሆነ ጠቅሶ፣ ለተጨማሪ ምርመራ የ14 ቀናት ጊዜ ጠይቋል፡፡

    የአቶ ኤርሚያስ ጠበቆች የምርመራ ዘርፉን በመቃወም ለፍርድ ቤቱ እንዳስረዱት፣ አቶ ኤርሚያስ በሌላ ጉዳይ ታስረው ካሉበት እንዲፈቱ በፍርድ ቤት ትዕዛዝ የተሰጠ ቢሆንም ያላግባብ ታፍነው ወደዚህ ፍርድ ቤት መምጣታቸውን አስረድተዋል፡፡ ፖሊስ እንዳቀረበው የተጠረጠሩበት ጉዳይ ውስብስብ አለመሆኑን፣ መኪናውም በእጃቸው እንደሌለና ለሌላ ሰው በሕጋዊ መንገድ መሸጡን ገልጸዋል፡፡ በዋስትና ሆነው ምርመራው መጣራት እንደሚችል በማመልከት የመርማሪ ፖሊስን የተጨማሪ ቀናት ጥያቄ ውድቅ እንዲያደርግላቸው ፍርድ ቤቱን ጠይቀዋል፡፡

     አቶ ኤርሚያስ በዋስ ቢፈቱ ወደ ውጭ አገር ሊሄዱ እንደማይችሉና የዕግድ ትዕዛዝ የተላለፈባቸው መሆኑን የገለጹት ጠበቆቻቸው፣ የዋስትና መብታቸው እንዲጠበቅላቸው በድጋሚ ጠይቀዋል፡፡ ፍርድ ቤቱ የሁለቱን ወገኖች ክርክር ከሰማ በኋላ የአቶ ኤርሚያስን ዋስትና ጥያቄ በማለፍ ለመርማሪ ፖሊስ የሰባት ቀናት ተጨማሪ የምርመራ ጊዜ በመፍቀድ ለሚያዝያ 28 ቀን 2008 ዓ.ም. ቀጠሮ ሰጥቷል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች